PARTORDING NI PARMINGGUON MINGGU, 28 JUNI 2020

PARTORDING NI PARMINGGUON

MINGGU PATOLUHON DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE

RESORT PONDOK GEDE

Minggu, 28 Juni 2020

Pukul 07.00 WIB & 10.00 WIB

Topik: Pajongjong Bagas na Martua

(P: Paragenda - R: Ruas)

1.        Marende BE HKBP No. 706:1-2 Godang ni Pasupasu i G=Do (SDJ)

1.      Godang ni pasupasu i dilehon Tuhanhi.

Tarlobi asiasiM i marhite Anak-Mi.

Jalo ma pujianhi, Jesus Sipalua i.

Boi au bongot tu surgo i,

Marnida hasangapon-Mi.

--- jongjong ---

2.      Tondong nang aleale i palashon rohangki.

Alai na umuli i boi au anak-Mi.

Jalo ma pujianhi, Jesus Sipalua i.

Boi au bongot tu surgo i,

Marnida hasangapon-Mi.

2.        Votum – Introitus – Tangiang (A.XV/A.3 – D.XIII/38)

         P:      Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

         R:      Amen.

         P:      Nunga tibu hian diida rohangku Jahowa, ninna Ibana do: Haholongon salelenglelengna hubahen mangkaholongi ho, dibahen i hutaiti ho marhitehite denggan basa. Haleluya!

         R:      (Mangendehon BE HKBP No. 852 F=Do): Haleluya, Haleluya, Haleluya!

         P:      (Martangiang ma hita):

                  Ale Tuhan Debata, Pargogo na so hatudosan! Sai lehon jala patubu ma di hami haporseaon na sintong. Tambai ma haporseaonnami ganup ari, asa lam togu. Lehon ma di hami holong ni roha na so marpangansi asa holong rohanami di Ho dohot di dongannami jolma. Lehon di hami pangkirimon na mangolu, asa marlas ni roha hami mambahen lomo ni rohaM i. Sai oloi ma pangidoannami ala ni Anak-Mu, Tuhan Jesus Kristus Tuhannami.

         R:      Amen. -hundul-

3.        Marende BE HKBP No. 15:1 Aut na Saribu Hali Ganda F=Do (BL 103)

1.      Aut na saribu hali ganda saringar ni soarangki.

Naeng nasa gogo bahenonhu mamuji Debatanta i.

Paboa las ni rohangki, hinorhon ni pambaen-Na i.

        

4.        Patik ni Debata: Patik Palimahon sahat tu Patik Pasampuluhon

         P:      Tangihon hamu ma Patik ni Debata di Minggu sadari on i ma Patik Palimahon sahat tu Patik Pasampuluhon:

                 

                  Patik Palimahon: Ingkon pasangaponmu do natoras mu asa martua ho, jala leleng mangolu di tano na nilehon ni Jahowa Debatam di ho.

                  Patik Paonomhon: Unang ho mamunu!

                  Patik Papituhon: Unang ho mangalangkup!

                  Patik Paualuhon: Unang ho manangko!

                  Patik Pasiahon: Unang ho olo manghatindanghon hata na so tutu maralohon dongan jolma.

                  Patik Pasampuluhon: Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru, manang lombuna manang hodana, manang dia pe ugasan ni donganmu.

         P:      Rap mangido gogo ma hita tu Debata laho mangulahonsa!

    P+R:  Ale Tuhan Debata, sai pargogoi jala parrohai ma hami laho mangulahon Patik-Mi. Amen.

5.        Marende BE HKBP No. 673:1 Adong do Sada Mual i Bes=Do (SDJ)

--- jongjong ---

1.        Adong do sada mual i na sian Tuhan i.

         Durus sian bugang-Na i, di hau parsilang i.

         Di hau parsilang i, di hau parsilang i.

         Durus sian bugang-Na i, di hau parsilang i.

6.        Manopoti Dosa (B.9 – C.9)

P:      Tatopoti ma dosanta! Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaon-Mi manopoti jala manganggukhon dosanami. Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami. Dibahen i tama do rimasan-Mu jala uhuman-Mu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni rohaM, Sipangolu hami dohot ala ni Goar-Mu na badia i. Ale Tuhan, sai asi ma rohaM di hami na dangol on!

R:      Amen.

P:               …… Tangiang na hohom SDJ HKBP No. 683 ……

      

         Tabege ma hata bagabaga taringot tu hasesaan ni dosa. Satongkin do hutadingkon ho, alai papungupapunguon-Hu ma ho muse marhitehite angka asi ni roha godang! Tagan di parpiar ni muruk-Hu hutabunihon bohing-Ku satongkin maradophon ho, alai marhitehite denggan basa salelenglelengna asian-Hu ho, ninna Jahowa Sipalua ho. Hasangapon ma di Debata na di ginjang!

R:      Amen.

7.        Marende BE HKBP No. 760:1 Jesus do Alealengku F=Do (SDJ)

1.      Jesus do alealengku so ada tudosnii,

         Aleale na sumurung i di au.

         Hasoloan ni rohangku, Tuhan haposanhi,

         Sipalua na mamorsan dosangki.

         Na mangapuli au di sitaononhi,

         Mangurupi au di hagogotan i.

         Jesus do alealengku so ada tudosnii,

         Aleale na sumurung i di au.

8.        Manjaha Buku Ende ni Angka Ende sian si Salomo 8:5-7

         P:      Tabege ma Hata ni Debata turpuk ni ari Minggu on, sian Buku Ende ni Angka Ende sian si Salomo 8:5-7, ita jaha ma marsorinsorin: Ise do ulaning ibana na manaek sian halongonan, jala marpangunsandean tu hasudungan ni rohana? Di toru ni hau unte manis ahu manungguli holong ni roham; laos disi do diae inanta ho, disi do ho ditubuhon na manubuhon ho.

     

         R:      Bahen ma ahu songon tintin sahap tu bagasan roham, songon tintin sahap tu botohonmu! Ai tung na gogo do roha haholongon i, songon gogo ni hamatean tahe;

         P:      Tung na jorbut do pangiburuonna i, songon jorbut ni banua toru tahe. Nalanalana do songon nala ni api, songon hilap sian Jahowa.

         R:      Ro pe angka aek magodang, ndang tarbaorhonsa anggo roha haholongon i, jala ndang taraup angka batang aek.

         P:      Tung sura pe olo sada baoa mangalehon nasa arta pineopna di jabuna bahen ali ni roha haholongon i nian, ndang parduli ibana disi. I ma sahatna! Martua do angka na tumangihon Hata ni Debata, jala na umpeopsa.

        

         R:      Amen.

9.        Marende BE HKBP No. 656:1 Parhahamaranggion Bes=Do (SDJ)

--- jongjong ---

1.      Parhahamaranggion i lam hot jala togu.

Singkop ma hasadaon i di Jesus i burju.

Rap sauduran hita be marholong na tutu,

Mardame, marlas roha ma di Jesus i tutu

10.     Manghatindangkon Haporseaon

         P:      Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

         P+R:  Ahu porsea di Debata Jahowa, i do Ama, Pargogo na so hatudosan na tumompa langit dohot tano.

                 

                  Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patolubon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

                 

                  Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

11.     TINGTING + TANGIANG PANGONDIAN

12.     Marende BE HKBP No. 137:1-2 Nunga Ro tu Hita on C=Do (BL 164)

1.      Nunga ro tu hita on hata hangoluan.

Na pasonang sai tongtong roha na jeaan.

Molo jinalona i gabe na porsea,

Di Tuhanta Jesus i, Sipalua hita

2.      Ala ni tapuji ma goar ni Tuhanta.

Tapasangap Debata na palas rohanta.

Mamestahon ari on, ari parningotan

Di basa-Na na tongtong so marpansohotan.

13.     Jamita Kolosse 3:18-21

         P:      Hata ni Debata jamita di Minggu Patoluhon Dung Trinitatis sadari on, sian buku Kolosse 3:18-21 mandok:

Hamu angka parompuan, oloi hamu ma hata ni hamulianmuna be, songon na tama di roha ni Tuhan i. Hamu angka baoa, haholongi hamu ma pardihutamuna be, jala unang ma jungking hamu maradophon nasida! Hamu angka dakdanak, sandok pangoloi ma hamu di natorasmuna, ai i do dihalomohon Tuhan i. Hamu angka amaama, unang gintali hamu angka anakkonmuna, asa unang mandele.

I ma hatana!

14.     Marende BE HKBP No. 730:1… Sai Patau ma au Tuhan Des=Do (SDJ) – (Pelean IA, IB & II)

           

1.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki,

Lao papatar holong-Mu tu donganhi.

2.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki

Patariparhon basaM tu donganhi.

--- Musik ---

3.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki,

Lao patandahon diriMi tu donganhi.

4.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki,

Baen ias hata dohot parangengki.

--- Musik ---

15.     Tatangianghon Pelean – Ale Amanami – Pasupasu

P:      Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

         R:      (Mangendehon): BE HKBP No. 204:2 (BL 73) Bes=Do

Nasa na nilehon-Mi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, na so unsatonhu do.

P:      Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R:      (Mangendehon SDJ HKBP No. 841 Es=Do):

Ai Ho do nampuna harajaon

Dohot hagogoon ro di hasangapon

Saleleng ni lelengna. Amen!

P:      "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

         R:      (Mangendehon SDJ HKBP No. 845: Es=D): Amen, Amen, Amen.