ACARA PARTANGIANGAN KONVENT PANDITA DOHOT PANGULA NA GOK TINGKI HKBP DISTRIK 19 BEKASI Senin, 11 November 2019

ACARA PARTANGIANGAN

KONVENT PANSITA DOHOT PANGULA NA GOK TINGKI

 HKBP DISTRIK 19 BEKASI

Senin, 11 November 2019

 

1. Marende BE. No. 361: 1-2 Na Denggan Situtu Do BL. 157

1.     Na denggan situtu do, mamuji Debata

Jahowa na tumimbo, na sai tongtong basa

Denggan do paboahon, manogot asi-Mi

Bodari mangendehon, burjuM nang sintong-Mi

….. Jongjong …..

2.     Mardongan sipiltihon, na denggan situtu

Naeng ma tongtong pujion, ni nasa na burju

Ho Tuhan Debatangku, ai las ni rohangki

Do na tongtong binaen-Mu, di pambahenan-Mi

2. Votum – Introitus – Tangiang (P: Paragenda - H: Huria) (Pdt. Nikson Simangunsong)

P:         Marhitehite Goar ni Debata Ama, dohot Goar ni Anak-Na Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Ise do na jadi nangkok tu dolok ni Jahowa, jala ise do na jadi jongjong di hajongjongan ni habadiaon-Na i?

H:        Halak partangan na lidang dohot na ias roha.

P:         Haleluya!

Martangiang ma hita: Ale Tuhan Debata, Pargogo na so hatudosan, Amanami saleleng ni lelengna! Asi ni rohaM do na mangaramoti hami sian nasailaon rasirasa nuaeng, jala asi ni rohaM do na mangalehon Barita na Uli i, gabe hangoluannami. Sai asi ma roham, sai buhai ma rohanami jala lehon TondiM na badia i, asa huantusi hami sude panogunoguM dohot pambahen-Mu na balga i. Paian ma HataM di bagasan rohanami, asa mardame jala sonang hami jala lam imbaru rohanami marhitehite Anak-Mu, Tuhan Jesus Kristus Tuhannami.

H:        Amen.

3. Koor Parousia

4. Marende BE. No. 117: 1+4  Jahowa Debatanta do

1.     Jahowa Debatanta do partanobatoanta

Musunta ingkon talu do, dibaen pangondianganta

Ianggo musu i, i ma sibolis i

Jorbut do tahi ni, mangago jolma i,

Ndang dapot na mangatup.

4.     Ai hata ni Jahowa i, ndang dapot ungkitonna

Tuhanta manjagahon i, ditungkol naposo-Na

Hosanta, arta pe, ugasan sasude, dirampas musu i

Antong mahua i; hot do harajaon-Na

4. Manjaha Hata ni Debata Rom 14: 1-12

P:       Hata ni Tuhanta Sijahaonta marsorinsorin di Partangiangan on, sian Surat ni Apostel Paulus tu huria Roma 14: 1-12. Anju hamu ma na gale marhaporseaon, unang uhumuhumi hamu pingkirannasida!

H:      Pos do roha ni na sada on, laho manganhon nasa ragam ni sipanganon; ai na gumale i, ingkau rata sambing do dipangan.

P:       Unang ma hu roha ni na manganhonsa mida na so manganhonsa; jala na mangorom, unang ma diuhumuhumi donganna na manganhonsa, ai naung dijangkon Debata do ibana

H:      Ai ise do ho, umbahen na diuhumuhumi ho anak somang ni na leban? Mandapot di tuanna do ibana, manang na hot, manang na tinggang. Alai hot do ibana, ai tarpahot Tuhan i do ibana.

P:       Ia di roha ni na deba, marhasurungan do ari on sian ari an; ia di roha ni na asing, dos be do angka ari i. Asal ma gomos pingkiranna be!

H:      Na pabadiahon ari i, di Tuhan i ma diparbadiai; na manganhon i, Tuhan i ma diingot disi, ai dipuji disi Debata; songon i do na mangorom, Tuhan i do diingot disi, laos dipuji do Debata.

P:       Ai ganup hita ndang mangolu di dirinta, jala laos ganup hita ndang mate di dirinta.

H:      Ai ia mangolu pe hita, mangolu di Tuhan i do; jala mate hita, mate di Tuhan i do! Asa mangolu manang mate pe hita, tong do di Tuhan i hita.

P:       Ai i do umbahen na mate Kristus jala mulak mangolu, asa Ibana Tuhan ni angka na mate, nang angka na mangolu.

H:      Ia ho, boasa uhumuhumanmu donganmu; boasa hu roham mida donganmu? Ai hita sasude pajongjongonna sogot tu adopan ni habangsa ni Debata.

P:       Ai na tarsurat do: "Na mangolu do Ahu, ninna Tuhan i. Marsinggang tu jolongku sogot nasa na mangolu, jala nasa parsoara marhatopothon Debata!" Asa ganup hita on, alusanta do Debata taringot tu dirinta be. I ma sahatna! Martua do angka na tumangihon Hata ni Debata, jala na umpeopsa.

H.      Amen.

5. Tangiang Pangondian (Pdt. Sakarias Simanjuntak, M.PAK)

6. Koor Pardihuta Ni Pangula Na Gok Tingki

7. Marende BE. No. 257: 4  Jonok Debatanta

4.       Debata na songkal jala marmulia baen ma dohot au badia

Lehon ma gogongku asa oloanku Ho sobokhon suruan-Mu

Lomo ni roha-Mi naeng patupaonku, Ho haholonganku.

8. Jamita:  (Pdt. M.S.M. Panjaitan, M.Th)            

9. Marende BE. 487: 1…Tung Halak na margogo P. Pelean

1.     Tung halak na margogo sipartangiang i

Dokdok pe sitaonon dang olo talu i

Pos situtu rohana di Debatana i

Tuhanna manaluhon sude pangalo i

2.     Nang hirahira mogap dibaen sitaonon i

Marsinggang do ibana managam Tuhan i

Dung jumpang pe tingkina sumurut arsak i

Tarapul ma rohana dibaen Tuhanna i

3.     Imbaru panghirimon nang hagogoon i

Margogo marsahala do partangiang i

Togu muse langkana lao marjamita i

Ai Kristus do donganna di ulaonna i

10. Tangiang Panutup

Ev. Pilippi 4: 10-20 ; Ep. 5 Musa 24: 19-22

(Minggu XXII Dung Trinitatis, 17 November 2019)

Topik: Marpanarihon tu Dongan Jolma

Mansai jonok jala denggan do parsaoran ni huria Pilippi tu apostel Paulus, uju di Pilippi do pe apostel i nang ndung ditadinghon apostel i huria Pilippi, laho mangebati luat na asing laho marbarita nauli.

1.   Apostel Paulus dohot Silas ro tu Pilippi laho mamaritahon barita na uli, sekitar taon 60 M. Di mula na i si Lidya (na ro sian Tiatira, Asia) sada halak parompuan naung gabe porsea, ro tu huta Pilippi laho martigatiga kain ungu. Dungi adong sada parompuan na dipamalum Si Paulus marhitehite goar ni Tuhan Yesus, ima sahalak na ginohan ni tondi na hodar (Pangarunding) gabe dohot ma i porsea rap dohot angka parompuan na marnidasa ujui. Hinorhon ni na pinamalum na i parompuan i, gabe ditangkup jala diuhum ma si Paulus dohot si Silas laos dipenjara, alai dihurungan i sai dihatindanghon do haporseaonna ganup ari marhite na sai martangiang jala mamuji Tuhan nasida di hurungan i dipabegebege angka donganna na dihurungan i, di sada tingki ro ma lalo, gabe mungkap ma sude pintu ni hurungan i, marnida i gabe porsea ma kepala penjara i rap dohot keluargana pe olo tardidi (Ul. Ap.16: 25-34). Marhite proses na songon i ma mulana gabe lam solhot panghilalaan ni halak Pilippi tu si Paulus. Pola gabe jongjong ma huria Pilippi.

2.   Dungi udut ni pardalanan ni apostel Paulus  sian Pilippi, laho tu luat na asing, i ma Tessalonika, Berea,  dungi tu Athena dohot Korintus di Akhaya (Ul. Ap. 17 ), alai sai tong do marpanarihon huria Pilippi tu ulaon panghobasion ni apostel i. Uju di Tessalonika si Paulus, 2 hali ditongos huria Pilippi bantuan (hepeng) laho manumpahi ulaon panghobasion pamaritaon barita nauli, songoni nang uju di  Berea (Makedonia) pe. Holong ni roha nasida i, patar jala manontong do nang pe tarhurung si Paulus di Roma, ima marhite na disuru huria Pilippi do si Epafroditus laho mamboan pangurupion (dana) dalan nasida patuduhon naparsidohot di partinaonan ni apostel i. Mansai las situtu do roha ni apostel i ala denggan ni roha ni huria Pilippi on. Di na tarhurung apostel i di Roma, gabe si Epaproditus ma mandongani dohot manarihon apostel i molo adong angka na hurang manang tona na ingkon sipasahaton. Alai uju mandongani apostel i, masa do sahit na posa tu si Epafroditus, alai ala huaso dohot gogo ni Debata di na martangiang apostel i, malum ma ibana sian parsahiton i. Dung lam hipas panghilalaan ni si Epafroditus disuru apostel i ma ibana mulak tu Pilippi, laos marhite Ibana ma ditongoshon apostel Paulus surat on tu huria Pilippi.

3.   Marhite suratna i, disosoi apostel i do huria i, asa lam marsihohot dihaporseaon, huhut dijamothon asa manat huria i diharoro ni angka siboan poda na lipe na sian hajahudion dohot hasipelebeguon. Dungi asa di bagasan bisuk na sian Debata laho pasidunghon angka persoalan na metmet unang gabe lam mangararati (4: 2-9). Jala turpuk bindu 4: 10-20 on i ma dihamauliatehon apostel i do parsaoran na marpanarihon napinatupa ni huria i.

4.   Di ayat 10-13, Las ni roha di bagasan Tuhan. “Tarhilas situtu” (bersukacita, terharu) panghilalaan ni apostel Paulus ala pangurupion ni huria Pilippi na sai manarihon ibana. Las ni roha ni apostel i, na umbalga ndada ala “silehonlehon i” alai ala Hata ni Debata na mangula di bagasan roha dohot ngolu ni huria Pilippi do, ai molo olo huria Pilippi pasahat pangurupionna tu apostel i, dirajumi apostel Paulus do:

a.     Ala Hata ni Debata do mangonjar roha nasida umbahen na rade mangurupi, manarihon naposo-Na.

b.     Ala dirajumi huria i apostel Paulus naposo ni Debata.

c.     Asa lam doras do barita nauli i dibaritahon ro di liat portibi on

d.     Ala naung dapotan haluaon huria i, gabe disarihon nasida ulaon ni apostel i dalan nasida laho pasangap Debata, Alani do didok apostel i gabe uap na hushus/pelean tu Debata do i dirajumi (18)

Sambintas, pandohan  ni apostel i di ayat 11-13, hira na mandok dang ringkot di apostel Paulus hepeng manang pangurupion i, ai nunga jumolo dihangoluhon ibana ngolu na marhahurangan dohot na marlobilobi, dst. Alai sasintongna nanaeng patuduhon balga ni las ni rohana i do ibana disi. Lapatanna na sailaonnai nunga diantusi marpangontik (manghasabamhon na adong) sian na niulana manjait tenda, ai marhite ido disarihon Debata Ibana jala saluhut do tarpatupa ibana marhite Tuhan i (ay.13) alai molo adong muse pangurupion sian huria Pilippi, nda gabe lam balga ma las ni rohana? (Ada rasa keterharuan karena perbuatan baik jemaat yaitu perhatian, kepedulian sebagai buah dari iman).

5.   Dung dijalo jala dihamauliatehon apostel Paulus pangurupion i, gabe dihatindanghon ibana do pangurupion nasida na sailaonna i (14-17), dungi  ditangianghon apostel i do Huria i (19) asa Debata manggohi nasa na ringkot di huria i. Boasa? Ala ditanda apostel ido huria Pilippi, nda tung ala na marlobilobi umbahen na olo manarihon apostel i, ndungi nda tung adong jolma na so ringkot be panarihonon ni Debata.

6.   Ay. 20. Pangunjuni ni tangiang ni apostel i, i ma  hamuliaon (doxology), laho pasunggulhon naporsea, asa molo tung adong na mangalehon adong na manjalo, nauli ma i. alai ingkon Debata do na marsangap ro di saleleng ni lelengna. Asa ndada gabe tumimbo na mangalehon jala tumoru na manjalosa. Ai saluhutna i tarpatupa ala hata ni Debata naung binaritahon i do na mangonjar roha, laho marpanarihon dohot manghamauliatehon na jinalo, bahen sangap ni Debata.

7.     Aplikasi:

a.       Marsitutu mamaritahon barita nauli ala haporseaon di Jesus Kristus, nang pe  mangadopi ragam ni haporsuhon.

b.       Sian parsitutuon i tagamon do adong parbue lehonon ni Debata tu angka naposo-Na. Ndang pasombuon ni namarsuru i na sinuruna (Mat. 28 :20). Alai unang lupa mandok mauliate.

c.       Parbue ni haporseaon i, marragam do bentukna, boi do parsaoran na denggan, dame, hasadaon, hepeng (hamauliateon, si bikin gembira), dll. Alai molo jumpangta angka i sude, ndada laho papuas diri manang pangkeon laho menyombongkan diri. Ala sian parbue ni haporseaon do i ingkon pangkeon do laho pahembang panghobasion. lapatanna, ai tu Debata do hasahatan ni pelean hamauliateon (parbue ni haposeaon ni huria i), alani parhitean do hita jolma laho manjalo dohot mamangkesa, antong tudia do i pangkeon? Laho pasangap Debata!

d.       Sai unang ma tubu istilah “marutang budi” ala silehonlehon di huria. Alai ingkon ajaran do nang huria (ruas) gabe Parasiroha (na ringgas masilehonlehon) paboa naung jumolo disarihon Debata   na ringkot di ngoluna. Berbagi dari pemberian Tuhan. Gabe parasiroha ma hamu, songon Amamuna parasiroha i (Luk. 6:36).

Denggan do menjaga hubungan baik dohot ruas ni huria, dalan laho marparsaoran di bagasan hata ni Debata dohot marsitangiangan, lumobi di jaman teknologi naung canggih nuaeng gabe pamurahon hita menjangkau, mamanghulingi angka ruas ni huria di inganan na marragam. Amen.

? (pinarade. Pdt. Sakarias Simanjuntak, M.PAK)

Ev. Habakuk 3: 1-6 ; Ep. Mateus 13: 47-50

(Minggu Ujung Taon Parhuriaon, 24 November 2019)

Topik: Debata na Sangap Manguhumi Saluhut Bangso

Patujolo

Habakuk lapatanna “silongkot”. Sai lohot tu Debata do Habakuk jala garang marsual dohot Debata. Sai dipaimaima rohana do alus ni hoihoina sian Debata. Dialusi Debata, dung dapotsa alus i, ndang dihalomohon rohana. Ala sai na alo tu rohana do alus i, i ma taringot tu angka na masa di ngolu ni bangso Israel (Juda).

Sungkunsungkun di rohana: Sadia leleng on, ale Jahowa, joujou ahu, matua so ditangihon ho? Boasa tung pataridahononmu tu ahu hageduhon, jala marsombusombu ho paidaida hangaluton? Molo na sun gogo do Debata, boasa martinaon na hansit halak na pintor na so marsala? On ma na gabe parungkilonna. Alani sungkunsungkunna i, sai lohot/longkot do ibana tu Debata, jala dialusi Debata hoihoinana.

Hatorangan

Bindu 1 dohot 2 bagian na parjolo tangiang panulingkiton (Boasa? Doa Interogasi). Habakuk manungkun Debata! Marparsirangguthon Debata! Hoihoi do ibana tu Debata. Didok rohana paotikhu, na sosadia do nabinahen ni Debata tu bangso Israel. “Sadia leleng on, ale Jahowa, joujou ahu, matua so ditangihon ho? Sai hualualuhon tu ho hadoboon, matua so manumpak ho? Boasa tung pataridahononmu tu ahu hageduhon, jala marsombusombu ho paidaida hangaluton? Pangarupaon dohot hadoboon di jolongku; masa parsalisian, jala tubu parbadaan.” (Hab. 1: 2-3). On do sungkunsungkun ni Habakuk tu Debata. Boasa so hatop? Boasa dipabenda? Boasa otik? Boasa pabahathu? Tung tarbahen Debata na badia ma paidaida sude angka na jahat? Nda ho do ale Jahowa Debatangku sian na robi dope na sun badia di ahu? Alai nang pe songon i bagas ni hoihoina, sai lohot tu Debata do si Habakuk! Bagian na paduahon, i ma bindu 3 maporus tu Debata do Habakuk, martangiang ma panurirang Habakuk, marlogu andung, taruli hasabaron do Habakuk. Dapotan alus na sangkan Habakuk: “alai anggo halak partigor i mangolu do binahen ni parsihohotna marhaporseaon.” Aha do na masa tu Habakuk?

Habakuk sada halak na balga hoihoina tu Debata. Halak na so hea saep roha. Ndang sonang rohana tu cara dohot pambahenan ni Debata. Sai mubauba do rohana, sai dituhasi rohana do pambahen ni Debata, mandok: Boasa paotikhu diula Ho, boasa paotikhu dipatupa Ho Tuhan, alai tongkinnari, boasa pabahathu diula Ho, boasa pabahathu dipatupa Ho Tuhan? (Habakuk datang kepada Allah, dan ia menginginkan Allah akan melakukan sesuai dengan keinginannya! Apakah kita juga cenderung seperti itu?)

Haimbaruon na pinaputa ni raja Josia ndang tuk pasauthon haimbaruon na hot (ideal). Mangihut mangarajai ma Joiakim raja na mangulahon gok pardosaon, manjolo sisip, papeol uhum, gok hajahaton (609–598 sM). Hatiha i bangso Assur na manaban 10 marga Israel nunga lam sumurut gogo dohot huasona, didok roha ni Habakuk ndang tuk be bangso Assur pangkeon ni Debata laho manguhum bangso on,  dalan ni Debata paturehon bangso Israel. Politik pe so ada turena. Alani i sungkunsungkun ma Habakuk: Sadia leleng on, ale Jahowa, joujou ahu, matua so ditangihon ho? (Hab. 1: 2). Beasa angka parjahat sai mardohar hira soada mara di nasida? Dihasiholi Habakuk asa gira Debata ro paturehon (Intervensi). Ndang dapot diida rohana hahomion “Ai ida ma, paheheonku ma halak Kasdim, sada bangso na garang jala na hijang, na maotaot dompak desa na opat i di tano on laho manoluk inganan angka na so ibana hian nampunasa”. (1:6).  Alani i adong 5 nidok ni Debata tu Habakuk:

1. Ndang dope dibereng ho na hupatupa i, patonggor ma matamu!

2.  Hinorhon ni i longang ma ho muse di tingkina.

3.  Adong do sipatupaonhu nang uju di ngolumu on, uju mangolu dope ho.

4.  Ndang dope hupaboa i tu ho, ala ndang porsea ho.

5.  Nunga hupatupa haluaon i, alai holip sian pamerenganmu.

Aha do na pinatupa ni Debata? Hatiha i halak Kasdim (Babelonia) harajaon na metmet, tibu marbalga jala laho gabe harajaon na bolon jala tarbarita situtu. Di na sahali na marsahit do raja Hiskia, ro ma suruan ni harajaon na metmet sian topi ni aek Eprat Babel mandulo raja Hiskia di parsahitonna. (2 Raja 20: 12 Di tingki uju i ma disuru Merodak-Baladan, anak ni si Baladan, raja sian Babel suruanna mamboan surat dohot silua tu si Hiskia, ai nunga tarbortik tu pinggolna na marsahit i si Hiskia.) Di haroro ni nasida i, dipatuduhon raja Hiskia angka arta isi ni bagasna dohot isi ni bagasjoro ni Debata tu suruan ni raja Babel i, ala di roha ni raja Hiskia huta na metmet do Babel, jala ndang adong gogona, hira na sipanggaraon do raja i. Sahat ma na masa i tu pinggol ni Jesaya, di sungkun si Jesaya ise do tamue ni raja i, jala na marhua do nasida? Na ro nasida mandulo ahu diparsahitonku, ai raja na tarbarita do hape ahu on! Ninna Hiskia. Alani i manurirangi ma si Jesaya, “Ida ma, na ro do angka ari sogot, tarboan ma disi nasa na di bagasan jabum dohot na sinamotsamot ni angka ompum rasirasa sadarion tu Babel; ndang adong teba nanggo sada, ninna Jahowa.” (2 Raja 20: 17). Halak Kasdim/Babel, i ma naung pinarade ni Debata, di huta na metmet, harajaon na metmet marbonggal gabe harajaon na bolon di Purba. I ma naung pinatupa ni Debata na so niida ni si Habakuk. Babel gabe harajaon na bolon na pinangke ni Debata manguhum Israel di pardosaonna. I ma cara ni Debata, patubuhon harajaon ni sipelebegu laho mangajar, manguhum bangso-Na. Tutu na jahat sahali do bangso Assur, alai dao jumahat do pe Babel. Jorbut, jala na songkal do bangso i; Jala umbontis angka hodana sian babiat, jala rumahat mangkarat sian gompul bodarina i; jala marinjak angka jolma parsihundulna. Molo mamolus soldadu ni Babel sude do malengse ndang adong na teba. Nasa hau ditaba, nasa pahanpahanan di usung, nasa parompuan diusung, lahilahi ditaban. Ubahen i do tarsurat: “Ai ndang martumbur disi hau antajau, jala ndang marparbue angka hau anggur, lambang do bunga ni hau jetun, jala ndang dapot sipanganon sian angka hauma; rasip do angka birubiru sian balian, jala ndang adong be jonggi di bagasan bara.” (ay.17). Dungi didok Habakuk ma, maposi hu do i Tuhan! Ai adong dope halak na burju di tongatonga ni Israel! Ai nunga sahat tu pinggolhu hasongiron ni bangso Babel. Ninna Habakuk, sai marmungutmungut ma ibana. Tung pasombuonmu ma halak na burju rap tarbunu dohot halak parjahat? Patupaonmu ma hajahaton umbalos hajahaton? Tung unang ma nian pamasa i! I ma parsirangguton ni si Habakuk tu Debata! Laho ma ibana tu inganan ginjangginjang laho paihutihut, marnida hamamasa ni uhuman i. “Di atas panatapanku do ahu jongjong, jala tindang ahu tu partanobatoan, jala manatapnatap ahu marnida manang aha sidohononna tu ahu, jala manang aha alusna taringot tu alualungku.” (2:1). Hata ni Debata tu Habakuk, tuat ma ho sian i, “Surathon ma pangungkapon i, jala uhirhon tu angka batu panuratan, asa tangkas tarjaha nang pamolus.” (2:2). (la ma’an yaaruwts qowree’ bow - that he may run that readeth it - “Siapa yang berlari bisa membaca, atau siapa yang membaca bisa berlari”- manang ise na manjaha marlojong, manang ise na marlojong manjaha). Ingkon hatahononmu do tu bangso on asa parade dirina be tu panguhuman i.

Sipahusorhusoron ni Roha

1.     Habakuk manungkun Jahowa: Bunuon ni halak Kasdim/Babel ma halak partigor rap dohot parjahat? Alai Debata ni Israel mandok: “alai anggo halak partigor i mangolu do binahen ni parsihohotna marhaporseaon.” (2:4). Ondihonon-Ku do halak partigor jala paluaon-Ku molo tongtong masihohot nasida tu ahu. Tutu molo ro Babel, boi torop halak agoan haporseaonna ala godoron. Alai angka na marsihohot mangolu, molo tongtong porsea tu Ahu di tonga ni hamaolon i. Hasatiaon tu Tuhan Debata alus. Na satia do na paluaon-Na. Parsihohotonna marhaporseaon (satia), lapatanna tongtong rap, sahat tu sinirang ni hamatean, nang gok hamaolon songon hamaolon uju Babel, tongtong satia tu Debata. Rap dohot Jesus manang aha pe namasa. Tongtong satia songon suami istri di manang aha pe na masa. (Olo do ho mangkaholongi ibana sian nasa roham dohot mangulahon sian nasa gogom, huhut marparangehon parange na badia rap dohot ibana; na olo do ho manganjuanju dohot hagaleonna, tung sura humurang parangena, jala na so tupa paulahonmu manang tadingkononmu ibana paima disirang hamatean hamu sogot?). Ndan jadi sirang ia so sinirang ni hamatean. I do haporseaon, i do iman-amen. Molo hot porsea tu Debata, partigor na tongtong porsea, malua do binahen ni parsihohotna marhaporseaon. Molo tongtong porsea jala tongtong masihohot tu Debata di bagasan Jesus Kristus, halak partigor na porsea, malua do binahen ni parsihohotna marhaporseaon. (Ndang tarjalo turpuk on pandohan: Sahali di palua, tongtong malua). Tongtong ma marsihohot, Debata do hagogoon jala tuk paluahon di ganup parungkilon, di ganup tingki.

2.     Marjea ma manang ise na pagukguk manang aha, so ibana nampunasa; sadia leleng on tagamon? Tung na padokdok utang tu ibana do ibana disi. (2:6). Sadihari pe, tongka do dohonon hata marjea (kutukan)! Hea binege didok natuatua tu anakhonna marjea ma ho! Sitongka dohonon na songon i. Tu sude na nidok ni Jesus marjea di Matius 11 ndang adong na tading nanggo sada sian huta na hona toru i, nda holan Tiberias do na tading ala so hona torutoru ni Jesus tu huta i. Songon i do nang Sodom dohot Gumora, Babel ditorui Tuhan i, marjea! Malengse jala salpu huta dohot harajaon i. 

3.     Tung di haholongi Debata do sude na tinompa-Na. Tarrimas situtu do Ibana tu bangso na mangalengsehon tombak, mangalengsehon pahanpahanan, mangalengsehon dengke, d.n.a. “Ai ndang martumbur disi hau antajau, jala ndang marparbue angka hau anggur, lambang do bunga ni hau jetun, jala ndang dapot sipanganon sian angka hauma; rasip do angka birubiru sian balian, jala ndang adong be jonggi di bagasan bara.” (ay.17). Ala pangalaho manegai na tinompa ni Debata, malengse do harajaon Babel. Molo mardosa bangso Israel, mardosa jala martangkang huria ni Tuhan i, dipangke do bangso na asing (ugamo na asing) laho gabe lambutlombut asa muba, asa mardame dohot Debata. Songon Habakuk, mardame marende rohana ala marhaporseaon ibana tu Debata ni Israel, dipaimaima rohana do pambahenan ni Debata di bagasan hasabamon. “Ale Jahowa, nunga hubege baritam, gabe mabiar ahu. Ale Jahowa, sai ulahi ma pangolu ulaonmu di parsitongaan ni angka taon, di parsitongaan ni angka taon ma i tutu pabotohon! Sai marningot ma ho di asi ni roha, nang di bagasan rimas.” Alai anggo ahu, marolopolop ma ahu di bagasan Jahowa, jala mariaia ahu mida Debata ni hatuaonku. Jahowa, Tuhan i do hagogoonku, jala dibahen ibana do pathu tudoshon ursa tini, jala toguonna do ahu dumege angka dolokdolokku. I ma di pande ende mardongan parhinaloan. (ay.2,18-19). “…Antong, masiapulan ma hamu marhitehite angka hata i!” (ida Ep. 1 Tes. 4: 13-18). Amen.

? (pinarade. Pdt. Nikson Simangunsong)

KONVEN DISTRIK XIX BEKASI

KONVEN 

PANGULA NA GOK TINGKI

 

HKBP DISTRIK XIX BEKASI

 

HKBP PONDOK GEDE

RESORT PONDOK GEDE

Senin 7 November 2016

 

Jl. Perumahan Taman Pondok Gede Blok H No.1-3

Pondok Gede RT 04 RW 01 Kelurahan Jatirahayu

Kecamatan Pondok Melati Kota Bekasi

Provinsi Jawa Barat

Telp. (021) 8467284

ACARA PARTANGIANGAN

KONVEN PANGULA NA GOK TINGKI

HKBP DISTRIK XIX BEKASI

Pondok Gede Senin, 7 November 2016

I.  PARTANGIANGAN  (Pdt. Nikson Simangunsong)                      

1.  Marende BE.No.102: 1+3 O Tondi Parbadia i bongoti

     BL.206  Es=Do

1.  O Tondi Porbadia I, bongoti rohanami be,

      Ro sipatiur roha. O sondang sian surgo i,

      Sondangi rohanami be, tu halalas ni roha.

      Asa, masa, patupahon pinodahon ni hataMu,

      Sai tu hami ma rohaMu.

3.  Sai pargogoi ma hami on, mangihutihut hataMon,

     Di pardalanannami. Haporseaonnami pe,

     Tambai tung masa aha pe, na bernit taononnami.

     Tatap, tatap sude hami, rohanami pasonanghon;

     Hajolmaon hamonanghon.

2. Votum – Tangiang (P: Paragenda ; H: Huria)

P:    Marhitehite Goar ni Debata Ama, dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on!

H:   Amen.

P:    Songon on do didok Tuhan Jesus: Ianggo poda na di Ahu, ndang Ahu nampunasa, poda ni na marsuru Ahu do i. Molo adong manang ise na mambahen lomo ni roha ni Ama i, botoon ni i do taringot tu poda i, manang na sian Debata i, manang na huhatahon i sian roharohangku sandiri. Songon na nidok ni Surat i: Angka batang aek na mangolu do mabaor sian pamatang ni na porsea di Ahu. (Joh.7,16.17.38). Haleluya! (Martangingan ma hita) Ale Tuhan… (Hundul)

 3.  Marende BE.No.221:1-2 Saleleng Jesuski  BL.5 As=Do

1.  Saleleng Jesuski, na mandongani au

     Maporus holsoholsongki, sai di Ibana au

2.  Parmahan Jesuski, birubiruNa au

     Ditogutogu tondingki, ndang be marmara au

4.  Epistel 5 Musa 25: 5-10

     P:    Molo tampak maringan halak na marhahamaranggi, hape mate sahalak sian nasida ndang tubuan anak, ndang jadi pamulion parompuan, jolma ni halak na mate bahen jolma ni halak ruar, ingkon anggina i do mareakkon nasida bahen jolmana pajongjongkon pomparan di hahana.

     H:   Ia anak buhabaju na tinubuhonna i ingkon marpanggoarhon goar ni amana na mate, asa unang pidom goarna i sian Israel.

     P:    Alai tung sura ndang lomo roha ni baoa i pagodangkon jolma ni hahana i, ingkon nangkok jolma ni hahana i tu harbangan ni huta i mandapothon angka sintua huhut mandok: Manjua do anggingki pajongjongkon goar ni hahana di Israel, ndang olo ibana mangabia ahu.

     H:   Dung i ingkon jouon ni angka sintua ni huta i ma ibana huhut mangapoi ibana; hape molo tong dipirhon rohana i mandok: Ndang lomo rohangku mangabia nasida.

     P:    Ingkon ro ma jumonok jolma ni hahana i tu lambungna di adopan ni angka sintua i, laos tanggalanna ma sipatuna sian patna jala tijuranna bohina, huhut dohononna mangalusi: Ingkon songon i do bahenon tu baoa, na so olo pajongjong pomparan tu hahana.

     H:   Jala ingkon dohonon ni halak goarna di Israel: Jabu ni halak naung tinanggalan sipatuna.

     P:    I ma sahatna. Martua do angka na tumangihon Hata ni Debata, jala na umpeopsa!

     H:    Amen.

5. Marende BE.No.223:1-2 Husomba Ho Tuhan BL.244 As= D

     

1.  Husomba Ho Tuhan tangihon au.

    SangkapMu ma tongtong pasaut tu au.

    Lam ganda baenonni i, holong ni rohangki.

    Sai lam gandai holong tu Ho

2. Uju na lilu au dao sian Ho,

    Sai dilului Ho au, laos jumpang do.

    Ala ni holong do rohangkinon di Ho.
    Sai lam gandai, holong tu Ho.

6. Tangiang Pangondian

7. Marende SDJ. No. 826: 2-3 Gohi au Tuhan C=Do

2.  Gohi au Tuhan marhite hataMi,

     Gohi au Tuhan marhite hataMi.

     Na mauas do tondingku, o Tuhan di hataMi,

     Gohi au Tuhan marhite hataMi.

3. Gohi au Tuhan marhite hataMi,

    Gohi au Tuhan marhite hataMi.

    Asa tang jala matoras au marhite hataMi,

    Gohi au Tuhan marhite hataMi.

8.  Jamita: Jeremia 9: 23

Manang ise na naeng mamuji dirina, on ma dipujihon: Na marroha i ibana, jala na tinandana i ahu, ai ahu do Jahowa, parasi roha na mangkajongjongkon uhum dohot hatigoran di tano on, ai angka ido lomo ni rohangku, ninna Jahowa.

9.  Marende SDJ. No.792:1-2 Pasupasu hami O Tuhan D= Do

     (Papungu Pelean)

1.  (Reff.) Pasupasu hami o Tuhan, sai usehon dameMi.

     Sai ampehon tanganMi Tuhan, lehon tu au gogoMi. (Fine)

     Di portibi on, baen ma au Tuhan, habaoran ni las ni roha;

     Tu na marsak i, tu na dangol i, gabe pangapuli i.

     (DC al Fine)

2.  Di portibi on, baen ma au Tuhan monang maralohon dosa.

     Dibaen gogoMi, talu musu i sibolis pangago i.

     Pasupasu, d.u.

3.  Di portibi on baen ma au Tuhan sipatupa hadameon.

     Baen ma hataMi saor tu roha ni na masihosoman i.

     Pasupasu, d.u.

4.  Di portibi on baen ma au Tuhan siradoti haholongon.

     Togutogu ma hami on Tuhan marparange na denggan.

     Pasupasu, d.u.

10. Tangiang Pelean - Ale Amanami

11. Pasupasu

12. Amen, amen, amen.

II. RAMAH TAMAH

Ev. Maleaki 3:19-20a (Alkitab: Maleakhi 4:1-2a);

Ep. 2 Tessalonik 3:6-13

(Minggu XXV Dung Trinitatis 13 November 2016)

Topik:

Habibinsar ni Mata ni Ari Hasintongan Dohot Hamalumon

Uju panurirangion ni Maleaki (abad 5 seb. M) nunga torop sian bangso Israel na so satia be tu Debata manang na so mangulahon hata/patik ni Debata. Isarana ndang ra be rohanasida laho manggarar pelean parpuluhan dohot singkop. Meleaki namarlapatan: suruangKu (Mal.1:1;3:1 suruongku ma suruangKu), hombar tu pangantusion i, di mulanai hata Maleaki ndada goar ni jolma, alai “songon jabatan doi“ suruan ni Debata. Namangula do panurirang on dungkon sidung bagas joro dipauli dung mulak nasida sian habuangan Babel. Alai boi do dohonon na mangula do ibana songon panurirang andorang so si Nehemia dohot Esra. Diulaonna songon panurirang tung tangkas do ditulak Maleaki jala diprotes ibana perkawinan campuran, nunga dipangolihonnasida dohot dipamuli tu angka bangso na humaliangna, hape mansai tangkas do diorai asa unang marlaok pangalaho nasida suang songon i nang haporseaon nasida dohot angka debata sileban, debata ni angka “bangso parbegu na humaliang nasida”.

Diulaonna songon panurirang diuji ibana do manjou saluhut bangso i asa marhamubaon (pasuanghon parsaoran na denggan muse dohot Debata), marhite na mangulahon lomo ni roha ni Debata, termasuk ma pasahathon pelean parpuluhan tu bagas joro. Ai holan ala mangulahon hadaulaton, paturehon parsaoranna tu Debata do tagamon lehonon ni Debata pasupasuNa tu bangso i (ida: Mal.3:6-12). Tutu dungkon mulak nasida sian habuangan Babel, timbo do panghirimon nasida dihamamasa ni ngolu na dumenggan, dipauli nasida bagas joro, alai aha nabinege nasida nasailaon i, i ma hamoraon, keamanan ndang jumpangnasida. Dihaliangi angka musuna do nasida, gagal panen do nasida ala logo ni ari, dungi masa ma haraparon (haleon potir ; Mal.3:11), gabe ragu ma nasida di holong dohot pangaramotion ni Debata (1:2), diida nasida sai hira na so jumpang be keadilan, sai hira na ditumpahi Debata do angka parjahat ai lam mardohar do nasida (2:17), gabe tubu ma di roha nasida, aha ma gunana mangulahon uhum hasintongan i, aha gunana mangaradoti patikNa, ai  diida nasida angka siula hajahaton, angka namangasahon gogo dohot na mangasahon parbinotoan, mangasahon huasona do na dapotan pasupasu (3:14-15), disangsihon/diraguhonnasida ma padan pangaramotion ni Debata na pinasahat ni angka panurirang i tu nasida .

Diuji panurirang Maleaki ma mangalusi nasida lumobi ganggu  ni roha nasida mandok molo pe ingkon aeon nasida nasa hapariron dohot parungkilon, ndada ala ni burju ni roha nasida mangulahon patik ni Debata, alai ala hajahaton dohot hajungkaton nasida do di adopan ni Debata, angka malim ndang diulahon ulaonna songon malim na tutu (1:6), alai nunga sai hira holan hasomalan sambing. Hape angka na mian di tongatonga nasida na marharoroan sian duru ni Israel, tung tangkas do pasahathon peleanna tu Debata (1:11), diulahon bangso i do ragam ni hajahaton di adopan ni Debata, isarani angka parsibalik mata, pangalangkupon, pargadombuson, penindasan tu angka nametmet/na gale dohot tu angka napogos, ndang jumpang be hasintongan dohot hatigoran di rohanasida (3:5), Alani i dijou jala disosoi Maleaki do bangso i paimbaru diri di moral dohot dipartondion nasida, pauba diri nang diparsaoran siapari maradophon donganna sabangso, ai marhite i ma jumpangan asi ni roha nasida sian Debata, naeng ma ingkon papitaon nasida parugamoon nasida maradophon Debata, mangulahon patikNa dohot mangalehon nasa na patut sipasahaton nasida, isara ni parpuluhan, dohot ragam ni angka pelean, asa unang be jumpang pangalaho namarsipaulaula marsomba tu Debata.

Di bagasan turpuk on dipagomos Maleaki do roha ni angka na ganggu i, ditaringoti ma taringot tu ari haroro ni Tuhan i (3:19: “ ai ida ma na ro ma ari namarsigorgor) ai marhite i ma patar haholongon ni Debata, huasona dohot hamuliaonna diadopan ni saluhut bangso, disi ma masa paruhuman tu saluhut halak siula hajahaton dohot pamintorion tu angka siulahon patik ni Debata.  Angka siula hajahaton ingkon diuhum tu bagasan api pamurunan jala didok ndang tebahononna nanggo uratna nang rantingna pe, ndang adong namanahan di joloNa maradophon paruhuman i, songon durame do jolma siula hajahaton i. Tutu di angka siula hata ni Debata, di angka namanghabiari Debata/na porsea di Debata, ari haroro ni Tuhan i, boi do i gabe songon mata ni ari binsar di nasida na mamboan hangoluan dohot haluaon nang las ni roha, alai gabe ari hamamago do i di angka siula hajahaton (hari yang menakutkan). Di ari i ma patar saluhutna nasa parulaon ni jolma i, ndang adong na holip. Angka na jungkat roha (orang gegabah) dohot halak siula hajahaton (orang orang fasik) angka jolma napatimbohon dirina di adopan ni Debata, namambahen dirina dohot nasa na dong di ibana (huasona, artana, hamaloonna dna) gabe haporusanna, na sai mamintori dirina di adopan ni Debata, saluhutna ingkon togihononna tu paruhuman i. Doshon durame do nasida angka na jungkat roha i ditutung tu api pamurunan i, jala didok Debata, ndang adong tebahononna sian nasida, sun siap do urat nang ranting nasida, sangkidop mata do huaso dohot hajengkaron nasida saluhutna, ndang adong namanahan di ari paruhuman i, di ari haroro ni Tuhan napaduahalihon i.

Tutu marasing do na naeng jaloon ni angka sihabiari Debata, na satia jala marhaporusan, tu angka partigor (ay 20: alai binsarbinsar ma di hamu, angka na manghabiari goarHu mata ni ari hatigoran mardongan hahisaron di linggom ni habongNa ....) lapatanna, angka na manghabiari Debata gabe siparmonang (pemenang) di ari paruhuman i, di ari i ma pintoran ni Debata nasa namanghaposi Ibana, di ari i ma alusan ni Debata saluhut hoihoi nasida siala pangela ni portibi on, binsar ma di nasida mata ni ari hatigoran mardongan hahisaron. Jumpang ma las ni roha di nasida pola digombarhon songon anak ni lombu napanihalnihalon ala las ni rohana. Naeng patangkashon na naso marisuang haporseaon i, hasatiaon dohot panghirimon ni angka na porsea tu Debata, na lehononNa do upa na sumurung tu angka naporsea.

Amen.

(Pdt. Hotman Sitorus)

Sermon HKBP Distrik  XIX Bekasi

Jamita tu Minggu 20 Nopember 2016

(Ujung Taon Parhuriaon)

Kolose 1 :11-20

Tanda jala Haporseai ma Jesus i

Adong pandohan mandok : Kenal maka sayang, tidak kenal maka tak sayang. Hata “kenal” (ma/di tanda) tontu umbagas do i sian hata diboto (tahu). Lam bagas panandaonta tu sasahalak gabe lam yakin jala barani do hita manghatindanghon na tatanda i tu halak na asing.  Jala tontu marhite panandaon na tangkas ido hita manontuhon haposan manang so haposan do ibana, laos marhite panandaon i do boi patingkosonta angka hata na so tingkos berupa dugaan/ prasangka ni halak tu na tatanda i.

Mananda jala marsihohot tu Jesus ido na mambahen na porsea margogo mangadopi saluhut angka tudingan manang ajaran na merendahkan dohot meragukan hadirion ni Jesus. Alai sabalikna tubu do keraguan di angka na hurang tangkas mananda ise do  Jesus i.

Ise do Jesus didok Si Paulus?

Teologia Paulus mengenai Yesus yang ilahi mengatakan bahwa Yesus adalah Allah secara mutlak dan sempurna. Jesus ima Debata situtu jala jolma situtu.  (meminjam istilah Andar Ismael : manusia 100% dan Allah 100%)Ai dibagasan Ibana do maringanan sandok gok ni hadebataon marrupahon daging (kol 2:9)

Mansai torang do dipatorang apostel i taringot tu ise do Jesus (Kolose 1 :15-20), domu mai ala godang ni pemikiran sian ahli filsafat nang angka guru sesat (bidat) na mandok Jesus i dang dos dohot Debata alai tumoru do derajatna sian Debata. Alani ma, gabe lam dipatangkas apostel Paulus do taringot tu hadebataon ni Jesus. ima :

a.       Gambar (suman ) ni Debata,(ay 15a) alani marhite Jesus do hita mananda Debata,“ai dibagasan Ama i do ahu jala dibagasan Ahu do Ama i” (joh 14:11)

b.      Naparjolo tubu sian natinompa (15 b)

c.       Marhite ibana do sude ditompa (Joh 1:1+14, ibana do Hata i, jala marhite Hata i do ditompa saluhut na adong).Panompaon (creatio ex nihilo) ima marhite lomo ni roha ni Debata

d.      Ibana do dijolo ni saluhut na parjolo hehe sian namate

e.       Ibana do ulu ni daging (huria), ala ni Kristus do adong parpunguan i, ido umbahen didok Kristus “ulu” jala naporsea i ma pamatangna.

f.       Ibana do pardengganan ni saluhut, pardengganan/pardamean ni jolma tu Debata dohot Debata tu jolma, napinatupaNa marhite mudarNa (20-22).

Sian hatorangan i, gabe tangkas ma antusan toho ma antong Debata do Jesus i. Alani molo tangkas do panandaonta di Jesus i, gabe ima bohalta mangadopi angka parpoda haliluon na ro manggugai haporseaon. Ima angka na mandok :

a.       na so tingkos Jesus i Debata

b.      paboa dang sae holan manghaposeai Jesus asa dapotan haluaon, alai dohot do kemampuan filosofi, pambahenan na denggan, uhum dohot patik radotan.

c.       paboa Jesus i, jolma biasa sambing do i, ai molo Debata Ibana boasa olo marlea, haotoon do i.

Marhite panandaon di Jesus i, huria Kolose dohot hita dapotan pos ni roha di hasesan ni dosa dohot hangoluan na salengnilelengna. Gabe marhaporseaon na togu unang olo dipaotooto manang ahape.

Alani ulaonta ima :

a.    Patandahon ma Jesus i tu donganmu, unang ganggu rohana jala asa dohot ibana malua. Tontu tiruonta do nang apostel Paulus na sai tongtong manangianghon ruas na di huria Kolose, asa dilehon Debata tu nasida pantas ni roha (habisuhon) lao mananda lomo ni roha ni Debata, dungi asa diparangehon na hinaporseaanna, asa benget jala lambas marroha huhut dibagasan roha mauliate (9-12).

b.   Paposhon roha ni naung Kristen, asa hot  marpanghirimon na mangolu. Lumobi angka na marsak ala ni hamatean asa unang lilu haporseaonna. Ai naung dapotan hasesaan ni dosa do ganup naporsea, jala nunga diunsat hita sian haholomon tu harajaon niDebata (ay 13-14). Gabe taruli di hangoluan na salelengnilelengna ma ibana.

c.     Memento Mori (ingot ari hamamatem). Halak naung tangkas mananda Jesus na manesa dosa dohot silehon haluaon, tontu ndang adong be habiaranna taringot tu hamatean.  Gariada sai masihol ibana tu inganan na pinarade ni Tuhan i, asa rap dohot alealena  BE no. 834  (na masihol do rohangku)                                                     

        Pdt. Sakarias Simanjuntak