PARTORDING NI PARMINGGUON MINGGU PASAMPULULIMAHON DUNG TRINITATIS MINGGU, 20 SEPTEMBER 2020

 PARTORDING NI PARMINGGUON

MINGGU PASAMPULULIMAHON

DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE

RESORT PONDOK GEDE

Minggu, 20 September 2020

Ev. Lukas 17: 26-37

Ep. 1 Rajaraja 19: 9-18

 

Topik: Dipapatar Debata Huaso-Na Marhite Na Tinompa

(P: Paragenda - R: Ruas)

 

 

1.        Marende BE HKBP No. 116: 1-2 Ditompa Ho Do Au (BL 243) D=Do 4/4

 

1.            Ditompa Ho do au, sondangi rohangkon.

Tung basabasaM i sude na di au on.

Gomgomi pamatanghu, naeng Ho do oloanhu.

Sai lehon ma gogongku, lomoM naeng ulaonhu.

Urupi, tatap au tutu, Panompa na burju.

 

--- Jongjong ---

 

2.            Tuhan Sihophop au sai buri tondingkon.

Marhite mudarMi torusi ngolungkon.

Pinuji ma goarMu, arga ma panghophopMu;

Dibaen pangalahongku, nang nasa ulaonhu.

O Jesus Sipalua au, tu Ho ma au patau.

2.        Votum – Introitus – Tangiang (A.XV/A.3 – D.XIII/46)

 

       P:       Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

       R:       Amen.

       P:       Nunga tibu hian diida rohangku Jahowa, ninna Ibana do: Haholongon salelenglelengna Hubahen manghaholongi ho, dibahen i Hutaiti ho marhitehite denggan basa. Haleluya!

R:       (Mangendehon BE HKBP No. 852 F=Do 4/4):

                 Haleluya, Haleluya, Haleluya!

       P:       Martangiang ma hita:

                 Ale Tuhan Debata, Pargogo na so hatudosan jala Parasiroha na sumurung! Dipangido rohaM, naeng mangolu jala martua hami sogot; nunga ragam dalanna dibahen Ho manungguli rohanami, asa hutanda hami hatuaon sogot. Dibahen i hupaserep hami ma nuaeng rohanami mangido sian Ho: Sai lehon ma TondiM na badia i tu hami, asa porsea hami di holong ni rohaM di hami. Sai hutangihon hami ma soaraM, na mangapoi hami di tingki parasirohaon nuaeng, asa sampang hami tu hangoluan, na pinaradeM i di hami marhitehite Tuhan Jesus Kristus, Tuhannami.                

       R:       Amen. -hundul-

 

3.        Marende BE HKBP No. 559:1-2 Debata Na Songkal Jala Na Badia D=Do 4/4

 

1.       Debata na songkal Sitolusada,

          Di sogot ni ari hupuji goar-Mi.

          Debata na songkal siparasiroha,

          Sitolusada, na badia i.

2.       Debata na songkal, surusuruan-Mu

          Saluhut marsomba pasahat tumpal-Mi.

          Angka na badia ro tu adopan-Mu

          Mamujimuji salelengna i. Amen.

 

4.        Patik ni Debata (Patik Parjolo dohot Lapatanna)

 

P:       Tangihon hamu ma Patik ni Debata i ma Patik Parjolo dohot lapatanna.

          Patik Parjolo: Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.

  Dia do lapatan ni i?

          On do: Ingkon umbiar rohanta jala humolong jala umpos mida Debata asa mida nasa na adong.

 

P:       Ima sahatna. Antong rap mangido gogo ma hita sian Debata laho mangulahon na hombar tu patikNa i:

 

P+R:   Ale Tuhan Debata, sai pargogoi ma hami mangulahon na hombar tu Patik-Mi. Amen.

 

5.        Marende BE HKBP No. 164:1-2 O Tuhan Jesus Ho Rajangku (BL 107) Allah=Do 4/4

 

1.       O Tuhan Jesus, Ho Rajangku, tangihon au naposoM on.

          Naeng topotanhu do dosangku, tu Ho Sigomgom tano on.

          Ai naeng mangolu tondingki marhitehite mudar-Mi.

 

--- Jongjong ---

 

2.       Godang do dosa ni tanganhu, rohangku pe gok dosa do.

          Nang mata pe, nang pamatanghu, luhutna i gok dosa do.

          Sai sesa nasa dosangki marhitehite mudar-Mi.

6.        Manopoti Dosa (B.1 - C.1)

 

P:       Tatopoti ma dosanta!

Ale Amanami jala Debatanami na di banua ginjang. Parasiroha na sumurung mida hami! Huparhatutu jala hutopoti hami do dosa dohot pangalaosionnami na godang i di joloM. Tatap hami marhitehite asi ni rohaM, jala sesa ma dosanami saluhutna, ala ni panghophop ni Anak haholongan ni rohaM, Tuhan Jesus Kristus, Sipangolu hami.

R:       Amen.

 

          (Tangiang na hohom BE HKBP No. 164 BL 107)

 

P:       Tabege ma Hata bagabaga taringot tu hasesaan ni dosa.

          Munsat pe angka dolok, jala humuntal angka robean, alai anggo parasi ni rohangKu na so tupa munsat sian ho, jala padan ni hadameonKu na so tupa humordit, ninna Jahowa Siasii ho. Hasangapon ma di Debata na di ginjang!

R:       Amen.

7.        Marende BE HKBP No. 765:1 Nang Pe Munsat Angka Dolok Es=Do 4/4

 

1.            Nang pe munsat angka dolok, nang humuntal pe robean i,

Ndang tagamon olo munsat asi ni roha ni Jahowa i.

Nang pe mago sogot langit, nang pe mago dohot tano i,

Ndang tagamon olo muba na nidokNa di hataNa i.

Hot do asi ni rohaNa ro di salelenglelengna.

Nang pe padan hadameon tung na so humordit do.

I do hata ni Jahowa, Tuhan siasii ho.

Hot do asi ni rohaNa ro di salelenglelengna.

Nang pe padan hadameon tung na so humordit do.

I do hata ni Jahowa, Tuhan siasii ho. Hot do i, saut do i.

8.        Epistel (1 Rajaraja 19: 9-18)

P:       Tabege ma Hata ni Debata turpuk ni ari Minggu on, sian buku 1 Rajaraja 19: 9-18. Ita jaha ma marsorinsorin, songon on ma hatana! Masuk ma ibana disi tu bagasan sada liang laos marborngin disi. Dung i ida ma, ro ma hata ni Jahowa, mandok tu ibana: “Aha do ni niulam dison, ale Elia?”

R:       Dung i ninna ibana ma: “Marmurukmuruk situtu do ahu nian humophop ulaon ni Jahowa Debata Zebaot, ai nunga ditadinghon halak Israel parjanjianMu,

P:       Nunga maloha angka langgatanMu, jala nunga dibunu angka panurirangMu marhite sian podang, sasada ahu nama tading, dohot hosangki dope dilului nasida naeng buatonna.”

R:       Dung i ninna Ibana ma: “Ruar ma ho jala jongjong tu dolok na di jolo ni Jahowa, ai ida ma, naeng mamolus Jahowa.”

P:       Tongkin nari ro ma habahaba bolon, na manorbani angka dolok dohot mamolai angka dolok batu mardalan di jolo ni Jahowa; alai ndada Jahowa dope di bagasan habahaba i.

R:       Dung salpu habahaba i ro ma lalo; alai ndada Jahowa dope di bagasan lalo i. Dung salpu lalo i ro ma api; alai ndada Jahowa dope di bagasan api i. Dung salpu api ro ma alogo na tarangonangon.

P:       Jadi dung dibege si Elia soarana i, dihuphupi ma bohina dohot sampesampena; dung i ruar ma ibana laos jongjong di baba ni liang i.

R:       Dung i ida ma, ro sada soara mandok tu ibana: “Aha do na niulam dison, ale Elia?” Dung i ninna ibana ma: “Marmurukmuruk situtu do ahu nian humophop ulaon ni Jahowa Debata Zebaot;

P:       Ai nunga ditadinghon halak Israel parjanjianMu, jala nunga diloha nasida angka langgatanMi, nunga dibunui dohot angka panurirangMu marhite sian podang, jala sasada ahu nama tading, dohot hosangki dope dilului nasida naeng buatonna.”

 

R:       Alai ninna Jahowa ma tu ibana: “Mulak ma ho tu dalanmu hian tungkan Damaskus, laho ma ho tusi jala miahi si Hasael bahen raja gumomgom Aram.

 

P:       Miahi dohot si Jehu, anak ni si Nimsi bahen raja gumomgom Israel, miahi dohot si Elisa, anak ni si Sapat sian Abel Megola bahen panurirang singkatmu.

 

R:       Jadi manang ise na malua sian podang ni si Hasael, ingkon mate bunuon ni si Jehu ma i, jala manang ise na malua sian podang ni Jehu, ingkon mate bunuon ni si Elisa ma i.

 

P:       Angkup ni i tinggal dope Hubahen di Israel pitu ribu halak, saluhutna i angka na so mangalompit ulu ni totna marsomba tu Baal dohot na so dung mangumma ibana.” I ma sahatna! Martua do angka na tumangihon Hata ni Debata, jala na umpeopsa.

 

R:       Amen.

 

9.        Marende BE HKBP No. 489: 1-2 Sai Haposi Tuhanmi (BL 331) C=Do 4/4

 

1.       Sai haposi Tuhanmi nang di hagogotan i.

          Nang tung jut pe rohami, sai haposi Tuhanmi.

          I tutu, pos rohangki di Ho ale Tuhanhi.

          Paima sahat au tu Ho, tongtong haposanhu Ho.

 

--- Jongjong ---

2.       Gok dameNa rohami, molo sai pos rohami.

          Di panarihonNa i, borngin nang arian i.

          I tutu, pos rohangki di Ho ale Tuhanhi.

          Paima sahat au tu Ho, tongtong haposanhu Ho.

 

10.    Manghatindanghon Haporseaon

 

P:       Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

 

P+R:    Ahu porsea di Debata Jahowa, i do Ama, Pargogo na so hatudosan na tumompa langit dohot tano.

         

          Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

         

          Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

 

11.    Tingting Huria dohot Tangiang Pangondian

 

12.    Marende BE HKBP No. 767:1-2 Songon Aek Na Mabaor G=Do 4/4

 

1.            Songon aek na mabaor dameNa,

Songon aek na mabaor dameNa,

Songon aek na mabaor dameNa di rohangkon.

Songon aek na mabaor dameNa,

Songon aek na mabaor dameNa,

Songon aek na mabaor dameNa di rohangkon.

 

2.       Singkop do holong ni rohaNa,

          Singkop do holong ni rohaNa,

          Singkop do holong ni rohaNa di rohangkon.

          Singkop do holong ni rohaNa,

          Singkop do holong ni rohaNa,

          Singkop do holong ni rohaNa di rohangkon.

 

13.    Jamita (Lukas 17: 26-37)

 

P:       Songon na masa uju di tingki ni si Noak i, suman tusi do sogot di angka ari ni Anak ni jolma i:

Na mangan minum do nasida, mangoli jala pabolihonsa sahat ro di ari habobongot ni si Noak i tu bagasan parau i; jadi ro ma aek na sumar i mangagohon nasida saluhutna.

Songon na masa di angka ari ni si Lot: Mangan minum nasida, manuhor manggadis, manuan jala pauli bagas.

Alai di ari halalaho ni si Lot sian huta Sodom turun ma udan api dohot barerang sian ginjang, mangagohon nasida saluhutna.

Songon i ma masa di na sadari i, di na gabe patar Anak ni Jolma i.

Ia halak na di bilut parginjang ni jabuna di na sadari i, jala di jabu i ugasanna, unang ma dialap i di na mijur ibana; jala halak na di ladang laos songon i, unang pola muli ibana!

Ingot hamu ma nioli ni si Lot i!

Agoan hosa ma na naeng paluahon hosana; alai na agoan hosa, i do na pangoluhonsa.

Hudok ma di hamu: Di na saborngin i dua halak ma sapodoman; na sada do jangkononna, na sada nari tulahonna.

Rap manduda ma dua parompuan; na sada do jangkononna, na sada nari tulahonna.

Rap mangula hauma ma dua halak; na sada do jangkononna, na sada nari tulahonna.”

Jadi ninna nasida ma mangalusi Ibana: “Di dia ma i, Tuhan?” Gabe didok ma tu nasida: “Ia disi bangke, laos tusi do marumbal angka lali.” I ma sahatna!

14.    Marende BE HKBP No. 569:1… O Debata Tung Longang Do Rohangku Bes=Do 4/4 (Pasahathon Pelean)

 

1.            O Debata, tung longang do rohangku,

Molo hubereng na tinompaMi.

Saluhut bintang, hilap dohot ronggur

Manghatindanghon hasangaponMi.

Marende au Tuhan mamuji Ho,

O Debata sangap do Ho.

Marende au Tuhan mamuji Ho,

O Debata sangap do Ho.

2.            Di ladang, di adaran dohot tombak,

Marende pidong tung mansai sonang.

Punsu ni dolok, sunge dohot rura,

Mamaritahon sangapMi Tuhan.

Marende au Tuhan mamuji Ho,

O Debata sangap do Ho.

Marende au Tuhan mamuji Ho,

O Debata sangap do Ho.

 

--- Musik ---

 

3.            Molo huingot balga ni holongMu

Marhite Jesus na tarsilang i.

Anak sasadaMi, o Debatangku

Dilehon Ho manobus jolma i.

Marende au Tuhan mamuji Ho,

O Debata sangap do Ho.

Marende au Tuhan mamuji Ho,

O Debata sangap do Ho.

 

4.            Molo ro Kristus lao mangalap ahu

Tu hasonangan salelengna i.

Di surgo i Ho do pasangaponhu

Rap dohot angka na badia i.

Marende au Tuhan mamuji Ho,

O Debata sangap do Ho.

Marende au Tuhan mamuji Ho,

O Debata sangap do Ho.

 

--- Musik ---

 

*Acara Pelepasan Sintua Pensiun Khusus Pukul 10.00 WIB*

Ende Huria               : Nomor 149:1-2   (BL 182)

Ende Huria               : Nomor 184:6      (BL 103)

 

15.    Tangiang Pelean – Ale Amanami – Pasupasu

P:     Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

R:     (Mangendehon): BE HKBP No. 204:2 (BL 73)

       Nasa na nilehon-Mi, tondi ro di pamatanghu.

       Hosa dohot gogongki, ro di saluhut artangku.

       Hupasahat i tu Ho, na so unsatonhu do.

P:     Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R:     (Mangendehon): BE HKBP No. 841

       Ai Ho do nampuna harajaon

       Dohot hagogoon, ro di hasangapon

       Saleleng ni lelengna. Amen.

P:     "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

 

P/R:  (Mangendehon): BE HKBP No. 845

              Amen… Amen… Amen.

 

 

 

Peleanta, itatongoshon ma tu:

1. Rekening Britama Cab. Pond Gede

No. (002) 038501000630566

2. Tabungan BNI

No. (009) 1919667770

 

 

Manang boi ma discan sian aplikasi LinkAja, Gopay, Ovo, Dana dan Shopee: