ACARA PARTANGIANGAN
LANSIA
Ancol - Kamis 18 Oktober 2018
1. Joujou tu Parsaoran (L= Liturgis; H= Huria)
L: Huria ni Tuhanta, Punguan
LANSIA HKBP Pondok Gede. Na marlas ni roha do hita ari on, ala pangaramotion ni
Tuhanta, jala nunga dipataru asi rohaNa hita rombongan horas tu inganan, Ancol na uli on.
Asa rap partangiangan hita dison. Taparade jala ita pasonang be ma rohanta,
laho paihutihut acara partangianganta on.
H: I ma tutu! Mauliate ma di Tuhanta Pardengganbasa i, naung pataru hita,
jala marsonangan hita sahat tu inganan on.
L: Martangiang na hohom be ma hita di bagas rohanta
be.
………Martangiang na
hohom……………
L: Huria ni Tuhanta Punguan Partangiangan Sermon Lansia HKBP Pondok Gede, tapangiar ma soaranta mamuji Tuhanta Debata, marende ma hita!
2. Marende BE. No. 4: 1 Sai puji Debata BL. 148 F=Do
1.
Sai puji
Debata dibaen asi rohaNa.
Huhut tongtong basa di nasa
tinompaNa.
Ria ma hita be mamuji Debata,
Ai sesa do nuaeng dosanta i
dibaen.
2. Disuru Debata
AnakNa Jesus Kristus
Jadi mansai arga do hita on ditobus
Diporsan Jesus i dosanta sasude
Asa mudarNa i paias hita be.
3. Votum – Introitus - Tangiang
L : Marhitehite Goar ni Debata Ama
dohot Goar ni AnakNa Tuhan Jesus Kristus dohot Goar ni Tondi Parbadia na
tumompa langit dohot tano on. Amen. Haleluya! Di
Tuhan Debatanta i do hatuaon dohot hasangapon, dohot hamuliaon dohot
hagogoon.
H: Ibana do
Debata Ama, na pahehehon Tuhan Jesus, i do na pahehehon dohot hita sogot ala ni
Tuhan Jesus.
L: Haleluya! Martangiang ma hita: Ale Tuhan Debata, Parasiroha jala
na bonar ! Mauliate hudok hami, ala dipabinsar Ho tu hami Barita na Uli, na
manondangi rohanami. Ai ala ni i umbahen hutanda hami Ho dohot lomo ni rohaM.
Dipangido rohanami naeng mangulahon lomo ni rohaM hami saleleng di ngolu on,
jala naeng martua hami bahenonMu. Sai parbadiai ma rohanami marhitehite TondiM,
jala pargogoi ma hami mangorom hisaphisap dohot manggotaphon roha portibi on.
Sai palas ma rohanami mangoloi Ho ala ni AnakMu, Tuhan Jesus Kristus,
Tuhannami. Amen.
4. Koor: Lansia
5. Marende BE. No. 115:1+3 Tuhan Debata BL. 59
1. Tuhan
Debata sai ramoti ma, daging dohot tondinami
I do pangidoan nami. Sai pahipas be, hami on sude.
3.
Sai parbadiai, sai tongtong rajai, ale Tondi Parbadia.
Rohanami asa ria, mangoloi hataM,
hombar tu rohaM!
8. Jamita: Lukas 16: 1-8
Lukas 16:1-8
1
Laos didok Ibana ma tu siseanna i: Adong ma sada halak na mora na marjuara
bagas. Jadi tarbortik ma tu ibana, dipansuasaehon juara bagas i artana.
2
Gabe dijou ma ibana, ninna ma mandok ibana: Dia do i na hubege taringot tu ho?
Patuduhon ma paretongan ni hajuaraonmi; ai ndang tarbahen ho be leat ni juara
bagas!
3
Jadi marhusari ma juara bagas i: Dia nama bahenonku, ai buaton ni tuanki nama
sian ahu hajuaraonki. Mamangkur, ndang adong gogongku; manehenehe, maila ahu.
4
On ma tahe sibahenonku di rohangku, asa dijangkon nasida ahu tu jabunasida, ia
dung dipaijur ahu sian hajuaraonki:
5
Jadi sadasada ma dijou nasa parsingiran ni indukna i tu jolona, didok ma tu na
parjolo ro i: Sadia sigararonmi tu tuanta?
6
Alusna: Saratus gunsi miak. Gabe ninna ma mandok ibana: Alap ma suratmi, dung i
hundul ma ho manurathon hatop limapulu!
7
Tu na asing muse didok: Ia ho, sadia do sigararonmi? Saratus tuhukan eme! Gabe
didok tu ibana: Alap ma suratmi, dung i surathon ma: Ualupulu!
8
Jadi dipuji na mora i ma juara bagas na geduk i, ala bisuk pambahenna i. Ai
umbisuk do anak portibi on asa anak hatiuron i mangangkupi donganna saroha.
Hamuna
ompungdoli ompungboru ruas ni Partangiangan Lansia on!
Tangkas
itaboto jala itahaporseai: Debata Jahowa do na manompa salahut na adong, jadijadian
ni tanganNa do luhutna (Psalmen 8:4). Songon na didok hata ni Debata: Di mula
ni mulana ditompa Debata langit dohot tano on. (1 Musa 1:1). Di ari paonomhon
di tompa Debata ma jolma. Dung i dipasupasu Debata ma nasida, ninna Debata ma
tu nasida: Marpinompari ma hamu, asa sopar hamu, jala gohi hamu sandok tano on,
jala patunduk hamu; jala raja i hamu dengke angka na di laut dohot pidong angka
na martongatonga langit ro di sude binatang, angka na manjirir di atas tano on.
(1 Musa 1:26).
Alai
mangalo do jolma na parjolo i tu Debata madabu nasida tu dosa. Gabe gok
hamaolon ngolu ni jolma i, dohot do marhamaolon sude na tinompa i (1 Musa 3).
Mangihut ma muse pinompar ni jolma mamunu tinodohonna (Kain dohot Abel: 1 Musa
4), diririt angka anak ni Debata ma boru ni jolma, ala na uli do nasida, jala
dibuat bahen jolmanasida guru pamillitnasida. (1 Musa 6). Mangihut dipandok jolma
i ma: Tole, tapungka ma sada hutanta, jala tapajokkon sada tungkup, sungkot ro
di langit punsuna, tabahen ma baritanta, asa unang marserak hita tu liat
portibi on (1 Musa 11).
Dipilit
Debata si Abraham, si Ishak, si Jakob dohot bangso Israel, asa marhite nasida
gabe tarpasupasu portibi on. Nang i pe gok pangalaho na so hinalomohon ni
Debata diula nasida.
Tolhas
tu masa ni Tuhan Jesus di ngoluNa, adong halak Parise, Saduse, Siboto Patik, asa
angka nasida ma nian songon “Juara Bagas” patureture arta ni “namora” i ma
Tuhanta Debata. Alai diparlomolomohon nasida do arta ni namora i, marguru tu
lomolomo ni rohana be.
Laho
manulingkit pangalaho i, dipasahat Tuhanta Jesus ma umpama on. “Adong ma sada halak na mora na marjuara
bagas. Jadi tarbortik ma tu ibana, dipansuasaehon juara bagas i artana. Gabe
dijou ma ibana, ninna ma mandok ibana: Dia do i na hubege taringot tu ho?
Patuduhon ma paretongan ni hajuaraonmi; ai ndang tarbahen ho be leat ni juara
bagas!” (Lukas 16:1-2).
Hamuna
ompungdoli ompungboru ruas ni Partangiangan Lansia on!
Tuhanta
Debata do na mora i. Hita jolma do juara bagas na so haposan i. Di tingkina
tungguon ni namora i ma tu hita jolma: Patuduhon
ma paretongan ni hajuaraonmi; ai ndang tarbahen ho be leat ni juara bagas!
Dia
ma sipatupaonta laho mangadopi panguhuman i?
Jadi
sadasada ma dijou nasa parsingiran ni indukna i tu jolona, didok ma tu na
parjolo ro i: Sadia sigararonmi tu tuanta? Alusna: Saratus gunsi miak. Gabe
ninna ma mandok ibana: Alap ma suratmi, dung i hundul ma ho manurathon hatop
limapulu! Tu na asing muse didok: Ia ho, sadia do sigararonmi? Saratus tuhukan
eme! Gabe didok tu ibana: Alap ma suratmi, dung i surathon ma: Ualupulu! Jadi
dipuji na mora i ma juara bagas na geduk i, ala bisuk pambahenna i. Ai umbisuk
do anak portibi on asa anak hatiuron i mangangkupi donganna saroha.
Arahon
ma sude ngulmit ni ngolum tu na sasintong ni sintongna. Songon na binahen ni
juara bagas i: Surathon na saratus gunsi miak gabe lima pulu. Ala Lima pulu
hian do sintongna, na digandai do asa Saratus. Saratus tuhukan eme, gabe Ualupulu!
Ualupulu hian do na sintong, na digandai do asa gabe Saratus. Gabe dipaulak
Ualupulu. Muba ma be rohanta, mulak ma
hita tu na sasintongna!
Ala
so adong nanggo sada sian jolma i na haposan gabe juara bagas di adopan ni
Tuhan, gabe dilehonma tu halak na asing ulaon i, i ma tu Jesus Tuhanta i. Jesus Kristus do juara bagas haposan i. Itatiru
ma Tuhan Jesus Kristus Juara bagas haposan i, laho mamangke sude silehonlehon
ni Debata di ngolunta be! Amen.
9. Marende BE. No.
90: 1-2 Sai marlas ni roha hita BL. 175 F=Do (Papungu Pelean).
1.
Sai tapuji Debatanta ale hajolmaon i
Ai naung hehe do Tuhanta sian hamatean i
Dipasidung Jesus i ulaonNa sasude
Patupahon haluaon di saluhut hajolmaon.
2.
Anggo utang ni dosangku digarari Jesus
i
I do haporseaonku di na tinaonNa i
Nunga tulus patik i nunga mintop rimas i
Di na hehe i Ibana ro di au hangoluanNa
10. TANGIANG PELEAN –
PASUPASU
11. (Mangendehon:) Amen, amen, amen.
Pdt. Nikson Simangunsong
Tidak ada komentar:
Posting Komentar