ACARA PESTA PARJOLO ARI PARNINGOTAN
HASASAOR NI TONDI PARBADIA
HKBP PONDOK GEDE
RESORT PONDOK GEDE
DISTRIK XIX BEKASI
Minggu, 4 Juni 2017
TOPIK:
Tondi
Parbadia Manggohi Bangsona
(Ulaon
ni angka Apostel 2: 1-21)
Jl.
Perumahan Taman Pondok Gede Blok H No.1-3
Pondok
Gede RT 04 RW 01 Kelurahan Jatirahayu
Kecamatan
Pondok Melati Kota Bekasi
Provinsi
Jawa Barat,
Telp.
(021) 8467284
Persiapan Ibadah (L=Liturgis J=Jemaat)
1. Joujou tu Parsombaon
L: Hamuna
huria ni Tuhanta angka na hinaholongan di bagasan Kristus Jesus! Dame na sian
Tuhanta ma na mangarajai roha dohot pingkiranta di parmingguonta sadari on.
Tongon tahe apala di bagasan minggu sadarion marpungu do hita marparsaoran
manghalashon Pesta Parjolo Parningotan Ari Hasasaor ni Tondi Parbadia. Dibahen i
marlas ni roha ma hita mangendehon pujipujian tu Debata naung mangusehon Tondi
Parbadia tu hita be.
2. Marende BE. No. 105: 1-3 Ro ma Tondi
Parbadia BL.86 Es=Do
1. Ro ma
Tondi Parbadia Debatangku situtu.
Rohanami ma paria mangoloi hataM burju.
Sai sondangi ma tongtong rohanami na holom.
2. Lehon ma
di rohanami hapistaran na sintong.
Asa tung huboto hami marparange di joloM.
Sian haliluon pe sai palua hami be.
…………………… Musik
…………………… (Jongjong)
3. Patuduhon
ma di hami dalan hangoluan i.
Paimbaru rohanami sai padao ma dosa i.
Pargogoi ma hami be tu na denggan sasude.
3. Votum-Introitus-Tangiang
L: Marhitehite Goar ni Debata Ama dohot
Goar ni AnakNa, Tuhan Jesus Kristus dohot Goar ni Tondi Parbadia, na tumompa
langit dohot tano on.
J: Amen
L: Songon on ninna Tuhan Jahowa: Jala
lehononku tu hamu roha na imbaru dohot tondi na imbaru tu bagasan ateatemuna;
jala unsatonKu do roha batu sian dagingmuna, jala lehononKu tu hamu roha sibuk.
Jala lehononKu ma tondingKu tu bagasan ateatemuna, jala Ahu mambahensa, asa
marparange hamu di bagasan angka patikKu, angka uhumHu pe radotan jala
patupaonmuna do.
J: [mangendehon]
Haleluya, haleluya, haleluya.
L: Martangiang ma hita! Ale Tuhan Debata,
Amanami! Ho do manondangi jala mangajari roha ni angka na porsea di HataM
marhitehite Tondi Parbadia. Sai buhai ma rohanami asa ture parrohaonnami
marhitehite TondiM i, asa tongtong gok dame rohanami manghalashon hagogoonNa i
marhitehite Tuhan Jesus Kristus Tuhannami.
L+J: Amen. (Hundul)
4. Marende
BE. No. 106: 6 Ale Tuhan Amanami BL.176 F=Do
6. Tondi sai ajari
ahu jala togutogu ma.
Asa au marpangalaho na badia, na
tama.
Sai paburju rohangkon mangoloi
hataM tongtong,
Asa molo ro ajalhu sahat au tu ingananMu.
5. PATIK
I-X
L: Tangihon hamu ma patik ni Debata: Patik
Parjolo sahat tu pasampuluhon!
Patik
Parjolo: Ahu do Jahowa Debatam, ninna Debatanta. Ndang
jadi marangkup Ahu bahenonmu Debatam.
Patik
Paduahon: Ndang jadi ganaonmu jala ndang jadi sumanonmu
manang aha na di banua ginjang dohot na di banua tonga on, ro di na di bagasan
aek na di toru ni tano, ianggo tung gabe sisombaon manang sioloan.
Patik
Patoluhon: Ndang jadi dohonon Goar ni Debata, ianggo so
ture dalanna, ai hona uhumNa do sogot angka na marsineang di GoarNa.
Patik
Paopathon: Ingot hamu ma pabadiahon ari minggu i! Di na
onom ari ma ula hamu nasa siulaonmu; alai anggo ari papituhon i, ari paradianan
ni Jahowa Debatam do i. Ndang jadi ho mangula anggo di na sadari i, manang
anakmu pe manang borum manang naposom lahilahi, manang naposom boruboru, ro di
pinahanmu, ro di pangisi ni huta ni halak pe na mangebati hutam. Ai di na onom
ari do ditompa Debata langit dohot tano dohot laut dohot nasa isina, dung i
maradian do Ibana di ari papituhon i. Dibahen i do umbahen na dipasupasu Debata
Jahowa ari paradiananNa i jala diparbadia i.
J: Patik Palimahon: Ingkon pasangaponmu
do natorasmu, asa martua ho jala leleng mangolu di tano na nilehon ni Jahowa
Debatam di ho.
Patik
Paonomhon: Unang ho mamunu!
Patik Papituhon: Unang ho mangalangkup!
Patik Paualuhon: Unang ho manangko!
Patik Pasiahon: Unang ho olo manghatindanghon hata na so tutu maralohon
dongan jolma.
L: Patik
Pasampuluhon: Ndang jadi haliangan ni roham bagas ni
donganmu, ndang jadi haliangan ni roham dongan saripe ni donganmu, manang
naposona baoa manang naposona boruboru manang lombuna manang hodana, manang dia
pe ugasan ni donganmu. Antong, rap mangido
gogo ma hita tu Debata!
J: Ale Tuhan Debata, sai pargogoi ma
hami mangulahon na hombar tu PatikMi. Amen.
6. Koor Pukul 06.00 WIB: Ama
Pukul 09.00 WIB: Lansia
7. Marende BE No. 104: 4+8 Bongoti ma
rohangku BL. 155 F=Do
4. O
Tondi sipodahon tangiang na sintong.
Ho do na tinangihon ni Ama i tongtong.
Ajari ma au on mandok pangidoanhu
Sian sandok rohangku, tangihon hatangkon.
…………………… (Jongjong) ……………………
8. Pagirgir
rohanami mangalo dosa i.
Tambai ma gogonami di pangunjunan i.
Dongani hami on mangalo musunami,
Sai unang olo hami saor tu portibi on.
8. Manopoti
Dosa
L: Tatopoti ma dosanta! Ale Tuhan Debata, Pargogo na so hatudosan jala Amanami! Hujou hami do
GoarMu na badia i, ala na targogot hami marningot dosanami. Sai marasi ni roha
ma Ho mida hami on. O Tuhan Jesus Kristus, Anak ni Debata na gabe jolma ala ni
hami, na mate jala na hehe sian na mate, na manaek tu banua ginjang do Ho
mangondihon hami! Asi rohaM di hami, sai patongtong ma di hami roha
hamauliateon tu Ho. O Tondi Parbadia, pangapul di na marsak roha, pamalum ma
saluhut na bernit, binahen ni dosanami! Ro ma Ho mangingani hami, asa marlas ni
roha hami mangulahon lomo ni rohaM. Ho do parhitean ni nasa asi ni roha, sai
unang tulak hami. Sai tangihon ma hami, Ho ale Debata, Ama, Anak dohot Tondi
Parbadia! Amen.
---Musik---BE. No. 182 Tu joloM o Debatangku BL. 24
L: Tabege ma Hata bagabaga taringot tu hasesaan
ni dosa! Ro ma hamu tu Ahu, asa mangolu tondimuna, ninna Tuhan
Jahowa. Tung sura rara dosamuna songon abit bunga dapdap, bontar do bahenonHu
songon itak; nang pe rara songon abit hasumba, gabe songon hapas do muse. Hasangapon ma di Debata na di ginjang!
L+J: Amen (Hundul)
9. Koor Pukul
06.00 WIB: Haleluya
Pukul 09.00 WIB: Ama Sion
10. Marende
BE No.471: 2-3 Hupillit Jesus donganhi BL.
318 F=Do
2. Arga
ditobus tondingki, na mate do Ibana.
Ngolunghu hubaen upa nii, lao mangoloi hataNa.
Di Ho ngolungku ro di ajalhu, Jesus di Ho au mate
mangolu.
Di Ho ngolungku ro di ajalhu, Jesus di Ho au mate
mangolu.
3. Rohangku
baen ingananMi, patiur ma langkangku.
Huhatindanghon ma disi Ho Jesus palitongku.
Di Ho ngolungku ro di ajalhu, Jesus di Ho au mate
mangolu.
Di Ho ngolungku ro di ajalhu, Jesus di Ho au mate
mangolu.
11. Epistel
Psalmen 104: 24-34;35b
L: Tabege ma Hata ni
Debata turpuk ni ari Minggu on, na tarsurat di Psalmen 104: 24-34;35b. Tung na lan situtu do angka
jadijadianmu, ale Jahowa! Saluhutna i dipauli Ho marhitehite hapistaran, tung
gok jadijadianmu do tano on.
J: Tole
laut i na balga jala na lambas, disi do rumamang angka gulokgulok na so
habilangan, binatang angka na metmet rap dohot angka na balga.
L: Disi do mardalani angka parau, tole buea, na
jinadihonmu, asa marmeammeam disi.
J: Saluhut
nasida mangaranap tu Ho, asa lehononMu sipanganonnasida di tingkina be.
L: Molo dilehon Ho di nasida, dijomputi nasida,
molo dipatedek Ho tanganMu, butongan nasida di na denggan i.
J: Molo
ditabunihon Ho bohiM, holsoan ma nasida, ditait Ho ma hosanasida, monding ma
nasida, jala mulak nasida tu orbuknasida hian.
L: Molo ditongos Ho tondiM, tartompa ma nasida,
jala dipaimbaru Ho do rupa ni tano on.
J: Sai
ro di salelenglelengna ma hamuliaon ni Jahowa marlas ni roha ma Jahowa mida
angka jadijadianNa i!
L: Molo Ibana mamereng tano on, jadi humuntal
ma, dijama angka dolok, jadi martimus ma.
J: Endehononku
ma Jahowa saleleng di ngolungku, umpalu parhinaloan ma ahu umpuji Debatangku,
saleleng adong dope ahu.
L: Sai dihalomohon rohaNa ma nian pingkiranku,
ianggo ahu, sai marlas ni roha do ahu mida Jahowa. …Puji ma Jahowa, ale
tondingku! Halleluya! I ma sahatna. Martua
do angka na tumangihon Hata ni Debata, jala na umpeopsa.
L+J: Amen.
12. Koor Pukul
06.00 WIB: Wijk 5
Pukul 09.00 WIB: Parompuan+Wijk 6
13. Marende SDJ No. 645: 1-2 Ro ma Ho
Parasiroha Es=Do
1. Ro
ma Ho parasiroha sai pagirgir rohangkon,
Mangendehon denggan basa nilehonMu di au on.
Tiruonhu ma suruan mangendehon sangapMi.
Pujionhu Ho Jahowa partanobatoanhi.
……………………Jongjong……………………
2. Na
malua do tondingki ala hagogoonMi.
Pos rohangku boanonMu diringkon tu surgo i.
Jesus sai lului au, atik tung na lilu au.
Na dihophop Ho do au na mambahen mangolu au.
14. Manghatindanghon Haporseaon
L: Rap ma hita
manghatindanghon haporseaonta i songon panghatindanghonon ni donganta
sahaporseaon di sandok portibi on, rap ma hita mandok.
J: Ahu porsea ...
(Hundul)
15. Tingting – Tangiang Pangondian
16. Marende BE No. 641: 1… O Tondi Parbadia i F=Do (Pel. Ia-Ib)
1. O Tondi Parbadia i, sigohi parluhutan,
Marolopolop dolok i, marhasak nang galumbang.
Saluhut na tinompa i,
gok be las ni rohana i, marsurak haleluya.
2. O
Tondi Parbadia, pabangkit panurirang,
Papatar asi holongMi, tu angka na hansitan.
Su murut do na holom i, tubu ma panghiromon i,
endehon haleluya.
…………………… Musik ……………………
3. Di Tondi Parbadia i, raphon Debata Ama,
Dohot Tuhanku Jesus i, Sitobus
manisia.
Naung mate di hau silang i, hehe
manaek tu surgo i, endehon haleluya.
4. O,
Tondi Parbadia i, sigohi langit tano,
Pajongjong harajaonMi, disaluhutna bangso.
Sai parrohai HuriaMi, pasangap Kristus Tuhan i,
olophon Haleluya.
…………………… Musik ……………………
17. Jamita Ulaon ni angka Apostel 2: 1-21
18. Marende BE No. 102: 1… O Tondi Parbadia I Bongoti
BL.206 Es=Do
(Pelean II: Pelean tu
Ulaon Zending)
1. O
Tondi Parbadia i bongoti rohanami be, ro sipatiur roha.
O sondang sain surgo i sondangi rohanami be, tu
halalas ni roha.
Asa masa patupahon pinodahon ni hataMu,
Sai tu hami ma rohaMu.
2. Ho do
silehon roha i di nasa na porsea i, tumpahi rohanami.
Patogu rohanami be, pasar hataM tu sasude, sai tong
dongani hami.
On pe, sude parrohaon, hatuaon lehononMu, sipujion do
goarMu.
…………………… Musik ……………………
3. Sai
pargogoi ma hami on mangihutihut hataMon di pardalanannami.
Haporseaonnami pe tambai tung masa aha pe
na bernit taononnami.
Tatap, tatap sude hami, rohanami
pasonanghon;
Hajolmaon hamonanghon.
4. Sungguli
hami on sude, huhut paburju hami be mangalo dosanami.
Papir ma tondinami on, papos ma rohanami
on di paraloannami.
Gohi, gohi rohanami asa hami
Mambolongkon losok dohot halembaon.
…………………… Musik ……………………
5. Ho
batu mamak na togu na tau ojahan situtu paojak rohanami
Tu hata hasintongan i. Tung unang olo lilu be nang
sada sian hami.
Lehon roha na tumogu, na umburju manggoari
Jesus Kristus Tuhannami.
6. Pangapul
sian surgo i songgopi rohanami be pasaor dameM tu hami.
Pamalo hami on tongtong mamboan roha na holong
Di angka dongannami.
Dao ma bada dohot hosom, ingkon tongtong sonang hami
Mandalani dalannami.
…………………… Musik ……………………
7. Parbadiai
ma hami on huhut patogu ma tongtong torusi rohanami.
Tanggali sian hami be huhut pabali sasude na tau
mangago hami.
Taiti hami tu na sonang na di ginjang
Sumangkaphon hangoluan, hasonangan.
19. Tangiang Panutup (Jongjong)
L: Tatangianghon
ma Peleanta: Ale
Debata Amanami na di banuaginjang, Ho do haroroan ni saluhut silehonlehon na
denggan dohot nasa uli basa na mauliutus. Hupasahat hami sian na nilehonMi tu
hami, pelean nami tu Ho. Sai jalo ma i gabe uap na hushus di JoloM. Pasupasu ma
i jala ramoti asa huparhaseang hami pelean on, patimbulhon harajaonMu di
tongatonga ni HuriaM dohot di portibi on. Buhai ma rohanami marhitehite tondiM,
asa lam hutanda hami godang ni silehonlehonMi tu hami, asa lam girgir hami
mandok mauliate tu Ho, marhitehite Jesus Kristus Tuhannami. Amen.
J: (mangendehon)
BE. No. 14: 2 Puji Hamu Jahowa Tutu BL.57
Bes=Do
Ingot tongtong ale tondingkon, sude na denggan na
dipasonggop Debata tu ho.Denggan basaNa do na pangoluhon ho.
L: Ale Tuhan Debata, Jahowa na manompa, na
mamasumasu, na paluahon jala na mangaramoti ngolunami. Marsangap ma goarMu di
tongatonga ni hajolmaon, jala lam rarat ma barita ni hamuliaonMu sahat ro di
ujung ni portibi on.
J: Mauliate ma rohanami di saluhut denggan ni basaM.
L: Nunga dilehon Ho AnakMu Tuhan Jesus Kristus
laho paluahon, jala padamehon jolma manisia dohot Ho Debatanami. Asi ma rohaM,
sai lam marurat jala marparbue ma dameMi di bagasan ngolunami. DameMi ma na mangarajai
roha dohot pusupusunami. Asa mardame hami tu saluhut jolma.
J: DameMi ma na
mangarajai keluarga dohot bagasnami.
L: Lam rarat ma harajaonMu di sandok
portibion, marsangap ma tongtong goarMu, olat ni on ro di salelenglelengna.
Amen.
J: (mangendehon) BE. No.204: 2 Ndang
Tadinghononhu Ho BL. 73.
Nasa na nilehonMi, tondi ro di pamatanghu. Hosa dohot gogongki,
Ro di saluhut artangku. Hupasahat i tu Ho, na so unsatonku
do.
L: Ale
Tuhan Debata, Amanami! Na so tarasam do godang ni silehonlehonMu di hami.
TondiM na badia i dilehon Ho tu hami jolma, sumonggopi hami na lea on. Na
umarga i do dilehon Ho tu hami, jala gumodang do i sian portibi on dohot sian
pangisina sude. On pe mauliate ma rohanami jala pujionnami ma Ho ala ni sude
habalgaon dohot hamuliaonMu, naung pinapatarMu tu hami. Sai lehon ma Tondi
Parbadia i tu HuriaM, angka na olo mangihuthon Tuhan Jesus Kristus, Tuhannami
asa diajari, dirajai, dipatiur, diparbadiai jala dipatongtong hami mian di
Barita na Uli i. Ale Tondi Parbadia! Sai pasada ma HuriaM na pinapungupunguM i,
asa masijaloan jala masihaholongan songon angka ruas ni daging ni Tuhan Jesus
Kristus na badia i. Sondangi jala patiur ma hami, asa hutanda hami angka dosa
na balga dohot na metmet sipasidingonnami. Sai buas ma Ho manesa dosanami, asa
lam badia jala imbaru hami ganup ari, asa tarbahen hami saor di bagasan Huria
na badia, na sasada i. Sai ondihon jala padomu hami tu Ama i, asa pos rohanami
mandok: Amanami di bagasan Tuhan Jesus Kristus. Sai tambai silehonlehon tu
Huria, asa lam ganda torop ni angka Parbarita na Uli dahot pangajari dohot
parasiroha, na mamaritahon habalgaonMu di portibi on. Sai sondangi jala
pasupasu sude parpunguan ni halak Kristen di gareja, di parsikolaan, nang di
bagasna be, asa tau nasida saor tu parpunguan sogot. Sai sungguli angka na
tarpodom, jala pargogoi angka na gale. Sai songgoti ma angka na neang dahot na
tangkang marroha, asa ditinggalhon nasida hajahatonna be. Sai parrohai angka na
bojok roha, jala apuli angka na marsak dohot na dangol i, asa unang diruparupa
portibi on angka na mangoloi Ho. Sai tatap ma na targogot dohot na pinaburuburu
ni halak ala ni haporseaon di Tuhan Jesus, sai ajari nasida maralus jala mian
ma Ho di bagasan nasida. Sai ramoti ma pingkiran ni angka panggomgomi, panguhum
dohot angka raja, asa tigor uhumnasida, jala
asa dihabiari nasida ari paruhuman sogot. Sai patogu haporseaonnami, asa
tongtong huingot hami, naung sesa dosanami, jala boanonMu hami tu hangoluan
sogot. Sai sungguli pangkirimon na mangolu di hami, asa pos rohanami, nang
malangke daging on, pangoluonMu do muse, asa masuk hami marnida Debata Ama
marhitehite Tuhan Jesus Kristus, Tuhannami. Amen.- Ale Amanami na di banua ginjang........
J: (mangendehon) Ai Ho do nampuna
harajaon, dohot hagogoon......
L: Dipasupasu jala diramoti Tuhan Debata ma
ho…
J: (mangendehon) Amen,
amen, amen.
Tidak ada komentar:
Posting Komentar