BONA TAON SEKSI PAROMPUAN HURIA

PARTONDING NI

PARTANGIANGAN BONA TAON PAROMPUAN

HKBP PONDOK GEDE RESORT PONDOK GEDE

DISTRIK XIX BEKASI

Kamis, 14 Februari 2019; Pukul 14.00 WIB – selesai

Tema:

Ai holan sian Jahowa Debatanta ro hatuaon ni Israel.

 (Jeremia 3: 23b)

I.              PANGARADEON

II.           IBADAH (St. M. Gaja, S.Pd)

1.       Invocatio

L    : Tabe ma di hamu saluhutna! Nunga dipapungu asi roha ni Tuhan hita di gareja on marhite Partangiangan Bona Taon Seksi Parompuan HKBP Pondok Gede Resort Pondok Gede Distrik XIX Bekasi. Antong ale dongan, tapungka ma partangiangan on di bagasan las ni roha dohot hamauliateon godang tu Debata.

H   :  Mauliate ma di Ho ale Debatanami, na mangalehon partingkian on di hami

L    :  Dijou Debata do hita laho marsaor dohot Ibana di bagasan partangianganta sadari on, asa ita jalo sian Ibana gogo dohot sada ni roha laho paihutihut partangiangan on. Antong tapuji jala tapasangap ma Ibana marhite na marende hita.

2.       Marende BE. No. 15: 1-2 Aut na Saribu Hali Ganda BL.103 F=Do

Aut na saribu hali ganda saringar ni soarangki

Naeng nasa gogo bahenonku, mamuji Debatanta i.

Paboa las ni rohangki hinorhon ni pambaenNa i.

Jongjong

Tung sura sahat soarangku tu ujung ni portibion,

Naeng nasa jolma haraonku mamuji Debata tongtong

Tama do nasa hosangki hubaen pasangap Tuhan i.

3.       Votum~Introitus~Tangiang

L    : Marhitehite Goar ni Debata Ama!

H   :  Na manompa jala na manjadihon hita dohot sude nasa na asong di portibi on.

L    :  Dohot Goar ni Anak-Na Tuhan Jesus Kristus!

H   :  Na mangalehon hangoluan na imbaru di bagasan ngolunta, na manobus hita sian sude dosanta marhitehite mudar-Na. Ibana do Tuhanta na ro tu portibi on, asa malua hita sian gomgoman ni sibolis, nang na laho ro paduahalihon di ari sogot, laho manguhumi sude nasa na marhosa.

L    :  Dohot Goar ni Tondi Parbadia!

H   :  Ibana do na padomuhon hita di bagasan parsaoranta sadari on. Ibana do na mangajari hita jala na mangalehon apulapul di bagasan hagogotan. Jala Ibana do na manogunogu dohot mangalehon gogo na imbaru di parngoluonta be.

L    :  Na manompa langit dohot tano on!

H   :  Amen, hupuji ma goar-Mu ale Tuhan!

L    :  “Unang hamu mabiar!” ninna Jahowa sitompa saluhut. Ida ma, Ahu paluahon bangsong-Ku sian tano tungkan habinsaran dohot sian tano tungkan hasundutan ni mata ni ari.

H   :  Marende BE. No. 194: 2 Aut so asi rohaM BL. 62 F=Do

Mauliate ma di Ho, o Debata ala basaM!

Sibahen dalan i marhite Anak-Mi, tu banuaM.

L    :  Ai laho do songot pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tu si.

H   :  Marende BE. No. 194: 4 Aut so asi rohaM BL. 62 F=Do

         Disuru Anak-Mi tu au Tondi-Na i na sian Ho

         Manogu tondingki tu hasonangan i. Pinuji Ho!

L    :  Di jolo ni angka ari on, pagomos hamu ma tanganmuna. Ai bahenon-Ku ma hamu gabe pasupasu tu saluhut bangso, asa gabe bangsong-Ku nasida, jala Ahu gabe Debata nasida. Songon hamu di bagasan Ahu, songon i ma nang nasida di bagasan Ahu. Haleluya! Martangiang ma hita! (ida Agenda) (Hundul)

4.       Koor : INA HANNA

5.       Marende SDJ. No. 712: 1 Tagu au ale Jahowa G=Do

Togu au ale Jahowa di dalan na rodop on

Ho do na tongtong satia togu au na gale on.

Sagusagu hangoluan sai pabosur tondingkon

Sai pabosur tondingkon!

6.       Litani “Pangkirimon di taon na imbaru”

L    :  Molo tarimangi pardalananta di bagasan taon naung salpu i, godang situtu do angka na masa. Mardalan hita di bagasan ngolu na gok mara dohot biar. Biar rohanta mangadopi sude angka na masa i. Adong dope hasonangan di ari marsogot? Manang na ingkon mangolu do hita di bagasan hatahutan!

H   :  Ale Tuhan, asi ma rohaM, togu ma hami saleleng di hasiangan on.

L    :  Gabe sejarah ma taon 2018 di hita. Bencana alam, kekacauan dohot sude angka na masa, gabe sada sosososo do di hita, asa tapareahi dirinta ganup. Nang sipata lomos rohanta, sungkunsungkun aha do na naeng masa di tongatonga ni bangso Indonesia na huhaholongi hami on?

H   :  Ale Tuhan, asi ma rohaM, togu ma hami saleleng di hasiangan on.

L    :  Ndada holan i tahe, hatahuton, ganggu dohot biar, sahat do tu tongatonga ni huria. Godang do ruas ni huriaM na gabe lam mandao sian tongatonga ni parsaoran di huria. Hasadaon, dame, las ni roha songon i nang parlinggoman ndang be dipataridahon huria.

H   :  Ale Tuhan, asi ma rohaM, togu ma hami saleleng di hasiangan on.

…………… hohom ……………

L    :  Gabe sorminan ma taon 2018 naung salpu laho mangeahi taon 2019 on. Molo biar rohanta laho mandalani ariarinta, itaingot ma, adong do Ama na di banua ginjang na mandok hata-Na tu hita “Unang mabiar hamu!”, ai ndang pasombuon-Na sasada  hita mardalan. Asal ma hohom tu Debata hita, Debata do marporang mangalohon sude angka musunta.

H   :  Mauliate ma ale Tuhan, di sude denggan basaM dohot panoguon-Mu.

L    :  Gabe sorminan ma taon 2018 naung salpu laho mangeahi taon 2019 on, asa lam marsada parompuan di huria laho patupahon angka na denggan di tongatonga ni bangso Indonesia on. Patupahon kerjasama na denggan di tongatonga rakyat dohot pamarenta. Kepedulian sosial, i do na dipangido, asa tarida kemajuan, sejahtera dohot hasintongan di tongatonga ni bangso na merdeka.

H   :  Mauliate ma ale Tuhan, di sude denggan basaM dohot panoguon-Mu.

L    :  Gabe sorminan ma taon 2018 naung salpu laho mangeahi taon 2019 on. Asa tarida hasadaon di tongatonga ni huria laho patuduhon haporseaon na togu di bagasan ngolunta. Marsada ma pangula ni huria dohot ruas parompuan, laho patupahon las ni roha di tongatonga ni huria. Ai saluhutna do hita tarjou, ndada holan pangula ni huria, alai sude do hita dipangido Debata gabe siulahon na denggan. Mauliate ma ale Tuhan, di sude denggan basaM dohot panoguon-Mu. Amen.

7.       Koor:

8.       Marende BE. No. 707: 1 Hagogoon dohot apulapul Es=Do

Hagogoon dohot apulapul do dilehon Tuhan i tu au

Ganup ari au ditogutogu, ganup tingki diondingi au.

Ai hombar tu lomo ni roha-Na do dilehon Tuhan i tu au

Ro marsorin arsak las ni roha haporseaonhu dipatau.

9.       Epistel (Sijahaon manogot; Jeremia 30: 7-13)

30:7 Oe jea tonanon! Ai tung na bolon ari na sasada i, na so adong tudosna, jala tingki hagogotan do i di Jakkob; alai atik pe songon i ingkon paluaon ibana sian i.

30:8 Dung i di ari na sasada i, ninna Jahowa Zebaot, ponggolhononku ma augana sian tangkuhukmu, jala rapuanku angka tali pangihot na di ho, jala ndang be halak ruar marhatobanhon ibana.

30:9 Ingkon Jahowa Debatanasida i oloannasida dohot si Daud rajanasida i, sipatindangonku di nasida.

30:10 Alai anggo ho, ale Jakkob naposongki, unang ho mabiar, ninna Jahowa, jala unang tarsonggot ho, ale Israel; ai ida ma, ahu paluahon ho sogot sian luat na dao dohot pinomparmu sian tano habuangannasida; jala ingkon mulak Jakkob marnalom ni roha jala marsonangsonang, jala ndang adong nanggo sahalak na manonggoti.

30:11 Ai ahu do donganmu, ninna Jahowa, laho paluahon ho; ai sun siap do bahenonku saluhut bangso parbegu haambolonganmu na hubahen i na sai laon, alai anggo ho ndang siap bahenonku; ingkon pinsangonku do ho nian hombar tu uhum, jala ndang tarbahen so toruanku ho.

30:12 Ai songon on do hata ni Jahowa: Tung na targisik do bugangmu, jala bernit situtu torutoru na niaemi.

30:13 Ndang adong nanggo sahalak na mangondihon ho di paruhuman laho pauliulihon bugangmi, jala ndang adong taoar pamalumhon bugangmi.

10.   Koor: Parompuan

11.   Tangiang Pangondian: (Pdt. Hotman Sitorus)

  

12.   Marende BE. No. 677: 1 Mansai Lambok G=Do

Mansai lambok Tuhan Jesus manjou manjou ho dohot au

Ida Ibana paima haroromu mulak ma ho dohot au

Antong sai ro ma ho, angka na sorat sai ro ma ho.

Mansai lambok Tuhan Jesus manjou, pardosa mulak ma ho.

13.   Jamita: Jeremia 3: 23b (Pdt. Nikson Simangunsong)

14.   Papungu Pelean

L    :  Tapapungu ma peleanta songon parbue ni haporseaonta, huhut marningot sude denggan basa naung itajalo sian Debata. Taingot ma hata ni Debata na tarsurat di Rom 11:36 na mandok: Ai sian Ibana do saluhutna ro, marhitehite Ibana jala marhapatean tu Ibana do saluhutna i! Di Ibana ma hasangapon salelenglelengna! Antong di bagasan las ni roha, itapasahat ma peleanta marhitehite ende pujian.

H   :  Marende BE. No. 691: 1 – Hupasahat ma tu Jesus Es=Do

Hupasahat ma tu Jesus saluhutna ngolungki

Roha nang pambahenanku, saluhutna tingkingki

Ref.      Hupasahat ma tu Jesus, saluhutna diringki

            Hupasahat ma tu Jesus, saluhutna ngolungki.

Pangkeonku ma tanganku, mangula lomo-Na i,

Langka nang simanjojakku, mangihuthon Tuhanki.

Ref.      Hupasahat ma …

Nang pamereng ni matangku, mandompakkon Jesus

Soara ni pamanganku, mamuji goar-Na i.

Ref.      Hupasahat ma …

Dung huida Tuhan Jesus, hutundalhon dosangki,

Lohot rohangki tu Jesus, sipalua tondingki

Ref.      Hupasahat ma …

Tarhalomong do rohangku dipandok ni Tuhanku,

Aleale ni Tuhanku, au di goar Jesus i.

Ref.      Hupasahat ma …

Mauliate ma rohangku, ala au hinonghop-Mi,

Pujionku ma goarMu, salelenglelengna i.

Ref.      Hupasahat ma …

15.   Parsuruon

L    :  Debata parasiroha jala pardenggan basa i ma na paborhathon hita laho marhobas di ragam ni angka pangulaonta di taon 2019 on. Ndang tarula hamu agia aha, anggo so mardonganhon Ahu, ninna Tuhan i. antong jalo hamu ma lombulombu haporseaon i, haintopan hamu do marhite sian i sude sumbia api ni parjahat i. Jangkon hamu ma nang tahuluk haluaon, dohot podang ni tondi, i ma hata ni Debata.

H   :  Gomos do ditiop rohangku, ndang tarbahen sirang hita sian holong ni roha ni Debata, na di bagasan Kristus Jesus Tuhanta i, ai Ibana do na maniop ahu di bagasan ngolungku.

L    :  Antong, binsan sadihari dope, taulahon ma na denggan tu saluhut halak, asa ndada be hita na mangolu nuaeng, alai Kristus do na mangolu di bagasan hita. Asa marparange na denggan hita di bagasan ngolunta.

16.   Tangiang Panutup dohot Pasupasu

L   :  Ale angka dongan, tongkinnari, naeng simpul ma partangianganta sadari on, alai pos ma rohanta, ianggo asi ni roha ni Debata, hot do i ro di saleleng ni lelengna. Debata do na mandongani ahu, Debata do na mandongani hamu, Debata do na mandongani hita saluhutna.

H   :  Pos do rohanami, Jahowa do na mandongani hami, patariparhon hami, huria nang bangso-Na mandalani taon 2019 naung pinasahat ni Debata tu hita.

L    :  Molo pos do rohanta dipandonganion ni Jahowa, jaloonta ma pasupasu-Na di tongatonga ni ulaonta, di tongatonga ni keluarga, di tongatonga ni lingkunganta, songon i nang di tongatonga ni bangsonta. Ai di dok do di hata-Na i: “Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate”.

H   :  Sai saut ma na pinarbaga-Mi ale Tuhan, jaloon nami ma gogo sian Ho, di na mandalani taon 2019 on hami. Sai pasupasu ma hami, keluarga nami, lingkungan nami songon i nang bangso nami, laho patulushon lomo ni rohaM di tongatonga ni portibi on.

L    : Rap ma hita mandok Tangiang Hatopanta i…..Antong jalo hamu ma pasupasu sian Debata:

H   :  (Mangendehon:) Amen, amen, amen.

III.       KATA-KATA SAMBUTAN (Protokol: Ny. Silalahi br. Simangunsong)

1.      Panitia-Seksi Parompuan (Ny. Sibarani br. Tambunana)

2.      Mewakili Ina Hanna (Ny. St. Lumbantobing br. Simanjuntak)

3.      Mewakili Parompuan (Ny. Sirait br. Silalahi)

4.      Mewakili Ruas Parompuan (Ny. St. Sitanggang br. Siregar)

5.      Dewan Koinonia (St. M. Gaja, S.Pd)

IV.       BIMBINGAN

Sian Pdt. Jeffry Sitindaon (Pendeta Resort)

V.     PANORTORON          

VI.   MARSIPANGANON

Tangiang jumpa mangan (Pdt. N. Simangunsong)

VI.       PANUTUP