ADVENT NA PARJOLO (Taon Baru Parhuriaon)

PARTORDING

NI PARMINGGUON

ADVENT  NA PARJOLO

(Taon Baru Parhuriaon)

Minggu, 2 Desember 2018

Tema:

“Managam haroro ni Sipalua”

(4 Musa 24: 15-17)

HKBP Pondok Gede

Jl. Perumahan Taman Pondok Gede Blok H No.1-3

Pondok Gede RT 04 RW 01 Kelurahan Jatirahayu

Kecamatan Pondok Melati Kota Bekasi

Provinsi Jawa Barat

Telp. (021) 8467284

1. Joujou tu Parsaoran Dohot Manggalahi Lilin Advent Na Parjolo

U:        Selamat Advent ma di hita! Huria ni Tuhanta, nunga taripar hita tu Minggu Taon Baru Parhuriaon, Advent na Parjolo. Lapatanna HARORO, manang managam harororo ni Tuhan i. Alani i di bagasan las ni roha ma hita marsaor di Minggu Advent na Parjolo on. Minggu Advent paingothon hita asa hobas managam haroro ni Tuhan i. Antong tatomu ma Ibana marhite na mangendehon BE. No. 45: 1 “Hosianna anak ni”

H:         (Magendehon:) BE. No. 45:1 Hosianna Anak ni, raja David  BL.73 Bes=Do

            Hosianna Anak ni, Raja David ro tu hita.

            Baen ture dalanna i, asa bongot tu rohanta.

            Baen ma gabagaba i, di Tuhanta na ro i.

U:         Nunga ro Ibana najolo tu portibi on marhite hatutubu-Na di Betlehem, i ma na itahalashon.

H:         Alai na maimaima do hita di haroro-Na paduahalihon laho manguhum portibi on dohot mangapuli na porsea di Ibana.

U:       Minggu Advent na Parjolo, paingothon hita di hapapatar ni bagabaga ni Debata di Padan na Robi taringot tu haroro ni Jahowa songon Ama, marhite haroro ni Tuhan Jesus paluahon jolma pardosa. Ro Ibana mamboan uhum songon na nidok ni Tema Minggu on: “Managam haroro ni Sipalua.” Alanii, itajangkon ma Ibana! Songon tanda ni hahobasonta managam haroro-Na i, galahanta ma lilin Advent na parjolo (Uluan manggalahi Lilin Advent I). Marende ma hita!

2. Marende SDJ. No. 590: 1, 3-4 Advent Es=Do

1.      Advent i do di tingki on marsaringar di tano on.

Ingkon rade oroan i managam Sipalua i

Advent, Advent, na ro ma Tuhan i, antong tagam ma.

3.     Advent di tonga borngin do, dungo so tung laos tarpodom ho.

Tompu so panagaman do, songon panangko borngin ro.

Advent, Advent, na ro ma Tuhan i, antong tagam ma.

………. Musik ………. (jongjong)

4.     Advent, advent, advent, advent martua do oroan-Na i.

Na bisuk na marroha i, marulos hatigoran i

Advent, Advent, na ro ma Tuhan i, antong tagam ma.

3. Votum Introitus

U:        Marhitehite Goar ni Debata Ama, dohot Goar ni Anak-Na, Tuhan Jesus Kristus dohot Goar ni Tondi Parbadia na tumompa langit dohot tano on. Amen. Marolopolop ma ho jala marlas ni roha, ale boru Sion, ai ida ma, na ro ma Ahu maringanan di tongatongam i, ninna Jahowa. Haleluya!

H:        (Mangendehon:) Haleluya, haleluya, haleluya!

U:       Ale Tuhan Debata, Pargogo na so hatudosan, na tumompa langit dohot tano, hinorhon ni asi ni rohaM do umbahen sahat hami tu taon Huria na imbaru on. Lehon ma tu HuriaM TondiM na badia i dohot hamaloon sian Ho, asa lam rarat jala ganda harajaon-Mu di tongatonga ni hami on. Sai lehon ma hiras ni roha tu naposoM mangkatahon HataM, asa lam denggan HuriaM marhite sian i. Pargogoi ma hami mangoloi Ho di bagasan haporseaon na tongtong, asa manahan hami sahat ro di ujungna marhitehite Anak-Mu Jesus Kristus Tuhannami.

U+H:   Amen. (Hundul)

4. Marende BE. No. 42: 1-2  Hamu sude naung tinoruan BL.216 As=Do

1.    Hamu sude naung tinoruan ni patik ni si Musa i.

       Sai ro hamu tu hasonangan na di bagasan Jesus i.

       Ai nunga ditostosi Jesus do ihotihot ni sibolis

       Na mangagohon  tondimi. Dapothon ma nuaeng Tuhanmu,

       Naung ro mambaen haluaonmu, papos ma rohami disi.

2.    Na ro ma Gurumi, tarehon pinggolmu tu poda-Na i.

       Naeng patuduhonon-Na dalan di ho nuaeng tu surgo i.

       Ai na buni anggo na jolo, patar do di sude na olo

       porsea di Tuhanta i. Ibana do na paboahon

       Saluhut na hinalomohon ni Debata, Ama-Na i.

5. Patik

U:    Tangihon hamu ma Patik ni Debata! Sian Konfessi HKBP taon 1996 Bindu 16 HARORO NI TUHAN I. Tahaporseai jala tahatindanghon do:

H:   Na ro do Tuhan Jesus paduahalihon papatarhon Jerusalem na imbaru i, songon hapataran ni hasangapon dohot hamuliaon ni Debata.

U:      Disi ma marujung hasiangan on. Ndang adong na umboto sadihari ombas ni haroro-Na i.

H:      Ala ni i ingkon hobas jala dungo do na porsea i di bagasan hasatiaon dohot panghirimon di haroro-Na i, ai disi ma masa uhum dohot asi ni roha-Na

U:      Marhite poda on, taharingkothon do mamangke tingki ni ngolunta on songon tingki parasian dalan manomunomu haroro ni Tuhan i.

H:      Tatulak do bangko na sai manguji mamilangi dohot manontuhon ari haroro ni Tuhan i paduahalihon. Songon i dohot pingkiran na mandok na so adong ujung ni hasiangan on.

U:      I ma sahatna. Antong rap mangido gogo tu Tuhan Debata laho mangulahon patik-Na!

U+H:     Ale Tuhan Debata, sai pargogoi ma hami mangulahon na hombar tu Patik-Mi.

H:      Amen.

6. Koor: 06.00 WIB Parompuan ; 09.00 WIB Ina Hanna

7. Marende BE. No. 39: 1-2  Beha ma panjalongku. BL. 156 C=Do

1.       Beha ma panjalongku di Ho o Tuhanhi?

          Beha ma panomungku di Ho o rajangki?

          Sondangi ma rohangku na holom na bodo.

          Ai naeng patupaonhu las ni rohaM di Ho.

……….. (jongjong) ………..

2.       Pangisi ni Sion-Mu do mangolophon Ho.

          Laos songon i rohangku lao mandapothon Ho.

          Na ringgas do rohangku mamuji goar-Mi.

          Na daulat do sangkaphu patulus roha-Mi.

8. Manopoti Dosa

U:     Tatopoti ma dosanta! Ale Tuhan Debata, Pargogo na so hatudosan jala Ama Parasiroha! Ndang lomo rohaM mida hamatean ni pardosa; mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen hupangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhannami. Amen.

H:     (Mangendehon:) SDJ. No. 677: 1  Mansai lambok G=Do

                                                 Mansai lambok Tuhan Jesus manjou, manjou ho dohot au,

                 Ida Ibana paima haroromu mulak ma ho dohot au.

                 Antong sai ro ma ho angka na sorat sai ro ma ho,

                 Mansai lambok Tuhan Jesus manjou pardosa mulak ma ho.

U:     Tabege ma hata bagabaga taringot tu hasesaan ni dosa. Songon on do panghaholongi ni Debata di portibi on, pola do Anak-Na na sasada i dilehon, asa unang mago ganup na porsea di Ibana, asa hangoluan na saleleng ni lelengna di ibana. Hasangapon ma di Debata na di ginjang!

U+H:     Amen. (hundul)

9. Koor:   06.00 WIB Ama Sion ; 09.00 WIB Immanen

10. Marende BE. No. 41: 1-2  Parripe ni Tuhanta BL. 153 F=do       

1.    Parripe ni Tuhanta sai hehe ma hamu.

       Sai jangkon ma Rajanta marroha na burju.

       Girgir ma hita be marende di Ibana.

       Manjouhon Hosianna, burju ma sasude.

2.    Hamu na marsak roha jonok do Raja i.

       Na ro mangapul roha ni nasa na tungki.

       Torop nuaeng tahe inganan hasonangan,

       I ma partangiangan ni na porsea i.

11. Manjaha Epistel

U:     Tabege ma Hata ni Debata turpuk ni ari Minggu on.  Sian Pangungkapon 22: 16-20 Ahu, Jesus, marsuru surusuruanku, mangkatindangkon tu hamu angka on, mandapothon angka huria i. Ahu do urat dohot marga ni David, bintang sipaias na marsinondang i!

H:      Jadi didok Tondi dohot oroan i: Ro ma Ho! Laos dohonon ni na umbegesa: Ro ma Ho! Sai ro ma na mauas; dijalo na giot roha i ma aek hangoluan i, dalan basabasa!

U:    Ahu mangkatindangkon di ganup, na umbege angka hata panurirangon ni surat on: Ia adong na manambai tusi, tambaan ni Debata ma tu ibana angka haporsuhon, na tarsurat di bagasan buku on.

H:      Jadi molo adong na mamuati angka hata ni buku panurirangon on, buatan ni Debata ma tohapna na di hau hangoluan dohot di huta na badia i, angka na tarsurat di bagasan buku on.

U:      Didok Ibana na mangkatindangkon on; Olo, na ro ma Ahu tibu! Amen; ro ma Ho, ale Tuhan Jesus! I ma sahatna. Martua do angka na tumangihon Hata ni Debata, jala na umpeopsa.

S:      Amen.

12. Koor: 06.00 WIB Wijk 3 ; 09.00 WIB Ama – Wijk 1

13. Marende SDJ. No. 593: 1-2 Na Hinirim na sai laon F=Do

1.      Na hinirim na sai laon, Jesus Kristus ro ma Ho.

          Sian dosa, hatahuton sai palua hami on.

       Ho do gogo sihaposan, panghirimonnami i.

       Angka bangso saluhutna, paima bagabaga-Mi.

………… (Jongjong) …………

2.     Ro ma Ho palua hami, bangso na pinillit-Mi.

       Ro ma Ho rajai ma hami salelenglelengna i.

       Sai tumpahi hami monang marhitehite tondiM.

       Boan hami tu na sonang, ala ni panghophop-Mi.

14. Manghatindanghon Haporseaon

U:      Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

H:      Ahu porsea…

15. Warta Jemaat

16. Marende BE. No. 45:1…Hosianna anak ni raja David  BL.73 Bes=Do

      (Pelean Ia-Ib)

1. Hosianna! Anak ni Raja David ro tu hita.

     Baen ture dalan-Na i asa bongot tu rohanta.

     Baen ma gabagaba i di Tuhanta na ro i.

2.  Hosianna! Ro ma Ho tu bagasan rohanami.

     Na manomunomu Ho ale Jesus Tuhannami.

     Las do rohanami i  molo bongot Ho tusi.

………… (musik) …………

3. Hosianna! Raja ni hadameon, Ulubalang.

     Nasa na binoan-Mi, dame dohot hasonangan.

     Hami na hinophop-Mi do nampuna i sude.

4. Hosianna! Tatap ma hami na nirajaan-Mu.

     Togu ma tu Debata hami angka sisean-Mu.

     Sai sungguli hami on mangoloi hataM tongtong.

………… (musik) …………

5. Hosianna! Saut ma baen bagabaga ni Jahowa.

     Nang buni dope nuaeng hasangapon-Mi di jolma.

     Angka na porsea i do mananda gogo-Mi.

6. Hosianna! Pargogoi hami sasude o Tuhan.

     Asa gabe pangoloi hami na di pardangolan.

     Di hataM na denggan i, asa pinatulus i.

………… (musik) …………

7.       Hosianna! Anak ni Debata na gabe jolma.

          Topot ma huria-Mi asa sai tongtong martua.

          Sangap ma di goar-Mi salelenglelengna i.

17. Jamita: 4 Musa 24: 15-17

18. Marende BE. No. 539:1…Sai hutagam do Tuhanku BL.371 G=Do

(Pelean II)

1. Sai hutagam do Tuhanhu, sai masihol rohangki

Di haroro ni Tuhanhu songon na nidok-Na i.

Sai mardongan olopolop huriaM managam ho,

Maranata ro o Tuhan, amen, sai tibu ma ro.

2. Las ni roha ndang hapalang do manggohi rohangki.

Dung binege soara-Na di na ro Tuhanta i.

Sai mardongan olopolop huriaM managam ho,

Maranata ro o Tuhan, amen, sai tibu ma ro.

………… (musik) …………

3. Sai rade ale tondingku, tagam panjouon-Na i.

Sai tu langit an manomu, ho di Jesus Tuhanmi.

Sai mardongan olopolop huriaM managam ho,

Maranata ro o Tuhan, amen, sai tibu ma ro.

4. Ai tagamon nunga borhat Ho Tuhanhu sian i.

So tung unang au tarlalap, tading di na rodop i.

Sai mardongan olopolop huriaM managam ho,

Maranata ro o Tuhan, amen, sai tibu ma ro.

………… (musik) …………

19. Baptisan Kudus

            1. 146: 1-2 O Jesus naeng tardidi BL. 6  Es=Do

            2. 147: 6 Jesus hami ro dison BL. 78 As=Do

           

20. Tangiang Pelean

U: Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

H: (mangendehon:) SDJ. No.848: 1  Dison adong huboan Tuhan

                 Dison adong huboan Tuhan, parbue ni ngolungku na so tardok nian.

                 Sadia ma argana Tuhan molo sai ni rajuman sude denggan basaM?

                 Jalo ma Tuhan, sai las ma rohaM.

U: Tapuji Ibana Tuhan Sipalua hita, na ro mamboan hatiuron tu ngolunta, jala taulahon ma hata dohot patik-Na.

H: Nuaeng marpadan ma hita di jolo ni Tuhan i laho mangundukhon na patut sibahenonta songon tanda ni pangoloionta dohot haradeonta manjanghon Ibana. Mangihuthon si Johannes, tanda ni haradeonta manjanghon Ibana:

U: ”Pauba hamu ma rohamuna ai nunga songgop harajaon banua ginjang i”. Paubahon roha, i do parbue ni haporseaon dohot haradeon manjanghon Kristus, hombar tu joujou ni si Johannes Pandidi, “Parbuehon hamu ma na tama, paboa naung muba roham”. Parbue na tama na niigilna sian hita i ma mamarangehon lomo ni roha ni Tuhan i. Antong borhat ma hita mamarangehon Hata i, itapasahat ma sondang hatiuron i tu tongatonga ni portibi on.

H: (mangendehon:) BE. No. 204:2   Ndang Tadingkononhu Ho   BL. 73

Nasa na nilehon-Mi Tondi ro di pamatanghu,

Hosa dohot gogongki ro di saluhut artanghu,

Hupasahat i tu Ho na so unsatonhu do.

U: (Tangiang di ari pesta dung salpu marjamita hal 139. No.1)

     Ale amanami na di banua ginjang…

H: (mangendehon:) Ai Ho do nampuna harajaon dohot hagogoon ro di hasangapon saleleng ni lelengna. Amen!

U: Dipasupasu jala diramoti Tuhan Debata ma ho...

U+H: (mangendehon:) Amen, amen, amen.

Seluruh Parhalado dan Ruas ni huria HKBP Pondok Gede

Pasahathon: Selamat Advent