ACARA IBADAH PERAYAAN NATAL GABUNGAN

ACARA IBADAH PERAYAAN NATAL GABUNGAN

(AMA, PAROMPUAN, LANSIA)

HKBP PONDOK GEDE RESORT PONDOK GEDE

DISTRIK XIX BEKASI

Sabtu, 22 Desember 2018

Tema:               Mamaritahon Taon Parasinirohaon ni Tuhan i 

(Lukas 4: 19)

I.    Prosesi: Pendeta, Parhalado, dan Panitia

II.   Kata Sambutan: Ketua Panitia Natal

III. Ibadah

1.  Tabe Dohot Joujou tu Ibadah Natal

L:    Hamu saluhutna huria ni Tuhanta nahinaholongan di bagasan Goar ni Tuhan Jesus Kristus! Na marpungu do hita di borngin on laho mamestahon huhut manghalashon Pesta Parningotan di Ari Hatutubu ni Tuhan Jesus Kristus, Sipalua i. Alani i mangasahon Goar ni Tuhan Jesus, hupasahathami ma tu hamu saluhutna: Selamat Natal ma di hamu saluhutna!

H:    Selamat ari Natal ma nang di hamu saluhutna parhaladonami. Sai dipargogoi, diparrohai jala dipatau Tuhanta Raja ni Huria i ma hamu saluhutna manghobasi Huria-Na on, suang songon nang hami saluhutna ruas ni huria, lam sada ma rohanami mangihuthon Kristus Tuhan i. (huhut masijalangan tu siamun hambirangna mandok selamat natal di hamu na hinaholongan ni Debata)

L:    Tapuji ma Debata Ama, naung mangalehon Anak-Na Tuhan Jesus Kristus na gabe jolma humophop hita, laho paluahon hita sian hamagoan dohot sian dosa. Alani i tabaritahon ma hatutubu ni Kristus i, na ro mamboan hadameon, haluaon, dohot ragam ni pasupasu tu hita huria-Na. Marende ma hita tapangiarma soaranta!

H:    Marende BE. No. 57: 1+3   Nunga jumpang muse ari pesta i BL.202 C=Do

1.      Nunga jumpang muse ari pesta i, hatutubu ni Tuhanta Jesus i.

Tuat do Ibana sian surgo i mebat tu hita on;

Hasangapon di Debata, dame dame ma di jolma

Las ni roha ni Debata hajolmaon muse.

……………… (musik) ………………

3.    Sombanami ma di Ho na tubu on, Ho siboan dame tu portibi on,                      (jongjong)

        Sai pasaorhon ma tu rohanami on dame-Mi o Jesus.

        Hasangapon di Debata, damedame ma di jolma,

        Las ni roha ni Debata hajolmaon muse.

2.  Votum - Introitus

L:    Marhitehite Goar ni Debata Ama, dohot Goar ni Anak-Na Tuhan Jesus Kristus dohot Goar ni Tondi Porbadia na tumompa langit dohot tano on.

H:    Amen

L:    Patuginjang ma tohangmuna, hamu ale angka harbangan, patuginjang ma hamu, ale angka pintu sian na robi, asa bongot Raja ni hamuliaon i.

H:    Ise ulanging Raja ni Hamuliaon i; i ma Jahowa  na gogo jala ulubalang, Jahowa Ulubalang ni hamusuaon.

L:    Patuginjang ma tohangmuna, hamu ale angka harbangan, jala patuginjang ma hamu,  ale angka pintu sian na robi, asa bongot Raja ni hamuliaon i.

H:    Ise ulaning Ibana, Raja ni Hamuliaon i? I ma Jahowa Zebaoth, Ibana do Raja ni hamuliaon i. Ibana naung ro manopot hajolmaon, napaluahon hita sian huaso ni sibolis.

L:    Ai naung tubu do di hamu saborngin on di huta ni si Daud Sipalua i, i ma Kristus Tuhan i, Ibana do Raja, napaluahon hita sian dosa.

H:    Nunga ditopot Debata hita na di pardangolan on, Nunga dipadiri Debata hita gabe bangso naniasian-Na, dipasupasu hita asa gabe pasupasu tu saluhut natinompa-Na i, antong tapareahi ma hasadaon ni roha; tapasangap ma Debata marhite hata nang parulaonta, asa marsangap Debata jala marmulia Goar-Na na sun timbul i di angka na humaliang hita.

L:    Iale Jahowa huhalashonhami do panopoton-Mu di hami borngin on, na huhalashon hami marhite pesta Natal di huriaM on, bahen ma hami siboan pasupasu  jala tiruan tu na humalianghami. Haleluya!

H:    (Mangendehon:) Haleluya, haleluya, haleluya.

L:    (Martangiang ma hita:) Ale Debata Amanami, Ama ni Tuhan Jesus Kristus, na tubu di Betlehem. Sai pinuji ma goar-Mu na badia i ala naung ditingkir Ho hami bangsoM. Ditogutogu Ho do hami bangsoM sian haholomon tu hatiuron, jala dipadomu Ho do hami sian na holang hian sian Ho, gabe saor muse dohot Ho. Gok halalas ni roha do hami alani i, sai jalo ma hamauliateon ni rohanami, naung tinopot-Mu marhitehite Anak-Mi.

H:    Amen.

3.  Marende SDJ. No 605: 1 + 4  Las ma roham D=Do                 (hundul)

1.        Las ma roham Tuhanta ro, gumonggom sasude,

Ungkap roham, jangkon rajam,

Marende ma sude, marende ma sude, marende, marende ma sude.

4.        Ibana do Rajanta i, Parasiroha i, na tigor i, na bonar i,

Parholong roha i, parholong roha i, parholong, parholong roha i.

4.  Patik ni Debata

L:    Patik ni Debata di hita di pesta natal on i ma natarsurat di Epesus 5: 8-10. Ai na holom do hamu najolo; alai tiur do anggo nuaeng di bagasan Tuhan i; marparange ma hamu songon angka anak hatiuron.

H:    Ai nasa habasaon dohot hatigoran dohot hasintongan, ido parbue ni natiur i.

L:    Tangkasi hamu ma manang dia lomo ni roha ni Tuhan i. I do sahatna! Antong rap mangido gogo ma hita tu Debata:

L/H: Ale Tuhan, sai pargogoi ma hami mangulahon na hombar tu patik-Mi. Amen.

5.  K O O R:  Lansia

6.  L I T U R G I  I  (Taringot tu hatotompa ni portibi on)

Prolog:     Ida ma, haholomon manghuphupi tano on, alai Debatanta mangalehon panondang asa gabe tiur. Ala ni parrohahon ma na tinompa ni Debata na mangalehon hasonangan dohot pasingkophon ngolum asa marhatiuron jala tau hasangapon di Goar-Na. Ibana do manjadihon nasa na adong, songon on ma panompa-Na.

1 Musa 1: 1 – 30

7.  Marende BE. No.  48: 4 + 7   Ria ma hita sasude BL. 16 F=Do

4.    Sitompa nasa na adong, sigomgom sasude,

       Ro songon i tu tano on; manaon na porsuk i,

       Manaon na porsuk i.

7.    Ringgas ma hita sasude mamuji Debata,

       Gogoma taendehon be, amen haleluya,

       Amen haleluya.

8.  L I T U R G I  II  (Ndang margogo jolma i marsihohot di hatani Debata, gabe madabu nasida tu bagasan dosa)

Prolog:     Dung denggan dibereng Debata sude natinompa-Na i, dipasahat ma tu jolma i na ditompa-Na tumiru rupa-Na, laho mangarajai natinompa-Na i. Alai diela sibolis, i ma ulok i do jolma i gabe mardosa. Alani i didabu Debata ma uhuman tu jolma i.

1 Musa 3: 1-13;    1 Musa 3: 16-17;    1 Musa 3: 23-24;    1 Musa 6: 5-7

9.  K O O R:  Wijk III, Wijk VI

10.  Marende  BE. No  61: 2-9   Na tau las ni roha BL.2 F= Do

2.        Tung godang do dosa, pangunjunan pe,

Mangarsahi hita paima mate be,

Mangarsahi hita paima mate be                        

…………… (jongjong) ……………

9.        Sai ditatap Jesus sian surgo i,

Jolma manisia tinobus-Na i,

Jolma manisia tinobus-Na i.

11.  Tangiang Manopoti Dosa dohot Mangido Asi ni Roha ni Debata

L:    Tatopoti ma dosanta:  Ale Tuhan Debata Amanami na di banuaginjang. Ho do patupahon hasesaan ni dosa di hami halak na dangol on marhitehite Anak haholongan ni rohaM.

H:    Sai asi ma roham di hami angka na mangarsakhon dosanami. Sai sahapi ma tu bagasan rohanami hasesaan ni dosanami.

L:    Lehon ma tu hamiTondiM na badia i asa unang ganggu rohanami di asi nirohaM, alai asa hot rohanami marhaporseaon laho manggotaphon nasa dosa dohot roha portibi on.

H:    Najotjot do hami paihutihut roharohanami, sipata ndang boi huoromhami dirinami, gabe olo hami manghatahon na so toho, mangelaela dongan asa manghasogohon dongan jotjot hupaburnanghami dirinami, ale Tuhan asi ma roham di hami.

L:    Marungkil do hami di pardalanan ni ngolunami on,  godang na so huantusi hami pambahenan-Mu di ngolunami, gabe jotjot gok mabiar hami. Ale Tuhan, sai pahotma haporseaonnami, patogu nang panghirimonnami asa monang hami maralohon saluhut na manosak ngolunami. Sai ajari ma hami mananda lomo ni roham asa hupasahathami dirinami tu Ho, gabe pelean na mangolu jala na badia marhitehite Tuhan Jesus Kristus.

H:    (mangendehon:  BE. No.182: 3-4 Haholongan na badia BL.24 Bes=Do):  

3.        Sai jotjot do hutadingkon dalan-Mi na tigor i,

           Kristen au hape hutondong dalan hamagoan i

4.        Ala ni tungki rohangku jongjong di adopan-Mi,

           Sai asi roham Tuhanku sesa nasa dosangki,

L:    Bagabaga ni Debata taringot tu hasesaan ni dosa: Songon on do hata ni Tuhan Jahowa, nunga pola Hu-pasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu di Sipalua ho. Hasangapon ma di Debata na di ginjang!

H:    Amen.               (hundul)

12.  K O O R: Wijk I, Wijk V

13.  Epistel Jesaya 9: 1-6; Jeremia 23: 5-6

L:         Hata ni Debata turpuk di pesta natal on, sian Jesaya 9: 1-6; Jeremia 23: 5-6; Bangso namardalani di bagasan haholomon i, marnida sada panondang na bolon. Binsar do sada panondang di angka namangingani tano linggoman ni hamatean.

Wijk  I:   Nunga dipatorop Ho bangso i, nunga dipadiri Ho di ibana halalas ni roha bolon; marlas ni roha ma nasida di jolo ni bohiM, songon las ni roha di gotilon, songon parolopolopon di namarbagi tabantaban.

Wijk II:   Ai nunga diponggolhon Ho auga na ampe tu ibana, dohot batahi ni abarana dohot linsinglinsing ni namangadu ibana, songon uju di ari Midian.

Wijk III: Ai masoksok do sogot sinjata ni parsinjata di hatuturtar ni tongtangan, ro di ulon na marsapu mudar, gabe sipanganon ni api.

Wijk IV: Ai nunga tubu di hita sada posoposo, dilehon tu hita sada Anak, pampe tu Ibana do sogot harajaon, jala bahenonna Goar-Na: Sipartahi Halongangan, Siulubalang ni Debata, Ama saleleng ni lelengna,  Raja ni Hadameon.

Wijk V:          Bahen hagaganda ni harajaon dohot hadameon na so marujung di habangsa ni si David dohot di harajaon-Na i, pahothon dohot patoguhon patik dohot hatigoran, olat nion ro di salelenglelengna, Hamuruhon ni Jahowa patupahon  songon i.

Wijk VI:  Ida ma, na ro do angka ari sogot, ninna Jahowa. Patindangon-Ku ma di si David sada tumbur na tigor, na bangkit Raja jala napistar; jala hajongjongkonon-Na ma uhum dohot hatigoran di tano i.

Sude Ruas: Di angka arina dapotan tua ma Juda, jala Israel marsonangsonang di ingananna; jala  on do goar-Na dohonon ni halak: Jahowa Parpintoranta.

L:         I ma sahatna. Martua ma angka natumangihon hata ni Debata jala naumpeopsa.

Sude Ruas:   Amen.

14.  L I T U R G I  III (Dilumbahon Debata bagabaga-Na)

Prolog:     Alai nang pe songon i uhum ni Debata, tong do didatdati jolma i mardosa, ndang parduli nasida di hasintongan. Disuru Debata pe panurirang-Na, manghatahon hasintongan, ndang ditangihon nasida. On ma hinajorbut ni pangalaho ni jolma di bagasan dosa.

Jesaya 59: 3-4; Jesaya 59: 7-8; Psalmen 107: 17-18; Psalmen 107: 26-27

Psalmen 107: 33-34; Psalmen 107: 39-40

15. K O O R:   Wijk II, Wijk IV

16. Marende  BE. No. 56: 1 + 4  Sai ro ma hamuna BL.139 A=Do

1.        Sai ro ma hamuna angka naporsea, sai ro ma hamuna tu Betlehem,

Ida dakdanak Sipalua hita, tasomba ma Ibana, tasomba ma Ibana,

Tasomba ma Ibana Rajanta.

……………… (jongjong) ………………

4.        O Jesus Tuhanku sai nang pujiongku pambaen-Mu di ahu pardosa on,

Ai gabe jolma Ho humokhop ahu, tasomba ma Ibana, tasomba ma Ibana,

Tasomba ma Ibana Rajanta.

17. Manghatindanghon Haporseaon

L:    Tahatindanghon ma haporseaonta i songon panghatindanghonon ni donganta sahaporseaon di sandok portibi on, rap ma hita mandok:

H:    Ahu porsea di Debata Jahowa ............. d.u. (hundul)         

18.  K O O R:   Gabungan Ina Hanna-Parompuan, Ama

19.  L I T U R G I  IV  (Hasasaut ni bagabaga, nunga tubu Jesus)

Prolog:       Didok hata ni Debata: Na so lomo do rohang-Ku mida hamatean ni halak parjahat i, ia so ingkon mida hamumulak ni parjahat i tumadingkon dalanna  nian asa mangolu ibana. Ndang dipasombu Debata jolma mago di bagasan dosana. Songon on ma asi ni roha ni Debata mida angka pardosa dohot bagabaga-Na di haroro ni Jesus Sipalua.

Jesaya 1: 18-19; Jesaya 4: 2-3; Jesaya 54: 7-8; Psalm 103: 2-4;

Psalmen 103: 8-13; Jesaya 7: 14; Jesaya 9: 1-6; Jesaya 60: 1-2; Mika 5: 1

20.  Pagalak Lilin Natal: (diiringi lagu SDJ. No. 616 Uli na i di borngin na badia C=Do)

1. Pandita                                                   5. Mewakili Ina

2. Parhalado/ Paragenda                               6. Mewakili Lansia

3. Ketua Panitia Natal                                    7. Koordinator Sintua Wijk I – VI

4. Mewakili Ama                 

21. Marende  BE. No. 54: 1-3  Sonang ni bornginna i  BL.64 C=Do         (Ruas Jongjong)           

1.        Sonang ni borngin na i, uju ro Jesus i,

Sonang modom do halak sude,

Holan dua na dungo dope;

Mangingani Anakna, Jesus Tuhanta i,

2.        Denggan ni bornginna i, uju ro Jesus i,

Tu parmahan di Betlehem i, dipaboa pardisurgo i,

Nunga ro Sipangolu, Jesus Tuhanta i.

3.        Godang ni Tua disi, di na ro Jesus i,

Tung malua pardosa muse, sian hamagoanna sude,

Ala ro Sipangolu Jesus Tuhanta i.

22.  Tangiang pangondian: Sahalak Sian Panitia Natal

23.  L I T U R G I  V                                                                   (hundul)

Prolog:       Saut do bagabaga ni Debata marhite panurirang-Na, marhitehite hatutubu ni Tuhan Jesus Kristus. Ibana do Debata na gabe jolma humonghop hita.

Mateus 1: 18; Mateus 1: 21; Lukas 2: 1-16

24. FRAGMENT: “Hupang na Mago i” (Lukas 15: 8-10)

25.  K O O R:  Koor Gabungan HALELUYA

26. Marende  SDJ. No. 593: 1…  Na hinirim na sai laon F=Do           (Pelean Ia/b)

1.        Na hinirim na sai laon, Jesus Kristus ro ma Ho.

Sian dosa, hatahuton sai palua hami on.

Ho do gogo sihaposan, panghirimonnami i.

Angka bangso saluhutna, paima bagabaga-Mi. ……………… (musik) ………………

2.        Ro ma Ho palua hami, bangso na pinillit-Mi.

Ro ma Ho rajai ma hami salelenglelengna i.

Sai tumpahi hami monang marhitehite tondiM.

Boan hami tu na sonang, ala ni panghophop-Mi. ……………… (musik) ………………

27.  Jamita: Lukas 4: 19  

                    

28.  Marende SDJ. No. 602: 1…  Di Natal na parjolo i  Bes=Do          (P. Pelean II)

1.        Di Natal na parjolo i parmahan marborngin di ladang i.

Tusi do ro suruan i mandok nunga sorang Messias i.

Noel, noel, noel, noel, tubu Raja ni Israel.

2.        Binsar do sada bintang i, di Purba torang sinondangna i.

Tongtong tarida bintang i, arian nang borngin patar do i.

Noel, noel, noel, noel, tubu Raja ni Israel.   ……………… (musik) ………………

3.        Parroha sian Purba i lao borhat manjalahi Raja i.

Paihutihut bintang i, tu huta ni Raja na sorang i.

Noel, noel, noel, noel, tubu Raja ni Israel.

4.        Bintang-Na i na tiur i, mardalan do tu manabia i.

Di Betlehem mansohot i, di atas inganan ni Jesus i.

Noel, noel, noel, noel, tubu Raja ni Israel.   ……………… (musik) ………………

5.        Parroha sian Purba i lao bongot tu bagas ni Jesus i.

Disombahon tu Jesus i haminjon, mas, mir binoanna i.

Noel, noel, noel, noel, tubu Raja ni Israel.

28.  Tangiang Panutup-Tangiang Pelean-Pasupasu.

29. (Mangendehon:) Amen, amen, amen.

Selamat Hari Natal dan Salam Damai