HKBP PONDOK GEDE: BONA TAON WIJK 2

PARTONDING NI

PARTANGIANGAN BONA TAON 2018

KOOR GABUNGAN WIJK 2 DOHOT KOOR JERIKO

HKBP PONDOK GEDE

Kamis, 25 Januari 2018; Pukul 19.00 WIB – sidung

Tema: “…Di Ho do hata hangoluan sisalelenglelengna!”

(Johannes 6: 68-69)

I. PANGARADEON (Protokol : St. R.Ch. Hutasoit)

II. IBADAH

1. Invocatio

L : Tabe ma di hamu di bagasan taon na imbaru on! Nunga salpu sada taon, tung godang do itajalo angka pengalaman na denggan dohot pengalaman na buruk di taon naung salpu i, i do na laho bohal jala parsiajaranta laho mangeahi taon na imbaru. Nunga bongot hita tu taon na imbaru, na dibasabasahon Debata tu hita. Antong ale dongan, itapungka ma taon on di bagasan las ni roha dohot hamauliateon godang tu Debata.

H : Mauliate ma di Ho ale Debatanami, na mangalehon ngolu na tipak di bagasan taon na imbaru on.

L : Dijou Debata do hita laho marsaor dohot Ibana di bagasan partangianganta on, i ma Partangiangan Bona Taon 2018, asa ita jalo sian Ibana hagogoon laho mandalani ariarinta di taon na imbaru on. Antong itapuji jala itapasangap ma Ibana marhite na marende hita.

2. Marende BE. No. 15: 1-2 Aut na saribu hali ganda BL.103 F=Do

Aut na saribu hali ganda saringar ni soarangki

Naeng nasa gogo bahenonku, mamuji Debatanta i.

Paboa las ni rohangki hinorhon ni pambaenNa i.

Tung sura sahat soarangku tu ujung ni portibi on,

Naeng nasa jolma haraonku mamuji Debata tongtong

Tama do nasa hosangki hubaen pasangap Tuhan i.

3. Votum~Introitus~Tangiang

L : Marhitehite Goar ni Debata Ama!

H : Na manompa jala na manjadihon hita dohot sude nasa na adong di portibi on.

L : Dohot Goar ni AnakNa Tuhan Jesus Kristus!

H : Na mangalehon hangoluan na imbaru di bagasan ngolunta, na manobus hita sian sude dosanta marhitehite mudarNa. Ibana do Tuhanta na ro tu portibi on, asa malua hita sian gomgoman ni sibolis, nang na ro paduahalihon di ari sogot, laho manguhumi sude nasa na marhosa.

L : Dohot goar ni Tondi Parbadia!

H : Ibana do na padomuhon hita di bagasan parsaoranta sadari on. Ibana do na mangajari hita jala na mangalehon apulapul di bagasan hagogotan. Jala Ibana do na manogunogu dohot mangalehon gogo na imbaru di bagasan ngolunta.

L : Na manompa langit dohot tano on!

H : Amen, hupuji ma goarMu ale Tuhan!

L : “Unang hamu mabiar!” ninna Jahowa sitompa saluhut. Ida ma, Ahu paluahon bangsongKu sian tano tungkan habinsaran dohot sian tano tungkan hasundutan ni mata ni ari

H : Marende BE. No. 69:1 Ungkap bahal na ummuli BL.84 C=Do

1. Jesus sai urupi hami, dohot di taon baru on
Paimbaru gogonami, mangihuthon Ho tongtong
Pasupasu ma muse, na porsea sasude

L : Ai laho do songot pangisi ni huta na sada tu na sada nari mandok: Beta hita rap marsomba tu bohi ni Jahowa, jala mangalului Jahowa Zebaot! Ahu pe naeng dohot do laho tu si.

H : Marende BE. No. 69:2 Ungkap bahal na ummuli BL.84 C=Do

2. Pingkiranku ulaonku, tau pasangap Ho ma i
Dungo manang modom ahu,

Ho tongtong di lambungki
Nang lao ruar masuk pe, Ho ma donganki muse.

L : Di jolo ni angka ari on, pagomos hamu ma tanganmuna. Ai bahenonku ma hamu gabe pasupasu tu saluhut bangso, asa gabe bangsongku nasida, jala Ahu gabe Debata nasida. Songon hamu di bagasan Ahu, songon i ma nang nasida di bagasan Ahu.

L : Martangiang ma hita! (ida Agenda)

4. Koor : Jeriko

5. Marende SDJ. No. 712: 1 Tagu au ale Jahowa G=Do

Togu au ale Jahowa di dalan na rodop on

Ho do na tongtong satia togu au na gale on.

Sagusagu hangoluan sai pabosur tondingkon

Sai pabosur tondingkon!

6. “Pangkirimon di taon na imbaru”

L : Molo tarimangi pardalananta di bagasan taon naung salpu i, godang situtu do angka na masa manipat angka ari. Mardalan hita di bagasan ngolu na gok ondamondam, gok biar rohanta mangadopi sude angka na masa. Adong dope hasonangan di ari marsogot? Manang na ingkon mangolu do hita di bagasan hatahutan!

H : Ale Tuhan, asi ma rohaM, togu ma hami saleleng di hasiangan on.

L : Gabe sejarah ma taon 2017 di tongatonga ni bangsonta. Bencana alam, kekacauan dohot sude angka na masa, gabe sada gambaran di hita asa tapareahi dirinta ganup. Nang pe songon i, sipata lomos do rohanta, aha do na naeng masa di tongatonga ni bangso Batak songon i di bangso Indonesia na huhaholongi hami on?

H : Ale Tuhan, asi ma rohaM, togu ma hami saleleng di hasiangan on.

L : Ndada holan i tahe, hatahuton, ganggu dohot biar, sahat do tu tongatonga ni huria. Godang do ruas ni huriaM na gabe lam mandao sian tongatonga ni parsaoran di huria. Hasadaon, dame, las ni roha songon i nang parlinggoman ndang be dipataridahon huria.

H : Ale Tuhan, asi ma rohaM, togu ma hami saleleng di hasiangan on.

…………… hohom ……………

L : Gabe sorminan ma taon 2017 naung salpu laho mangeahi taon 2018 on. Molo biar rohanta laho mandalani ariarinta, ta ingot ma, adong do Ama na di banua ginjang na mandok hataNa tu hita “Unang mabiar hamu!”, ai ndang pasombuonNa hita mardalan sasadanta. Asal ma hohom hamu, Debata do marporang maralohon sude angka musunta.

H : Mauliate ma ale Tuhan, di sude denggan basaM dohot panoguonMu.

L : Gabe sorminan ma taon 2017 naung salpu laho mangeahi taon 2018 on, asa lam marsada hita laho patupahon angka na denggan di tongatonga ni huria lumobi di Wijk 2. Patupahon kerjasama na denggan di tongatonga punguan dohot keluarganta be. Kepedulian sosial, ido na dipangido, asa tarida kemajuan, sejahtera dohot hasintongan di tongatonga ni masyarakat na merdeka.

H : Mauliate ma ale Tuhan, di sude denggan basaM dohot panoguonMu.

L : Gabe sorminan ma taon 2017 naung salpu laho mangeahi taon 2018 on. Asa tarida hasadaon di tongatonga ni huria laho patuduhon haporseaon na togu di bagasan ngolunta. Marsada ma pangula ni huria dohot ruasna, laho patupahon las ni roha di tongatonga ni huria. Marsada ma pangurus ni punguan dohot ruasna, laho patupahon las ni roha di tongatonga ni punguan. Ai saluhutna do hita tarjou, ndada holan pangula ni huria, alai sude do hita dipangido Debata gabe siulahon na denggan.

H : Mauliate ma ale Tuhan, di sude denggan basaM dohot panoguonMu.

7. Koor : Gabungan Wijk 2

8. Marende SDJ. No. 707: 1 Hagogoon dohot apulapul Es=Do

Hagogoon dohot apulapul do dilehon Tuhan i tu au

Ganup ari au ditogutogu, ganup tingki diondingi au.

Ai hombar tu lomo ni rohaNa do dilehon Tuhan i tu au

Ro marsorin arsak las ni roha haporseaonhu di patau.

9. Epistel (Sijahaon Bodari) Poda 10: 17-21

10. Tangiang Pangondian: Pdt. Hotman Sitorus

11. Marende SDJ. No. 677: 1 Mansai lambok G=Do

Mansai lambok Tuhan Jesus manjou manjou ho dohot au

Ida Ibana paima haroromu mulak ma ho dohot au

Antong sai ro ma ho, angka na sorat sai ro ma ho.

Mansai lambok Tuhan Jesus manjou, pardosa mulak ma ho.

12. Jamita: Epesus 4: 26-27 (Pdt. Nikson Simangunsong)

Ia tarrimas hamu, unang ma mardosa! Unang ma sanga mate mata ni ari, so mintop rimasmuna. Unang pasiat hamu sibolis i.

Adong sada keluarga, bagasnasida marpekarangan na bolak manghaliangi bagasnasida. Martubuan hau Antajau, hau Mangga, hau Rambutan, hau Kesema, hau Jambu, dohot ragam bunga. Sai disi ma marmeam angka dakdanak tondonghon ni bagasnasida i. Las do roha ni amanta dohot inanta i, nang pe sai pekarangan nasida i, inganan marmeam angka dakdanak i. Songon i angka dakdanak, burjuburju, nang marmeam nasida di alaman i, ndang olo nasida marlomolomo mamutikhon nanggo sada sian bunga na sinuan di pekarangan i. Songon i, parbue ni hau i, holan parbue na matoras na malamun do dipangido nasida.

Molo ro angka dakdanak na asing, molo pintor so suman marpangalaho, pintor dipinsang nampuna bagas i, gari dipamuli, unang gabe disegai parrohaon ni dakdanak na jumolo marmeam di sini.

Hira songon i ma Koor Gabungan Wijk 2 dohot Koor Jeriko marmeam di alaman Bagas ni Debata (Gareja). Las do roha ni Debata, jala dipabolas mamutihi ragam angka parbue na tonggi na tabo sian huria i, i ma angka pasupasu ni Debata. Jala sai diparose, diparateatehon Debata do di “na marmeam” di alaman ni Debata, di jagai do sian angka panggugai.

Digugai angka na malo parbegu sisomba huasohuaso portibi huria Epesus, na garang mura tarrimas, sibolison.

Nang halak Batak pe, di mulana pe angka na mabiar tu sumangot do, angka huaso portibi. Hau na balga, rura na bagas, gabe parsombaon. Hinorhon ni sudena i, muramura tarrimas, hasoropan sibolison.

Halak na manghaporseai Kristus, naung marmeam di alaman bagas ni Debata: “Ia tarrimas hamu, unang ma mardosa! Unang ma sanga mate mata ni ari, so mintop rimasmuna. Unang pasiat hamu sibolis i.”

Taon 2018 taon so ada rimas, taon tepat waktu (Teng!), taon lambas ni roha sama ruas ni Wijk 2, Koor Gabungan, Koor Jeriko, pengurus ni punguan, pangajari koor, amanta inanta Sintua sude gok lambas ni roha. So ada mara, so ada dendam. Ndang muramura muruk! Sude masalah selesai, mardame sonang ala hata ni Tuhanta marhite Jesus Kristus. Amen.

13. Papungu Pelean

L : Tapapungu ma peleanta songon parbue ni haporseaonta, huhut marningot sude denggan basa naung tajalo sian Debata. Taingot ma hata ni Debata na tarsurat di Rom 11:36 na mandok: Ai sian Ibana do saluhutna ro, marhitehite Ibana jala marhapatean tu Ibana do saluhutna i! Di Ibana ma hasangapon salelenglelengna! Antong di bagasan las ni roha, tapasahat ma peleanta marhitehite ende pujian.

H : Marende SDJ. No. 691: 1 –Hupasahat ma tu Jesus Es=Do

Hupasahat ma tu Jesus saluhutna ngolungki

Roha nang pambahenanku, saluhutna tingkingki

Ref. Hupasahat ma tu Jesus, saluhutna diringki

Hupasahat ma tu Jesus, saluhutna ngolungki.

Pangkeonku ma tanganku, mangula lomoNa i,

Langka nang simanjojakku, mangihuthon Tuhanki.

Ref. Hupasahat ma …

Nang pamereng ni matangku, mandompakkon Jesus

Soara ni pamanganku, mamuji goarNa i.

Ref. Hupasahat ma …

Dung huida Tuhan Jesus, hutundalhon dosangki,

Lohot rohangki tu Jesus, sipalua tondingki

Ref. Hupasahat ma …

Tarhalomong do rohangku dipandok ni Tuhanku,

Aleale ni Tuhanku, au di goar Jesus i.

Ref. Hupasahat ma …

14. Parsuruon

L : Debata parasiroha jala pardenggan basa i ma na paborhathon hita laho marhobas di ragam ni angka pangulaonta di taon 2018 on. Ndang tarula hamu agia aha, anggo so mardonganhon ahu, ninna Tuhan i. antong jalo hamu ma lombulombu haporseaon i, haintopan hamu do marhite sian i sude sumbia api ni parjahat i. Jangkon hamu ma nang tahuluk haluaon, dohot podang ni tondi, ima hata ni Debata.

H : Gomos do ditiop rohangku, ndang tarbahen sirang hita sian holong ni roha ni Debata, na di bagasan Kristus Jesus Tuhanta i, ai Ibana do na maniop ahu di bagasan ngolungku.

L : Antong, binsan sadihari dope, taulahon ma na denggan tu saluhut halak, asa ndada be hita na mangolu nuaeng, alai Kristus do na mangolu di bagasan hita. Asa marparange na denggan hita di bagasan ngolunta.

15. Tangiang Panutup dohot Pasupasu

L : Ale angka dongan, tongkinnari, simpul ne ma partangianganta sadari on, alai pos ma rohanta, anggo asi ni roha ni Debata, hot do i ro di saleleng ni lelengna. Debata do na mandongani ahu, Debata do na mandongani hamu, Debata do na mandongani hita saluhutna.

H : Posa do rohanami, Jahowa do na mandongani hami, patariparhon hami, huria nang bangsona mandalani taon 2018 naung pinasahat ni Debata tu hita.

L : Molo pos do rohanta dipandonganion ni Jahowa, jaloonta ma pasupasuNa di tongatonga ni ulaonta, di tongatonga ni keluarga, di tongatonga ni lingkunganta, songon i nang di tongatonga ni bangsonta. Ai di dok do dihataNa i: “Alai angka na marhaposan tu Jahowa maruli hagogoon mardapotdapot, gabe marhabong ni lali laho manaek. Marlojongi nasida ndang olo loja, mardalani nasida ndang olo mandate”.

H : Sai saut ma na pinarbagaMi ale Tuhan, jaloon nami ma gogo sian Ho, di na mandalani taon 2018 on hami. Sai pasupasu ma hami, keluarga nami, lingkungan nami songon i nang bangso nami, laho patulushon lomo ni rohaM di tongatonga ni portibi on.

L : Antong rap mandok ma hita tangiang Hatopanta i; Ale Amanami…(jalo hamu ma pasupasu sian Debata): “Dipasupasu jala diramoti Tuhan Debata ma ho, disondanghon Tuhan Debata ma bohiNa tu ho jala asi ma rohana mida ho, didompakhon Tuhan Debata ma bohiNa tu Ho, jala diparsaorhon ma dameNa tu tondim”.

H : Marende “Amen, amen, amen”