JAMITA
BONA TAON 2021
“Debata do Mual ni Pasupasu”
(4 Musa 6: 22 - 27)
Hamu
angka dongan, ganup ruas ni Huria Kristen Batak Protestan (HKBP) na
hinaholongan di ganup inganan di Indonesia nang di duru ni Indonesia di bagasan
goar ni Tuhanta Jesus Kristus. Loas hamu ma jolo ahu atas goar ni sude parhobas
ni hurianta di hatopan dohot di distrik songon i nang di angka ressort, huria,
Pos-pos Pekabaran Injil, dohot lembaga ni hurianta, i ma angka partohonan na
gok tingki dohot partohonan na so gok tingki padohot angka parhalado na so
partohonan di sandok hurianta manghorasi hamu dohot hata on di Bona ni Taon
2020 on: “Selamat Taon Baru ma di hamu saluhutna. Horas. Horas. Horas!
Tapuji
ma Debatanta Sitolusada i na mangudut ngolunta marsadasada, boi hita tolhas
sian taon 2020 i tu taon na imbaru 2021 on. Tama do hita marlas ni roha dohot
mamujimuji Debata pardenggan basa i, ai atik pe bahat situtu do na dokdok na
taadopi dohot tabolus songon angka na porsea di taon 2020 i, tarlumobi hinorhon
ni Pandemi Covid 19 na manusai ngolunta, sai rap do Ibana dohot hita ganup.
Tapasangap goarNa, ai atik pe taadopi hinamaol ni ngolungolu, parsahiton,
hagogotan nang habot ni roha saleleng sataon bolon 2020 tongtong do diramoti,
ditogutogu jala diparbadia jala dipalua Tuhan i hita. Tung holong do rohaNa
mida hita jolma na tinompaNa i di sandok portibi on, ai nunga jumpang be Vaksin
maralohon Covid 19 i. Jala marusaha do pamarentanta paadonghon dohot
mansagihonsa tu sandok rakyatta asa tung margogo pamatangta mangalo Covid 19 i.
Atik pe ndang taboto dope sadia lelengnari asa boi ris adong Vaksin i
parsaulihonon ni angka bangso di portibi on, tama tapuji goarNa, ai ndang saut
be siaphonon ni Covid 19 i ngolunta. Ndang dipasombu 25 Ibana hita torus
manaon, tumatangis, hira anak ni manuk na so marinduk. Jala, tama tapuji goarNa
ai diurupi do hita satia manang unduk patupa 4 M i di ngolu nang ulaonta songon
sinosoan ni pamarentanta tu hita, i ma Marmasker, Manjaga Jarak, Mamuri
Tanganta ias, dohot Manulak marsaor dohot bahat jolma, manang patupa kerumunan.
Arop do roha boi hita ganup ruas ni HKBP patupa 4, M i jala molo boi, gabe
sitiruon di angka donganta saripe, sabagas, hombar jabu nang tu angka na di
humaliangta be, dalanta gabe pasupasu tu portibi on. Dung tapuji Tuhanta siala
ni pandonganionNa tu hita di taon 2020 i, manatap ma hita tu jolo. Somal do
tapasungkunhon di bona ni ganup taon sungkunsungkun na mangihut on: Songon dia
do ulaning ngolunta marsasahalak di taon 2021 on? Songon dia ma hita
mandalanhon ngolunta asa boi tadungdung na tatahi, dapot na niluluan, jumpang
na jinalahan di taon 2021 on? Songon dia ma hita angka na porsea di Kristus
Jesus na marsaor di bagasan Huria Kristen Batak Protestan patupahon ulaon ni
huria i di taon 2021 on di tirket hatopan, distrik, ressort, huria nang pospos
Pekabaran Injil, songon i nang di lembaga na tahobasi di hatopan nang di ganup
huria, nang di ngolunta marsadasada? Dna.
Di
tongatonga ni panungkunion na songon i, di bagasan sadari on hata ni Debata na
mamanghulingi hita ndang apala pangajarion manang sosososo taringot tu dia ma
sipatupaonta jala songon dia hita mangolu di taon on songon angka ruas ni HKBP
na denggan marsaor, manindangi dohot marasi ni roha. Jala ndang hataNa na
manguhumi hita na mura madabu tu bagasan dosa on ia hataNa tu hita sadari on.
Alai apala hata pasupasu do dipasahat Ibana tu hita di bagasan sadari on, di na
tapaadopadop bohinta tu Ibana di bagasan tangiangta, Debata mual ni pasupasu
i.Ai apala Debata mual ni pasupasu i na masumasu hita sadari on i do na
manghatai dohot hita sadari on jala mamasumasu hita. Ai apala hata pasupasu
pinasahatNa tu bangso pinillitNa i marhite Malim Aron na jolo i do hataNa tu
hita sadari on. Hata pasupasu pinasahat ni Malim Aron i nunga gabe hata
pasupasu pinasahat 26 ni Debata tu hita ganup, sundut na tumua dohot na umposo,
i ma hita na marsaor di HKBP na tahaholong i, huria ni Kristus Jesus
pinajongjongNa lobi 159 taon na salpu i dohot pinarmudumuduNa sahat tu
partingkian digital dohot pandemic Covid 19 di tingki on. Hata pasupasuNa i
dipasahat tu hita di HKBP marhite angka naposoNa, angka pandita: “Sai
dipasupasu jala diramoti Jahowa ma ho! Dipasondangkon Jahowa ma bohiNa tu ho,
jala asi ma rohaNa mida ho! Didompakhon Jahowa ma bohiNa tu ho jala dipasaorhon
ma dame tu tondim.” Ndang tagamon so las rohanta, pir tondinta, tamba gogonta,
hiras rohanta jala hirpas langkanta dung tabege, tarimangrimangi, tajangkon,
taauhon, tahaporseai jala tahaposi hata pasupasu sian Tuhanta i. Ganup do hita
saleleng on naung tarpasupasu siala ni hata pasupasu naung tajangkon sian Ibana
marhite angka naposoNa. Asa lam tangkas di hita tuanta na pinasupasu ni Debata
sasada mual ni pasupasu i, denggan do patorangon onomsa hata pasupasuNa i tu
hita ganup:
· Parjolo,
Debata mamasumasu hita. Di Bibelta i ia na hinangkam ni hata ‘pasupasu’ ndang
pejek (Indo: sempit), alai hibul sahibulhibulna, komprehensif, holistik, jala
integratif (partondion, psikologis, sinadongan na marragam i,
parsaoran/relasional, sosial, politis, dna.). Dohot do dihangkam hata
‘pasupasu’ i pinompar (1 Musa 28: 3), sinadongan (1 Musa 24: 35), tano (1 Musa
48: 3), hahipason (5 Musa 7: 12-15). Alai dohot do nang angka na asing na so
hagoaran hita dison isara habisuhon nang angka innovasi, kreatifitas dna. Ala
ni i, unang ma tapapejek pasupasuNa i tu hita, alai jangkon ma di tondim
pasupasuNa i tu hita sadari on nang di taon on nang dung i. Unang oloi
pangantusion na papejek pasupasuNa i tu hamu. Jangkon. Halashon ma. Puji ma
Ibana.
· Paduahon,
Debata mangaramoti hita. Marhite angka dalanNa na boi dohot na so boi
antusanta, adong marhite angka hajamotonta sandiri, adong marhite angka na
mangula di keamananta di negaranta nang angka na patimbo imunitas ni
pamatangta, adong marhite angka na di duru di 27 hatauonta nang di partingkian
digital on, ramotan ni Debata do hita taon on tarlumobi di partingkian dohot
inganan na digohi angka ancaman, na tarida dohot na so tarida hita. Jangkon
jala halashon ma pangaramotionNa di ngolum di taon on (Patudos Psalmen 91: 1-12).
Tangiangta, diramoti ma tong bangsonta maradophon angka sipartahi hajahaton na
naeng manggaori dohot manusai ngolu ni negaranta.
· Patoluhon,
Jahowa pasondangkon bohiNa tu hita ganup. Na nidokna i ma Ibana sandiri
pasondangkon na denggan, lambas ni roha marhite haroroNa sandiri na digombarhon
marhite hata ‘bohiNa’. Jotjot do hata pasondangkon bohiNa on digombarhon di
Bibelta i di bagasan parngoluan (konteks ni ngolu) na tongon mangadopi
hasusaan, hagogotan (Psalmen 31: 17, 80 : 4, 80 ; 20). Disi ma ro Ibana
paluahon. Ndang tagamon malua ngolunta sian angka na songon i di taon on. Alai
tapapos ma rohanta na paluaonNa do hita marhite na Ibana sandiri ro paluahon
hita. Ganup do ra hita nunga manghilalahon i. Dipalua ma angka hita
on/donganta/sisolhota sian sahit Covid 19 i nang sian ragam mara na naeng
manusai ngolunta.
· Paopathon,
Debata marasi ni roha mida hita. Ndang adong hita na lias sian dosa, na so
marhagaleon. Alai sadari on, marasi ni roha do Ibana mida hita. Ndang
dibaloshon angka dosa nang hahuranganta i di taon na salpu i. Di bagasan ulaon
ni Jesus Kristus do i dipatupa Ibana sasingkopsingkopna. Ndang diuhum Ibana
hita sadari on alai diasii do.
· Palimahon,
Debata mandompakhon bohiNa tu ho/hita. Hata ‘mandompakhon’ patuduhon na di
tongatonganta do Ibana. Ia hadir. Molo ditundalhon Ibana do bohina sian hita ro
ma angka hasusaan tu tongatonga ni ngolunta (Psalmen 13: 2). Alai molo
didompakhon bohiNa saut ma palumehononNa pasupasuNa tu hita, tu keluarganta, tu
hurianta, tu bangsonta.
· Paonomhon,
Debata pasaorhon dame (Heber: Syalom)-Na, i ma haluaon na hibul, i ma na malua
sian mara, sian hajahaton, sian hapogoson na sumalin, dohot haluaon na
marhatigoran. Damai yang adil.
Ala
songon i do hape bagas dohot bidang ni pasupasu ni Debata na tajalo sian Debata
di ganup panombaon manang parmingguonta di bagas joroNa dohot di inganan na
asing, isara di parsikolaan, nang di jabu ala so adong dope godung garejana
dohot ala ni Covid 19, mansai ringkot hita di bona ni taon on manghamauliatehon
pasupasu ni Debata, pangaramotionNa, sondang ni bohiNa, asi ni roha nang
dameNa. Jangkon ma i sadarion nang di ariari na ro on di taon 2021 on. Topot
tongtong Ibana di bagasan parmingguon rap dohot angka donganta sahaporseaon, ai
disi do Ibana pasahat pasupasuNa marhite angka naposoNa. Unang ma gabe mansohot
hita mandohoti parsaoran panombaon tu Ibana, di gareja secara terbatas, jala
unduk tu Protokol Kesehatan, nang di jabunta be ala dipatupa pamarentanta
pembatasan marpungu di angka inganan parsaoran ni natorop, ai disi do hita
manjangkon pasupasuNa siala ni marragam sidalian. Ai nang di partingkian Covid
19 on tarbahen hita do mardonganhon internetisasi, patupa ibadah on-line,
streaming dohot na asingna i manjangkon pasupasuNa ai disi do hita manjangkon
pasupasuNa marhite angka naposoNa. Amen.
Selamat
Taon Baru ma di hita sude Tabe mardongan tangiang
HURIA
KRISTEN BATAK PROTESTAN
Ephorus
HKBP
Pdt.
Dr. Robinson Butarbutar
Tidak ada komentar:
Posting Komentar