ACARA PESTA PADUAHON ARI PARNINGOTAN HASASAOR NI TONDI PARBADIA

ACARA PESTA PADUAHON

ARI PARNINGOTAN HASASAOR NI TONDI PARBADIA

(PENTAKOSTE II)

                                                                                             

 Topik :

TUNG NA SONGKAL DO ANGKA PAMBAHENANMU

(PSALMEN 66:1-7)

Senin, 16 Mei 2016

Jl. Perumahan Taman Pondok Gede Blok H No.1-3

Pondok Gede RT 04 RW 01 Kelurahan Jatirahayu

Kecamatan Pondok Melati Kota Bekasi

Provinsi Jawa Barat,

Telp. (021) 8467284

I.           Pangaradeon  diri

(Huria martangiang na hohom. Manghuling ma organ BE No 815  “Uli do tingki na Hohom”. Prosesi).

II.      Joujou tu parsaoran (L = Liturgis; H = Huria))

   

L   :   Huria ni Tuhanta, hujanghon hami ma haroromuna di bagasan las ni roha. Selamat datang, selamat beribadah, horas ma di hamu saluhutna

H   :   Horas! Horas! Horas!

L   :   Tapuji ma Tuhanta ala dipapungu asi ni rohaNa do hita saluhutna tu bagasNa na badia on. On ma parpunguan Pesta paduahon Parningotan Ari Hasasaor ni Tondi Parbadia.

H:     Pinuji ma Debata Ama di bagasan AnakNa Jesus Kristus na marsuru Tondi Parbadia tu portibi on jala bongot tu rohangkon.

L:      Pinuji ma Ho ale Tuhan Jahowa na marsuru TondiMi songgop tu rohanami. Endehononku ma Jahowa saleleng di ngolungku, umpalu parhinaloan ma ahu  umpuji Debatangku, saleleng adong dope ahu _{(Ps. 104:33)}. Antong taendehon ma ”Ale Tondi Parbadia, sai songgopi hami on_”

               

01.     Marende BE No. 462:1-3  “Ale Tondi Parbadia”              BL. 311                                              

Ale Tondi Parbadia, sai songgopi hami on.

Rohanami ma paria lao mamuji Ho tongtong.

Ho tongtong, Ho tongtong, lao mamuji Ho tongtong.

Debata ni hangoluan, lehon hangoluan i.

Sunggul sian partangisan saluhut na mate i.

Saluhut, saluhut, saluhut  na mate i

---organ---                           ---jongjong---

ApiMi sai lam pagalak, sondang di na holom i.

Asa las, tiur ma halak, lam pita huriaMi.

Lam pita, lam pita, lam pita huriaMi

                      

02.     Votum, Introitus, Tangiang  

L:    Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia na tumompa langit dohot tano on. Amen. Sian Sion, situan ni hinadenggan, marsinondang Debata.

H:   Sai na ro do Debata, jala ndang tagamon hohom Ibana;

L:    ai songon on do didok Jahowa: UsehononKu ma aek tu angka na mauas dohot angka sunge tu na mahiang. UsehononKu ma tutu TondingKu tu pinomparmuna nuaeng jala pasupasungKu tu pinomparmu sogot.

H:   Jahowa do Debata, jala Ibana manondangi hita.

L:    Tambathon hamu ma angka pelean pesta i sahat ro di angka tanduk ni langgatan _{(Psalm 50:2,3a; Jes. 44:3; Psalm. 118:27)}. Tagan so manjou dope nasida, nunga mangalusi Ahu, manghatai dope nasida nunga manangihon Ahu _{(Jes. 65:24)}. Di hamu do bagabaga i dohot di angka anakhonmuna ro di saluhut na dao, manang piga na naeng jouon ni Tuhanta dope _{(Ulaon 2:39)}. Molo tung adong apoapo marhitehite Kristus, dohot sosososo holong ni roha dohot parsaoran ni Tondi, nang talup dohot asi ni roha, gohi hamu ma halalas ni rohangkon: Sada ma parrohahon hamu; sada ma haholonganmuna. Saroha, sapingkiran ma hamu _{(Pil. 2:1-2)}.  Haleluya

H:   (mangendehon)            Haleluya, haleluya, haleluya

L:    (Martangiang ma hita) Ale Tuhan Jesus! Hudok hami mauliate tu Ho sian nasa rohanami, ala dipaojak Ho huriaM di tano on, jala ala dohot hami dijou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannami, asa lohot tu Ho hami marhitehite haporseaon na sintong, jala asa tongtong huhalashon hami pasangaphon goarMu, na tarpuji ro di saleleng ni lelengna. Amen.

               (hundul)

03.     Marende BE No. 109:1 Sai Songgopi hami on   BL. 78

Sai songgopi hami on  ale Tondi Parbadia

Sai ajari ma tongtong hami on huhut paria

Martangiang tu  Tuhanta  asa tongtong oloanNa.

04.   Patik.

L:    Tangihon hamu ma patik ni Debata di Pesta paduahon Parningotan Ari Hasasaor ni Tondi Parbadia, i ma patik IV dohot lapatanna. Patik IV: Ingot hamu ma pabadiahon ari minggu i! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anakmu pe manang borum manang naposom lahilahi manang naposom boruboru, ro di pinahanmu, ro di isi ni huta ni halak pe na mangebati hutam.

H:   Ai di na onom ari do ditompa Debata langit dohot tano dohot laut dohot nasa isina, dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadiai.

L:    Dia do lapatan ni i? On do: Ingkon dihabiari rohanta Debata jala ingkon holong rohanta di Ibana, asa unang tois rohanta di ajar na sian hata ni Debata,

H:    ingkon badia do hata ni Debata di rohanta jala ingkon ringgas rohanta tumangihon dohot mangguruhon.

L:  Songon i ma sahat na. Rap ma hita mangido gogo tu Tuhan Debata laho mangulahon patikNa i

L+H : Ale Tuhan Debata sai pargogoi ma hami mangulahon na hombar tu patikMi.   Amen.

05.  Koor:

06.  Marende BE No. 418: 1+3  “Sasude Hadosaonmu”         BL. 228                                                             

              Sasude hadosaonmu, hamagoanmi, sai tinggangkon tu Jesusmu, Tuhanmi. 

(jongjong)

Dosami do pinorsanNa, o  hansitna i. Ingot holong ni rohaNa, tiop i !

07.  Tangiang Manopoti dohot Hasesaan ni Dosa.

L:  Tatopoti ma dosanta, martangiang ma hita. Ale Tuhan Debata, na badia jala na bonar. Parasi jala Partalup ni roha jala na basar do Ho! Sai marpangulahi ma rohaM mida hami. Ai jotjot do huhatindanghon hami: “Ahu porsea di Tondi Parbadia jala adong sada huria na badia”. Hape ndang huhaporseai hami TondiMi sian nasa rohanami, sian nasa gogonami, dohot sian nasa ateatenami. Sai olo do tondi ni portibi on hupatangitangi jala huoloi hami. Ndang badia hubahen hami huriaMi. Ai gok dosa do huulahami. Ambolong do ariarinami hubahen hami.

H: (mangendehon BE No. 182 : 2; BL. 24 “Tu JoloM o Debatangku”)                                        

Husolsoli do rohangku na gok dosa i tongtong.

Ai godang ariaringku na hubahen ambolong

L:  Ditongos Ho do TondiMi tu portibi on asa porsea hami tu Jesus Kristus, Sipalua i. Alai sai jotjot do huarsahi hami Ho marhitehite hata dohot pambahenannami. Sai jotjot do hutadinghon hami TondiMi na manogunogu hami tu dalan na tigor i.

H: (mangendehon BE No. 182 : 3; BL. 24 “Tu JoloM o Debatangku”)

      Sai jotjot do hutadinghon dalanMi na tigor i. Kristen au, hape hutondong dalan hamagoan i.

L:  Ale Amang, ra, nunga tung maila Ho marnida hami. Ra, nunga tung marisuang hubahen hami panghophoponMi. Ra, dohononMu ma “Ai nunga pola ampe tangke tu daling ni angka hau! Onpe, sitabaon ma nasa hau na so marparbuehon na denggan jala sidabuhononhon tu api!” _{(Mat. 3:10)}. Ale Tuhan, asi ma rohaM.

H: (langsung mangendehon BE No.681:1 “Ale Amang Asi RohaM”)

      Ale Amang asi rohaM di au pardosa on,

      Unduk do rohangkon nuaeng marsomba tu joloM.

      Unang jujur, unang jujur angka dosangki.

      Sai salpuhon, sai salpuhon sian rohaMi.

------hohom 15 detik------

L:  Ale Tuhan, ndang adong na hupangasahon hami dunghon asi ni rohaM: hatigoran na pinatupa ni AnakMu do na hupangasahon hami tu joloM. Dibahen i sai sesa ma sude dosanami! Sai pasonang jala apuli ma hami angka na hinophop ni Tuhan Jesus Kristus, Tuhannami. Amen.

         Tabege ma  Hata bagabaga taringot tu hasesaan ni dosa!

         Molo tung adong manang ise na mardosa, adong do Pangondianta di Ama i, i ma Tuhan Jesus Kristus na tigor roha i. Jala Ibana do pardengganan taringot tu dosanta, alai ndada holan tu dosanta, dohot do taringot tu dosa ni saluhut portibi on. Hasangapon ma di Debata na di ginjang!

   L+H: Amen.

 (hundul)

08.  Koor

09.   Marende BE No.447:4   “Ho Mual Hangoluan i”               BL.298

Marolopolop rohangki,  mamujimuji Tuhan i, rade do hatuaon. Tadingkon nasa holsomi, hinsa ma tuhuk silangmi, tongkin do sitaonon.

Haposi bagabaga i, godang do sihirimonmi di lambung ni Tuhanmu.

10.  Epistel: 

L:  Tabege ma hata ni Debata, turpuk epistel di Pesta paduahon Parningotan Ari Hasasaor ni Tondi Parbadia, tarsurat di 1 Korint 2:12-16. Songon on ma hata ni Tuhanta:  Alai ndang hujalo hami tondi portibi on; Tondi na sian Debata do, asa dapot botoonnami na binasabasahon ni Debata tu hami.

H: Jala i do huhatahon hami, ndada di bagasan hata habisuhon ni jolma na targuruhon, tung na pinodahon ni Tondi do, laho manimbangi angka partondion mangihuthon ruhut ni tondi.

L: Ndang tarjalo jolma hian na sian Tondi ni Debata, ai haotoon do i di rohana; ndang tartandasa i, ai partondion do mandodo i.

H: Alai saluhutna i didodo partondi; alai ndang tardodo manang ise anggo ibana.

L: Ai ise ma naung tumanda roha ni Debata, asa ajaranna Ibana? Alai roha ni Kristus i do anggo di hami.  Songon i ma sahat na.

Martua do angka na tumangihon hata ni Debata jala na umpeopsa.

L+H: Amen

11. Koor:

12. Marende BE No.107:1+2 “O Tondi Parbadia”                     BL. 207

O Tondi Parbadia i sai masuk Ho tu rohangki.

Pasaorhon asi ni rohaM  ro di sude denggan basaM.

Tu au marhite sondangMi nang pe tu jolma sasude.

Ai naeng papunguonMu pe tu Tuhan Jesus  jolma sude. Haleluya, Haleluya.

(jongjong)

O Sondang na badia  i pasaor hataM tu rohangki 

Tiur ma baen rohangkinon mananda Debata tongtong.

Padao ma haliluon i  sinabur ni sibolis i;

Hubaen ma Tuhan Jesus i sambing gurungku, ihutanki, Haleluya, Haleluya

                             

13.   Manghatindanghon Haporseaon

          L:      Tahatindanghon ma haporseaonta i, songon na hinatindanghon ni donganta sahaporseaon di sandok portibi on, rap ma hita mandok:

L+H : Ahu porsea…

(hundul)               

14.  Sunggulsunggul

15. Marende BE No. 106:1… “Ale Tuhan Amanami” (Pelean I & II) 

        BL.176

Ale Tuhan  Amanami na marholongroha  i.

Suru TondiMi tu hami angka na tinoguMi

Paimbaru tondingki gabe joroMi ma i.

Sai oloi pangidoanku sian asi ni rohaMu.

Ndang adong hangoluanku anggo so ro TondiMi

Maringanan di rohangku jala ndang margogo i.

Patupahon hataMi pasangaphon goarMi

Sai tongtong holom rohangku molo  so patiuronMu.

                                                                -----organ-----

Tung beha ma tandaonku Ho, o Jesus, Tuhanki ?

Tung beha ma tolopanku Ho do hangoluanki

Molo so ro TondiMi manondangi rohangki ?

Ipe suru ma Ibana asa saor tu au hataNa.

Tondi, sai ajari ahu jala togutogu ma

                      Asa au marpangalaho  na badia na tama.

                      Sai paburju  rohangkon mangoloi hataM tongtong

                      Asa molo ro ajalhu sahat au tu ingananMu.

16.  Jamita: Psalmen 66: 1-7

17.Marende BE No. 640: 1... “Haholongan Sian Ginjang” (Pelean tu ulaon

Keadilan, Perdamaian, Keutuhan Ciptaan/KPKC)

Haholongan sian ginjang las ni roha na hot i

Tumpal ni asi ni roha sai bongoti rohangki,

Jesus na gok asi roha dohot haholongon i

Baen malua baen martua hami na tahutan i.

Lehon tondi haholongon tu parroha na bojok

Bagabaga hadameon sahat baen tu hami on

Jesus Alpha nang Omega bona ni haporseaon

Sai padao ma angka dosa, sai palua hami on.

--- organ---

Sipalua na sun gogo lehon tu au ngoluMi

Ro ma Ho sai marsihohot mangingani joroMi

Asa Ho husomba hami raphon pardisurgo i

Rap mamuji mangoloi, Ho di hasangaponMi.

Sai pasingkop tinompaMu, lam pita baen hami on

Haluaon na sumurung lehon  ma tu hami on

Boan hami tu na uli di banua ginjang i

Paima Ho pujionnami salelenglelengna i.

       

18.  Parsuruon:

L: Huria ni Tuhanta, naeng paujungonta ma partangiangan Parningotan Ari Hasasaor ni Tondi Parbadia taon 2016 on, borngin on. Alai tahaporseai do ianggo pandonganion ni Tuhanta na so tupa marujung tu portibi on. Didongani do hita di pardalanan ni ngolunta. Pandonganion ni Debata i ma gabe jaminan di huriaNa mangadopi angka hamaolon na sipata so marhaujungan i. Taingot ma, gumogo do Tuhanta i sian nasa gogo di portibi on. Dibahen i, endehononta ma:

H: (langsung mangendehon Ref. BE No. 753 Di Pardalanan Jesus di jolongku)

                Ref: Huboto do tangkas panoguonMu diiringiring Ho do langkangki

                        Sahat ro di ujung ni pardalanku togu ma au jonok tu lambungMi.

L: Sai tapaingotingot ma hata ni Tuhanta na mandok: “Alai angka on do parbue ni Tondi: Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon” _{(Gal. 5:22)}. Tajanghon ma Tondi Parbadia i asa patar di hita angka pambahenan ni Tuhanta na uli i.

H: (langsung mangendehon BE No. 730:1 Sai Patau ma au Tuhan)

Sai patau ma diringku ale Tuhan, papatarhon hinauliMi Tuhan,

Suru ma TondiMi saor tu rohangki, lao papatar holongMu tu donganhi.

                L:  Tangiang panutup (Agenda)