PARTORDING NI PARMINGGUON MINGGU PAUALUHON DUNG TRINITATIS MINGGU, 02 AGUSTUS 2020

PARTORDING NI PARMINGGUON

MINGGU PAUALUHON DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE RESORT PONDOK GEDE

Minggu, 02 Agustus 2020

Pukul 07.00 WIB & 10.00 WIB

 

Ev.: 2 Musa 23:1-9

Ep.: Ulaon ni Apostel 5:1-11

 

Topik: Manghagigihon Sisip dohot Korupsi

 

(P: Paragenda - R: Ruas)

 

I.             Pangaradeon

 

II.          Tingki na Hohom

                                

1.            Marende BE No. 257:1-2 Jonok Debatanta (BL 210)

Ø   Jonok Debatanta unduk be ma hita lao marsomba tu Tuhanta.

Mijur Debatanta, tu tongatonganta, tapahohom ma rohanta.

Somba ma Debata di banua ginjang na so halompoan.

 

........ Jongjong ........

 

Ø   Jonok Debatanta, surusuruanNa do manungkap di joloNa. HabadiaonNa dipapujipuji dohot ende na umuli.

Hita pe sasude, sai girgir rohanta mangoloi Tuhanta.

 

2.            Votum/Agenda (A.XV/A.9 – D.XIII/59)

P:     Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on.

P/R: Amen.

P:     Parangehon hamu ma na tama di Tuhan i, marguru tu sandok lomo ni rohaNa, marparbuehon parbue marhitehite saluhut ulaon na denggan. Oloi hamu ma Jahowa marhitehite las ni roha, ro be ma hamu tu joloNa marhitehite olopolop. Haleluya.

R:     (Mangendehon): Heleluya… Haleluya… Haleluya.

P:     Martangiang ma hita: Ale Tuhan Debata, na sangap jala na badia! Diramoti jala digomgomi Ho do HuriaM marhitehite TondiM i. Dibahen i hupangido hami nuaeng tu Ho, lehon ma di hami roha pangoloion, asa marlas ni roha hami mangulahon na nidokMu songon pangoloi ni anak tu amana. Sai pararat ma harajaonMu jala sai tambai ganup ari bilangan ni angka na porsea di Ho, asa lam tarbarita GoarMu na badia i, jala dapotan hangoluan hami marhitehite Tuhan Jesus Kristus, Tuhannami. Amen.

 

3.            Marende BE No. 24:1,7 Tatap Hami on na Pungu dison (BL 59)

Ø   Tatap hami on, na pungu dison,

Ai na naeng pujionnami dengan ni basaM di hami,

Tatap hami on na pungu dison.

 

Ø   Sai padungo be hami on sude.

Unang loas modom hami di bagasan dosanami,

Sai padungo be hami on sude.

 

4.            Patik: VIII dohot Lapatanna

P:     Patik ni Tuhanta di hita sadarion ima patik pa-VIII dohot lapatanna. Patik paualuhon: UNANG HO MANANGKO, dia do lapatan ni i on do: ingkon dihabiari rohanta Debata jala ingkon holong rohanta di Ibana, asa unang hita olo mandobo hepeng ni dongan jolma, manang mambahen bisukbisuk mangalansumhon boniaga, ingkon sipangandaon ni rohanta do arta ni dongan jala siramothononhon. Ima sahatna. Antong rap mangido gogo ma hita sian Debata laho mangulahon na hombar tu patikNa i.

P/R: Ale Tuhan Debata, sai pargogoi ma hami mangulahon na hombar tu patikMi. Amen.

 

5.            Marende BE No. 182:1+3 Tu Jolom o Debata (BL 24)

Ø   Tu jolom o Debatangku sai use do rohangkon.

Sai pasiat tangiangku dohot iluilungkon.

 

........ Jongjong ........

              

Ø   Sai jotjot do hutadinghon dalanMi na tigor i.

Kristen au, hape hutondong dalan hamagoan i.

 

6.            Tangiang Manopoti Dosa (B.10 – C.10)

P:     Tatopoti ma saluhut dosanta tu adopan ni Debata, tapaunduk be ma rohanta, martangiang ma hita: Ale Tuhan Debata, Pargogo na so hatudosan jala Ama Parasiroha! Ndang lomo rohaM mida hamatean ni pardosa; mulak ma nian parjahat i tumadingkon dalanna, asa mangolu ibana, i do dipangido rohaM. Ala ni i umbahen dipangido hami; sai sundati ma torutoruM asa unang mangonai be tu hami. Sai sesa sude dosanami, asa mangolu hami di bagasan asi ni rohaM. Sai pargogoi ma hami, asa margogo hami, marhitehite Tuhan Jesus Kristus Tuhannami. Amen.

 

...... Tangiang na hohom (BE HKBP No. 681) ......

 

P:     Bagabaga ni Debata taringot tu hasesaan ni dosa: Songon on do Hata ni Jahowa: Unang ho mabiar, ai Ahu do Siluluhon ho; nunga pola Hujou goarmu, Ahu nampuna ho. Hasangapon ma di Debata na di ginjang!

P/R: Amen.

 

7.            Marende BE No. 223:1 Husomba Ho Tuhan (BL 244)

Ø   Husomba Ho Tuhan, tangihon au!

SangkapMu ma tongtong pasaut tu au.

Lam ganda baenonMi, holong ni rohangki,

Sai lam gandai, holong tu Ho.

8.            Epistel: Ulaon ni angka Apostel 5:1-11

P:     Hata ni Debata turpuk Epistel di minggunta sadari on ima na dienet sian buku Ulaon ni angka Apostel 5:1-11; tajaha ma marsorinsorin: Adong ma uju i sahalak na margoar si Ananias rap dohot dongan saripena si Sapira, na manggadis tanona.

R:     Mardos ni roha ibana dohot dongan saripena manamondinghon tuhorna i deba; diboan ma na deba nari, dipeakhon ma tu jolo ni angka apostel.

P:     Alai ninna si Petrus ma: “Oe Ananias, naung digohi sibolis i do hape roham laho manggabusi Tondi Parbadia i dohot mamorso deba tuhor ni tano i.

R:     Ia ditiop ho i, nda gong di ho; digadis ho pe i, nda laos tong guru di ho? Dia do umbahen na tubu roham mambahen songon i. Ndada jolma na ginabusanmi disi, Debata do.”

P:     Alai disi dibege si Ananias hata ondeng, runggang ma ibana, laos tos hosana. Jadi di biahaton situtu ma sude na umbegesa.

R:     Jadi hehe ma angka na umposo, disaputi ma bangkena, diusung ma tu balian laho mananom.

P:     Alai salpu arga tolu jom ro ma dongan saripena i, ndang dope diboto na masa i.

R:     Jala dipanghulingi si Petrus ma ibana: “Paboa ma tu ahu, na saon do digadis hamu tano i?” Olo, na sai do,” ninna.

P:     Alai ninna si Petrus ma mandok ibana: “Boasa tung saroha hamu mangunjuni Tondi ni Tuhan i? Tagam ma, na mandok masuk ma angka naung mananom dongan saripem; usungon nasida ma nang ho tu balian.”

R:     Dung i pintor runggang ma ibana tu jolona, laos tos hosanna. Jadi di na bongot i angka na umposo i, nunga mate ibana didapot jala diusung ma bangkena tu balian, ditanom ma tu lambung ni dongan saripena i.

P:     Jadi hatahutan situtu ma sude na sahuria i ro di nasa na umbegesa. Ima sahatna. Martua do angka natumangihon hata ni Debata, jala naumpeopsa.

P/R: Amen.

9.            Marende BE No. 698:1 Sai Ihuthononhu Jesus

 

........ Jongjong ........

 

Ø   Sai ihuthononku Jesus, sai ihuthononhu Jesus

Salelenglelengna i.

Nang godang haporsuhon sai benget do au manaon.

Sai ihuthononhu Jesus salelenglelengna i.

 

10.        Manghatindangkon Haporseaon

P:     Tahatindangkon ma haporseaonta i, songon na hinatindangkon ni donganta sahaporseaon di sandok portibi on, rap ma hita mandok:

 

P/R: Ahu porsea di Debata Jahowa, i do Ama Pargogo na so hatudosan natumompa langit dohot tano.

 

        Ahu porsea di Jesus Kristus, Anak ni Debata Jahowa na sasada i; ima natinubuhon ni si Maria, na gabegabean sian Tondi Parbadia andorang so habubuhan; i do Tuhanta na tumaon na bernit, di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom. Na mulak mangolu di ari patoluhon, na manaek tu Surgo, laho hundul tu siamun ni Debata Jahowa Amana i, Pargogo na so hatudosan i, disi ma Ibana paima mulak sogot tu tano on laho manguhumi angka namangolu dohot na mate,

       

         Ahu Porsea di Tondi Parbadia, jala adong huria na badia, Huria Hatopan ni halak Kristen angka na badia, dohot di hasesaan ni dosa, dohot di hata i, namandok; Mulak mangolu do sogot daging ni halak naung mate, dohot di hangoluan na so ra suda. Amen.

 

11.        Tingting Huria dohot Tangiang

12.        Marende BE No. 750:1-2 Tu Tondingkon o Jesus

Ø   Tu tondingkon o Jesus patolhas hataMi.

Asa sonang rohangku, unang sai ganggu i.

Reff.:   Rohangkinon dohot tondingkon

            Naeng tumangihon Ho,

            Di son do au naposoMon, rade tumangihon Ho.

 

Ø   Parbadiai ma ahu jolma na ramun i.

Pangke ma au Tuhanhu manjou na lilu i.

Reff.:   Rohangkinon…

 

13.        Jamita: 2 Musa 23:1-9

1.            “Ndang jadi pararatonmu barita gapgap, jala unang paherbang tanganmu rap dohot parjahat, gabe sitindanghon hageduhon.

2.            Ndang jadi paihutonmu tahi torop laho manjahati, jala ndang jadi parpanguluanmu hata bada, manang manolopi hata torop laho papeolhon uhum.

3.            Na pogos pe ndang jadi ampinanmu di pargulutanna.

4.            Molo jumpang ho lombu ni musum, manang halodena lilu, ingkon mulak togihononmu tu ibana.

5.            Molo diida ho halode ni halak na manghagigihon ho mandate dibahen soratna, ndang jadi pasombuonmu peak, ingkon paheheonmu do i rap dohot binoanna.

6.            Ndang jadi pailingonmu uhum tu halak na pogos hasolhotonmu di pargulutanna i.

7.            Sai paholang ma ho sian hata gapgap, jala ndang jadi mate bunuonmu halak na lidang dohot na tigor, ai ndang olo Ahu mamintori halak parjahat.

8.            Ndang jadi jaloonmu silehonlehon, ai papitung mata ni halak angka na tonggor hian nian anggo silehonlehon, jala dipapeol parhataan ni halak partigor.

9.            Ndang jadi hilangonmu halak dagang, ai diboto hamu do roha ni halak dagang ala halak dagang nang hamu na jolo di tano Misir.

14.        Marende BE No. 730:1-4 Sai Patau ma au Tuhan (Pelean)

1       Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki,

Lao papatar holong-Mu tu donganhi.

 

2.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki

Patariparhon basaM tu donganhi.

 

--- Musik ---

 

3.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki,

Lao patandahon diriMi tu donganhi.

 

4.      Sai patau ma diringku ale Tuhan,

Papatarhon hinauliM i Tuhan.

Suru ma TondiM i saor tu rohangki,

Baen ias hata dohot parangengki.

 

--- Musik ---

 

15.        Tangiang Panutup/Tangiang Pelean

P:     Tapasahat ma peleanta tu Debata, martangiang ma hita: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus.

         Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on.

         Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

R:     (Mangendehon BE HKBP No. 204:2):

         Nasa na nilehonMi, tondi ro di pamatangku.

         Hosa dohot gogongki, ro di saluhut artangku.

         Hupasaha i tu Ho, na so unsatongku do.

P:     Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

R:     (Mangendehon BE HKBP No. 841):

Ai Ho do nampuna harajaon

Dohot hagogoon ro di hasangapon

Saleleng ni lelengna. Amen!

 

P:     Jalo hamu ma pasupasu sian Tuhanta:

         Dipasupasu jala diramoti Tuhan Debata ma hamu (ho)! Disondangkon Tuhan Debata ma bohiNa tu hamu (ho) jala asi ma rohaNa mida hamu (ho)! Didompakhon Tuhan Debata ma bohiNa tu hamu (ho) jala dipasaorhon ma dameNa tu tondimuna be.

R:     (Mangendehon): Amen… Amen… Amen.

 

 

Pandita dohot keluarga, suang songon i nang saluhutna Parhalado ni hurianta rap dohot keluarga, dohot saluhut namanghobasi parmingguonta sadarion pasahathon:

SELAMAT ARI MINGGU MA DI HAMU SALUHUTNA.

TUHANTA MA NAMANGARAMOTI.

HORAS!