PARTORDING NI PARMINGGUON MINGGU VI DUNG TRINITATIS MINGGU, 19 JULI 2020 PUKUL 16.00 WIB

PARTORDING NI PARMINGGUON

MINGGU VI DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE RESORT PONDOK GEDE

Minggu, 19 Juli 2020

Pukul 07.00 WIB & 10.00 WIB

Topik: Hadaulaton dohot Pelean tu Jahowa

(P: Paragenda - R: Ruas)

I.             Pangaradeon

II.          Saat Teduh

1.            Marende BE No. 17:1-2 Raja na Tumimbul (BL 210)

Ø   Raja na tumimbul sigomgomi hami,

Jalo ma pujian nami.

Denggan ni basaM do pangoluhon hami,

Atik pe mardosa hami.

Sai apoi pargogoi, hami mangendehon, sangapMi o Tuhan.

……… Jongjong ………

Ø   Sai dipuji langit jadijadianMu

Saluhut pambahenanMu.

Parsinondang bolon na marpamongguri,

Ho o Tuhan do dipuji.

Bulan i, bintang pe, Ho do pinujina dohot sinondangna.

2.            Agenda/Votum

P:     Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano.

P/R: Amen.

P:     Songon on do hata ni Tuhan Jahowa; Manang ise namamelehon hamauliateon, i do napasangap Ahu jala mambahen dalan asa Hupatuduhon tu ibana hatuaon ni Debata. Haleluya.

R:     (Mangendehon): Haleluya… Haleluya… Haleluya.

P:     Ale Tuhan Debata Amanami, nunga marpungu hami dison, di ari na pinarbadiaanMi. Sai buhai ma pinggol dohot rohanami, asa marlas ni roha hami manangihon hataM na badia i jala ringgas hami manimbangi dohot umpeop hataM di bagasan rohanami, asa pos rohanami martangiang tu Ho. Urupi ma hami, asa huparhaseang hami angka ariari ni ngolunami na pondok i. Sai pamasuk ma hami tu hangoluan saleleng ni lelengna. Pujionnami ma Ho disi marhitehite Tuhan Jesus Kristus, Tuhannami.

P/R: Amen.

3.            Marende BE No. 111:1 Patimbul be ma Sangap (BL 129)

Ø   Patimbul be ma sangap ni Jahowa Debatanta.

Dok ma mauliate i tu Debata Amanta.

Ai Pardangolan i sude, nang saluhut na jorbut pe dialo Debatanta.

4.            Patik I – IV

P: Patik ni Debata di hita, di minggunta sadarion ima patik I–IV.

Patik Parjolo: Ahu do Jahowa Debatam, ninna Debatanta, ndang jadi marangkup Ahu bahenonmu Debatam.

Patik Paduahon: Ndang jadi ganaonmu, jala ndang jadi sumanonmu manang aha na di banua ginjang, dohot na di banua tonga on, ro di na di bagasan aek na di toru ni tano, ianggo tung gabe sisombaon manang sioloan.

Patik Patoluhon: Ndang jadi dohonon Goar ni Debata, ianggo so ture dalanna, ai hona uhumNa do sogot angka namarsineang di GoarNa.

Patik Paopathon: Ingot hamu ma pabadiahon ari Minggu i. Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anakmu pe manang borum, manang naposom lahilahi manang naposom boruboru, ro di pinahanmu, ro di isi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina, dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadiai. Ima sahatna. Antong rap mangido gogo ma hita sian Debata laho mangulahon patikNa i.

P/R: Ale Tuhan Debata, sai pargogoi ma hami mangulahon na hombar tu patikMi. Amen.

5.            Marende BE No. 114:1 Ale Jahowa Debata (BL 212)

……… Jongjong ………

Ø   Ale Jahowa Debata sai tatap hami on,

Ai masiboan dosana be do hami tu joloM.

Asi rohaM di hami be, sai sesa dosa i sude,

Marhite Jesus AnakMi, na mate di hau silang i,

di Golgata, di dolok Golgata.

6.            Tangiang Manopoti Dosa

P:     Tatopoti ma dosanta tu adopan ni Debata, tapaunduk ma rohanta, martangiang ma hita: Ale Tuhan Debata, Pargogo na so hatudosan jala Amanami. Hujou hami do GoarMu na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami, asi rohaM di hami, sai patongtong ma di hami roha hamauliateon tu Ho. O Tondi Parbadia, Pangapul di namarsak roha, pamalum ma saluhut na bernit, binahen ni dosanami. Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata, Ama, Anak dohot Tondi Parbadia. Amen.

……… Tangiang na hohom BE HKBP No. 174 (BL 184) ………

P:     Bagabaga ni Debata taringot tu hasesaan ni dosa. Ro ma hamu tu Ahu, asa mangolu tondimuna, ninna Tuhan Jesus. Tung sura rara dosamuna songon abit bunga dapdap, bontar do bahenonKu songon itak; nang pe rara songon abit hasumba, gabe songon hapas do muse. Hasangapon ma di Debata na di ginjang.

P/R: Amen.

7.            Marende BE No. 189:1+5 O Jesus na Pangolu Au (BL 19)

Ø   O Jesus na pangolu au, Anak ni Debata.

Asi rohaM sai togu au, sahat tu Debata.

Ø   On pe hubonom rohangkon tongtong tu rohaMi.

Sabam ma au bahenon nii, mangolu tondingki.

8.            Epistel: Markus 12:41-44

P:     Hata ni Debata, turpuk Epistel di minggunta sadari on, ima na dienet sian buku Markus 12:41-44, tajaha ma marsingkat sorin. Na hundul do Ibana tondonghon poti parasian, gabe dibereng ma pambahen ni halak mandabuhon hepengna tu poti i. Jadi torop do na mora na mandabuhon na godang.

R:     Laos ro ma boruboru na mabalu sada, na pogos; didabuhon ma tusi dua rimis, i ma sasen.

P:     Gabe dijou Jesus ma siseanNa i, ninna ma mandok nasida: “Situtu do hatangKon tu hamu: Gumodang do na nidabuhon ni na mabalu, na pogos an tu bagasan poti parasian i, asa saluhut angka na mandabuhon i.

R:     Ai sian lobilobinasida do didabuhon be; alai ia parompuan an, sian pogosna do didabuhon saluhutna na di ibana, tung sandok hangoluanna i.”

P:     Ima sahatna. Martua do angka natumangihon Hata ni Debata, jala naumpeopsa.

P/R: Amen.

9.            Marende BE No. 738b:1-2 Lam Jonok Rohangki (SDJ)

Ø   Lam jonok rohangki Tuhan tu Ho.

Nang pe na porsuk do dalan tu Ho.

Sai ima endengki, naeng lam jonok tu Ho.

         Lam jonok rohangki, jonok tu Ho.

……… Jongjong ………

Ø   Marbantal batu pe sonang do au,

Nang pe holom sude, tiur do au.

         Asal di nipingki sai lam jonok tu Ho.

         Lam jonok rohangki, jonok tu Ho.

10.        Manghatindanghon Haporseaon

U:     Rap dohot donganta sahaporseaon di sandok portibi on, tahatindangkon ma haporseaonta i, rap ma hita mandok:

U/R: Ahu porsea di Debata Jahowa, i do Ama Pargogo na so hatudosan natumompa langit dohot tano.

        Ahu porsea di Jesus Kristus, Anak ni Debata Jahowa na sasada i; ima natinubuhon ni si Maria, na gabegabean sian Tondi Parbadia andorang so habubuhan; i do Tuhanta na tumaon na bernit, di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom. Na mulak mangolu di ari patoluhon, na manaek tu Surgo, laho hundul tu siamun ni Debata Jahowa Amana i, Pargogo na so hatudosan i, disi ma Ibana paima mulak sogot tu tano on laho manguhumi angka namangolu dohot na mate,

        Ahu Porsea di Tondi Parbadia, jala adong huria na badia, Huria Hatopan ni halak Kristen angka na badia, dohot di hasesaan ni dosa, dohot di hata i, namandok; Mulak mangolu do sogot daging ni halak naung mate, dohot di hangoluan na so ra suda. Amen.

11.        Tingting Huria dohot Tangiang

12.        Marende BE No. 178:1 Ro ma tu Jesus (BL 196)

Ø   Ro ma tu Jesus, ro ma tibu, bege hataNa jangkon burju.

         Na ro do Jesus pangolu ho, asal porsea ho.

         Mansai las rohanta i muse, molo ias sian dosa pe.

         Sai ro ma hita tu surgo i, laos sonang ma di si.

13.        Jamita: 5 Musa 16:13-17

13:    “Ingkon marariraya parlapelapean ho pitu ari lelengna, ia dung dipapungu ho parbue sian pardegeanmu dohot sian pangilanganmu.

14:    Jala ingkon marlas ni roha ho di ari rayamu, songon i ho dohot anakmu dohot borum dohot naposom baoa dohot naposom parompuan dohot halak Lepi dohot halak dagang dohot dakdanak na tading di lampin dohot parompuan na mabalu di bagasan angka hutamu.

15:    Ingkon pitu ari lelengna ho marariraya di Jahowa Debatam di inganan sipilliton ni Jahowa, ai pasupasuon ni Jahowa Debatam ma ho di saluhut gogo ni tanomu dohot di saluhut ulaon ni tanganmu, dibahen i, ingkon marlas ni roha situtu ho.

16:    Ingkon tolu hali di bagasan sataon ro nasa baoa di tongatongamu tu adopan ni Jahowa Debatam, di inganan sipilliton ni Jahowa, i ma di ari raya sagusagu na so niasoman dohot di ari raya minggu dohot di ari raya parlapelapean, jala ndang jadi rumar boti ro manang ise tu adopan ni Jahowa.

17:    Ganup tahe marguru tu na tarlehon tanganna, hombar tu pasupasu naung nilehon ni Jahowa Debatam tu ho.”

14.        Marende BE No. 691:1-4 Hupasahat ma tu Jesus (SDJ)

(Pelean IA, IB dohot II)

Ø   Hupasahat ma tu Jesus, saluhutna ngolungki.

Roha nang pambahenanhu, saluhutna tingkingki.

         Reff.:      Hupasahat ma tu Jesus, saluhutna diringki,

                        Hupasahat ma tu Jesus, saluhutna ngolungki.

Ø   Pangkeonhu ma tanganhu, mangula lomoNa i.

         Langka nang simanjojakhu mangihuthon Tuhanhi.

         Reff.:      Hupasahat ma tu Jesus, saluhutna diringki,

               Hupasahat ma tu Jesus, saluhutna ngolungki. 

                        ……… Musik ………

Ø   Nang pamereng ni matangku mandompakhon Jesus i.

         Soara ni pamanganhu mamuji GoarNa i.

         Reff.:      Hupasahat ma tu Jesus, saluhutna diringki,

               Hupasahat ma tu Jesus, saluhutna ngolungki.

        

Ø   Dung huida Tuhan Jesus hutundalhon dosangki.

Lohot rohangki tu Jesus sipalua tondingki.

         Reff.:      Hupasahat ma tu Jesus, saluhutna diringki,

               Hupasahat ma tu Jesus, saluhutna ngolungki.

        

                       ……… Musik ………

15.        Tangiang Pelean dohot Pasupasu

Pandita: Tapasahat ma peleanta tu Debata, martangiang ma hita: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehonMi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti, asa huparhaseang hami pelean on patimbulhon harajaonMu di tongatonga ni HuriaM dohot di portibi on. Buhai ma rohanami mandok mauliate tu Ho, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami, Amen.

Ruas:     (Mangendehon): BE No. 204:2 (BL 73) 

               Nasa na nilehon-Mi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, na so unsatonhu do.

Pandita: Ale Amanami na di banua ginjang, sai pinarbadia ma GoarMu, Sai ro ma harajaonMu, sai saut ma lomo ni rohaM di banua tonga on songon na di banua ginjang. Lehon ma tu hami sadari on hangoluan siapari. Sesa ma dosanami, songon panesanami di dosa ni dongan na mardosa tu hami. Unang hami togihon tu pangunjunan, palua ma hami sian pangago.

Ruas:     (Mangendehon): BE HKBP No. 841 (SDJ)

Ai Ho do nampuna harajaon, dohot hagogoon,

Ro di hasangapon, saleleng ni lelengna. Amen.

Pandita: Dipasupasu jala diramoti Tuhan Debata ma ho, disondangkon Debata ma bohiNa tu ho jala asi ma rohaNa mida ho, didompakhon Tuhan Debata ma bohiNa tu ho, jala dipasaorhon ma dameNa tu tondim. Amen.

Ruas:     (Mangendehon): Amen… Amen… Amen.

PANDITA, SALUHUT PARHALADO NANG KELUARGA

 DOHOT SUDE NAMANGHOBASI PARMINGGUONTA SADARI ON PASAHATHON:

 “SELAMAT ARI MINGGU MA DI HAMU SALUHUTNA.

TUHANTA MA NAMAMASUMASU.”