HKBP PONDOK GEDE: PARTORDING NI PARMINGGUON MINGGU, 05 JULI 2020

PARTORDING NI PARMINGGUON

MINGGU IV DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE RESORT PONDOK GEDE

Minggu, 05 Juli 2020

Pukul 07.00 WIB & 10.00 WIB

Topik: Dipasupasu Asa Gabe Pasupasu

(P: Paragenda - R: Ruas)

I. Pangaradeon

II. Acara Parmingguon

1. Marende BE No. 110:1-2 Haleluya Pinuji Ma (BL 98)

Ø Haleluya, pinuji ma, na sasadasa Debata,

Sitompa saluhutna.

Ai asi ni rohaNa i, gogoNa pe tongamNa i;

Ingkon endehononta.

………… Jongjong …………

Ø Haleluya, pinuji ma, na tuat sian Debata,

AnakNa sasadasa.

Na mate ala dosa i, patupa hangoluan i,

Ingkon endehononta.

2. Votum/Agenda

P: Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, natumompa langit dohot tano on.

R: Amen.

P: Ise do na jadi nangkok tu dolok ni Jahowa, jala ise do na jadi jongjong di habadiaonNa i? Halak partangan na lidang dohot na ias roha. Haleluya.

R: (Mangendehon): Haleluya… Haleluya… Haleluya.

P: Martangiang ma hita: Ale Tuhan Debata jala Amanami! Sai urupi ma hami, asa unang mandele hami, uju ro hapogoson tu hami, jala asa unang magopo hubahen hami silehonlehonMu na denggan i, uju ro pasupasuM tu hami. Ramoti hami, asa unang marpos ni roha hami tu artana di hasiangan on. Lehon di hami haporseaon asa dohot hami parjambar di siteanon ni angka na porsea di Ho marhitehite Tuhan Jesus Kristus, Tuhannami.

P/R: Amen.

3. Marende BE No. 194:1-2 Aut So Asi RohaM (BL 62)

Ø Aut so asi rohaM, aut so godang basaM, tu dia au?

Alai dibaen basaM dohot asi rohaM, tu surgo au.

Ø Mauliate ma di Ho, o Debata ala basaM.

Sibahen dalan i marhite anakMi tu banuaM.

4. Patik ni Debata

P: Patik ni Debata di hita sadarion ima ayat bulanan bulan Juli, natarsurat di Poda 4:5 ”Sai eahi hapistaran, eahi ma tutu pangantusion; * unang tung halupahon, jala unang tundali angka hata ni pamanganhu.“ Ima sahatna, antong rap mangido gogo ma hita sian Tuhan Debata.

P/R: Ale Tuhan Debata, sai pargogoi ma hami laho mangulahon na hombar tu patikMi. Amen.

5. Marende BE No. 681:1 Ale Amang Asi RohaM (SDJ)

………… Jongjong …………

Ø Ale amang asi rohaM, di au pardosa on.

Unduk do rohangkon nuaeng, marsomba di joloM.

Unang jujur, unang jujur, angka dosangki.

Sai salpuhon, sai salpuhon, sian rohaMi.

6. Tangiang Manopoti Dosa

P: Tapaunduk ma rohanta martangiang tu adopan ni Debata laho manopoti dosanta: Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, namanguhumi jolma manisia! Na ro do hami tu joloM manopoti dosanami, angka na huula hami marhite sian pangalaosionnami di patikMu, ima marhite sian hatutubu ni rohanami na roa i, nang sian panghataionnami na so ture, ro di pangoloionnami di hisaphisap ni rohanami. Na tama situtu do hona uhum hami ala ni dosanami i, alai na tarsolosolbagi do hami nuaeng ala ni i. Asi ma rohaM di hami, ale Debatanami. Pardenggan basa jala Parasiroha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, napinarbagabagaM di angka na porsea di AnakMu, Tuhan Jesus Kristus, Tuhannami. Amen.

………… Tangiang na hohom BE No. 167 (BL 108) …………

P: Bagabaga ni Debata taringot tu hasesaan ni dosa; Parasiroha jala Pardenggan basa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang.

P/R: Amen.

7. Marende BE No. 169:1 Ho Sipangolu Au (BL 224)

Ø Ho Sipangolu au, sai topot ma au on.

Sai unang mandaodao, Ho sian rohangkon.

Ro Sipangolu ro tibu, baen ma au anakMu tutu,

Dohot mudarMi buri au, ias songon hapas ma au.

Ias tutu, ias tutu, dohot mudarMi buri au,

Ias songon hapas ma au.

8. Epistel: Rom 15:7-13

P: Hata ni Debata turpuk Epistel di hita di bagasan sadari on, ima natarsurat di buku Rom 15:7-13, tajaha ma marsorinsorin: Dibahen i masijangkonan ma hamu songon pangjangkon ni Kristus di hita, bahen hasangapon ni Debata.

R: Ai on do hudok; Naung gabe pangoloi di angka na tarsunat do Kristus ala ni hasintongan ni Debata, laho pahothon bagabaga na tu angka ompu na jolo.

P: Alai dipasangap angka sipelebegu i do Debata ala asi ni rohaNa, songon naung tarsurat: ”Ala ni i do pujionhu Ho di tongatonga ni angka sipelebegu jala endehononhu ma goarMu.”

R: Jala didok di na asing muse: “Marolopolop ma hamu angka sipelebegu rap dohot bangsoNa!“

P: Jala di na asing muse: ”Puji hamu ma Tuhan i, sude hamu angka sipelebegu, jala pujion ni saluhut angka bangso ma Ibana.”

R: Jala didok si Jesaya do muse: ”Adong ma sogot urat ni si Jese, jala hehe ma na manggomgomi angka parbegu; tu Ibana ma manghirim angka bangso.”

P: Alai gok ma dibasabasahon Debata nampuna panghirimon i tu hamu ragam ni halalas ni roha dohot dame di bagasan haporseaon, asa lam sumurung hamu marpanghirimon, pinargogoan ni Tondi Parbadia. Ima sahatna; Martua do angka natumangihon hata ni Debata, jala naumpeopsa.

P/R: Amen.

9. Marende BE No. 470:1-2 Jesus Ho Nampuna Au (BL 317)

Ø Jesus Ho nampuna au dohot na adong di au,

Gogo dohot hosangki, sahat ma tu tanganMi.

………… Jongjong …………

Ø Sai rajai ma matangki, manangkasi dalanMi.

Sai patinggil pinggolhi tumangihon hataMi.

10. Manghatindangkon Haporseaon

P: Rap dohot donganta sahaporseaon di sandok portibion tahatindangkon ma haporseaonta i, rap ma hita mandok:

P/R: Ahu porsea di Debata Jahowa, i do Ama Pargogo na so hatudosan natumompa langit dohot tano.

Ahu porsea di Jesus Kristus, Anak ni Debata Jahowa na sasada i; ima natinubuhon ni si Maria, na gabegabean sian Tondi Parbadia andorang so habubuhan; i do Tuhanta na tumaon na bernit, di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom. Na mulak mangolu di ari patoluhon, na manaek tu Surgo, laho hundul tu siamun ni Debata Jahowa Amanai, Pargogo na so hatudosan i, disi ma Ibana paima mulak sogot tu tano on laho manguhumi angka namangolu dohot na mate,

Ahu Porsea di Tondi Parbadia, jala adong huria na badia, Huria Hatopan ni halak Kristen angka na badia, dohot di hasesaan ni dosa, dohot di hata i, namandok: Mulak mangolu do sogot daging ni halak naung mate, dohot di hangoluan na so ra suda. Amen.

11. Tingting Huria dohot Tangiang Pangondian

12. Marende BE No. 469:1-2 Di Dia Ahu Tu Dia (BL 316)

Ø Di dia ahu, tu dia laho torop donganhu.

Punjunglangkangku, Jesus Tuhanhu, Jesus Tuhanhu.

Ø Naung ro Tuhanhu, girgir rohangku, laho pararathon,

Manghatindangkon Jesus Tuhanhu, Jesus Tuhanhu.

13. Jamita: 1 Musa 12:1-9

1. Dung i ninna Jahowa ma mandok si Abram: “Bungkas ma ho sian tano hagodanganmu dohot sian tano hatubuanmu dohot sian bagas ni amam tu tano sipatuduhononHu tu ho.

2. Hubahen pe ho gabe bangso na bolon, jala pasupasonHu ma ho, jala pabalgaonHu goarmu, asa gabe pasupasu ho.

3. Jala pasupasuonHu angka na mamasumasu ho, jala toruaonHu angka na mamurai ho, jala dapotan pasupasu marhitehite ho saluhut angka bangso di tano on.”

4. Jadi bungkas ma si Abram, songon na nidok ni Jahowa tu ibana, bungkas ma dohot si Lot udur dohot ibana. Marumur pitu pulu lima taon si Abram, di na bungkas i ibana sian Haran.

5. Dung i diarahon si Abram ma si Sarai, jolmana i dohot si Lot, anak ni hahana i ro di sude na sinamotsamotnasida, dohot jolma angka na tinuhornasida di Haran, jadi bungkas ma nasida laho tu tano Kanaan. Jadi dung tolhas nasida ro di tano Kanaan.

6. Diliati si Abram ma tano i sahat tu inganan ni si Sikem ro di tombak More, nunga di tano i hian halak Kanaani didapot.

7. Dung i ro ma Jahowa, diida si Abram, didok ma: ”Tu pinomparmu ma lehononHu tano on.” Jadi dipaojak disi sada langgatan di Jahowa na niidana i.

8. Dung i borhat ma ibana sian i tu sada dolok na tungkan habinsaran ni Bet-El, jala dipagohon undungundungna, tungkan hasundutan ni Bet-El, jala tungkan habinsaran ni Ai; jadi dipauli ma disi sada langgatan di Jahowa, jala dipajoujou goar ni Jahowa.

9. Dung i bungkas muse si Abram laho dompak dangsina.

14. Marende BE No. 792:1… Pasupasu Hami o Tuhan (SDJ)

Papungu Pelean IA, IB & II

1 Reff.: “Pasupasu hami o Tuhan, sai usehon dameMi.