SERMON LANJUT USIA (LANSIA)

 https://www.youtube.com/watch?v=YLV3l7xk3N4&t=3s

SERMON LANJUT USIA

KAMIS, 10 SEPTEMBER 2020

 

1.   Buku Ende HKBP No. 763: 1 Molo Jesus donganmi G=Do 3/4

 

Molo Jesus donganmi las roham,

Jesus i pangurupim las roham.

Hot haporseaonmi dohot pos ni rohami, mardonganhon Jesus i las roham.

Las roham, las roham,

mardonganhon Jesus i las roham.

Marsinondang ma di ho

bintang panghirimon i,

mardonganhon Jesus i las roham.

 

2. Psalmen 4: 1-9

 

Hata ni Tuhanta Jamita di Sermon Lanjut Usia (Lansia 10 September 2020 Psalmen 4: 1-9 mandok:

 

4:1 Ende sian si Daud.

4:2 Sai alusi ma ahu, ale Debata ni hatigoranku, ia hujou Ho, jala palumbang ahu jumpa hagogotan, asi ma roham di ahu, jala tangihon ma tangiangki.

4:3 Ia hamu, pinompar ni jolma, sadia leleng on do lea rohamu di hasahalaonki, sadia leleng on do haholongan ni rohamuna na so hasea, jala dioronmuna gabus. Sela.

4:4 Unang so boto hamu: Marhasurungan do dibahen Jahowa angka hasianna, matua ditangihon Jahowa do, molo hujou Ibana.

4:5 Holsohon hamu hian ma, asa unang dapotan dosa, marhusari ma rohamuna, dung ro di podoman hamu, asa sonang hamu. Sela.

4:6 Pelehon hamu ma pelean hatigoran, jala marhaposan tu Jahowa ma hamu.

4:7 Lan do angka ma mandok: Tung ise ma manumpakkon na denggan tu hita? Alai ale Jahowa, sai pasondangkon ma tu hami sondang ni bohim!

4:8 Gumodang do las ni rohangku dilehon Ho, sian di nasida di hamamasa ni gotilon eme dohot anggur na gabe situtu.

4:9 Sonang do ahu hupapeak huhut mamintor nok; ai sasada Ho do, ale Jahowa, pasonang ahu maringanan.

I ma sahatna!

 

Ompungdoli-ompungboru Lanjut Usia!

 

Tangkas taboto jamita parngoluon ni raja Daud, sada halak na marparsaoran na rosu solhot dohot Debata.

Songon sahalak naposo ni Debata Daud, ragam na masa  diadopi di ngoluna, hamaolon dohot las ni roha. Mangadopi mara uju marmahan, maralohon bangso Palistim, maralohon Saul, maralohon sibolis. Songon dia pe ragam ni angka na masa i di ngoluna, tongtong do ibana pasahathon diri ibana tu Debata. Diboto ibana do hagaleonna paboa ndang margogo ibana mangadopi angka musuna, alani i do didok ibana “Sai alusi ma ahu, ale Debata ni hatigoranku, ia hujou Ho, jala palumbang ahu jumpa hagogotan, asi ma roham di ahu, jala tangihon ma tangiangki.” (ay.2). On ende tangiang mangido haluaon. Pola didok ibana “Marhasurungan do dibahen Jahowa angka hasianna, matua ditangihon Jahowa do, molo hujou Ibana.”  Patuduhon solhot ni ibana tu Debata, na so ise be ibana, nda songon hasian di Debata.

Sada halak hasian adong do hatandianna, i ma “Sonang do ahu hupapeak huhut mamintor nok; ai sasada Ho do, ale Jahowa, pasonang ahu maringanan.”

Tutu torop dohot gogo do musuna, jala diboto Daud do hagaleonna, tung so tarbahenna do sian gogona sandiri maralohon musuna i. Debata do dipangasahon laho mangalo musuna i. Pos do rohana tu Debata na oloan ni Debata do pangidoanna. Ale Jahowa, sai  pasondangkon ma tu hami sondang ni bohim! (ay.7).

Turpuk on mangarahon hita dipartingkian hamaolon pangontak ni Covid-19 dohot keadaan sosial politi-ekonomi na maol on, portibi angka na tinompa ni Debata naung lam sega-lam mohop portibi on, asa tongtong  mangasahon Tuhanta i hita, Ibana paturehon hita, paluahon hita sian hamaolon on. Tuhan Jahowa do pangurupi, haporusan, na marmahani hita. Tuhan Jahowa do dolok batu ro di saleleng ni lelengna (Jesaya 26:4 Marhaposan tu Jahowa ma hamu tongtong, ai Tuhan Jahowa do dolok batu ro di salelenglelengna).

Sude angka na uli, denggan basa holan sian Debata do harorona marhitehite Jesus Kristus.

Hasian ni Tuhanta do hita marhitehite Jesus Kristus, dohononta ma bornginna i uju naeng peak hita modom di podoman: “Sonang do ahu hupapeak huhut mamintor nok; ai sasada Ho do, ale Jahowa, pasonang ahu maringanan.” Amen.

 

3. Tangiang

Ale Tuhan Debata, Amanami Parasiroha na sumurung! Sai togihon ma hami tu Anak-Mu, asa Ibana nampuna hami. Lehon ma di hami haporseaon na sintong, asa holan Ho sambing haposannami. Unang loas hami marhaposan tu angka na di hasiangan on, ai holan Ho do haposan dohot haporusan. Sai asi ma rohaM, patuduhon tu hami dalan tu hatuaon, Paspasu ma saluhutna ruas Lanjut Usia (Lansia) ompungdoli-ompungboru di huriaM, asa jumpang hami asi ni rohaM na godang i ala ni Tuhan Jesus Kristus, Tuhannami. Amin.

 

4.    Menyanyi Buku Nyanyian HKBP No. 763: 1 Bila Yesus sertamu G=Do 4/4

 

Bila Yesus sertamu, s’lamatlah.

Yesus yang menolongmu, s’lamatlah.

Imanmu s’makin teguh.

Pengharapanmu penuh.

Yesus dalam hidupmu, s’lamatlah.

S’lamatlah jiwamu,

bila Yesus sertamu s’lamatlah.

‘Kan bersinar bagimu bintang pengharapanmu,

Bila Yesus sertamu s’lamatlah.

 

5. Tangiang Panutup

 

Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago! Ai Ho do nampuna harajaon dohot hagogoon ro di hasangapon saleleng ni lelengna. Amen!

Asi ni roha ni Tuhan Jesus Kristus dohot holong ni roha ni Debata Ama dohot parsaoran ni Tondi Parbadia i ma mandongani hamu ! Amen.

 

6. (mangendehon BE. HKBP No. 845: Es=Do 4/4) Amen, amen, amen.