PARTORDING NI PARMINGGUON MINGGU PASAMPULUONOMHON DUNG TRINITATIS MINGGU, 27 SEPTEMBER 2020

 

PARTORDING NI PARMINGGUON

MINGGU PASAMPULUONOMHON

DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE

RESORT PONDOK GEDE

Minggu, 27 September 2020

Ev. 2 Samuel 9:1-8

Ep. Lukas 14:12-14

 

Topik: Marasi ni Roha tu Angka Namartihas

(P: Paragenda - R: Ruas)

 

 

I.         Persiapan

 

II.       Tingki na hohom

 

III.     Ulaon parmingguon

 

1.        Marende BE HKBP No. 15:1-2 Aut na Saribu Hali Ganda (BL 103)

1.        Aut na saribu hali ganda saringar ni soarangki.

Naeng nasa gogo bahenonhu mamuji Debatanta i.

Paboa las ni rohangki, hinorhon ni pambaen-Na i.

 

--- Jongjong ---

 

2.        Tung sura sahat soarangku tu ujung ni portibi on.

Naeng nasa jolma haraonhu mamuji Debata tongtong.

Tama do nasa hosangki hubaen pasangap Tuhan i.

2.        Votum – Introitus – Tangiang (A.XV/A.9; D.XIII/52)

 

P:    Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

 

P/R: Amen.

 

P:    Parangehon hamu ma na tama di Tuhan i, marguru tu sandok lomo ni rohaNa, marparbuehon parbue marhitehite saluhut ulaon na denggan. Oloi hamu ma Jahowa marhitehite las ni roha, ro be ma hamu tu joloNa marhitehite olopolop. Haleluya!

 

R:    (Mangendehon BE HKBP No. 852 F=Do 4/4):

       Haleluya, Haleluya, Haleluya!

 

P:    Martangiang ma hita:

Ale Tuhan Debata, Pargogo na so hatudosan! Ho do silehon apulapul tu angka na marsak roha. Ho do silehon gogo tu angka na gale. Asi ma rohaM! Tatap ma angka na marsak roha dohot angka na hona pangunjunan. Sai tatap ma hoihoinasida, jala palua nasida sian hagogotan i, asa patar diida nasida: Ho do pangurupi, haporusan dohot pangaramoti di hagogotan marhitehite Tuhan Jesus Kristus, Tuhannami.

 

R:    Amen. -hundul-

 

3.        Marende BE HKBP No. 567:1-2 Na Mora do Tuhanta i

 

1.        Na mora do Tuhanta i, jala parholong situtu.

Na basa mangalehon. Pangido ma tu Tuhan i,

Sian hamoraonNa i, tu ho pasahathonNa,

Mardongan las ni roha.

2.        Na ro do hami o Tuhan marsomba tu habangsaMi,

Tangihon pangidoan. Patogu rohanami be,

Nang panghirimonnami pe, unang luangan hami,

Manang tarhirim hami.

 

4.        Patik (Psalmen 41:2-4)

 

P:    Tangihon hamu ma Patik ni Debata i ma sian buku Psalmen 41:2-4:

·        Martua ma halak na manatap uhum tu na soro ni arion, sai paluaon ni Jahowa do ibana di * ari hinamago.

·        Ramotan jala pangoluon ni Jahowa do ibana, martua do ibana bahenonNa di tano on, jala ndang tagamon lehononMu ibana ripe rupaon ni musuna.

·        Sandeon ni Jahowa ma ibana di podoman parsahiton, dipahosing Ho do lagena sudena di parsahitonna i.

 

Ima sahatna. Antong rap mangido gogo ma hita sian Debata laho mangulahon na hombar tu patikNa i:

 

P/R: Ale Tuhan Debata, sai pargogoi ma hami mangulahon na hombar tu Patik-Mi. Amen.

 

5.        Marende BE HKBP No. 688:1+3 Tuhan

 

1.        Tuhan jotjot do marsak donganhi.

Ala na sala pambahenanhi.

Hatangku, langka nang parulanhi; jora ma au.

 

--- Jongjong ---

 

3.     Nuaeng na ro do au sumomba Ho,

Pasahat ngolungki Tuhan tu Ho.

Tuhan lehon ma roha na holong; urupi au.

6.        Manopoti Dosa (B.3; C.3)

P:    Tatopoti ma dosanta!

Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia! Na ro do hami tu joloM manopoti dosanami, angka na huula hami marhite sian pangalaosionnami di PatikMu, i ma marhite sian hatutubu ni rohanami na roa i, nang sian pangkataionnami na so ture, ro di pangoloionnami di hisap-hisap ni rohanami. Na tama situtu do hona uhum hami ala ni dosanami i; alai na tarsolsol bagi do hami nuaeng ala ni i. Asi ma rohaM di hami, ale Debatanami. Pardengganbasa jala Parasi roha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di AnakMu Tuhan Jesus Kristus, Tuhannami. Amen.

 

(Tangiang na hohom BE HKBP No. 182 BL 24)

 

P:    Tabege ma Hata bagabaga taringot tu hasesaan ni dosa. Parasi roha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang!

P/R: Amen.

7.        Marende BE HKBP No. 190:1 Las Rohangku Situtu (BL 69)

1.        Las rohangku situtu mida Jesus na lulu.

Manjalahi hajolmaon, ai Ibana paluahon.

Jolma manisia i sian hamagoan i.

 

8.        Epistel (Lukas 14:12-14)

P:    Tabege ma Hata ni Debata turpuk ni ari Minggu on, sian buku Lukas 14:12-14. Ita jaha ma marsorinsorin, songon on ma hatana!

Didok ma huhut tu na mamio Ibana: “Jumpa dibahen ho pesta manang haroan, unang ma pio tusi angka alealem, manang hahaanggim, manang hulahulam, manang hombar bagasmu pe, angka na gabe, asa unang nasida muse mamio ho, gabe dibalos i tu ho.

R:    Alai jumpa mambuat sipanganon ho, pio ma angka na pogos, angka na martihas, na pangpang dohot na mapitung.

P:    Jadi martua ma ho disi, ai ndang tarbalos nasida i tu ho; alai marbalos do i tu ho sogot di haheheon ni angka partigor.” I ma sahatna! Martua do angka na tumangihon Hata ni Debata, jala na umpeopsa.

P/R:  Amen.

 

9.        Marende BE HKBP No. 474:1-2 Ingkon Jesus do Donganku (BL 321)

1.        Ingkon Jesus do donganhu sahalakhu lilu do.

Raphon Jesus boi au monang, talu musu i na ro.

Ndang mabiar au disi, Tuhan Jesus donganhi.

Sai ihuthononhu Jesus, oloanhu nama i.

 

--- Jongjong ---

2.        Ingkon Jesus do donganhu molo marsitaonon au.

Tu Ibana hutingganghon nasa na pasorat au.

Ndang mabiar au disi, Tuhan Jesus donganhi.

Sai ihuthononhu Jesus, oloanhu nama i.

 

10.    Manghatindanghon Haporseaon

 

P:    Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

 

P/R: Ahu porsea di Debata Jahowa, i do Ama, Pargogo na so hatudosan na tumompa langit dohot tano.

       

       Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

      

       Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.        

11.    Tingting Huria dohot Tangiang Pangondian

 

 

12.    Marende BE HKBP No. 516:1-2 Bege Joujou ni Jesus (BL 353)

 

1.        Bege joujou ni Jesus i, tongtong dijou na lilu i.

       Mago do birubiru i sian Tuhanta Jesus i.

       Sai lului, sai lului birubiru na mago i.

     Sai lului, sai lului, mulak boan i tu Jesus.

 

2.        Ho diarahon Jesus i, silu lului na mago i.

       Togihon ma tu Jesus i na loja, na maheu i.

       Sai lului, sai lului birubiru na mago i.

     Sai lului, sai lului, mulak boan i tu Jesus.

 

 

13.    Jamita (2 Samuel 9:1-8)

 

1.        Dung i ninna si David ma manangkasi: “Adong dope ulaning jolma tadingtadingan ni Raja Saul, asa hubahen asi ni roha tu ibana, ala si Jonatan?”

 

2.        Jadi adong ma sada naposo isi ni bagas ni si Saul nahinan, na margoar si Siba, gabe tarjou ibana tu jolo ni si David. Dung i ninna raja i ma mandok ibana: “Atehe ho do si Siba?” “Naposom do ahu,” ninna ibana.

3.        Dung i didok raja i ma: “Atehe adong dope jolma tadingtadingan ni si Saul, asa hubahen tu ibana asi ni roha sian Debata?” Jadi ninna si Siba ma mandok raja i: “Adong dope sada anak ni si Jonatan, pangpang patna duansa.”

 

4.        Dung i ninna raja i ma mandok ibana: “Di dia ibana?” Gabe didok si Siba mandok raja i: “Ida ma, di Lodebar do ibana, sorang tu si Makir, anak ni si Ammiel.”

 

5.        Dung i disuru Raja David suruanna mangalap ibana sian bagas ni si Makir, anak ni si Ammiel di Lodebar.

 

6.        Jadi dung sahat si Mepiboset, anak ni si Jonatan, tubu ni si Saul, tu jolo ni si David, manungkap ma ibana tu tano marsomba. Alai ninna si David ma: “Ale Mepiboset!” Gabe didok ibana ma: “Dison do ahu naposom.”

 

7.        Dung i didok si David muse tu ibana: “Unang ho mabiar, ai ingkon bahenonhu tu ho asi ni roha; ala ni si Jonatan amangmu, ingkon paulahonhu tu ho sude golat ni si Saul, ompumi, jala ingkon tongtong ho sapanganan dohot ahu.”

 

8.        Jadi marsomba ma ibana, huhut didok: “Tung ise ma pola ahu naposom, umbahen pola dompakhononmu biang na mate songon ahu on?”

 

14.    Marende BE HKBP No. 716:1-3 Di na Mamolus Sandok Ngolu on (Pelean)

 

 

1.        Di na mamolus sandok ngolu on,

Gok do na marsak, gale.

Boan sinondang tu na holom i,

Asa margogo muse.

 

Reff.:      Bahen ma ahu parhiteanMu,

            PasupasuM mabaor ma i.

            Ale Tuhanhu patupa ma au,

            Baen pasupasu tu dongan sude.

 

--- Musik ---

 

2.        Sai baritahon Jesus na burju,

Tuk manesa dosa i.

Asa porsea di Jesus tutu,

Denggan pambaenmu disi.

 

Reff.:      Bahen ma ahu parhiteanMu,

            PasupasuM mabaor ma i.

            Ale Tuhanhu patupa ma au,

      Baen pasupasu tu dongan sude.

 

 

--- Musik ---

 

3.        Ula na denggan tu halak sude,

Songon binaenNa tu ho.

Ingot, urupi luhut na gale,

Gabe parholong ma ho.

 

Reff.:      Bahen ma ahu parhiteanMu,

            PasupasuM mabaor ma i.

            Ale Tuhanhu patupa ma au,

            Baen pasupasu tu dongan sude.

 

--- Musik ---

 

 

15.    Tangiang Pelean – Ale Amanami – Pasupasu

 

Pdt: Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:     (Mangendehon): BE HKBP No. 204:2 (BL 73)

       Nasa na nilehon-Mi, tondi ro di pamatanghu.

       Hosa dohot gogongki, ro di saluhut artangku.

       Hupasahat i tu Ho, na so unsatonhu do.

 

P:     Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:     (Mangendehon): BE HKBP No. 841

       Ai Ho do nampuna harajaon

       Dohot hagogoon, ro di hasangapon

       Saleleng ni lelengna. Amen.

 

P:     "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

 

P/R:  (Mangendehon): BE HKBP No. 845

              Amen… Amen… Amen.

 

 

Peleanta, itatongoshon ma tu:

1. Rekening Britama Cab. Pond Gede

No. (002) 038501000630566

2. Tabungan BNI

No. (009) 1919667770

 

 

Manang boi ma discan sian aplikasi LinkAja, Gopay, Ovo, Dana dan Shopee: