PARTORDING NI PARMINGGUON MINGGU XIII DUNG TRINITATIS, 6 SEPTEMBER 2020

 

PARTORDING NI PARMINGGUON

MINGGU PASAMPULUTOLUHON DUNG TRINITATIS

NEW NORMAL - SOCIAL DISTANCING COVID-19

HKBP PONDOK GEDE RESORT PONDOK GEDE

Minggu, 6 September 2020

Ev. Mateus 27: 1-10

Ep. 1 Musa 37: 23-30

 

Topik: Ndang Jadi Manjehehon Dongan Jolma

(P: Paragenda - R: Ruas)

 

 

1.            Marende BE HKBP No. 9: 1-2 Hupuji Holong ni Roha-Mu (BL 110) C=Do 3/4

 

1.        Hupuji holong ni roha-Mu, o Tuhan Jesus Rajangki.

Tu Ho hulehon ma tondingku, ai i do pinangidoM i.

Huhalupahon ma diringku, mamingkir holong ni roha-Mu.

 

---Jongjong ---

 

2.      Sai dilului Ho do ahu, au pe huhalungunhon Ho.

Ditaiti rohaM i rohangku, dibahen i hulehon do.

Dipillit Ho hian tondingku, i pe hutodo Ho Tuhanhu.

 

2.        Votum – Introitus – Tangiang (A.XV/A.10 – D.XIII/47)

         P:      Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

         R:      Amen.

         P:      Tigor do angka dalan ni Jahowa, jala halak partigor mardalan disi; alai anggo halak parjahat tarsulandit do disi. Haleluya!

         R:      (Mangendehon BE HKBP No. 852 F=Do 4/4):

                  Haleluya, Haleluya, Haleluya!

         P:      (Martangiang ma hita):

                  Ale Tuhan Debata, Pargogo na so hatudosan, na songkal jala na bonar! Dialo Ho do na ginjang marroha, jala dipatimbo Ho do na serep marroha. Ala ni i hupangido hami tu Ho: Sai ramoti hami, asa unang jungkat hami, unang ginjang rohanami. Alai togutogu hami marhitehite TondiM, asa unduk, serep tobok jala burju rohanami di adopan ni halak saluhut, ala ni Anak-Mu, Tuhan Jesus Kristus, Tuhannami.

                 

         R:      Amen. -hundul-

 

3.        Marende BE HKBP No. 588: 1 Tasomba Tongtong G=Do  3/4

 

1.      Tasomba tongtong na sun gogo i,

Tadok ma antong songkal Tuhan i.

Partanobatoan haporusan i,

Gok hamuliaon habangsa-Na i.

        

4.        Patik ni Debata Patik Patoluhon dohot Lapatanna

         P:      Tangihon hamu ma Patik ni Debata i ma Patik Patoluhon dohot lapatanna.

                  Patik Patoluhon:

                  Ndang jadi dohonon Goar ni Debata, ianggo so ture dalanna. Ai hona uhumNa do sogot angka na marsineang di GoarNa. 

Dia do lapatan ni i?

On do: Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolonnolon manang marujarujaran na roa, manang mangansi marhitehite Goar ni Debata; ai di na tarsosak dohot di tangiang dohot di pujipujian do sidohonon Goar ni Debata.

         P:      Rap mangido gogo ma hita laho mangulahon Patik-Na!

         P+R:  Ale Tuhan Debata, sai pargogoi ma hami mangulahon na hombar tu Patik-Mi. Amen.

 

5.        Marende BE HKBP No. 165: 1-2 Na Basa do RohaM di Au (BL 19) D=Do 4/4

 

1.      Na basa do rohaM di au, o Jesus Tuhanhi.

  Diihuthon Ho au tu na dao, mambuat rohangki.

 

--- Jongjong ---

2.      Pardosa na godang do au, badia anggo Ho.

  Sai tu na roa do au lao, sai tu na jahat do.

 

 

6.        Manopoti Dosa (B.3 – C.3)

P:      Tatopoti ma dosanta!

Ale Tuhan Debata, Ama ni Tuhannami Jesus Kristus, Ho do Debata pargogo na so hatudosan, sitompa nasa na adong, paruhum na tigor, na manguhumi jolma manisia! Na ro do hami tu joloM manopoti dosanami, angka na huula hami marhite sian pangalaosionnami di Patik-Mu, i ma marhite sian hatutubu ni rohanami na roa i, nang sian pangkataionnami na so ture, ro di pangoloionnami di hisaphisap ni rohanami. Na tama situtu do hona uhum hami ala ni dosanami i, alai na tarsolsol bagi do hami nuaeng ala ni i. Asi ma rohaM di hami, ale Debatanami. Pardengganbasa jala Parasi roha do Ho ala ni Anak haholongan ni rohaM, Tuhan Jesus Kristus Tuhannami. Sai sesa ma dosanami saluhutna, jala suru ma Tondi Parbadia tu rohanami be, asa tarbahen hami mangoloi Ho di bagasan hatigoran dohot habadiaon, gabe sahat hami tu hangoluan na so ra suda, na pinarbagabagaM di angka na porsea di Anak-Mu, Tuhan Jesus Kristus, Tuhannami.

R:       Amen.

P:       ……… Tangiang na hohom BE HKBP No. 165 Na Basa do RohaM di Au (BL 19) D=Do 4/4 ………

 

          Tabege ma Hata bagabaga taringot tu hasesaan ni dosa. 

 

          Parasi roha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang!

 

R:       Amen.

 

7.        Marende BE HKBP No. 180: 1+4 Ro tu Jesus ho na Loja (BL 228) As=Do 3/4

 

1.      Ro tu Jesus ho na loja, na maheu i.

         Lam lumbang do di lambung-Na rohami.

 

4.      Apulapul sae ni dosa, hangoluanmi.

         Saluhut dilehon Jesus, tuami.

 

      

8.        Manjaha Buku 1 Musa 37: 23-30

         P:      Tabege ma Hata ni Debata turpuk ni ari Minggu on, sian buku 1 Musa 37: 23-30. Ita jaha ma marsorinsorin. Jadi dung tolhas si Josep tu lambung ni angka hahana i, diosari nasida ma bajuna, baju sampuborna na ganjang i, na pinangkena i.

         R:      Dung i ditangkup nasida ibana, jala didabu ibana tu godung, alai rumar godung i ndang marisi aek.

         P:      Dung i hundul ma anggo nasida mangan sagusagu. Dung i manatapnatap ma nasida, gabe diida ma marudurudur halak Ismael ro sian Gilead rap dohot untonasida, angka na mangusung pamurpuri, miak na hushus dohot haminjon, angka na laho tuat tu tano Misir palangkahonsa.

         R:      Jadi ninna si Juda ma tu angka hahaanggina i: “Aha ma labanta molo itabunu angginta i, jala itaporso mudarna i?

         P:      Beta, itagadis ma ibana tu halak Ismael an, asa unang mangonai tangan hita tu ibana, ai angginta jala sibukta ibana,” jadi ditangihon angka hahaanggina ibana.

         R:      Dung i di na mamolus angka partigatiga halak Midian i, dienet nasida ma si Josep sian godung i tu ginjang,

         P:      Jala digadis si Josep arga dua pulu rupia tu halak Ismael, angka na mamboan si Josep tu tano Misir.

         R:      Dung i mulak ma si Ruben tu godung i, hape ndang be di bagasan godung i didapot si Josep, jadi disansani ma angka ulosna.

         P:      Dung i mulak ma ibana tu angka anggina i, ninna ma: “Ndang be disi dakdanak i, tu dia nama ahu?” I ma sahatna! Martua do angka na tumangihon Hata ni Debata, jala na umpeopsa.

         R:      Amen.

9.        Marende BE HKBP No. 476: 1 Ndada Au Guru di Au

(BL 322) G=Do 3/4

--- Jongjong ---

 

 

1.      Ndada au guru di au be, Jesus do nampuna au.

Las rohangku dung hubege, Jesus sipangolu au.

Ndang be au guru di au

Jesus na humophop au, nampuna au.

Tung saleleng au mangolu,

Jesus do nampuna au.

 

10.     Manghatindangkon Haporseaon

 

         P:      Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

 

         P+R:  Ahu porsea di Debata Jahowa, i do Ama, Pargogo na so hatudosan na tumompa langit dohot tano.

 

                  Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

                 

                  Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

 

11.     Tingting Huria + Tangiang Pangondian

12.     Marende BE HKBP No. 719: 1 Hubege SoaraM o Jesus F=Do 4/4

1.      Hubege soaraM, o Jesus; hubege soaraM, o Jesus.

Hubege soaraM, o Jesus na manjouhon: “Ihuthon ma Au!”

Togu au Jesus Tuhanhu, iringiring ma langkangku.

Patuduhon ma dalan-Mu, asa unang, unang lilu au.

 

13.     Jamita Mateus 27: 1-10

P:      Hata ni Debata jamita di Minggu Pasampulutoluhon dung Trinitatis sadari on, sian Evangelium Mateus 27: 1-10 mandok:

Torang ni arina i martuptup ma sude angka sintua ni malim dohot sintua ni bangso i dompak Jesus, laho mamusa Ibana.

Ditali jala ditogu nasida ma Ibana laho pasahathon tu panguhum si Latus.

Jadi dung diida si Judas, parjehe i na naeng hona uhum nama Ibana, disolsoli ma rohana, dipaulak ma na tolu pulu rupia i tu angka sintua ni malim dohot tu sintua ni bangso i;

ninna ma: “Sala do ahu, hujehehon do hape na so marpipot.” Alai didok nasida ma: “Ndang ro di hami i. Ho do na sari disi.”

Jadi ditimpalhon ma perak i tu bagasan joro i, laos sumurut sian i laho maningkot.

Alai dibuat angka sintua ni malim ma hepeng i, ninna ma: “Ndang jadi padomuon i tu arta ni joro, ai tuhor ni mudar do i.”

Jala mardos ni roha nasida manuhorhonsa tu ladang ni pande hudon, bahen parbandaan ni halak dagang.

Ala ni i do umbahen na margoar i ladang mudar ro di sadari on.

Disi ma jumpang hata ni Panurirang Jeremia na mandok: "Dibuat nasida do na tolu pulu rupia i, asam ni na niasam, diasam deba anak Israel.

Dung i dilehon ma i manuhor ladang ni pande hudon, songon na nidokhon ni Tuhan i tu ahu." I ma sahatna!

14.     Marende BE HKBP No. 749: 1… Songon Sorha ni Padati D=Do 3/4 (Pasahat Pelean)

           

1.      Songon sorha ni padati do ngolu ni jolma i.

Ari on marlas ni roha ala pangomoan i.

Hape ro ma sorimago na manosak roha i.

Hapogoson boi do songgop, ise pangaluan i?

Tatap ma halibutongan dungkon salpu udan i,

Padan holong ni roha-Na di sudena jolma i.

 

--- Musik ---

 

2.      Molo ro pe halisungsung, holom humaliang ho.

Pos roham ndang dipasombu sai paluaon-Na ho.

Molo manariur langit, tung uli idaon i.

Tanda holong ni rohaNa di na tinompa-Na i.

Tatap ma halibutongan dungkon salpu udan i,

Padan holong ni roha-Na di sudena jolma i.

 

--- Musik ---

 

3.      So tung pola ho mandele, unang biahaton ho.

         Hehe ho hatop langkahon, ingot padan na tu ho.

Haholongon do Tuhanmu, i ma mangapuli ho.

Bahenon-Na ho martua, asal ma porsea ho.

Tatap ma halibutongan dungkon salpu udan i,

Padan holong ni roha-Na di sudena jolma i.

 

--- Musik ---

 

 

15.     Tangiang Pelean – Ale Amanami – Pasupasu

 

P:      Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:      (Mangendehon): BE HKBP No. 204:2 (BL 73)

         Nasa na nilehon-Mi, tondi ro di pamatanghu.

         Hosa dohot gogongki, ro di saluhut artangku.

         Hupasahat i tu Ho, na so unsatonhu do.

 

P:      Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:      (Mangendehon): BE HKBP No. 841

         Ai Ho do nampuna harajaon

         Dohot hagogoon, ro di hasangapon

         Saleleng ni lelengna. Amen.

 

P:      "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

 

P+R:  (Mangendehon): BE HKBP No. 845

         Amen… Amen… Amen.

 

Peleanta, itatongoshon ma tu:

 

1. Rekening Britama Cab. Pond Gede

No. (002) 038501000630566

 

2. Tabungan BNI

No. (009) 1919667770