PESTA PARNINGOTAN DI HAMAMATE NI TUHAN JESUS

PARTURE NI PESTA PARNINGOTAN

 DI HAMAMATE NI TUHAN JESUS

DOHOT

MARULAON NA BADIA

HKBP RESORT PONDOK GEDE

Jumat, 25 Maret 2016

Topik: 
Kristus do Pardenggananta

(Johannes 19: 28-30)

. Perumahan Taman Pondok Gede Blok H No.1-3

Pondok Gede RT 04 RW 01 Kelurahan Jatirahayu

Kecamatan Pondok Melati Kota Bekasi

Provinsi Jawa Barat

Telp. (021) 8467284

1.  Pangaradeon.

·                   Parhalado mangarade panghobasion di Bilut Parhobasan.

·                  Huria mangarade pahohom dirina dihundulanna be.

·                U=Uluan             H=Huria

2.  Joujou tu parsaoran dohot Debata.

U:    Hamuna angka dongan sahaporseaon, namarpungu do hita nuaeng di Gareja on laho patupahon Pesta Parningotan di Hamamate ni Tuhanta Jesus Kristus. Andorang sotapungka pestanta, tangkas do ingkon taparade rohanta, pingkiranta dohot sandok ngolunta laho marningot habebernit ni sitaonon ni Jesus di hau napinarsilangi siala ni dosa ni saluhut jolma, ingkon manaon Ibana siala dosa na so tumanda dosa hian siala pangalaosionta di Patik ni Debata. Naeng nian targorga turohanta bernit ni na tinaon ni Jesus i asa unang be taulahon mardosa. Undukhon ma saluhut pambahenanmu nahurang i, jala taendehon ma ende on sian nasa rohanta:

                 (Mangendehon BE. No. 84: 1) Aut na ginorga tu rohangku Bl.195 F=Do

                 Aut na ginorga tu rohangku, bohiM di na lao mate Ho
Aut na huingot o Tuhanku, tongtong pangkophopMi di au
Ai Ho do paluahon ahu, dosangku do pinorsanMi
Didaoni Ho parsahitonku, martua au binahen ni i.

---------------tingki na hohom----------------

                 Tabongoti ma tingki parsaoran dohot Debata, ita uduti ma mangendehon Buku Ende No. 86: 1-3  Silang na badia i

3.  Marende BE. No. 86: 1-3  Silang na badia i  Bl.67 Bes= Do

1.    Silang na badia i, Ho do lombulombungki.

     Maralohon dosa i, dohot pandelean i.

     Di sude sitaonon i, Ho ma lombulombungki.

2.    Nasa na huula i, ndang tau hasonanganki.

     Nang ringkot pe rohangki, pola ro nang ilungki.

     Holan asi ni rohaM, pangurupi o, Tuhan.

                      ………………musik………………(jongjong)

3.  Ro do au nuaeng tu Ho, sai palambas ma rohaM.

     Nunga pola mate Ho, ala asi ni rohaM

     Jangkon au na dangol on, sai ulosi tondingkon.

4.  Votum-Introitus-Tangiang.

U:      Marhitehite Goar ni Debata Ama, dohot Goar ni AnakNa Tuhan JesusKristus, dohot Goar ni Tondi Parbadia natumompa langit dohot tano on.

H:      A m e n .

U:      Sintua ni Malim sisongon i do tama di hita, na badia, na so jahat, na so marlindang, na so marbolat sian angka pardosa.

H:      Naung gabe tumimbo sian angka banua ginjang.

U:      Na so pola ganup ari songon angka sintua ni malim i mamboan jumolo pelean taringot tu angka dosana sandiri, dung i taringot tu dosa ni natorop i.

H:      Ai sahali do i diulahon, di na mamelehon diriNa Ibana

U:      Na gabe pangoloi do Kristus paima mate, pola mate tarsilang. Di dia angka soropmi, ale hamatean? Di dia pangagoonmu, ale banua toru? Haleluya.

H:      (Mangendehon) Haleluya, Haleluya, Haleluya.

U:      (Martangiang ma hita)O Tuhan Jesus, Birubiru ni Debata, na mamorsan dosanami! Na jongjong do hami di joloM, marningot Ho, na targantung i. Tangkas do huantusi hami habebernit ni na tinaonMu di dolok Golgatha. Tungki do hami marningot dosanami na mangkorhon hamamateM i. Asi ma rohaM, urupi ma hami, asa gabe upa ni halojaonMu hami. Amen.

5. Marende BE. No. 80: 4+6  Mauas Jesus BL. 39 A= Do

4.   Tung tarbahen au jongjong di lambungMu majal jala mingguk rohangki?

Dao ma i, sai naeng parsintaonhu Ho o Jesus hatuaonhi.

     
     6.   Sai asi rohaM di au Tuhanhu, sai sombu ma bahen uashi.

           Buri au ale dohot mudarMu, asa tong mangolu tondingki.

6.  Patik Ni Debata:

U:      Tangihon hamu ma patik ni Debata! I ma sian Evangelium Johannes 13:15 “Ai sitiruon do hulehon tu hamu, asa dibahen hamu songon naung hubahen i tu hamu!” Antong, rap mangido gogo ma hita tu Debata!

U+H:       Ale Tuhan Debata, sai pargogo i ma hami mangulahon na hombar tu patikMi. Amen.

7. K o o r :      06.00 WIB  Hanna

                        10.00 WIB  Lansia

8. Marende SDJ. No. 618: 1-2 Di dia ho  Es=Do

1.   Di dia ho na tarsilang Tuhanhi, di dia ho na tarsilang Tuhanhi?

O hitir roha marningot bernit tinaonNa i. Di dia ho na tarsilang Tuhanhi?

(Jongjong)

2.   Di dia ho na dilabang Tuhanhi, di dia ho na dilabang Tuhanhi?

O hitir roha marningot bernit tinaonNa i. Di dia ho na dilabang Tuhanhi?

              

9. Tangiang Manopoti Dosa

U :     Tatopoti ma dosanta!Ale Tuhan Debata, Pargogo na so hatudosan jala Amanami! Hujou hami do GoarMu na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami! Asi rohaM di hami, sai patongtong ma di hami roha hamauliateon tu Ho.

H:        (Mangendehon BE. No.165: 2-3 O Jesus na pangolu au)Bl. 19 D=Do

            Pardosa na godang do au badia anggo Ho,

            Sai tu na roa do au lao  sai tu  na jahat do.

O Tuhan  hutopoti ma luhutna dosangki

                     Asi rohaM sai sesa ma di Ho ma tondingki.

U:        O Tondi Parbadia, pangapul di na marsak roha, pamalum ma saluhut na bernit, binahen ni dosanami! Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata, Ama, Anak dohot Tondi Parbadia! Amen.

H:        (Mangendehon BE. No.86: 3 Silang na badia i BL.67  Bes=Do

            Ro do au nuaeng tu Ho, sai palambas ma rohaM.

            Nunga pola mate Ho, ala asi ni rohaM

            Jangkon au na dangol on, sai ulosi tondingkon.

U:        Humophop hita, gabe dosa do Ibana na so tumanda dosa dibahen Debata, asa gabe hatigoran ni Debata hita, marhitehite Ibana. (2 Kor. 5, 21).Hasangapon ma di Debata na di ginjang!

U+H:   A m e n .                                                                               (hundul)

10. K o o r  :    06.00 WIB  Sion+Ebenezer

                        09.00  WIB Parompuan

11. Marende BE. No. 87: 1+3  Jesus Kristus do manobusBL. 91 Es=Do

1.   Ho tinobus ni Tuhanmu, tung jonok do Debatam.

Sai pasada pingkiranmu asa tong tutu sabam.

Sai pabulus, sai patulus, tu Tuhanmu ma roham.

2. Haberengan ho Tuhanmu di hau pinarsilang i?

So uhir tu pingkiranmu hansit na tinaonNa i?

Sai tohoi, sai oloi holong ni rohaNa i.

12.     Manjaha Hata ni Debata: Epistel Psalmen 39: 1-6

        U:      Tabege ma Hata ni Debata turpuk di Pesta Parningotan di Hamamate ni Tuhan Jesus sadari on. I ma sian Psalmen 39:1-6 Ende sian si Daud siendehonon ni si Jedutun.Ninna rohangku do: Sai jagaonku do angka pangalahongku maradophon dosa marhite sian dilangku, jagaonku do huntam ni pamanganku, saleleng di jolongku dope parjahat i.

H:    Sai mangungu do ahu mangkohomhohom, sai sip do ahu maradophon hauntungon, alai sai gunsang do ianggo parniahapanki.

U:    Sai mohop do ateatengku di bagasan ahu, lam hupingkiri, lam marjimbur do api, gabe mangkuling ma dilangku:

H:    Sai pabotohon ma tu ahu, ale Jahowa, ajalhu sogot dohot suhatsuhat ni ariaringku na otik i, asa huboto na gale do ahu hape.

U:   Ida ma, marsasantopap do angka ariaringku dibahen Ho, jala sobokkon soada na ma adamhu di jolom, alogo sambing do sude jolma, nang pe hot jongjong. Ido sahatna. Martua do angka natumangihon hata ni Debata jala naumpeopsa.

U+H: Amen

13. K o o r  :     06.00 WIB  Wijk 5

                        10.00 WIB  Wijk 6

14. Marende BE. No. 184: 1+3 Nunga tung jumpang au ojahan Bl. 103 F= Do

1.   Nunga tung jumpang au ojahan ni tondingki na mago i.

Mudar ni Jesus do Manahan saleleng ni lelengna i.

Nang mago pe portibi on, tongtong do hot ojahan on.

………………………..(jongjong) ………………………..

2. Unang ma mago hajolmaon di roha ni Jahowa i.

Disuru do tu hajolmaon AnakNa, sipangolu i.

Sai dituktuhi hata nii do pintu ni rohanta i.

15.  PANGAUHONON DI SITAONON DOHOT HAMAMATE NI JESUS

       U:   Sian Gabbata i ma pantarbatu paruhuman ni si Latus, diparborhat ma Tuhan Jesus naung tinali i, huhut manetehi mudar sian pangalinsingan na di tanggurungNa i. VIA DOLOROSA, dalan haberniton na binolus ni Tuhan Jesus, manuju tu Golgata partangkurahan hajongjongan ni silang ni Tuhan Jesus i. Nunga gale Tuhan Jesus ala pardurus ni mudar i, hape ingkon porsanonNa dope hau pinarsilang na dokdok i, ai ingkon sahat do i sadari i tu Golgata. Asa tung haru tangkas di roha ni sude halak ise na naeng tarsilang i, disurathon hian do di sada papan “JESUS NAZARENUS REX JUDAIORUM” na somal di papendek INRI na marlapatan, JESUS NA SIAN NAZARETH RAJA NI JAHUDI.Ndang tarhatahon be las ni roha ni Jahudi, songon i sintua ni natorop i, ai nunga saut dipatunduk Tuhan Jesus i, ndang adong be aloalo nasida didok rohana.Mamungka ma gale Tuhan Jesus hira na so adong be gogoNa. Sipata tinggang nama Ibana dionjar silang na bolon i, dohot hinorhon ni samboksambok ni angka soldadu asa tung humatop nian sahat tu partangkurahan i. Ndang tarpaidaida angka ina dohot angka boruboru na dohot mangihutihut Tuhan Jesus, na masa i, marsaburan ilu nasida paberengbereng natinaon ni Tuhan Jesus i, hape so tarbahen nasida manang aha tu Ibana. Alai, diboto Tuhan Jesus do pangkilalaan nasida i, gabe didok Tuhan i ma tu nasida: Unang ma ahu tatangisi hamu, Ale Boru Jerusalem, dirimuna, anakhonmuna ma..... Ndang diriNa disarihon Tuhan Jesus, alai natorop i do. Ise nama na manarihon Ibana? Di na lam suda gogoNa, hira na so tolap be namangusung hau pinarsilang i, hape ingkon sahat do i tu Golgata, Tuani ma topet disi si Simon na sian Kirene. Ibana nama dipaksahon angka soldadu i mamorsan hau pinarsilang i asa sahat tu Golgata. Nangetnanget didalani sahat ma tu dolok partangkurahan i.

       H:      (Marende BE.No.78: 1)       O ulu na sap mudar     Bl. 158  C= Do

                 O ulu na sap mudar, binaen ni bugangMi.

                 Na sian jangarjangar, sisungsang duri i.

                 O ulu hatongamon, hian do tumpalMi, 

                 Ditaon Ho haleaon, Ho naeng sombaonki.

      U:  Di Golgata, nunga jongjong silang ni Tuhan Jesus. Nian, adong do tolu silang naung jongjong disi, alai holan silang na di tongatonga i do na diparrohahon situan natorop, ai holan i do na marsurat. Na dua nari ndang pola diparrohahon i, ai somal do masa na songon i. Holan silang ni Tuhan Jesus i do ianggo na so hea masa, ai Anak ni Debata do na tarsilang disi.Hatop do marhobas angka soldadu mambuat tongkok dohot labang na tajom jala ganjang. Adong do nang na manghobasi tuak anggur na marsaor pogu asa adong lehononna tu Tuhan Jesus di hau pinarsilang i. Sintong ma tutu, dipanangkok ma Tuhan Jesus tu hau i, dilabang ma tangan dohot pat ni Tuhan Jesus tu hau i, dungi marpancar ma mudar ni Tuhan Jesus sian pangalabangan i. Tontu hansit jala maniak mai dihilala Tuhan i. Tung so tarhatahon do tahe hinabernit ni partinaonan ni Tuhan Jesus i.

       H:      (Marende BE. No.78: 3) O ulu na sap mudarBl.158 C=Do

                 Au on tama o Tuhan, manaon na tinaonMi.

                 Dosangku do diporsan Ho na tarsilang i.

                 Sai tatap ale Tuhan, au na dijoloMon.

                 Huhut sai patuduhon, basaM tu rohangkon

.

       U:      Nunga lam nangkok mata ni ari, lam maniak ma dihilala Tuhan  Jesus na targantung i, di pamilngas ni mata ni ari i tu bugang pangalabangan na di tangan dohot patNa i. Alai, aha ma sipatupaon ni namanghaholongi Ibana nunga saut targantung Tuhan Jesus Anak ni Debata i. Padomu hita jolma tu Debata do i. Sude do na dohot ro tu inganan pamajalan ni Tuhan i masidok hatana be huhut mangupirhon uluna be laho pauruuruhon Tuhan Jesus. Pe, Ho na pajongjonghonsa dibagasan tolu ari .... Palua ma antong diriM sian i .... angka songon i do dipandok nasida tu Tuhan Jesus na targantung i. Nang angka soldadu i pe, mansai ragam do dipandok nasida tu Tuhan Jesus naung targantung, na so tagamon be boi mangalo i. Dibuat nasida ma abit ni Tuhan Jesus laos dibagi bagi nasida hombar ru parbagina di roha nasida.Ndada holan halak na jongjong disi na mangaleai Ibana, dohot do nang halak na targantung dilambungNai mangungkap pamanganna tu Tuhan i. Nasada mangaleai, alai ianggo nasadanari diparhatopot do, na sintong Tuhan Jesus i Anak ni Debata. Laos dipagomgomhon do dirina tu Tuhan i ai didok do: “O Jesus, ingot ahu ia dung sahat Ho tu harajaonMi”.

       H:      (Marende BE. No.82: 3) O, Jesusku tu bugangMu   Bl. 21 G=Do

                 Tu tanganMu ma tondingku, jumpa hamamatengki.

                 Tu lambungMu, o Tuhanku, alap na tinobusMi.

       U:  Nang pe naung gantung Tuhan Jesus di hau pinarsilang i, marsoara dope Ibana sian i, patubegehon angka hata na tau mangapuli dohot papirhon tondi ni naumbegesa, jala na porsea tu Ibana. “Ale Amang, marpamuati ma rohaM mida nasida, ai ndang diboto nasida nabinahenna i.....”. Mangondihon halak na mamajalhon Ibana do hata i mangondihon tu Debata Amana na di surgo i. Nang pe naung gantung Ibana di hau pinarsilang i, alai anggo ulaon parpangondian i ndang namansohot sian Tuhan i.Nian, nda tung na so diantusi namamajalhon Ibana i, aha naniulana i, alai holan ala ni holong ni roha ni Tuhan Jesus maradophon hajolmaon on do umbahen diondihon na mamajalhon Ibana i. “Situtu do hatangkon tu Ho, sadarion do ho rap dohot au di paradeiso .....”. Hata on do na gabe apulapul tu parjahat na di siamunNa na tarpajal i, alai naung  marhatopothon Tuhan Jesus Kristus Anak ni Debata. Laos hata na mangonai tu hita ma on, ia na olo hita paubaroha dung taparhatopot Tuhan Jesus na targantung di silang i ala ni dosanta, gabe muba hita. Nang pe targantung Tuhan Jesus, mardalan do pengampunan jala taruli do angka na rap dohot Ibana. Ala ni i do, ingkon sian nasa roha ni naporsea i do mangendehon: “Sonang di lambung Jesus, sonang na ro tusi, Unang be ho mabiar laho mandapothon i....”. Sai olo ma hita ro tu lambung ni Tuhan Jesus, ai hasonangan do disi. “Ndi ma inang anakmi ......, Ndi inangmi .......”. Diihuthon si Maria do anakna i sahat ro di hau pinarsilang di Golgatha i. Diida Tuhan Jesus do inangNa i disi, laos didok do tu inangNa si Maria i .... Ndi ma inang anakmi, huhut dibereng dompak siseanNa na adong disi. Laos didok tu siseanNa i huhut dibereng tu inangNa si Maria ......, Ndi ma inangmi. Sada do sangkapNa mandok i tu nasida, i ma asa marsada jala marpasaoran nasida angka na mangihutihut Ibana sahat tu Golgata i, ido nahinirim ni Tuhan Jesus  sian nasida, laos songon i nang sian hita na mangihutihut Tuhan Jesus tu Golgata marhite parningotan on. “Eli, Eli Lama Sabachtani...... Ale Debatangku, Debatangku, boasa tadingkononMu ahu......?”, ala lam leleng lam hansit dihilala Tuhan Jesus na gantung di Silang i. Hira na ditadingkon Debata Ibana hinorhon ni hansitna.Alai asing do pangantusion ni natorop i di Hata ni Tuhan i, na manjou si Elias do i didok nasida. Hape na mansoarahon tu portibi on do Ibana poboa na mansai hansit do molo nunga ditadingkon Debata. Ala ni i, patut mabiar nian jolma manundalhon Debata.Mansai mohop panghilalaan ni Tuhan Jesus hinorhon ni bugang i, jala mudar na di dagingNa i nunga laho habis, patut do mansai mauas dihilala Tuhan Jesus. “Mauas Ahu ......” ninna Tuhan Jesus. Nda Ibana do na hea mandok: manang ise na mauas, tu Ahu ma Ibana ro. Jala laos Tuhan i do na hea manoarahon: “Batang aek na mangolu do mabaor sian naporsea di Ahu.....” hape ingkon Ibana ma muse mandok jala manjouhon sian hau pinarsilang i, “Mauas Ahu”. Dung hira naung lam sidung dihilala Tuhan Jesus ulaonNa na taringot tu partondion dohot pardagingon marhite sitaononNai, naeng ma auhohonNa i marhitehite na paujunghonsa di hau pinarsilang i, ai adong do hagogok ni pangoloionNa di tona ni Debata AmaNa.

.......... hohom sangombas ..........

“Marsoara na gogo ma Tuhan Jesus, mandok: “NUNGA MARUJUNG .....”. Dipatungki Tuhan Jesus ma simajungjungNa, jala dijouhon ma “Ale Amang ... tu bagasan tanganMu ma hupasahat tondingKu .....”Dungi...... TOS MA HOSANA.

………….. huria jongjong …………..

         (mangkuling ma giringgiring pitu (7) halihuhut diiringi Musik   mangendehon BE. No. 449: 1-2  Sai solhot tu silangMi Bl.300)     

.......... tingki na hohom ..........

U:   Nunga mate be Tuhan Jesus. Nunga marujung be dibahen ulaon  panghophoponNa i di hau pinarsilang i. Aha ma muse namasa? Masa  ma haholomon di sandok tano on, maribak hirehire na dibagas joro i, mabola dua sian ginjang tu toru, humutur jala humuntal ma tano i, jala mungkap ma angka tanoman, hehe do angka nabadia i.Ndang tarjua so dohonon ni Opsir namarjagai: TUTU DO HALAK ON ANAK NI DEBATA”. Dung bot ari, ro ma si Nikodemus dohot si Josep na sian Arimatia mangido bangke ni Jesus, asa denggan dibandahon, disahapi dope i jala dijaga. Ia hinaparir dohot dangol ni natinaon ni Jesus i, ise ma na tuk mangkilala jala holong ni rohaNa i, ise do tuk mandodo i? Nda ingkon songon i Kristus i asa bongot ibana tu hasangaponNa i? Didok Jesus dope: Dosam dohot dosa ni portibion do nahuporsan, manggarar i tu Debata! Asa rap Ahu dohot ho ro di pinomparmu di hasonangan di lambung ni Debata ..... i do natinaon ni Tuhan Jesus Kristus. Antong itatangisi ma dosanta dohot dosa ni ianangkonta, jala tahatindanghon ma Ibana naung mate jala mulak mangolu, hundul di siamun ni Debata laho mangondihon hita. Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

U+H: Ahu porsea di Debata Jahowa.......................                   (hundul)

16. K o o r Pukul 06.00 WIB: Ama

17. Sunggulsunggul

18. K o o r:

19. Marende BE. No. 76: 1... Sada nama sangkap ni rohangku BL. 199 F=Do

            (Papungu Pelean I – II)

1.     Sada nama sangkap ni rohangku di sandok portibi on.

Ndang tagamon na so las rohangku molo jumpang au inon.

Naeng ma sai ingoton ni rohangku, na binaen ni Jesus tu tondingku.

Uju pinorsanNa i saluhutna dosangki.

2.   Ingkon sai Ibana ingotonhu uju na tarpajal i.

Tu hau pinarsilang ginantunghon, sai mabaor mudarNa i.

Ai humophop au ditaon uasNa, asa dohot au muse upaNa;

Ai ditatap do au on, di pandokNa: “Nunga sun.”

                                             ………………musik………………

3.   O Jesusku sai paingot ahu di dosangku, di basaM.

Ai andorang di na holom ahu dipalambas Ho rohaM.

Nunga leleng dilului Ho do au na lilu asa unang mago.

Ditaon Ho na bernit i, lao manobus tondingki.

4.     Gok di Ho ma au ale Tuhanhu jala Ho ma jambarhi.

Dok ma: “Amen,” rongkom ma goarMu tu bagasan rohangki.

Lomo ni rohaM ma sungkunonhu, di sude na naeng ulahononhu.

Olo, i ma padanhi tu Ho Jesus, Tuhanhi.

                                       ………………musik………………

20. J a m i t a: Johannes 19: 28-30

           

21. Marende BE. No. 86: 1 … Silang na badia i BL. 67 Bes=Do         

     (Papungu Pelean II Pusat)

        

1. Silang na badia i, ho do lombulombungki.

Maralohon dosa i dohot pandelean i.

Di sude sitaonon i, ho ma lombulombungki.

2. Nasa na huula i ndang tau hasonanganhi.

Nang ringkot pe rohangki, pola ro nang ilungki.

Holan asi ni rohaM pangurupi o Tuhan.

                                                                 ………………musik………………

3. Ro do au nuaeng tu Ho, sai palambas ma rohaM.

Nunga pola mate Ho, ala asi ni rohaM.

Jangkon au na dangol on, sai ulosi tondingkon.

4. Dosa patundukhon au Ho ma mangondihon au.

Ramun situtu do au, mudarMi mamuri au.

Na pogos, dangol au on; Ho ma artangki tongtong.

                                                          ………………musik………………

5. Silang na badia i Ho do lombulombungki.

Molo puas hodokhi, di na suda bohalhi.

Di sude sitaonon i, Ho ma lombulombungki.

22. Tangiang-Ende Pelean-Ale Amanami-Pasupasu.

23. Dung mangulon 15 minut, udutan ma tu Ulaon Na Badia.

24. MARULAON NA BADIA

1.       Marende BE. No. 179: 1-2 Adong do sada mual  BL. 20 G=Do

1.    Adong do sada mual i, di na mardosa i

                 Mansai denggan do mual i pasonang rohangki

2.    Aek mual na badia i, ima di Jesus i.

               Disesa do tihasta i, dibuat arsak i.

2.    Pangaradeon

3.     Marende BE. No. 152: 1 Jesus namamorsan BL. 120 F=Do

            Jesus na mamorsan dosa ni portibi on, pangolu hami.

Jesus na marmosan dosa ni portibi on, pangolu hami.

Jesus  na mamorsan dosa ni portibi on, sai pasonang hami,

Amen,Amen,Amen.

4.     Manjaha Tona Ulaon Na Badia

5.     Marulaon na badia

a. BE. No. 153: 1… O Jesus, naung sineat            BL. 126 F=Do

1. O Jesus, naung sineat di hau na pinarsilang.

      Roham tongtong daulat, nang uju Ho tarhilang.

       Marutang hosa hami, ditaon Ho dosanami. Asi roham o Jesus.

2.    Pelean na Badia, na masuk tu Jahowa,

       Singkat ni manisia, na so daulat roha.

       Ditaon Ho dosanami, so i, lao mago hami. Asi roham o Jesus.

            3.    Pelean na badia, jinalo ni Debata,

                   Panaon ni manisia, na pasohothon bada.

                   Sai sesa dosanami, Ho hatigorannami, asi roham, o Jesus.

4.    Pelean na badia, dagingmu sipanganon

       di angka na porsea, mudarmu siinumon.

       Sai ro ma maringanan marhite parpadanan di hami on, o Jesus.

               

     b. BE. No. 227: 1… Jesus ngolu ni                          BL.  26 As=Do

            1.   Jesus ngolu ni tondingku, Ho do haporusanki.

                  Gok di Ho ma diringku ro di nasa langkangki.

2.   Lam tangkas ma patuduhon tu au on pangkophopmi,

      asa i huhalungunhon hot ma au di    lambungmi.

3.   Jangkon au baen siseanMu, na girgir tu podaMi.

      Sai surdukkon ma tanganmu asa tong hutiop i.

4.   Tangkup au Jesus Tuhanku tiop au mansai gomos

      Asa unang runsur pathu sian dalan na tingkos.

5.   Raphon Ho do au mangalo dosa dohot hisaphi

Ai sumurut do pangago anggo Ho di lambungki.

6.   Tondimi sai tong paian di au on tinobusmi.

Tung patau ma au manean pinarbagabagami

c.  BE. No. 176: 1… Na mungkap do surgo                BL. 3  Bes=Do

1.   Na mungkap do surgo, dibaen aha do ?

      Dibahen naung ro Jesus mangungkap di ho (2x).

2.    Dosam do tinaonNa di Golgata i,

Disi dipasae do sude utangmi (2x).

3.   Antong o tondingku, tu Jesus ma ro,

Ai las do rohana manjangkon nang ho (2x).

4.    Tarsongon hasumba rara dosami,

Sesaon ni mudar ni Jesus do i (2x).

5.    Roham mangkolsohon parsorionmi,

   Tu Jesus pasahat sude arsakmi (2x).

6.    Neang bahenonna na hansit sude,

       Basar ho di togu tu surgo muse (2x).

7.    O Jesus sai Ho do parjambaranki,

       Pasonang rohangku, pasabam ma i (2x).

d.  BE. No.  178: 1… Ro ma tu Jesus BL. 196  Bes=Do

1.   Ro ma tu Jesus ro ma tibu bege hatana, jangkon burju.

Na ro do Jesus pangolu ho,asal porsea ho.

Mansai las rohanta i muse, molo ias sian dosa pe.

Sai ro ma hita tu surgo, laos sonang ma disi.

2.   Ro ma tu Jesus undukkon ma pambahenanmu na so tama,

Naeng sesaonna  do dosami dibaen mudarna i.

Mansai las rohanta i muse…..

3.   Ro ma tu Jesus hatop ho ro ai so ditulak Jesus be ho.

Na asi roha do Jesus i, sai pos ma rohami.

Mansai las rohanta i muse…

4.   Ro ma tu Jesus na holong do rohana i di halak na ro

Ai dipalua tondinta i unang be mago i.

Mansai las rohantai muse...

e. BE. No. 155: 1… Naung moru do muse sataon    BL. 192 F=Do

1.   Tuson ma ho ale tondingku, di na mauas male ho.

Manjalo basa ni Tuhanmu, pinaradeNa i di ho.

Dilehon Jesus do dagingna marhitehite roti on,

Dilehon dohot do mudarna marhitehite anggur on.

2.   Ai nang tongtong pe ganup ari mudarna mangurasi au,

Huhut Ibana so mansadi manogu tu lambungna au,

Sai naeng au mangan parpadanan ni Jesus Kristus,

Tuhanki, na padamehon parbadaan, na pasonangkon rohangki.

3.   Asi roham di au, o Jesus tumpahi au sadarion

Ai hatami do hupatulus, manganhon parpadanan on.

Antong patiur ma rohangku marningot denggan ni basam

I ma na tinaonmi dosangku binaen ni holong ni roham.

4.   Patogu haporseaonku di hasasae ni dosangki

Marsitiopan baen rohangku di mudarmi na durus i.

Sai ro ma Ho ale Tuhanku marhite parpadanan on,

Jorom ma baen nuaeng rohangku, Ho ma nampuna au tongtong.

f. BE. No. 183: 1… Na jumpang au      BL.105  G=Do

1.   Na jumpang au na asiroha di au naung mago i hian,

Tuhan Jesus parasiroha di au na lilu nahinan.

Nuaeng hutanda Tuhanki parasiroha bolon i, parasiroha bolon i.

2.   Dibahen godang ni dosangku tung hona uhum au tama,

Hape ro Jesus dipadomu au muse dohot Debata.

Mudarna na badia i pajongjong pardomuan i, pajongjong pardomuan i.

3. On pe holan asi ni roha sipangasahononhon i.

Sipujionku do Jahowa, dung ro na pamanathon i.

Unduk huhut las rohangki, mamuji asiroha i,mamuji asiroha i. 

4.   Ianggo i ndang taragohon baenon ni manang aha pe.

Sai asimi hupangasahon di tangiangku sasude.

Mate pe au, pos rohangki, marningot asiasimi, marningot asiasimi.     

5.   I pe, ale Tuhan Jahowa, unang unsati asimi.

Boan ma au, ale Debata, dung mate au tu lambungmi.

Tongtong las rohangki disi, mamuji asiasimi, mamuji asiasimi.

g.   BE. No. 179: 1… Adong do sada mual            BL.20  G=Do

1.   Adong do sada mual i di na mardosa i;

      Mansai denggan do mual i pasonang rohangki.

              2.   Aek mual na badia i, i ma di Jesus i,

                    Disesa do tihasta i, dibuat arsak i.

3.   Ai mudar ni Tuhanta i do mual i sintong,

      Durus di Golgata do i, manghophop hita on.

              4.   I ma tutu, ai dohot au las dibahen Ho,

                    Asi do rohami di au, nang di luhut na ro.

 5. Parjahat di siamunmi,di dolok Golgata,

      Digolom i do hatami,dibaen porsea do.

              6. Dung i jalo malua i sian pangago i,

                   Dibaen porsea roha nii di Ho, Rajanta i.   

              7.   Sai dohot au palua ma, padao ma jea i.

                    Di hami sai patongtong ma haporseaoni.

              8.   Ai na margogo do tongtong mudarmu na use;

                    Ias dibahen rohangkon, bontor huhut ture.

              9.   Dibahen i pujionki tongtong ma goarmi.

                    Sai i ma sogot endengki, dung au di lambungmi.

               

h.  BE. No. 435: 1…  Marolopolop tondingki      BL.294. G=Do

              1.   Marolopolop tondingki, ai naung ditobus Jesus i.

                    Hamu sude, bege ma i, sai las rohangku mandok i.

                    Sonang ni tingki i, dung jumpang Jesus Tuhanki.

                    Tondina mangajari au, tarbaen marlas ni roha au.

                    Sonang ni  tingki i, dung jumpang Jesus Tuhanki.

2.   Dihaol holongna rohangki, tung na so boi be mago i.

      Matana do manatap au, Pinggolna tumangihon au.

      Sonang ni tingki i …………

              3.   Tu Jesus sahat ngolungki. Saleleng ni lelengna i.

                    Rap dohot au endehon ma. Endengku na imbaru, da.

                    Sonang ni tingki i …………

              4.   O, rohangki, sai tahan ma, Sitobus ho,

                    Ihuthon ma. i ma tutu, nang mate ho, tu surgo do ditogu ho.

                    Sonang ni tingki i ………

      i.     BE. No. 424: 1…  Soara ni Tondi    BL.284. Des=Do

1.    Soara ni tondi ni Tuhanta i jotjot dilaosi, ditulak ho i.

Sai tanda jeamu, pauba roham,dapothon Tuhanmu, sisesa dosam.

2.    Marunduk ni roha topoti sude, pambaenmu na torbang, jengkelmu sude,

Pasahat tu Jesus sandok dirimi. Sai tong pasunggulhon pangkophopNa i.

3.    Tangihon hataNa, parguru ma i, rajumi ruasmu ginomgomNa i.

Pangido: Sai lehon tu au tondiMi, Pargogo, mangula sandok lomoMi.

4.    Tarsor ho mardosa, manurut lomom, tung unang datdati, sai alo langkam.

Dompakkon Tuhanmu, Pargogo do i, Manesa, pamalum sude dosami.

5.    Sai tiop tanganNa, pangido ma on: Ramoti padungo, au siseanMon,

Pasada rohangku manggolom tongtong.Hatamu na sintong, patogu au on.

      j.     BE. No. 251: 1…  Na monang i do  BL.138. Es=Do

1.       Na monang i do na muse manganhon parbue ni hau hangoluan i,

Ndang jadi idaonna hamagoan nang hamatean paduahon i;

:,:Ai debatana papos rohana, mambaen langkana tongtong tiur.

2.       Na monang i ndang tupa hahuaon ni hamatean paduahon i;

Sai jongjong do Ibana maradophon bohingku di banuaginjang i,

sai idaonna disi Tuhanna :,: Ro di donganna na monang i.

3.       Na monang i do lehononku mangan di surgo manna na buni dope;

Pangalahona do tongtong ingoton, margoar na imbaru do muse,

Na sinurathon tu batu intan. :,: Tongtong martua panjalo i.

4.       Na monang i marnida pambaenanKu, i do na marmahani bangso i;

PasahatonKu deba sahalangKu tu tangan ni sude na monang i;

Sai rosahanna muse alona, :,: Patunduhonna do musungki.

5.       Na monang i do na manjalo ulos na saksak di banuaginjang i

Goarna i do na so jadi mosos sian pustaha hangoluan i

Taringotanku di Debatangku :,: Sude donganku na monang i.

                               

      k.     BE. No. 449: 1…  Sai solhot tu silangMi       BL.300. F=Do

1.       Sai solhot tu silangMi, Jesus Ingananku.

      Mual na mabaor disi, i ma i nu mon ku

SilangMi, Tuhanki i ma pujionku,

Paima sogot sahat au, i endehononku,

2.       Lao ma au  tu  silangMi, i  haporusanku.

Sai asi ma rohaMi unang tulak ahu. SilangMi…………..

3.       Domu ma tu silangMi, i ma tioponku.

Asa unang lilu au, Ho ihuthononku. SilangMi…………..

4.       Laos maniop silangMi sai paimaonku

GokkonMi tu surgo i, tu siteanonku. SilangMi…………

25. LITURGI  PANGUJUNGI (jongjong)

a.    Marende BE. No. 9: 1 Hupuji holong BL. 110  C=Do

Hupuji  holong ni rohamu, O Tuhan Jesus Rajangki.

Tu Ho hulehon ma tondingku, ai i do pinangidomi.

Huhalupahon ma diringku, mamingkir holong ni rohamu.

b. Tangiang Pujipujian

U :   Puji ma Tuhan Debata ale tondingku, jala nasa rohangku di bagasan mamuji GoarNa na badia i. Puji ma Tuhan Debata, ale tondingku, jala unang tung halupahon denggan ni basana sudena. Ibana do manesa dosam sudena, jala Ibana pamalum angka sahitmu sudena! Ibana paluahon hosam sian hamagoan, jala dilehon tu ho denggan basa dohot asi ni roha! Parasiroha jala pardengganbasa do Tuhan Debata, lambat tarrimas jala parasiroha godang!

     H:     (mangendehon) BE. No. 149: 3  Ho tongtong ihuthononku  BL. 182 Bes=Do

Manang aha pe na masa, las ni roha arsak pe.

Tioponku Ho na basa, na marholong roha pe.

Tung saleleng au mangolu, nang dung suda bohalhi.

Ingkon Ho o Sipangolu, pujionku sai tongtong.

U:   Ndang dibahen tu hita hombar tu dosanta, jala ndang dibaloshon tu hita hombar  tu hajahatonta! Songon asi ni roha ni amaama tu anakhonna do, asi ni roha ni Tuhan Debata di angka na manghabiari Ibana! Nunga tangkas dipatuduhon Debata holong ni rohaNa i tu hita, di na mate Kristus humophop hita uju pardosa dope hita. Antong nda lam malua ma hita nuaeng sian rimasNa, dung gabe parpintor hita hinorhon ni mudarNa i? Dibahen i sai pujion ni pamanganku dohot rohangku dohot nasa pambahenanku do Tuhan Debata olat ni on ro di salelenglelengna;

H:      Sai pujionku do Tuhan Debata, Amen!

  U:        Dipasupasu …

  H:        (mangendehon): Amen, amen, amen.

26. MASIJALANGAN  (Huhut mangendehon)

BE. No. 435: 1 Marolopolop tondingki     BL. 294 C=Do

              Marolopolop tondingki, ai naung ditobus Jesus i.

              Hamu sude bege ma i, sai las rohangku mandok i.

              Sonang i tingki i, dung jumpang Jesus Tuhanki.

              TondiNa  mangajari au, tarbaen marlas ni roha au.

            Sonang ni tingki i, ………