PARTANGIANGAN PASSION I SELASA 22 MARET 2016 20.00 WIB

ATURAN PARPUNGUAN

DI TINGKI PARTINAONON NI TUHAN JESUS

PASSION I

HKBP Pondok Gede Resort Pondok Gede

Selasa, 22 Maret 2016 Pkl 20.00 WIB

1.    Marende BE. No. 76: 1-3  Sada Nama Sangkap  BL. 199 F=do  (St. Barman B. Lumbanraja)

1.       Sada nama sangkap ni rohangku, di sandok portibi on.

Ndang tagamon na so las rohangku, molo jumpang au inon.

Naeng ma sai ingoton ni rohangku, na binaen ni Jesus tu tondingku.

Uju pinorsanNa i, saluhutna dosangki.

2.       Ingkon sai Ibana ingotonku, uju natarpajal i.

Tu hau pinarsilang ginantungkon, sai mabaor mudarNa i.

Ai humophop au ditaon uasNa, asa dohot au muse upaNa.

Ai ditatap do au on, di pandokNa: “Nunga sun!”

                        …………….musik…………(jongjong)

3.       O Jesusku sai paingot ahu di dosangku di basaM

Ai andorang di na holom ahu  dipalambas Ho rohaM

Nunga leleng dilului Ho do au na lilu asa unang mago

Ditaon Ho na bernit i lao manobus tondingki

2. Votum – Introitus – Tangiang

         U.     Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

         H.     A m e n

         U.     Tabereng ma induk ni haporseaon i jala na paujunghonsa. I ma Jesus namanaonhon parsilangon i.

         H.     Singkat ni las ni roha tohapNa i hian, so dietong i hailaon. Gabe hundul di siamun ni habangsa ni Debata.

         U.     Paingotingot hamu ma Ibana napataontaon paraloan si songon i dompak ibana sian angka pardosa.    

         H.     Asa unang marnaloja hamu, unang mandate tondimuna.

        U.    (Martangiang ma hita): Ale Tuhan Jesus, Sasada Ho do Sipangolu padomuhon jolma dohot Debata. Hupuji hami GoarMi, jala hudok hami mauliate tu Ho ala ni saluhut na binahenMi, patupahon hangoluannami. Sai dongani ma hami marhitehite asi ni rohaM, asa hupingkirihami tongtong na tinaonMu dohot hamamateM, asa huarsakhon hami dosanami jala asa tubu di hami haporseaon na sintong, jala asa marroha haholongon hami huhut mandok mauliate tu Ho, asa olo hami mangihuthon Ho ro di hamatean. Ale Tuhan Jesus, di Ho ma tama pujipujian di tongatonga ni saluhut Huria, naung tinobusMu marhitehite mudarMu na badia i, olat ni on ro di salelenglelengna. Amen. -hundul-

3.  Koor : 

4. Marende BE. No. 81: 1  Jesus Mual ni Ngolungku BL. 185 As=do 

            Jesus mual ni ngolungku, Sipangolu tondingki.

      Ai dibunu Ho musungku, i ma hamatean i.

            Ho manaoni hamagoan, patupahon hangoluan.

            Alani hupuji Ho, tung marribuhali do.

           

U:      Tabereng ma induk ni haporseonta i jala na paujunghonsa, i ma Jesus na manaonhon parsilangon i, singkat ni las ni roha tohapna i hian, so dietong hailaon, gabe hundul di siamun ni habangsa ni Debata! Paingotingot hamu ma Ibana, na pataontaon paraloan sisongon i dompak Ibana, sian angka sipardosa, asa unang marnaloja hamu. Unang mandate tondimuna! Jadi diarahon Jesus ma na sampuludua i, jala didok ma tu nasida: Na nangkok ma hita tu Jerusalem jala tulus ma tu Anak ni Jolma i, sasudena na tarsurat di angka panurirang. Ai pasahaton ma Ibana tu angka parbegu, gabe insahanna, leaanna jala tijuranna ma Ibana: dung i mulak mangolu ma Ibana di ari patoluhon. Alai ndang diantusi nasida agia otik sian i; na buni do hata i sian rohanasida, ndang diboto nasida na hinatahonNa i.

H:      Dung i dipansang angka Sintua ni Malim i dohot angka Parise ma rapot godang, didok nasida ma: aha ma bahenonta? Ai lan do tanda di bahen halak i! Molo itapasombu Ibana, porsea ma halak saluhutna di Ibana, gabe ro ma halak Rom mangarampas tanonta dohot bangsonta.

U:      Alai hehe ma sada sian nasida, i ma si Kayapas, Sintua ni Malim di nasataon i, didok ma tu nasida: Na  hurang roha do hamu! Ndang dipingkiri rohamuna, denggan do mate sada halak humophop natorop i, unang laho mago sandok bangso i. Alai ndang sian rohana sandiri dihatahon i; ala Sintua ni Malim ibana di na sataon i umbahen na  disuriranghon, na naeng mate Jesus, humophop bangso i. Alai tahe, ndada holan laho manghophop bangso i, alai naeng papunguonna angka anak ni Debata, angka na marserak dope, laho pasadaon.

H:      Asa olat ni na sadari i martuptup ma nasida laho mamusa Ibana. Alai didok nasida ma: unang ma di pestai, so tung guntur natorop i!

5.Koor :  

6. Marende BE. No. 77: 4  Hamu saluhut halak  BL. 65 G=do

            Au on ro di dosangku, na so tardok rohangku,

      Dibaen godangna i. I do na pinorsanMu.

      Di si ale Tuhanku, marsipal Ho  binaen ni i.

U:      Dung i onom ari nari asa dapot pesta Paska i, sahat ma Jesus tu huta Bethania, na niinganan ni Lazarus, na sinunggul ni Jesus sian na mate. Jadi dipauli nasida ma disi panganon ujuan di Ibana: si Marta do manghobasi, si Lazarus ma sada donganna mangan disi.

Baoa:     Gabe dibuat si Maria ma sahati miak Nardus na arga na marsaor, dimiahi ma pat ni Jesus, obukna ma  dibahen mangalapu. Jadi digohi uap  ni miak i ma bagas i.

Boru:      Jadi sada sian angka sisean, si Judas Iskariot na naeng manjehehon Ibana, mandok: Boasa so ginadis miak i arga tolu ratus hupang, bahen silehonlehon nian di angka napogos!

U:      Alai ndada na pogos sinarihonna umbahen na didok ibana songon i; panangko do ibana tahe, diusung do asiasi ni halak, ai tu ibana dipasahat puro i. Dung i ninna Jesus ma: Pasombu ma ibana, ai diparade do i hira tu ari hatatanomhi. Ai tongtong adong na pogos ditongatongamuna jala asal ma olo hamu, tarpatongon hamu do na denggan tu nasida; alai anggo Ahu ndang manontong di hamu.

H:      Intap ni na tarbahensa do na niulana i; na manjoloani do ibana mamiahi pamatangku songon di na mananom.

U:      Situtu do hatangkon tu hamu: Manang di dia di liat portibi on dijamitahon muse barita na uli on, hatahononna do nang na binahenna i gabe baritana. Dung i torang ni arina i dibege halak natorop na ro tu Pesta i na naeng ro ma Jesus tu Jerusalem, jadi dibuat nasida ma angka maremare, laho manomunomu Ibana huhut manjoujouhon: Hosianna! Pinasupasu ma na ro marhite goar ni Tuhan i, Raja ni Israel!

H:      Dung i dapot Jesus ma halode sada, i ma dihunduli, hombar tu na tarsurat: unang ho mabiar boru Sion, Idama, Rajam do na ro, marsihundul di anak ni halode. Jala halak Parise i, deba na sian natorop i mandok tu Ibana: Orai ma antong angka siseanmi, Guru!

U:      Alai ninna ma mangalusi: Hudok ma di hamu: aut mauhom nasida manjoujou ma angka batu!

7. Koor : PAROMPUAN

8. Marende BE. No. 84: 1  Aut na ginorga tu rohangku  BL.195 F=do

            Aut na ginorga tu rohangku, bohiM di na lao mate Ho.

            Aut na huingot o Tuhanku, tongtong pangkophopMi di au.

            Ai Ho do paluahon ahu, dosangku do pinorsanMi.

            Didaoni Ho parsahitonku, martua au binahen ni i.

U:      Alai dibongoti sibolis i do si Judas na margoar Iskariot, sahalak sian na sampulu dua i. Gabe laho ibana martuptup dohot angka Sintua ni Malim raphon angka Panungganei, manang dia dalanna pasahathon Ibana tu nasida. Jadi sian las ni rohanasida marpadan ma nasida mangalehon hepeng tu ibana. Dioloi si Judas ma i, jadi dilului ma tingki na une pasahathon Ibana na so sian pamotoan ni natorop i.

H:      Alai di ari parhobasan parjolo ni pesta Paska i didapothon siseanna ma Jesus, angka ninna ma: Tu dia  ma patureonnami di Ho panganon Paska i, dipangido roham?

Baoa: Gabe didok ma: Laho ma hamu tu huta i manopot sasahalak, dok hamu ma tu ibana: Tona ni Guru i: Na dapot ne ma tingkingku, di ho ma ahu sorang laho mangan Paska i rap dohot siseanku.

Boru: Jadi saut ma disuru Ibana siseanna dua halak jala didok ma tu nasida: Molo laho hamu tu huta, pajumpang ma hamu disi dohot sada halak na mangusung aek sahudon, ibana ma ihuthon hamu.

U:      Tu ibana ma dok hamu: Didia do bilut inganan, asa disi hupangan hami Paska i? Jadi patuduhonon na ma tu hamu bilut parginjang sada, na lambas na tipak hinembangan, disi ma pature hamu di hita. Jadi borhat ma siseanna, dibongoti ma huta i,

H:      jadi jumpang nasida ma tutu songon na nidokna i, gabe dipature ma Paska i.

U:      Asa dung bot ari, ro ma Jesus dohot na sampuludua i. Jadi di na mangan nasida, hehe ma Jesus sian na mangan i, ditanggal ma ulosna, dibuat ma basahan ditapolhon tu Ibana. Diusehon ma aek tu sambong, dung i diburi ma pat ni angka siseanna, diapusi ma dohot basahanna na tinapolhonna i. Dung i sahat ma Ibana tu si Simon Petrus, jadi didok i ma mandok Ibana: Tung Ho ma ale Tuhan, mamuri pathu?

H:      Dung i ninna Jesus ma mangalusi ibana: Ndang diantusi ho pambahenanku na tu ho anggo nuaeng, muse pe botoonmu i.

U:      Dung i didok si Petrus ma tu Ibana: Matua tano on, ndang burionmu pathu! Dung i ninna Jesus ma mangalusi ibana: Molo so burionku ho, ndang partohap ho di Ahu.

H:      Dung i ninna si Simon Petrus ma: Ale Tuhan, unang ma holan pathu, dohot ma tangan dohot ulungku!

U:      Gabe didok Jesus ma tu ibana: Halak naung maridi i, ndang be burion; ai nunga sude ibana ias. Naung ias do anggo hamu, alai ndang luhut hamu. Ai ditanda do sipasahat Ibana, umbahen na didok: ndang saluhut hamu ias.

9. Koor:  WIJK 3 

10. Marende BE. No. 152: 1 Jesus na mamorsan  BL. 120 F=do

Jesus na mamorsan dosa ni portibi on, pangolu hami.

Jesus na marmorsan dosa ni portibi on, pangolu hami.

Jesus  na mamorsan dosa ni portibi on, sai pasonang hami,

Amen, Amen, Amen.

U:      Asa dung diburi Jesus patnasida, dipangke ma muse ulosna, hundul ma ibana, didok ma tu nasida: Ai diantusi hamu do i pambaenki tu hamu? Digoarhamu do Ahu Guru dohot Tuhan, jadi ture do pandokmuna di si, ai i do Ahu tutu. Asa molo ahu Tuhan jala Gurumuna mamuri patmuna, tama ma nang hamu masiburian pat! Ai sitiruon do hulehon tu hamu, asa dibahen hamu songon naung hubahen i tu hamu! Na tutu situtu do na hudok on tu hamu: Ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa!

H:      Jadi di na mangan i nasida, ninna Jesus ma: Situtu do na hudok on tu hamu. Sada sian hamu naeng pasahathon Ahu!

Boru: Dung i marsak situtu ma nasida, gabe dipandok be ma tu Ibana: Nda tung ahu i Tuhan?

Baoa: Alai ninna ma mangalusi; Ia i na rap dohot Ahu manurdukkon tanganna tu paringkauan, i do na pasahathon Ahu! Tong do nian ujung ni Anak ni Jolma i

U:      Songon na tarsurat hian; Alai marjea do halak na pasahathon Anak ni jolma i! Tagonan unang ma sanga tubu ibana tu hasiangan on! Alai adong ma sada sian angka siseanna i, na hundul jumonok tu Ibana, haholongan ni Jesus i.

H:      I ma dihilap si Petrus jadi ninna ma mandok ibana : Sungkun ma, ise na nidokna i. Jadi dipajonok ma tu lambung ni Jesus mandok tu Ibana: Tuhan, ise i?

U:      Gabe dialusi Jesus ma: Ia tusi hulehon santopik na husornophon on, i ma ibana! Jadi disornophon ma santopik, dilehon ma tu si Judas Iskariot, anak ni si Simon. Jadi dung dibondut i, dibongoti sibolis i ma ibana. Dung i didok Jesus ma tu ibana: Humatop ma ula siulaonmu! Asa dung dijalo si Judas na santopik i, pintor laho do ibana tu balian. Alai borngin ma uju i.

11. Tagiangang sian sahalak na ro

12. Koor:  

13. Marende BE. No. 173: 1  Sai mulak BL.63  Es=do  

            Sai mulak, sai mulak, Ho naung lao jalang i?

            Ai na dao ho nuaeng, holang sian tuam.

            O parjalang ho. Mulak, mulak ma ho. Mulak, mulak ma ho.

U:        Jadi di na mangan i nasida, dihindat Jesus ma roti, dipasupasu ma, diponggoli ma jala diparlehon ma tu angka siseanna, huhut ma didok: jalo hamu, pangan hamu, dagingku do on!

H:        Dung i dihindat ma panginuman, didok ma mauliate, dilehon ma tu nasida. Huhut ma didok: sude hamu manginum sian i.

U:        Ai mudarhu do on, mudar parpadanan i, na niusehon humophop torop bahen hasesaan ni dosa. Alai hudok ma tu hamu: Na so tupa be inumonku olat ni on sian parbue ni hau anggur i sahat ro di ari sogot: disi ma inumonku na imbaru rap dohot hamu di harajaon ni Damang.

H:        Jadi dung diendehon nasida endeende pujipujian i, ruar ma nasida tu dolok Jetun.

U:        Disi ma didok Jesus tu nasida: Saluhut do hamu naeng targasip mida Ahu di na saborngin on, ai na tarsurat do: Lombutanku ma parmahan i, gabe marserak ma birubiru na sapunguan i,

H:        Alai ninna si Petrus ma mangalusi ibana: Agia sude nasida targasip mida Ho, anggo ahu, na so tupa targasip.

U:        Alai ninna Jesus ma mandok ibana: O, Simon, Simon, nunga dipangido sibolis naeng segeonna hamu songon dahanon. Alai Ahu do manangiangkon ho, unang mintop haporseaonmi. Jadi dung mulak sogot roham, pargogoi ma roha ni angka hahaanggim! Alai ninna si Petrus ma mandok Ibana: Tuhan, na hobas do ahu mandongani Ho tu hurungan, nang tu hamatean pe! Alai ninna Jesus ma: Hudok ma tu ho, Petrus: Ndang martahuak manuk saborngin on; so jolo tolu hali soadahononmu na so tinandam Ahu……………

14.  Marende BE. No. 180: 1-2  Ro tu Jesus ho na loja BL.228 As=do

            Ro tu Jesus ho na loja na maheu i

            Lam lumbang do di lambungNa rohami

Bereng di hau pinarsilang daon ni sahitmi

Tuhanmi na hona uhum singkatmi.

15.  Jamita (Pdt. Jeffry Sitindaon, M.Th)

16.  Marende BE. No. 183: 1-5 Na jumpang au BL.105 G=do (Pelean)

Na jumpang  au na asi roha,  di au naung mago i hian.

         Tuhan Jesus parasi roha, di au na lilu na hinan.

         Nuaeng hutanda Tuhanki,  parasi roha bolon i.

         Parasi roha bolon i

                       

                        Dibahen godang ni dosangku, tung hona uhum au tama.

                     Hape ro Jesus dipadomu. au muse dohot Debata.

                     MudarNa na badia i, pajongjong pardomuan i,

                     Pajongjong pardomuan i.

……………Musik……………………

On pe holan asi ni roha, sipangasahononhon i.

         Sipujionku do Jahowa, dung ro na pamanathon i.

            Unduk huhut las rohangki, mamuji asiroha i.

            Mamuji asiroha i.

Ianggo i ndang taragohon, baenon ni manang aha pe.

                     Sai asiMi hupangasahon, di tangiangku sasude.

                     Mate pe au, pos rohangku, marningot  asiasiMi.

                     Marningot  asiasiMi.

……………Musik……………………

I pe, ale Tuhan Jahowa, unang unsati asiMi.

            Boan ma au ale Debata, dung mate au tu lambungMi.

            Tongtong las rohangki disi, mamuji asiasiMi.

            Mamuji asiasiMi

17.Tangiang Pelean - Tangiang Ale Amanami.

18.   Pasupasu – Amen, amen, amen.