PARTANGIANGAN PASSION II RABU 23 MARET 2016 20.00 WIB

ATURAN PARPUNGUAN

DI TINGKI PARTINAONON NI TUHAN JESUS

PASSION II

HKBP Pondok Gede Resort Pondok Gede

Rabu, 23 Maret  2016 Pkl 20.00 WIB

1. Marende BE. No. 83: 1 – 2  Na Lao do Birubiru i    BL. 214 F=do (St. S. Silitonga, S.E)

            Na lao do Birubiru i, mamorsan angka dosa.

         Ni nasa hajolmaon i, di benget ni rohana.

         Diporsan do sahitta i, di lehon do DiriNa i.

         Tu tangan ni pamunu, ditaoni do na bernit i.

         Ro di na tos hosaNa i. Didok: Naeng porsanonku.

                        Ianggo Birubiru i,  i ma alealengku.

                     Na paluahon tondingki, disuru Debatangku.

                     Didok mandok AnakNa i, sai topot ma pardosa i.

                     Naung sun tinoruanku, balga tutu  do rimashi.

                        Alai tarbaen  do mombun i, horhonon ni mudarMu.

2. Votum – Introitus – Tangiang

         U:     Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano on.

         H:     A m e n

         U:    Sai unang mandaodao ianggo Ho, ale Jahowa, parsigantunganku, hapogani ma mangurupi ahu. Merus do gogongku songon ngarngar, jala lohot do dilangku di langitlangit ni pamanganhu, jala tu orbuk ni na mate dipapodom Ho ahu.

         H:    Ale Debatangku! Debatangku! Boasa tung tadingkononMu ahu?

         U:    Unang mandaodao Ho sian ahu, ai donok nama parmaraan, ai so adong sipartumpak. (Psalm 22, 20. 16, 2a. 12). Haleluya! Ale Tuhan Debata, Ama ni saluhut parasirohaon! Nunga ditatap Ho hami bangsoM on,

         H:    Ai ndang manjua Ho mangalehon AnakMu na sasada i, Tuhan Jesus Kristus tu tangan ni pardosa, asa taononNa haleaon dohot siak ni bagi sahat ro di hau na pinarsilang.

         U:    Sai tumpahi hami marhitehite asi ni rohaM, asa margogo hami jala marbenget ni roha songon anak haholongan ni rohaM i di angka sitaonon, asa marsangap GoarMu dohot AnakMu, Tuhan Jesus Kristus, dohot Tondi Parbadia marhitehite hami.

      U+H:  Amen.

3. Koor:  WIJK 1 – KOOR EBENEZER – INA HANNA - ROGATE

4. Marende BE.No. 81: 1+3  Jesus Mual ni Ngolungku BL.185 As=do

            Jesus mual ni ngolungku, sipangolu tondingki.

      Ai dibunu Ho musungku, i ma hamatean i.

            Ho manaoni hamagoan, patupahon hangoluan.

            Alani hupuji Ho, tung marribu hali do.

                        Bugang sada tanggurungmu, di na hona linsing  i.

                  Hamamalum ni bugangku, na di rohangki do i.

                        Ho do gabe binuraan, au dapotan hangoluan.

                        Ala ni hupuji Ho, tung  marribu hali do.

U:           Tagan jolma Kristus, dipelehon do angka pangidoan dohot elekelekna, mardongan anggukbolon dohot iluilu tu na tuk paulahon Ibana sian hamatean, jadi ditangihon do Ibana, gabe malua sian hatahuton i.

H:          Ai atik pe Anak Ibana, diguruhon do pangoloion marhite sian na tinaonna i! Jadi dung rimpas, gabe sihorhon haluaon salelenglelengna do Ibana di sude na mangoloi Ibana.

U:           Dung i sahat ma Jesus rap dohot nasida tu porlak sada margoar Getsemane. Jadi didok ma tu angka siseanna i: Hundul ma hamu jolo di son saleleng di san Ahu martangiang. Dung i ditogihon ma si Petrus dohot si Sebedeus na dua i, dung i gabe marsak situtu ma Ibana jala bobonosan. Jadi didok ma tu nasida: Mansai marsak situtu do rohangku, hira na mate do. Di son ma hamu dungo rap dohot Ahu.

H:          Dung i laho ma Ibana saotik tu jolo, dipatungkap ma bohina tu tano martangiang, ninna ma:

U:           Ale Amang, namun na tarbahen salpuhon ma siinumon on sian Ahu! Alai tahe, unang marguru tu rohangku, roham do!

H:          Dung i mulak ma ibana tu angka siseanna jala tarpodom do nasida didapot, jadi didok ma tu si Petrus:

U:           Ndang margogo hamu hape dungo rap dohot Ahu nanggo sangombas? Dungo ma hamu jala martangiang asa unang hamu bongot tu pangunjunan, ai na girgir do nian tondi i alai gale do ia daging.

5. Koor :  WIJK 2 – KOOR AMA IMMANEN- LANSIA

6. Marende BE. No. 152: 1  Jesus na Mamorsan BL.120  F=do 

Jesus na mamorsan dosa ni portibi on, pangolu hami.

Jesus na marmorsan dosa ni portibi on, pangolu hami.

Jesus  na mamorsan dosa ni portibi on, sai pasonang hami,

Amen, Amen, Amen.

U:           Dung i laho ma Ibana paduahalihon martangiang, ninna ma: Ale Amang, molo so tarbahen salpu on, nda ingkon huinum, sai saut ma lomo ni rohaM! Dung i di na ro Ibana tarpodom muse ma siseanna i didapot, ai mansai dokdok salibonnasida.

H:          Jadi ditadingkon ma laho martangiang patoluhalihon mandok hata ondeng. Dung i didapothon ma muse angka siseanna jadi didok ma tu nasida:

U:           Datdatanmuna dope modom dohot maradian? Nunga dapot tingkina nuaeng, sahat ma Anak ni jolma i tu tangan ni pardosa. Hehe ma hamu, laho ma hita! Ndi! Nunga ro na pasahathon Ahu! Ala diboto, si Judas siparjehe i do di inganan i, ai jotjot do marpungu Jesus tu si dohot angka siseanna.

H:          Ia si Judas diarahon ma angka soldadu dohot angka naposo ni Sintua ni Malim, didapothon ma tusi mantat sulusulu, palito dohot sinjata. Diboto Jesus do saluhut na naeng songgop tu Ibana, jala ruar ma Ibana, didok ma tu nasida: Ise do na jinalahanmuna i?

U:           Gabe ninna nasida ma mangalusi Ibana: Jesus halak Nasaret i do! Dung i ninna Jesus ma mandok nasida: Ahu do i! Alai dohot do si Judas siparjehe i jongjong di lambung nasida. Asa dung didok tu nasida: Ahu do i, sumurut ma nasida, angka martinggangan ma tu tano.

H:          Dung i diulahi ma manungkun nasida: Ise do na niluluanmuna? Jadi didok nasida ma: Jesus halak Nasaret i do! Dungi ninna Jesus ma mangalusi nasida:

U:           Nunga hupaboa tu hamu. Ahu do i. asa molo Ahu dilului hamu, loas ma laho angka on! Ai naeng do jumpang na nidokna i: Ndang adong na mago hubahen agia sada sian angka na nilehonMi tu Ahu. Alai nunga dipabotohon  parjehe i hian partinanandaan tu nasida, ai didok, ia  i na huumma, Ibana ma i, i ma tangkup hamu! Asa pintor didapothon ma Jesus, didok ma: Tabi di Ho, Guru! Laos diumma. Alai ninna Jesus ma mandok ibana: Marhua ho tuson, anggia? O Judas, pangummaon do hape dibahen ho, pasahathon Anak ni jolma  i? Dungi ro ma nasida, dilaluhon ma tangan nasida tu Jesus manangkup Ibana.

7.Koor :  WIJK 5 – PAROMPUAN – JERIKO

8. Marende  BE. No. 180: 1-2 Ro tu Jesus Ho na loja BL. 228 As=do

            Ro tu Jesus ho na loja na maheu i

            Lam lumbang do di lambungNa Rohami.

                        Bereng di hau pinarsilang, daon ni sahitmi.

                        Tuhanmi na hona uhum, singkatmi.

U:        Dung i adong ma sada sian angka dongan ni Jesus mangalaluhon  tanganna di sintak ma podangna, ditampulhon  ma pinggolna. Jadi didok Jesus ma tu ibana: pasarung podangmi! Ai na manintak podang, mago ma bahennon ni podang!

H:        Ai na so tarbahen Ahu do di roham  mangido sian Damang, asa dipadiri di Ahu saonari  lobi sian sampuludua loksa surusuruan?

U:        Alai songon dia ma  disi saut hata ni surat i na mandok: Ingkon masa do na songoni? Uju i ma didok Jesus tu angka na torop i, hira na dompak panamun do hamu hehe, marpodang jala marlombutlombut manangkup Ahu. Ariari do Ahu nian hundul mangajari di bagas joro, so adong ditangkup hamu Ahu. Alai na masa do  sude na on, asa jumpang hata ni angka panurirang. Dung i ditadingkon saluhut sisean  i ma Ibana laho maporus.

9.Koor:  WIJK 4 – WIJK 3 – WIJK 6

10. Marende BE. No. 487: 1 Tung Halak na Margogo BL.329 D=do

            Tung halak na margogo si partangiang i.

      Dokdok pe si taonon, ndang olo talu i.

            Pos situtu roha na di Debata na i.

            Tuhan na manaluhon sude pangalo i.

U:           Dung i ditangkup angka soldadu dohot induknasida ro di angka naposo ni Jahudi ma Jesus jala diihoti, jadi ditogihon  ma Ibana jumolo tu si Hannas i ma simatua ni si Kayapas, Sintua ni Malim di na sataon i.

H:          I ma si Kayapas naung mandok tu angka Jahudi: Denggannan do mate sada halak humophop bangso.

U:           Alai diihuthon  si Simon Petrus dohot sisean  na sada nari ma Jesus. Namasitandaan do sisean na sada i dohot  malim i, jadi bongot ma ibana rap dohot Jesus tu alaman ni malim i. Alai disungkun  Sintua ni Malim i ma Jesus taringot tu angka siseanna dohot taringot tu podana i. Jadi dialusi Jesus ma ibana ninna ma: Patar do hatangki di hatoropan. Na tongtong do Ahu mangajari nasailaon di bagasan parguruan  nang di bagas joro pe, parpunguan ni saluhut halak Jahudi. Ndang adong manang aha huhatahon marsibuni. Boasa Ahu disungkun ho? Nasida naung umbege hatangki! Ai diboto nasida  do na huhatahon i .

H:          Dung didok Jesus songon i, dipastap sada oppas na jongjong disi ma Ibana, huhut ma didok: Songon i pangalusim tu Sintua ni Malim i? Dungi ninna Jesus ma mangalusi ibana: Ia na hurang na hudok, hajongjongkon  ma hurang; alai  anggo na hona do, boasa pastapponmu Ahu?

U:           Asa disuru  si Hannas ma Ibana naung tinali i tu Sintua ni Malim si Kayapas, disi do marpungu angka Siboto Surat dohot  Sintua ni natorop. Alai sai mangihut  do si Petrus mandaodao  sahat ro di alaman tu si, rap dohot angka naposo  marnida ujungna.

H:          Alai anggo angka Sintua ni Malim  ro di sandok rapot godang mangalului  panindangion gapgap dompak Jesus, na tuk mambahen  Ibana marutang hosa.

U:           Alai parpudi ma dua halak, ninna ma: Didok halak on: Tarbahen Ahu do mangolahai joro ni Debata jala pajongjongonna i sumuang di bagasan tolu ari. Dung i hehe ma Sintua ni Malim i, mandok tu Ibana: Ndang alusanmu na hinatindangkonnasida  dompak Ho? Alai sai hohom do anggo Jesus.

11.  Tangiang sian sahalak na ro

12. Koor:  HALELUYA – AMA SION – AMA - MUSA

13.   Marende BE. No. 79: 5  Di na ponjot rohangku  BL. 124 F=do 

            Laos i ma  pajujuhon, rohangku sai tongtong.

      Manggotap hajahaton, sian rohangkinon.

      Unang huhalupahon be halojaonMu Tuhan.

      Nang tung satongkin pe.

U:      Dung di pangkulingi  Sintua ni Malim Ibana: Hupatolon ma ho tu Debata sipangolu i, asa dipaboa  Ho tu hami manang na tutu Ho Kristus, Anak ni Debata! Dung i didok Jesus ma tu ibana : Songon nidokmi ma tutu! Alai hudok ma tu hamu: Olat ni on ma idaonmuna Anak ni jolma i, hundul di siamun ni hagoon jala ro di atas ombun ni langit.

H:        Gabe diribakkon Sintua ni Malim ma paheanna mandok: Na mangaleai Debata do Ibana! Pola luluan dope sitindangi? Nunga dibege hamu pangaleaina i! Beha do dirohamuna?

U:        Dung i ninna nasida ma mangalusi: Marutang hosa ma Ibana! Jadi ditijuri nasida ma bohina, na deba manumbuk, na deba mangalinsingi huhut mandok: Surirangi hami, Kristus, ise do na mamunu Ho?

H:        Alai na hundul do anggo si Petrus di alaman i, jadi didapothon  sada parompuan ma ibana  mandok: Dohot do ho dongan ni Jesus na sian Galilea i!

U:        Alai diporso si Petrus do, didok ma: Ndang adong huboto, jala ndang huantusi na nidok mi! Laos ruar ma ibana tu alaman jolojolo, jala martahuak ma manuk.

H:        Alai marnida  ibana, diulahi naposo boruboru  i ma mandok tu angka na jonjong di si: On do sada sian nasida! Alai mamorso  muse anggo ibana.

U:        Jadi dung satongkin nari, didok angka na jongjong di si  ma muse mandok si Petrus: Ai, tongon do dongan nasida do ho, ai halak Galilea do ho! Gabe dipungka  si Petrus ma mabuburahon dirina huhut manolonnolon: Ndang hutanda jolma na nidokmuna i!

H:       I ma na masa di ari parhobasan ni Paska i, mareak hos ni ari. Dung i didok ma tu angka Jahudi: Ida hamu ma Rajamuna! 

U:        Alai digogo nasida ma manjouhon: Padao, padao ma i! Parsilangkon ma Ibana! Dung i didok si Latus ma tu nasida: Parsilanghononku ma Rajamuna?

H:       Jadi dialusi angka Sintua Malim i ma: Ndang adong rajanami dungkon ni Kesar i! Asa dung diida si Latus, na so marguna hatana lam ganda tahe gaorna, dibuatma aek mamuri tanganna di jolo ni na torop i, huhut mandok: lias do ahu sian mudar ni on!

U:        Hamu do na sari di si! Dungi ninna sude natorop i ma: Marsapata tu hami dohot tu anakhonnami ma mudarna i. Dungi sautma dipalua si Barabbas. Alai anggo Jesus dilinsingi, dungi dipasahat ma, asa diparsilangkon.

14.  Tangiang sian na ro

15.   Marende BE. No. 88: 2+4  Jesushu naung manobus au BL. 106 Es=do

Tarsolsol bagi do rohangku, paidaida dangolMi.

            Marningot sasude dosangku, ai i do na tinaonMi. 

            Hupuji nasa asiMi, alai gumodang holongMi.

Bagas uhirhon tu rohangku, pangkophopMi humophop au.

                        Tusi ma togu pingkiranku, guru di Ho sambing ma ahu.

                        Hupuji nasa asiMi, alai gumodang holongMi.

16. Jamita: (Pdt. Nikson Simangunsong, S.Th)

17.   Marende BE. No. 86: 1…  Silang na badia BL.67 Bes=do 

       (Pelean)

1.   Silang na badia i Ho do lombulombungki

      Maralohon dosa i Dohot pandelean i

      Di sude sitaonon i Ho ma lombulombungki

2.   Nasa na huula i Ndang tau hasonanganki

      Nang ringkot pe rohangki Pola ro nang ilungki

      Holan asi ni rohaM Pangurupi o, Tuhan

3.   Ro do au nuaeng tu ho, sai palambas ma rohaM.

      Nunga pola mate Ho, ala asi ni rohaM

                 Jangkon au na dangol on, sai ulosi tondingkon.

4.   Dosa patundukkon au, ho ma mangondihon au.

      Ramun situtu do au, mudarMi mamuri au,

      Na pogos, Dangol au on. Ho ma artangki tongtong.

5.   Silang na badia i Ho do lombulombungki

      Molo puas hodokki Di na suda bohalhi

      Di sude sitaonon i Ho ma lombulombungki.

18. Tangiang Pelean - Tangiang Ale Amanami.

19.  Pasupasu – Amen, amen, amen.