PARTANGIANGAN PASSION III KAMIS 24 MARET 2016 20.00 WIB

ATURAN PARPUNGUAN

DI TINGKI PARTINAONON NI TUHAN JESUS

PASSION III

HKBP Pondok Gede Resort Pondok Gede

Kamis, 24 Maret 2016 Pkl 20.00 WIB

1. Marende BE. No. 83: 1-2  Na Lao do Birubirui BL. 214 F=do

            Na lao do Birubiru i, mamorsan angka dosa.

         Ni nasa hajolmaon i, di benget ni rohana.

         Diporsan do sahitta i, di lehon do diriNa i.

         Tu tangan ni pamunu, ditaoni do na bernit i.

                  Ro di na tos hosaNa i, didok: Naeng porsanonku.

            Ianggo Birubiru i,  i ma alealengku.

         Na paluahon tondingki, disuru Debatangku.

         Didok mandok AnakNa i, sai topot ma pardosa i.

         Naung sun tinoruanku, balga tutu  do rimashi.

         Alai tarbaen  do mombun i, horhonon ni mudarMu.

2. Votum – Introitus – Tangiang

         U:     Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na tumompa langit dohot tano.

         H:     A m e n

           U:    Na gabe pangoloi do Kristus paima mate, pola tung mate tarsilang. Di dia angka soropmi, ale hamatean? Di dia pangagoonmu, ale banua toru? (Phil.2,8; Hos.13,14b). Haleluya! Ale Tuhan Debata, Amanami na di banua ginjang, Parasi roha na sumurung!

           H:   Na mandok mauliate ma hami tu Ho sian nasa rohanami, ala dilehon Ho AnakMu na sasada i tu hamatean humophop hami, asa unang mago na porsea di Ibana, alai asa hangoluan na saleleng ni lelengna di nasida.

           U:    Tatap ma hami, ale Amanami di bagasan AnakMu Jesus Kristus, na gabe habadiaon dohot hatigoran di hami.

           H:   Sai sesa ma dosanami saluhut ala ni pelean na sun denggan, na pinelehonNa i humophop hami.

           U:    Sai paeleng ma pinggolMu tu tangiangnami jala asi ma rohaM di hami marhitehite AnakMu, Tuhan Jesus Kristus, Tuhannami. Amen.

3. Koor :  WIJK 2 – IMMANEN - LANSIA

4. Marende BE. No. 8: 2  Jahowa, Jahowa BL.197 D=do

O Jesus, o Jesus, o Jesus! GoarMi do dipuji hami on.

Amen, amen. Ho do disuru Ama i.

Na marholong roha i, asa saut malua ma hami.

Sian saluhut jea. Pinuji Ho, pinuji Ho.

 U:     Asa ditogihon nasida ma Jesus sian jolo ni si Kayapas tu Kantor. Alai sogot manogot i. Ndang na bongot anggo nasida tu kantor asa unang tarsubang nasida laho manganhon Paska i. Gabe ruar ma si Latus mandapothon nasida, didok ma: Pangaluan dia do dibahen hamu dompak Halak on?

H:     Dungi, ninna nasida ma mangalusi: Aut unang sibahen na jat halak on, ndang tagamon pasahaton nami Ibana tu ho.

U:      Gabe ninna si Latus ma mandok nasida: Boan hamu Ibana. Uhum hamu Ibana marguru tu adatmuna. Alai ninna angka Jahudi ma mandok ibana:

H:     Ndang jadi pusaonnami manang ise. Jadi dialuhon nasida ma Ibana, ninna: na dapot hami do on, pabalikbalikkon bangsonami jala mangorai mangalehon guguan tu Kesar i, dipandok: Raja, Kristus do Ibana.

U:      Jadi dibongoti si Latus ma muse  kantorna, dijou ma Jesus, didok ma tu Ibana; Atehe, Ho do Raja ni Jahudi? Ro ma alus ni Jesus: Na sian roham do na nidokmi, manang na nidok ni halak do i tu ho taringot tu Ahu?

H:     Gabe dialusi si Latus ma: Ai halak Jahudi do ahu? Bangsomi dohot angka  Sintua ni Malim i do pasahathon Ho tu ahu. Aha do nabinahenMu?

U:      Jadi dialusi Jesus ma: Ndang sian portibi on harajaonKu, ndang tarbahen so mangalo angka naposongKu asa unang sahat Ahu tutangan ni angka Jahudi. Alai ndang songon i harajaonKi.

H:     Dung i ninna si Latus ma mandok Ibana: Asa Raja do Ho? Jadi ninna Jesus ma mangalusi: Songon na nidokmi ma tutu, Raja do Ahu; Umbahen na tubu Ahu jala umbahen na ro Ahu tu portibi on, asa huhatindanghon hasintongan i.

U:      Ganup na sian hasintongan i, tangihonon ni i do soarangKu. Jadi ninna si Latus ma mandok Ibana: Aha ma i hasintongan i? Jadi dung sun didok songon i, ruar ma ibana muse manopot angka Jahudi mandok tu nasida: Ndang jumpang ahu manang dia salana.

5. Koor :  WIJK 5 – PAROMPUAN – JERIKO

6.  Marende BE. No. 81:1 Jesus mual ni ngolungku BL.185 As=do

            Jesus mual ni ngolungku, sipangolu tondingki.

      Ai dibunu Ho musungku, i ma hamatean i.

            Ho manaoni hamagoan, patupahon hangoluan.

            Alani hupuji Ho, tung marribu hali do.

                       

           

U:     Alai lam digogohon nasida mandok: Digunturi Ibana do bangso i, ai mangajari do Ibana di sandok tano Juda mamungka sian Galilea sahat ro tu son. Alai umbege i si Latus, manungkun ma ibana, manang na halak Galilea Jesus.

H:     Jala dung diboto na sian gomgoman ni si Herodes Ibana, disuru ma Ibana tu jolo ni si Herodes, ai tongon do ibana di huta Jerusalem uju i.

U:      Marnida Jesus i si Herodes, las situtu ma rohana: ai nunga nania lelengna, sai naeng idaonna tanda sian Ibana sipatupaonNa. Jadi godanggodang ma disungkunhon tu Ibana; alai dang dialusi Jesus Ibana. Di si do angka Sintua ni Malim ro di Sibotosurat, jala gogogogo do Ibana dialuhon. Ia si Herodes rap dohot donganna, direherehei jala dilealeai do Ibana, disolukkan ma pahean na arga tu Ibana, laos songon i ma disuru Ibana mulak tu si Latus.

H:     Jadi di na sadari i ma maraleale si Herodes dohot si Latus, ai na masihosoman do nasida anggo na sailaon.

U:     Alai peam do dipalua panguhum i di Pesta i sada halak na tarhurung, marguru tu na tinodo ni natorop. Alai adong ma tarhurung ujui sada parjahat na sumalin na margoar si Barabbas. Jadi di na pungu i nasida, didok si Latus ma tu nasida: Ise do dipangido hamu paluaonku, si Barabbas manang Jesus na targoar Kristus do? Ai diboto do, late ni rohanasida do umbahen na dipasahat nasida Ibana.

H:    Alai sai disosoi angka Sintua ni Malim rap dohot Sintua ni bangso i do natorop i, asa dipangido nasida, malua si Barabbas, alai pusaon do anggo Jesus.

U:     Dungi ninna panguhum i ma mandok nasida: Ise sian na dua i dipangido hamu paluaonku? Jadi didok nasida ma: si Barabbas! Dung i didok si Latus ma tu nasida: Antong aha ma bahenonku tu Jesus, na targoar Kristus? Gabe saluhut nasida mandok: Parsilangkon ma! Alai ninna panguhum i ma: Ai aha ma na jahat dibahen? Jadi lam gogo ma dipanjouhon: Parsilangkon ma!

7. Tangiang sian sahalak na ro

8. Koor: WIJK 4 – WIJK 3 – WIJK 6 - HANNA

9. Marende BE. No. 77: 3  Hamu saluhut halak BL. 65 G=do 

Aha do manginona, tu Ho silehon tua di hajolmaon i?

            So dung hea marsala, Ho doshon hami jolma.

Ndang dung dibaen Ho dosa i.

U:   Dung i ditogu si Latus ma Jesus, didokhon ma linsingan. Jadi didandani soldadu ma sunsang duri bahen tumpal, diampehon ma i tu uluNa; baju dapdap ma dialithon tu dagingNa. Dung i ro ma nasida tu joloNa mandok: Tabi di Ho, ale Raja Jahudi! Laos dipastapi ma Ibana. Dung i ruar ma muse si Latus, di dok ma tu angka Jahudi: ida hamu ma, hutogihon do Ibana tu jolomuna asa diboto hamu na so adong jumpang ahu salana.

H:     Laos ruar ma Jesus manjujung sungsang duri jala marbaju dapdap. Jadi didok si Latus ma tu nasida: Ida hamu ma jolma i! Asa dung diida Sintua ni Malim dohot angka naposo ibana, dijouhon nasida ma: Parsilangkon, parsilangkon ma Ibana! 

U:    Dung i didok si Latus ma tu nasida: Boan hamu ma Ibana, Parsilanghon hamu ma; Ai ndang jumpang ahu salana. Gabe dialusi angka Jahudi ma ibana, ninna ma: Marguru tu patiknami, ingkon marutang hosa Ibana, ai dibahen do diriNa Anak ni Debata. Umbege i si Latus, lam ganda ma biarna. Dung i diulahi muse ma tu Kantorna, didok ma tu Jesus: Sian dia do Ho? Alai ndang dialusi Jesus ibana.

H:     Dung i didok si Latus ma tu Ibana: Ndang angkupanmu ahu manghatai? Ndang diboto Ho, marhuaso ahu paluahon Ho jala marhuaso pasilangkon Ho?

U:      Jadi dialusi Jesus ma: Ndang adong huasom mangago Ahu, aut unang dilehon i tu ho sian ginjang. Dibahen i gumodang do dosa ni na pasahathon Ahu tu ho. Jadi olat ni i ma dilului si Latus dalan paluahon Ibana.

H:     Alai manjujui ma angka Jahudi ninna do: Molo dipalua ho on dang aleale ni Kesar ho! Ai na mangalo Kesar i do ganup na mambahen dirina gabe raja.

U:      Asa dung dibege si Latus hata i, ditogihon ma Jesus haruar, laos hundul ibana di habangsa paruhuman i, na diinganan na margoar: Pantarbatu, Gabbata di dok anggo di hata Heber. I ma na masa di ari parhobasan ni Paska i, mareak hos ni ari. Dung i didok ma tu angka Jahudi: Ida hamu ma Rajamuna!  Alai digogo nasida ma manjouhon: Padao, padao ma i! Parsilangkon ma Ibana!

H:     Dung i didok si Latus ma tu nasida: Parsilanghononku ma Rajamuna? Jadi dialusi angka Sintua Malim i ma: Ndang adong rajanami dungkon ni Kesar i!

U:   Asa dung diida si Latus, na so marguna hatana lam ganda tahe gaorna, dibuatma aek mamuri tanganna di jolo ni na torop i, huhut mandok: lias do ahu sian mudar ni on! Hamu do nasari di si! Dungi ninna sude  natorop i ma: Marsapata tu hami dohot tu ianakhonnami ma mudarna i. Dungi sautma dipalua si Barabbas. Alai anggo Jesus dilinsingi, dungi dipasahat ma, asa diparsilangkon.

10. Koor:  HALELUYA – AMA SION – AMA

11. Marende BE.No. 88:2 Jesushu naung manobus au BL.106 Es=do

Tarsolsol bagi do rohangku, paidaida dangolMi .

Marningot sasude dosangku, ai i do na tinaonMi.

Hupuji nasa asiMi, alai gumodang holongMi.

12.  Jamita : (Pdt. Wilson Saragih, M.Th)

13.  Marende BE. No. 88: 1…

Di surgo do alealenta BL. 106 (Pelean) Es=do

1.   Jesusku naung manobus ahu sai naeng haholonganku Ho

      Tu dolok Golgata Ho laho nionjar ni holongMu do

      Hupuji nasa asiMi alai gumodang holongMi

  

2.   Tarsolsolbagi do rohangku paidaida dangolMi

      Marningot sasude dosangku ai i do na tinaonMi 

       Hupuji nasa asiMi alai gumodang holongMi

………………….. Musik …………………..

 3.    Jotjotna i husoadahon Ho, Sipangolu tondingkon

       Mabiar lao mangkatindangkon Ho na mangkophop au tongon

       Hupuji nasa asiMi alai gumodang holongMi

4.    Bagas uhirhon tu rohangku pangkophopMi humophop au

       Tusi ma togu pingkiranku guru di Ho sambing ma ahu

       Hupuji nasa asiMi alai gumodang holongMi

           

14.  Tangiang Pelean - Tangiang Ale Amanami.

15.   Pasupasu – Amen, amen, amen.