PARTANGIANGAN PARJOLO DI TAON 2021

 

 

ACARA PARTANGIANGAN HURIA

PARTANGIANGAN PARJOLO DI TAON 2021

HKBP PONDOK GEDE RESORT PONDOK GEDE

DISTRIK XIX BEKASI

Rabu, 7 April 2021

 

1. Tabe Dohot Joujou Mamuji Debata  

(P:Paragenda – H: Huria – Pdt: Pandita)

P:    Tabe ma di hamu nihaholongan di bagasan Kristus Jesus. Nuaeng dapot ma ombasna mamuhai Partangiangan Wijk di Huria ni Tuhanta HKBP Pondok Gede di Taon 2021 on. Tuhanta do na patauhon hita tolhas tu taon on dohot mamonai partangiangan di Huria-Na i. Alanii naeng okuhononta do:

 

H:   Holan asi ni roha ni Jahowa sambing do na patolhashon hita tu taon 2021 on atik pe di hamamasa ni marragam hamaolon. Sai lohot tu Ho ma rohangku ale Tuhan, jala sai tangan siamunMi ma na manogu au.

 

P:    Songon pargantisorin ni angka na masa, laos songon i marganti angka ari, bulan dohot taon di hita. Alai anggo Tuhan si Tolu Sada i, hot do i sian nantoari, sadarion marsogot sahat tu salelenglelengna.

 

H:   Nang asi rohaNa pe hot do salelenglelengna, siala nii do tama pujionta Ibana.

 

P:    Antong andorang so jojor jabu hita marsaor di bagasan hata ni Debata, ita pungka ma Partangiangan Wijk on sadari on. Puji hamu ma Debata sian nasa roha!

 

2. Marende BE HKBP No. 565: 1+4 Las Rohangku Lao Mamuji (G=Do) 4/4

 

Las rohangku lao mamuji Debata Parholong i,
Songon bunga na mangerbang di na binsar ari i.
Arsak, dosa, haporsuhon mago dibaen asiM i.
Las ni roha na manongtong lehon di au Tuhanki.

 

… Jongjong …

 

Rap ma hita mangendehon, sangap di GoarNa i,
Tapangiar soaranta lao mamuji Tuhan i.
Sun do holong ni rohaNa na so marnamontok i,
I do pasadahon hita salelenglelengna i.

 

3.  Votum - Introitus - Tangiang

P:    Marhitehite Goar ni Debata Ama, dohot Goar ni AnakNa, Tuhan Jesus Kristus dohot Goar ni Tondi Parbadia na tumompa langit dohot tano on. Amen. Songon on do didok Tuhan Jesus: Ro ma hamu tu Ahu, hamu angka na loja jala na sorat, Hupasonang pe hamu. Buat hamu ma augangku tu hamu, guruhon hamu ma sian Ahu,

 

H:   Ai na lambok do Ahu jala na serep marroha, asa dapotan paradianan hasonangan tondimuna. Haleluya!

 

P:    (Martangiang ma hita:) Ale Tuhan Debata Amanami na di banua ginjang. Mandok mauliate do hami tu Ho sian nasa rohanami, ala ni saluhut na binahenMi patupahon hangoluannami. Di bagasan asi ni rohaM do hupaujung hami ulaon Partangiangan Wijk di huriaM Pondok Gede di taon 2020 na salpu i. Laos asi ni rohaM ma na hupangasahon hami laho mangulahon Partangiangan Wijk di taon 2021 on. Asi ma rohaM, sai lehon ma roha na girgir tumangihon hataM, asa tarbahen hami mangihuthon Ho di tonga di pardalanan ni ngolunami be. Patau ma saluhut ruas ni huriaM manghalashon saluhut program ni huriaM, tahun 2021 taon Orientasi Panghobasion HKBP Taon 2021: Pemberdayaan Pahinsathon Hatauon Manghobasi. Bahen ma rohanami nang bagasnami be gabe langgatan pamujion di goarMu. Pargogoi saluhut Parhalado mangulahon tohonanna. Tumpahi ulaon ni ruasMi asa dihamauliatehon i marhite parsaoran dohot Ho di angka Partangiangan Wijk, asa tung sahat hami mangoloi Ho di bagasan haporseaon na ture, marhite AnakMu Tuhan Jesus Kristus Tuhannami. Amen. (hundul)

 

4. Marende BE HKBP No. 769: 1  Tu Debata do Panghirimon  C=Do 4/4

Tu Debata do panghirimonhi, di tano, laut, nang awangawang i.

Ibana do haposanhi, tongtong do diramoti langkangki.

Torop pe mara manahopi au, Debatangki do sumarihon au.

Pos rohangki, sonang do au, Ibana do mandongani au.

 

5. Refleksi Laho Mangulahon Partangingan Wijk

L1:    St. P.S. boru Silitonga, S.S.

Sada tanda parsaoran na mangolu dohot Debata, patar do i marhite ngolu partangiangon. Ndang mansohot di patubegehon tu hita barita ni Kristus i, asa unang sanga mandao rohanta. Songon i do dipatupa angka na porsea di huria na parjolo songon na tarsurat di Ulaon ni Apostel 2: 46: Ganup ari do nasida tongtong saroha di bagas joro i, jala jojor jabu do nasida marulaon na badia, marlas jala marbulus ni roha nasida marsipanganon.

 

H:     Songon parsitutuon ni si David di parsaoranna dohot di paraloanna, naeng songon i ma hita di tonga ni partangianganta.  Ai Jahowa do siparmahan au, Ibana patudu dalan sidalananku.

 

L1:    Di na patupahon partangiangan i hita, laos disi do hita mangido gogo dohot pangurupion sian Debata, ai ndang ala ni gogonta tutu, umbahen na boi hita malua, hipas, sonang mangolu jala mangulahon sude ulaonta na marragam i.

 

H:     Ia ngolunta na mardalan tu jolo jala lam gok hamaolon, alani hamaolon i mansai ringkot do di hita parsitutuon, hasatiaon suang songon i nang habengeton.

 

L1:    Parhatopotonta do na so mura mangadopi angka paraloan ni ngolu na lam rongking, lumobi di tonga na masa sorimago Covid-19 dohot pangontakna tu social ekonomi. Alanii ingkon mardonganhon Debata do hita manghamonanghon i.

 

H:     Songon pangkalungunhon ni ursa di angka guluan, songon i do pangkalungunhon ni tondingku tu Ho, ale Debata. Ai ndang Manahan au manghamonanghon paraloan ni ngolungku, molo ndang hataM na pasabam ahu.

 

L1:    Ngolu partangiangan ndada holan rutinitas manang ulaon na marpungupungu sambing. Alai di ulaon partangiangan i do hita manghilala paboa na Tuhan i do na ingkon tapangasahon. Ingot hita ma na masa tu bangso ni Debata, satongkin pe ndang marsuraksurak si Musa nunga manimbil nasida manginggalhon Debata, baliksa dipature jala digana do “debata tuangan” gabe debatana.

 

H:     Tapanghilalahon ma molo ndang sai marsaringar be hata ni Debata tu sipareonta, mago tu dia nama hita?

 

L1:    On ma tapeop “Asa sian na tumangihon do ro haporseaon: ia panangihonon i, sian hata ni Kristus do” (Rom 10:17). Andorang so tauduti mangaliati bagas ni ruas ni huriaNa marhite Partangiangan Wijk.

 

H:     Jumolo ma hita marsada di bagasan tangiang songon mula ni partangiangan sipatupaonta. Antong masihohot jala so mubauba ma hita dibagasan Tuhan i.

 

L2:    St. R boru Silali, S.Pd.

Togu ma haporseaonta jala lam sumurung ma diulaon ni Tuhan i, ai taboto do ndang mangopo halojaonta dibagasan Tuhan i.

 

H:     Naeng ma lam taharingkothon ulaon partangiangan on, ala ndang tarpangasahon hita dirinta jala tahilala ma na hurang do hita di adopan ni Debata.

 

L2:    Ringkoti hamu ma asa didapothon Ibana hamu so martihas, so hasurahan, dibagasan dame! Songon panghalungunhon ni Ursa di angka guluan, naeng songoni ma tondingta dohot pamatangta manghalungunhon partangiangan pinatupa ni huria.

 

H:     Taauhon ma pangajarion ni Debata marhite hataNa, asa tahaburjuhon pangoloionta di Tuhan i, songon on ma hatana: Mauliate hudok tu Debatangku, ganup huingot hamu.

 

L2:    Tongtong manang sadihari pe hutangianghon hamu sudena: sian las ni rohangku do hula tangiangki. Ai huingot saormuna tu Barita na Uli sian mulana i sahat ro di nuaeng.

 

H:     Apala on ma pos ni rohangku: Naung umpungka ulaon na denggan di bagasan hamu, patuluson ni i do i, sahat ro di ari ni Kristus Jesus.

 

L2:    Jala on do hupangido, naeng ma lam sumurung holong ni rohamuna, marurat di parbinotoan dohot di nasa panimbangon partondion, laho manangkasi na rumingkot i, asa polin hamu, so partuktuhan, sahat ro di ari ni Kristus. Asa ramos hamu marpabue hatigoran marhitehite Jesus Kristus, bahen hasangapon jala pujipujian di Debata. Antong, na margogo situtu do tangiang ni partigor, molo dihaburjuhon. Amen.

 

6. Marende BE HKBP No. 194: 2-3 Aut so asi rohaM (BL. 62) F=Do 3/4

 

Mauliate ma di Ho o Debata ala basaM.
Sibahen dalan i marhite AnakMi tu banuaM.

 

Anggiat ma holong rohangku sai tongtong burju tu Ho.
Sai dongananMu au manang tu dia lao sonang tutu.

 

7. Manjaha Hata ni Debata sian Psalmen 106: 1-5

 

P:      Tabege ma Hata ni Debata turpuk ni Partangiangan on, Sian buku Psalmen 106: 1-5 ita jaha ma marsorinsorin. Halleluya! Mandok mauliate ma hamu di Jahowa, ai na basa do Ibana, ai ro di salelenglelengna do asi ni rohana i.

 

H:     Tung ise ma tuk mangkatahon angka hagogoon ni Jahowa, patubegehon baritana i sudena?

 

P:      Martua ma angka na mangaradoti uhum, na tongtong patupahon hatigoran.

 

H:     Sai ingot ma ahu, ale Jahowa, hombar tu halolomo di bangsom, sai tingkir ma ahu marhitehite hatuaonmi!

 

P:      Asa hupaidaida hadoharon ni angka na pinillitmu, asa huhalashon halalas ni roha ni bangsomi, mamujimuji rap dohot partohapanmi. I ma sahatna. Martua do angka na tumangihon hata ni Debata jala na umpeopsa. Amen.

 

8.  Marende BE. No. 518: 1+4 Marsinondang dibaen Jesus (BL.355) As=Do 3/2

 

Marsinondang dibaen Jesus asi rohana i,
Jala hita do disuru, asa ta paboa i.
Ta pagalak palitonta, ta patiur dalan i,
Ai torop dope na lilu, sai hatopma mulak i.

 

Dongan, so tung mintop lampu na ringkot tu dongan i,
So tung mago angka jolma dibaen halembaonmi.
Ta pagalak palitonta, ta patiur dalan i,
Ai torop dope na lilu, sai hatopma mulak i.

 

9. Tangiang Pangondian

 

10.  Marende BE HKBP No. 267: 1 O Tuhan Sulingkit (BL. 100) C=Do 3/4

 

O Tuhan sulingkit ma au sondangi rohangku tangkas.
Gogongku soada di au.

Tu Ho paringgas tu Ho au padonok di Ho nama au.
Tu Ho paringgas tu Ho au padonok di Ho nama au.

 

11. Jamita: Ulaon ni Apostel 3: 12-19

 

Pdt:   Hata ni Debata jamita di Partangiangan borngin on, sian Ulaon ni Apstel 3: 12-19 mandok:

Alai marnida i si Petrus, ninna ma mandok natorop i: Hamu, halak Israel, boasa longang rohamu mida on, boasa hami diberengi hamu, songon na hira gogonami sandiri manang hadaulatonnami mambahen mardalan halak on?

Na dipasangap Debata ni si Abraham, si Isak dohot si Jakkob, Debata ni angka amanta i do Jesus naposona i, na pinasahat jala na sinoadahonmuna di jolo ni si Latus na mandok uhumna, paluaon Ibana nian.

Alai disoadahon hamu do na badia jala partigor i; dipangido hamu do, lehonon tu hamu pamunu i.

Alai dipusa hamu do partogi tu hangoluan. I ma dipahehe Debata sian na mate; hami do angka sitindangi ni i!

Asa ala ni haporseaon di Goarna do dipargogoi Goarna halak on na niida jala na tinandamuna, gabe dilehon haporseaon na sian Tuhan i do hahisaron tu ibana di jolomuna saluhutna.

Onpe, hamu ale angka dongan, huhilala, na hurang boto do hamu, umbahen na diulahon hamu i, songon i do nang angka sintuamuna.

Alai dipasaut Debata do disi na pinaboana hian marhitehite hata ni saluhutna panurirang, mandok: Sitaon na bernit do anggo Kristusna.

Antong, pauba jala paulak hamu ma rohamuna, asa tarsesa dosamuna. I ma sahatna!

 

12. Marende BE HKBP No. 467: 1... Asi ni rohaM Hupuji (BL. 315) A=Do (Pelean)

Asi ni rohaM hupuji ala Ho manobus au.

Di paias Ho rohangku, gabe soranganMu au.

IngananMu rohanami. TondiM i manggohi i.

Pangke dohot ngolunami gabe ulaulaM i.

 

Sai ramoti ma rohangku, asa boi gohanMu au.
Sai mabaor ma pasupasu nang marhite sian au,
IngananMu rohanami. TondiM i manggohi i.

Pangke dohot ngolunami gabe ulaulaM i.

 

... Organ ...

 

Naeng huhatindangkon hami hagogoonMi tongtong,
Paluahon na mardosa, nang parjahat na bolong.
IngananMu rohanami. TondiM i manggohi i.

Pangke dohot ngolunami gabe ulaulaM i.

 

 

13. Borhatborhat Manghaburjuhon Partangiangan

 

Pdt:   Huria ni Tuhanta! Nunga tabege hata ni Debata, na mamorhati hita laho mangulahon ulaon paraloan partondion i. Alanii tahaburjuhon ma paraloan partondion na denggan i. Tatangkup ma hangoluan salelenglelengna, ai tu si do hita tarjou.

 

H:     Borhat ma hita tu Partangiangan Wijk di bagasan pos ni roha di panogunoguon dohot panuturion ni Tuhanta, manongtong ma di bagasan tangiang dohot mangasahon hata ni Debata, asa sonang roham, timbul dohot tuam.

 

H :    Mangendehon BE HKBP No. 272: 4 Sai tole, tole ro sude BL. 249

 

Antong sai paralohon ma haporseaonmi

Dipargogoi Debata ma sipartangiang i

Tajom podangta i, i ma hataNa i

Maruli tumpal do sude na so sumurut be.

 

14. Tatangianghon Pelean – Ale Amanami – Pasupasu

 

Pdt:   Tatangianghon ma peleanta: … Amen. Rap mandok ma hita Tangiang Hatopanta i; Tangiang Ale Amanami…

 

H:     Ale Amanami na di banua ginjang! Sai pinarbadia ma GoarMu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago! Ai Ho do nampuna harajaon dohot hagogoon, ro di hasangapon saleleng ni lelengna. Amen.

 

Pdt:   Pasupasu

 

R:      (Mangendehon:) BE HKBP No. 845 Amen (3x) HKBP Es=Do 4/4 Amen, amen, amen.

 

Peleanta, itatongoshon ma tu: 1. Rekening Britama Cab. Pond Gede No. (002) 038501000630566

                  2. Tabungan BNI No. (009) 1919667770

                  3. Manang boi ma discan sian aplikasi LinkAja, Gopay, Ovo, Dana dan Shopee