HKBP PONDOK GEDE: ACARA PARMINGGUON UJUNG TAON PARHURIAON-PARNINGOTAN DI NA MONDING

ACARA PARMINGGUON UJUNG TAON PARHURIAON

DOHOT

PARNINGOTAN DI NA MONDING

HKBP RESORT PONDOK GEDE

DISTRIK XIX BEKASI

Minggu, 25 November 2018

Topik: Harajaon ni Debata na Manontong (Daniel 7: 9-14)

01. Marende BE. No. 539:1-3 Sai hutagam do Tuhanku BL.371 G=Do

1. Sai hutagam do Tuhanku, sai masihol rohangki.

Di haroro ni Tuhanku, songon na nidok-Na i.

Sai mardongan olopolop, huriaM managam ho,

Maranata ro o Tuhan. Amen, sai tibu ma ro.

2. Las ni roha ndang hapalang, do manggohi rohangki.

Dung binege soara-Na, di na ro Tuhanta i.

Sai mardongan olopolop, huriaM managam ho,

Maranata ro o Tuhan. Amen, sai tibu ma ro.

…Musik…

(jongjong) 3. Sai rade ale tondingku, tagam panjouon-Na i.

Sai tu langit an manomu, ho di Jesus Tuhanmi.

Sai mardongan olopolop, huriaM managam ho,

Maranata ro o Tuhan. Amen, sai tibu ma ro.

02. Votum – Introitus - Tangiang (U: Uluan ; H: Huria)

U: Marhitehite Goar ni Debata Ama dohot Goar ni Anak-Na Tuhan Jesus Kristus dohot Goar ni Tondi Parbadia na tumompa langit dohot tano on. Amen. Songon duhutduhut do saluhut daging jala songon bungabunga ni duhutduhut i do saluhut hasangapon ni jolma. Nunga malos duhutduhut i jala nunga marurus bungabunga i, alai na hot do Hata ni Tuhan i ro di saleleng ni lelengna. Sai burju ma ho rasirasa mate, dung i lehonon-Ku ma tu ho tumpal hangoluan. Haleluya!

H: (Mangendehon:) Haleluya, haleluya, haleluya.

U: Martangiang ma hita! Ale Tuhan Jesus, Tuhan ni angka na mate dohot angka na mangolu! Ho do nampuna hami, manang mangolu manang mate pe hami. Nang pe mardalan hami di rura nilinggoman ni hamatean, ndang huhabiari hami be hamatean, ai Ho do dongannami. Ndang tartiop hamatean manang tanoman be hami, ai Ho do Tuhannami naung humophop hami, jala Ho nampuna hami. Ro hami nuaeng tu Ho mangido: Sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophop-Mi, asa sahat hami tu hangoluan na so ra suda. Amen.

H: Amen. (hundul)

03. Marende BE. No. 541: 2+5 Na mulak Jesus i BL. 373 Es=Do

2. So tung na tading au, diharoro-Na i.

So tung ditiop rohangkon, na olo sego i.

Hutundalhon ma na di pudingki.

Jesus ma haposanhi diharoro-Na i.

5. Tinggil ma pinggolhi disoara-Na i.

So tung so begeonhu i diharoro-Na i.

Hutundalhon ma na di pudingki.

Jesus ma haposanhi diharoro-Na i.

04. Patik Parjolo sahat tu Patik Paopathon Dohot Lapatanna

U: Tangihon hamu ma Patik ni Debata. Sian Patik Parjolo sahat tu Patik Paopathon Dohot Lapatanna: Patik Parjolo! Ahu do Jahowa DebataM, ninna Debatanta. Ndang jadi marangkup Ahu bahenonmu Debatam. Dia do lapatanni i?

H: On do: Ingkon umbiar rohanta jala humolong jala umpos mida Debata asa mida nasa na adong.

U: Patik Paduahon! Ndang jadi ganaonmu jala ndang jadi sumanonmu manang aha na di banuaginjang dohot na di banuatonga on, ro di na di bagasan aek na di toru ni tano, ianggo tung gabe sisombaon manang sioloan. Dia do lapatanni i?

H: On do: Ingkon dihabiari rohanta Debata jala ingkon holong rohanta di Ibana, asa ndang jadi iba marsomba tu sombaon manang tu ganaganaan, mangido hangoluan sian i, jala ndang jadi oloan begu manang ulpuhan ni hadatuon, jala ndang jadi pos roha di ugasan homitan.

U: Patik Patoluhon! Ndang jadi dohonon goar ni Debata, ianggo so ture dalanna. Ai hona uhum-Na do sogot angka na marsineang di goar-Na. Dia do lapatanni i?

H: On do: Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolonnolon manang marujarujaran na roa, manang mangansi marhite goar ni Debata; ai di na tarsosak dohot tangiang dohot pujipujian do sidohonon goar ni Debata.

U: Patik Paopathon! Ingot hamu ma pabadiahon ari minggu i! Di na onom ari ma ula hamu nasa siulaonmu, alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anakmu pe manang borum, manang naposom lahilahi, manang naposom boruboru, ro di pinahanmu ro di pangisi ni huta ni halak pe na mangebati hutam.

H: Ai di na onom ari do ditompa Debata langit dohot tano dohot laut dohot nasa isina; dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradianan i jala diparbadiai.

U: Dia do lapatan ni i?

H: On do: Ingkon dihabiari rohanta Debata jala ingkon holong rohanta di Ibana, asa unang tois rohanta di ajar na sian Hata ni Debata,

U: Ingkon badia do Hata ni Debata di rohanta jala ingkon ringgas rohanta tumangihon dohot mangguruhon. I ma sahatna! Antong rap ma hita mangido gogo sian Tuhan Debata:

H: Ale Tuhan Debata, sai pargogoi ma hami mangulahon na hombar tu patik-Mi. Amen.

05. Marende BE. No. 355: 1-2 Malungun do rohangkinon BL. 173 Es=Do

1. Malungun do rohangkinon di ari-Mi o Tuhan.

Andigan jumpang haroroM manopot hasudungan

Ni roha-Mi, ai ala nii sonang do rohanami, hataM huingot hami.

… Jongjong…

2. Sai hupaima hami Ho, Ho do pangulunami.

Ai nunga pola mate Ho, pasaehon dosanami.

Dibahen i pos rohangki, sai urupan-Mu hami, di paraloannnami.

06. Manopoti Dosa - Tangiang Hasesaan ni Dosa.

U: Tatopoti ma dosanta! Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaon-Mi manopoti jala manganggukhon dosanami. Mansai jotjot huarsahi hami Ho marhitehite pingkiran dohot hata dohot pambahenannami na roa i.

H: Mangendehon BE. No.449: 2 Sai solhot tu silang-Mi BL 300 F=Do

2. Lao ma au tu silang-Mi, i haporusanku,

Sai asi ma roha-Mi unang tulak ahu.

Silang-Mi Tuhanki i ma pujionku,

Paima sogot sahat au, i endehononku.

U: Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami. Dibahen i tama do rimasan-Mu jala uhuman-Mu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus. Anak haholongan ni RohaM, Sipangolu hami dohot ala ni Goar-Mu na badia i. Ale Tuhan, sai asi ma rohaM di hami halak na dangol on! Amen.

…Organ mangendehon BE. No. 347 sada ayat…

H: Mangendehon BE. 347: 2 Sai masipaidaan BL 11 Es=Do

2. Antong burju ma hita mangalo dosa i, sai unang tading hita,

Di tonga dalan i, di tonga dalan i, di tonga dalan i.

U: Molo tung adong manang ise na mardosa, adong do pangondianta di Ama i, i ma Tuhan Jesus Kristus na tigor roha i.

H: Mangendehon BE. 528: 3-4 Tu dia ho dung mate ho BL 362

3. Lilu do ho di dosami, mago do ho, mago do ho,

Unang be togang mulak ro, tudia ho dung mate ho,

Dung mate ho, dung mate ho, sai pingkir ma tudia ho.

4. Jangkon ma Jesus rajami, sihohop ho, sihophop ho.

Ias dibaen mudarna ho, dungi rade tu surgo ho,

Rade ma ho, rade ma ho, tu surgo sai rade ma ho.

U: Jala Ibana do pardengganan taringot tu dosanta, alai ndada holan taringot tu dosanta, dohot do taringot tu dosa ni saluhut portibi on.

H: Amen. (hundul)

07. Marende BE. 176: 1-2 Na mungkap do surgo BL.3 Bes=Do

1. Na mungkap do surgo, dibaen aha do?

Dibaen naung ro Jesus mangungkap di ho;

Dibaen naung ro Jesus mangungkap di ho.

2. Dosam do tinaon-Na di Golgata i.

Disi dipasae do sude utangmi.

08. Epistel Pangungkapon 7: 9-17

U: Tabege ma Hata ni Debata turpuk ni ari Minggu on. I ma sian Buku Pangungkapon 7: 9-17. Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong di adopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida.

H: Gogo ma soaranasida manjoujou, angka ninna ma: Tua ma di Debatanta, na mangkunduli habangsa i, dohot di Birubiru i!

U: Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i,

H: Dung i manungkap ma nasida di jolo ni habangsa i huhut marsomba tu Debata. Ninna nasida ma: Amen!

U: Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen.

H: Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i?

U: Jadi hudok ma mandok ibana: Ale tuanku, ho do umbotosa. Gabe didok ma tu ahu: I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i.

H: Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan jorona i, jala Ibana, na mangkunduli habangsa i, ma paulihon inganan di atasnasida.

U: Ndang be male nasida, ndang be mauas, ndang be ditinggang las ni ari nasida, manang dia na mohop pe.

H: Ai parmahanon ni Birubiru na di parsitongaan ni habangsa i do nasida,

U: Jadi togihononna ma nasida tu angka mual aek hangoluan, jadi apusan ni Debata nasa iluilu sian matanasida. I ma sahatna. Martua do angka na tumangihon hata ni Debata jala na umpeopsa.

H: Amen.

09. Marende BE. 344: 1-2 Ise do angka nasida BL.84 C=Do

1. Ise do angka nasida di lambung ni Debata?

Na martumpal be huida jala marsinondang do?

Na marende do sude, girgir pamujina be.

… jongjong…

2. I do angka na malua angka na tutu burju.

Angka dongan na martua naung porsea situtu.

Di Tuhanta Jesus i, na humophop sasude.

10. Manghatindangkon Haporseaon.

U: Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

U+H: Ahu porsea … Amen. (hundul)

11. Tingting Huria

12. Parningotan di na Monding:

a. Marende BE. No. 525: 1 Na laho ma au BL 361 D=Do

1. Na laho ma au tu na sonang di ginjang,

Di surgo tutu sai na sonang ma au.

O ho donganki na gok dosa gok arsak,

Sai dohot ma ho sai tu surgo ma lao

Sai ro dohot ho, dohot ho, dohot ho,

Sai dohot ma ho sai tu surgo ma lao.

b. MANJAHA GOARGOAR NI NA MONDING

U: Domu tu taon Parhuriaon sadarion, patupaonta ma parningotan di angka donganta naung monding dung parningotan di na monding 26 November 2017 sahat tu sadarion. Goar nasida i ma: (dijaha goar ni na monding)

NO	NAMA	L/P	TGL LAHIR	TGL MONDING	UMUR	WIJK
1	Erika Tampubolon	P	10-05-1921	26-11-2017	96	04
2	Parsaoran Sitanggang	L	29-11-1961	26-11-2017	56	06
3	Bongsu Edison P. Panggabean	L	31-01-1955	05-12-2017	62	06
4	St. Ruslian Hutapea	L	14-06-1947	11-01-2018	70	05
5	Tiodora Napitu	P	21-08-1955	06-02-2018	62	03
6	Drs. Mampan Manalu M.M	L	21-03-1951	27-05-2018	67	01
7	Frida Naibaho	P	17-11-1930	22-06-2018	88	04
8	Ronald Hasudungan Sipahutar S.T.	L	26-05-1972	22-07-2018	46	06
9	Porman Pangaribuan	P	27-03-1965	22-08-2018	53	04
10	Sontiara Sirait	P	30-01-1958	22-08-2018	60	04
11	St. Linceria Siadari	P	16-04-1931	28-08-2018	87	03
12	Drs. Pangeran Gilbert Manurung	L	09-06-1952	30-08-2018	66	04
13	Tiomas Manurung	P	21-04-1947	08-09-2018	71	04
14	Drs. Djotaris Pakpahan	L	12-06-1945	20-10-2018	73	04
15	Ramili Sirait	P	20-05-1938	08-11-2018	80	04
16	Else Hutajulu	P	05-10-1943	11-11-2018	75	05

c. Pahohom diri: (dung dijaha goar ni na monding mangkuling organ mangendehon sada ayat BE.No.335:1 Loas ahu, asa lao BL 50 C=Do, huhut jongjong sude ruas, dung i jahaon ni uluan ma):

U: Huria ni Tuhanta molo tapatupa pe parningotan di na monding, ndada na manungguli sidangolon hita disi. Na paingothon hita do: Hita pe mate do songon angka donganta i. Na marningot ajalta do hita di parningotan on dohot patoguhon haporseaonta di hangoluan na manontong i. Molo marungkil pe hita nuaeng unang ma mandele hita, unang tarpodom songon na leban i. Sai dungo ma hita jala marroha na torang, ai ndang taboto arina dohot sadiharina. Alani i manontong ma hita martangiang.

H: Dung mangkuling organ BE. No.335 sada ayat.

Marende BE. No. 335: 2+4 Loas au asa lao BL. 50 C=Do

2. Jesuski sondang i, sitorusi ombun i,

O andigan ro tingkingku, asa borhat ma tondingku,

Lao marnida bohi-Mi, lao marnida bohi-Mi.

4. Sonangmi tondingki, molo sahat ho tusi,

O Jahowa Debatangku, ndang dodoan ni rohangku,

Las ni roha i disi, las ni roha i disi.

U: Disungguli parningotan on do hita marningot hata ni Parjamita 3 na mandok “Martiti be do sude nasa na tinompa.” Adong tingki tubu adong tingki mate. Molo tabo pe pangkilalaanta, unang lalap hita disi, molo hansit jala parir pe taahap, boto ma martiti do las ni roha dohot na hansit. Unang lalap hita di portibion parsatongkinan do ngolu i.

H: Tuhan sungguli hami asa unang lalap di portibion.

U: Parningotan di na monding paingothon hita: Ndang dison sambulo ni ngolunta, Ndang portibion tujuan dohot sihirimon ni rohanta. Surgo i do sambulonta dohot sihirimonta. Surgo i do na tongtong.

H: Tuhan dongani hami asa tulus pardalanannami mandapothon inganan-Mi.

U: Parningotan di na monding on paingothon hita: Ndang lohot di tanoman i angka na mate i. Adong do haheheon sian na mate na mangalehon pangkirimon di hita di parjumpangan sogot dohot na porsea i. Ai didok do “Nunga hehe Kristus sian na mate Ibana do parjolo ni angka na monding i.”

H: Ale Tuhan pahot di hami pangkirimon di hangoluan sogot i.

U: Parningotan sadarion mangigil parsihohotan ni haporseaon dohot hahobason mangoloi Tuhan i. Ai didok do magira ma Ahu ro tiop ma na di ho unang adong na mambuat tumpalmi. Sai burju ma ho rasirasa mate dung i lehononku ma tu ho tumpal hangoluan i.

H: Ale Tuhan patogu haporseaon dohot pangkirimonnami di haheheon parpudi i. Amen.

H: Mangendehon BE. No. 347: 1+3 Sai masipaidaan BL 11 Es=Do

1. Sai masipidaan do naporsea i,

Dung sahat be langkana tu hasonangan i,

Tu hasonangan i, tu hasonangan i.

3. Sai masipaidaan ma hita on muse,

Di lambung ni Tuhanta dung monang hita be,

Dung monang hita be.

U: (Martangiang ma hita:) Ale Tuhan Debata na sian nahinan jala na mangolu ro di saleleng ni lelengna, huingot hami sadarion angka na mate sian hami, naung pajolohon tu lambung-Mu. Di Ho do anakhinsu ni banua ginjang jala diungkap Ho do i di angka na mangasahon Tuhan Jesus Kristus. Na rungka do rohanami sadarion marningot ajalnami, dohot haheheon ni daging di ari sogot. Mauliate ma rohanami tu Ho, ala di tubuhon Ho hami tu pangkirimon na mangolu, gabe partohap hami di hangoluan na so ra suda. Ndada na mandele hami di ari parningotan on, alai na malungun do hami di sambulo ni tondinami. Nunga torop dongan nami naung nialap-Mu, tau sipaingot do ujung ni langka nasida di hami, baen pangkirimon mida Tuhan Jesus di ujung ni langkanami be. Sai sungguli ma rohanami mambahen tiruan na denggan di angka pinomparnami, Sai apuli ma na marsak roha dohot angka na matean asa unang mangandungi jala mandele nasida. Sai taiti ma roha nasida mamereng dompak ginjang, sai lehon TondiM tu hami asa tangkas dihatindangkon tu hami, naung dohot do hami anak-Mu jala panean di arta na di banua ginjang. Sai padao ma ganggu ni roha sian hami, asa hot haporseaonnami maniop Tuhan Jesus sipangolu i, andorang hubolushami rura linggoman ni hamatean i, molo homur matanami be, ungkap ma mata ni rohanami asa tangkas niida dalan tu hasonangan i. Molo hallang dilanami, so binoto be mangkuling, pargogoihami marhitehite tondiM, asa tarjouhonhami: Ale Amang sahat tu tangan-Mu ma tondingku sai patiur rohanami asa hobas langkanami jala sonang hami lao mate di bagasan Tuhan Jesus Kristus Tuhannami. Amen. (Hundul)

13. Marende BE. No. 543: 1... Buni bingkas ni holong BL. 374 Es=Do

(Papungu Pelean Ia-Ib)

1. Buni bingkas ni holong ni Tuhanta i di au.

Ditobus dohot mudar i pardosa songon au.

Alai on do na huboto: Ditiop Jesus gomos tanganhu.