PARMINGGUON MINGGU UJUNGTAON PARHURIAON Minggu, 22 Nopember 2020 Pukul 07.00 WIB Dohot 10.00 WIB

 

PARTORDING NI PARMINGGUON

MINGGU UJUNGTAON PARHURIAON

ADAPTASI CARA HIDUP BARU COVID-19

HKBP PONDOK GEDE

RESORT PONDOK GEDE

Minggu, 22 Nopember 2020

Pukul 07.00 WIB Dohot 10.00 WIB

Ev. Mateus 25: 31-46

Ep. Hesekiel 34: 11-16

 

Topik: Ari Uhum Sogot

 

(P: Paragenda - R: Ruas)

 

 

1.  Marende BE HKBP No. 544: 1-2 Molo Ro Panjou ni Tuhan (BL 419) G=Do 2/4

 

1.       Molo ro panjou ni Tuhan molo salpu tingki on,

Molo binsar bintang sipaias i.

Jala sahat ma tu ginjang angka na tinobus i,

Dohot au dibaen Tuhanta lao tusi.

Molo jouon ni Tuhanta angka goar di pustaha,

Dibaen asi ni roha-Na, alusanhu: O Tuhanhu, au dison.

 

--- Jongjong ---

 

2.       Molo dapot tingki hehe angka na tinobus i

Idaon nasida Tuhan Jesus i.

Di panghuling ni sarune lao manomu Tuhan i,

Dohot au dibaen Tuhanta lao tusi.

Molo jouon ni Tuhanta angka goar di pustaha,

Dibaen asi ni roha-Na, alusanhu: O Tuhanhu, au dison.

 

 

 

         

 

2.  Votum – Introitus – Tangiang (A. XVIII/A.1 – D. XX/75)

 

        P:     Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

 

        R:     Amen.

 

        P:     Angka diboto hamu do, na mangkorhon habengeton ni roha do pangunjunan di haporsesonmuna. Alai ingkon adong do ulaon naung sun denggan di habengeton i, asa tung tang situtu jala halak sisandok hamu, angka na so hurangan di manang aha. Martua do naposo, na mangulahon sisongon i didapot tuanna di harorona i. Haleluya!

 

        R:     (Mangendehon BE HKBP No. 852 Haleluya (3x) F=Do 4/4) Haleluya, haleluya, haleluya!

 

        P:     (Martangiang ma hita):

 

               Ale Tuhan Jesus, Tuhan ni angka na mate dohot angka na mangolu! Ho do nampuna hami, manang mangolu manang mate pe hami. Nang pe mardalan hami di rura nilinggoman ni hamatean, ndang huhabiari hami be hamatean, ai Ho do dongannami. Ndang tartiop hamatean manang tanoman be hami, ai Ho do Tuhannami naung humophop hami, jala Ho nampuna hami. Ro hami nuaeng tu Ho mangido: Sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophop-Mi, asa sahat hami tu hangoluan na so ra suda.

               

        R:     Amen. -hundul-

 

 

 

 

3.  Marende BE HKBP No. 562: 1-2 Hamuna Ale Jolma As=Do

 

1.       Hamuna ale jolma sai puji Debata.

      Hamuna ale jolma sai puji Debata.

 

2.    Gok asi ni roha-Na sahat tu huta on.

      Dohot habonaron-Na sai hot do i tongtong.

        

4.  Patik ni Debata Konfessi HKBP 1996 Bindu 15

 

        P:     Tatangihon ma Patik ni Debata di Minggu sadari on i ma sian Konfessi HKBP Bindu 15 mandok:

               Tahatindangkon jala tahaporseai do; Hamatean i do ujung ni ngolu ni jolma di portibi on, maradian ma ibana sian sandok ulaonna.

               Adong haluaon di angka na porsea paboa Jesus Kristus naung hehe i do pangoluhon jolma i sian na mate, Ibana do Tuhan ni na mangolu dohot na mate (Rom 14: 7-9).

               Martua do na mate di bagasan Tuhan i na satia ro dinujungna. (Pangungkapon 14: 13).

               Dipatupa huria do parningotan di angka na monding laho padungohon haporseaonta marningot ajalta sandiri huhut pahothon pangkirimon di hamonangan ni Kristus manaluhon hamatean, songon i nang pangkirimon di banua ginjang sambulo ni tondinta dohot hadodomu ni na porsea i dohot Tuhan Debata sahat tu na ro Jesus Kristus paduahalihon.

               Marhite poda on:

               Taondolhon do pangkirimon di haluaon ni jolma sian angka na mate di bagasan Jesus Kristus. Taalo do pingkiran na mandok boi na mangolu manjalo pasupasu sian na mate.

               Taalo do pingkiran na mandok paboa na adong pardomuan ni na mate dohot na mangolu marhite tangiang (mendoakan arwah-arwah). Taalo do pingkiran na mandok ingkon pajongjong tugu laho pasangaphon na monding, dalan pangalapan pasupasu tu pinomparna.

               Jala marhite poda on:

               Tatulak do sude rumang ni na pinodahon ni ugamo hasipelebeguon lumobi poda taringot tu tondi na mandok: Tading do tondi ni na mate i, jala tondi ni na mate i gabe begu dohot sumangot.

               Di parningotan di na monding siparateatehononhon do mandok mauliate tu Debata, di na marningot ulaon na denggan uju di ngoluna, alai ndang na mangigil pasupasu dohot tanda siarsiaran sian na monding i.

 

        P:     Rap mangido gogo ma hita tu Debata laho mangulahonsa!

 

P+R:  Ale Tuhan Debata, sai pargogoi ma hami mangulahon na hombar tu Patik-Mi. Amen.

 

5.  Marende BE HKBP No. 167: 1-2 Dijangkon Jesus do Pardosa (BL 108) Bes=Do 3/4

 

 

1.          Dijangkon Jesus do pardosa, na mangarsakhon dosa i.

Na mangundukhon hinaroa ni pambaenanna sasude.

Alai ditangkup hata on: Dijangkon Jesus nang au on.

 

--- Jongjong ---

 

2.          Pardosa na tarsolsol bagi na ponjot roha situtu.

Huhut na olo manopoti dosana i mansai burju.

I do dijangkon Jesus i, asa paluaon-Na i.

 

6.  Manopoti Dosa (B.6 – C.6)

 

P:     Tatopoti ma dosanta!

 

Ale Debatanami, na marasiroha jala na badia, Amanami, marhitehite Tuhan Jesus Kristus! Manang piga hali hami ro tu joloM, huhilala hami, ringkot do asi ni rohaM di saluhut hami halak pardosa. Ala ni i do umbahen na hupaserep hami dirinami sadari on di joloM, jala huparhatopot hami, tung na jotjot do hami manimbil sian angka dalan-Mu na badia songon birubiru na lilu. Sai unang pabali hami sian joloM ala ni dosanami i, ai ndang dihalomohon rohaM hamatean ni angka pardosa, alai hamubaon ni rohana do lomo ni rohaM, asa mangolu. Sesa ma saluhut hageduhonnami dohot pangalaosionnami marhitehite pangulunami na sasada i, Anak-Mu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di Goar-Mu na badia i.

 

R:     Amen.

 

P:     … Tangiang na hohom BE HKBP No. 167: 1 Dijangkon Jesus do Pardosa (BL 108) Bes=Do 3/4 …

 

        Tabege ma hata bagabaga taringot tu hasesaan ni dosa.

        Songon on do Hata ni Tuhan Jahowa: Nunga diarsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala ni hadirion-Ku, jala ndang be hupaingotingot angka dosam. Hasangapon ma di Debata na di ginjang!

 

R:     Amen.

 

7.  Marende BE HKBP No. 392: 1 Sai Pasiat Tuhan Jesus (BL 261) C=Do 4/4

 

1.          Sai pasiat Tuhan Jesus tu bagasan rohami.

        Sai maimaima Jesus, bege panuktuk-Na i.

        Sai pasiat Tuhan Jesus, jangkon i tu rohami.

        Nunga tingki parasian, so tung jolo salpu i.

     

8.  Manjaha Hesekiel 34: 11-16

 

        P:    Tabege ma Hata ni Debata turpuk ni ari Minggu on, ita jaha ma marsorinsorin. Sian Hesekiel 34: 11-16 Ai songon on do hata ni Tuhan Jahowa: Ida ma, ahu, apala ahu sandiri usouso sogot di birubirungku, jala luluanku nasida.

 

        R:    Songon pangalului ni parmahan di punguanna di ari uju di tongatonga ni birubirunna angka na mampar i ibana,

 

        P:    Suang songon i ahu mangalului birubirungku sogot, jala paluaonku nasida sian saluhut inganan parserahannasida i, uju di ari ombun dohot haholomon marimpotimpot.

 

        R:    Jala ahu manogihon nasida ruar sian angka bangso dohot papunguhon nasida sian angka luat,

 

        P:    Asa huboan nasida mulak tu tanonasida i, laos ahu marmahan nasida di atas ni angka dolok Israel, di bagasan angka rura dohot di bagasan saluhut parmianan di tano on.

 

        R:    Jampalan apala na lomak ahu marmahan nasida, jala di atas dolok angka na timbo di Israel parudamannasida,

 

        P:    Disi ma mangulon nasida di parudaman na denggan, jala jampalan apala na lomak jampalanna di atas ni angka dolok ni Israel. Ahu sandiri ma marmahan birubirungku, jala ahu paulon nasida, ninna Tuhan Jahowa. Luluanku ma na mago i,

 

        R:    Jala mulak boanonku na tardempar i, jala lilitanku do na mabugang i, jala pargogoanku do na marsahit i;

 

        P:    Alai anggo na mokmok i dohot na gogo i siaphononku do, ahu sandiri tahe marmahansa marhitehite uhum. I ma sahatna! Martua do angka na tumangihon Hata ni Debata, jala na umpeopsa.

       

        R:    Amen.

 

9.  Marende BE HKBP No. 759: 1-2 Jahowa Siparmahan Au-2 F=Do 3/4

 

1.     Jahowa siparmahan au, ndang na hurangan au.

Tongon dibaen na lomak i, pangolu tondingki.

 

--- Jongjong ---

 

 

 

2.     Ditogu au tu na tio, aek hangoluan i.

Dibaen do tondingki sio, di hasonangan i.

 

10.  Manghatindangkon Haporseaon

 

        P:     Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

 

        P+R:  Ahu porsea di Debata Jahowa, i do Ama, Pargogo na so hatudosan na tumompa langit dohot tano.

              

               Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

              

               Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

 

11.  Tingting + Tangiang Pangondian

 

12.  Parningotan di na Monding

 

1. Marende BE HKBP No. 520: 1-2 Partangisan do Hape (BL 357) D=Do 4/4

 

Partangisan do hape anggo hasiangan on;

Holso, arsak, sahit pe, sai manosak do tongtong

Ingkon songgop hamatean tu sudena jolma i;

Ai sude do na manean uhum ala dosa i.

 

Pdt:  Hamu angka dongan sahaporseaon di bagasan Goar ni Tuhanta Jesus Kristus. Sadari on, ingotonta do angka donganta naung jumolo monding sian tongatonganta di bagasan sataon parhuria on. Ndang na mangarungkari lungun, manang sidangolon hita nuaeng disi. Ai tapatupa pe parningotan di angka naung monding i, na paingothon hita do i, paboa hita pe monding do muse songon donganta naung monding i, jala tahaporseai do, ndada hamatean ujung ni pardalananta, tung dalan hangoluan do i. Songon nidok ni Apostel Paulus tu huria Korintus: ”Ai apala Tuhan i ma na tuat sogot sian banua ginjang, mardongan soara ni sintua ni surusuruan ni Debata, dohot mardongan sarune ni Debata, dung i, hehe ma jumolo angka na mate, angka na marhitehite Kristus”.

 

Angka on ma goar ni ruas ni huria na marujung ngolu di bagasan sataon parhuriaon on: … dijaha huria ma goar-goar ni na monding. (Manjaha!).

Asa torop ni ruas ni hurianta na marujung ngolu, i ma: …………….

Nunga maradian nasida sian nasa ulaonna di portibi on. Alai nang pe ingkon ampe tu ganup jolma hamatean i, songon naung masa tu angka haholongan ni rohanta naung jumolo i. Di bagasan pangaramotion ni Debata do nang angka i saluhutna. Ai Kristus do Tuhan ni na mangolu dohot na mate. Ingkon sude do pe jolma mamolus hamatean i. Ndang mardia imbar manang ise pe, na metmet nang na magondang, na mora nang na pogos, na sangap nang na lea, na gogo dohot na gale.

Antong rim ma hita jongjong!

Di bagasan unduk dohot serep ni roha, martangiang ma hita be di bagasan rohanta, asa tongtong ingot hita pasahathon dirinta tu Tuhanta, sahat ro di hasusuda ni bohalta be! … Amen.

Ita endehonma BE HKBP No. 347: 1 Sai Masipaidaan (BL 11) Es=Do 4/4

 

Sai masipaidaan do na porsea i.

Dung sahat be langkana tu hasonangan i.

Tu hasonangan i, tu hasonangan i.

 

Pdt:     Martangiang ma hita: Ale Tuhan Debata, huingot hami do sadarion angka dongannami naung jumolo monding sian hami. Songon duhutduhut do tutu saluhut daging, jala songon bungabunga do saluhut hasangapon ni jolma. Nunga malos duhutduhut i jala nunga marurus bungabunga i, alai na hataM i ro di salelenglelengna. Ajari jala pargogoi ma hami asa marsihothot di haporseaonnami, asa burju hami rasirasa mate, asa dohot hami parjambar di tumpal hangoluan i. Amen. (Hundul)

 

13.  Marende BE HKBP No. 757: 1-2 Ise do Naeng Martua Bes=Do 4/4

 

1.          Ise do na naeng martua, ise do na naeng sangap,

Ise do na naeng sangap? Dipasangap ma Jahowa,

Dipasangap ma Jahowa asa tung tutu sangap,

Asa tung tutu sangap.

 

2.          Ise do na naeng mamora, ise do na naeng sonang,

Ise do na naeng sonang? Dihaposi ma Jahowa,

Dihaposi ma Jahowa asa tung tutu sonang,

Asa tung tutu sonang.

 

14.  Jamita (Mateus 25: 31-46)

 

P:      Hata ni Debata jamita di Minggu Ujungtaon Parhuriaon sadari on, sian evangelium Mateus 25: 31-46 mandok:

Alai dung ro sogot Anak ni jolma i marhasangapon rap dohot saluhut surusuruanna, hundulanna ma disi habangsa hasangaponna i.

Dung i marluhut ma tu jolona nasa bangso, jadi sirangonna ma nasida songon binahen ni parmahan na manirang birubiru boruboru sian birubiru tunggal.

Jadi pajongjongonna ma boruboru i tu siamunna, alai anggo tunggal i tu hambirangna.

Dung i dohonon ni Raja i ma tu angka na di siamunna i: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on!

Ai na male do Ahu, dilehon hamu do Ahu mangan; na mauas do Ahu, dilehon hamu do Ahu minum; na buro do Ahu, gabe dijangkon hamu do Ahu.

Na marsangkotbulung do Ahu, jadi diparulosi hamu do ahu; na hansitan do Ahu, jala ditingkir hamu do Ahu; na tarhurung do Ahu jadi ro hamu mandulo Ahu.

 

Dung i dohonon ni angka partigor i ma mangalusi: Tuhan, nandigan huida hami Ho male, gabe hulehon hami Ho mangan; manang mauas, gabe hulehon hami Ho minum?

Nandigan huida hami Ho na buro, gabe hujangkon hami Ho; manang marsangkotbulung, gabe huparulosi hami Ho?

Nandigan huida hami Ho marsahit manang tarhurung, gabe hudulo hami Ho?

Dung i alusan ni Raja i ma nasida: Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!

Dung i dohononna ma tu angka na di hambirangna: Laho ma hamu sian jolongkon, hamu angka na binuraan tu api sisalelenglelengna, na pinature di sibolis i dohot di angka surusuruanna!

Ai na male do Ahu, ndang dilehon hamu Ahu mangan; na mauas do Ahu, ndang dilehon hamu Ahu minum.

Na buro do Ahu, ndang dijangkon hamu Ahu; na marsangkotbulung do Ahu, ndang diparulosi hamu Ahu; na marsahit do Ahu, na tarhurung do Ahu, ndang didulo hamu Ahu.

Dung i dohononnasida ma mangalusi Ibana: Tuhan, nandigan huida hami Ho male, manang mauas, manang na buro, manang marsangkotbulung, manang marsahit, manang tarhurung, so hupatureture hami Ho?

Dung i dohononna ma mangalusi nasida: Situtu do na hudok on tu hamu: Di na so niantoanmuna sahalak sian angka na metmet on, sandok Ahu do na so niantoanmuna disi.

Dung i laho ma nasida tu na bernit salelenglelengna; alai anggo partigor i tu hangoluan sisalelenglelengna do. I ma sahatna!

 

 

15.  Marende BE HKBP No. 837: 1-3 Sada Huta na Mansai Uli G=Do 4/4 (Pasahat Pelean IA, IB & II)

  

1.              Sada huta na mansai uli, sambulo ni tondinta do i.

Bagas ni Debata Ama i, diparade di na monang i.

Sogot di surgo i, sai pajumpang do hita disi;

Sogot di surgo i, sai pajumpang do hita disi

 

2.          Hita dohot donganta disan, rap marende mamuji Tuhan.

Ndang adong hasusaan disan, salelengna di surgo sonang.

Sogot di surgo i, sai pajumpang do hita disi;

Sogot di surgo i, sai pajumpang do hita disi.

 

--- Musik ---

 

 

3.          Debata Ama parholong i, sai pujion salelengna i.

Na marmuduhon ngolunta i, denggan basa-Na sai hot do i.

Sogot di surgo i, sai pajumpang do hita disi;

Sogot di surgo i, sai pajumpang do hita disi.

 

--- Musik ---

 

16.  Tatangianghon Pelean – Ale Amanami – Pasupasu

 

P:     Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:     (Mangendehon:) BE HKBP No. 204: 2 Ndang Tadinghononhu Ho (BL 73) Bes=Do 2/4

 

        Nasa na nilehon-Mi, tondi ro di pamatanghu.

        Hosa dohot gogongki, ro di saluhut artangku.

        Hupasahat i tu Ho, na so unsatonhu do.

 

P:     Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:     (Mangendehon:) BE HKBP No. 841 Ai Ho do nampuna harajaon Es=Do 4/4

 

        Ai Ho do nampuna harajaon

        Dohot hagogoon, ro di hasangapon

     Saleleng ni lelengna. Amen.

 

P:     Dipasupasu jala diramoti Tuhan Debata ma ho! Disondangkon Tuhan Debata ma bohi-Na tu ho jala asi ma roha-Na mida ho! Didompakhon Tuhan Debata ma bohi-Na tu ho jala dipasaorhon ma dame-Na tu tondim.

 

R:        (Mangendehon:) BE HKBP No. 845 Amen (3x) HKBP Es=Do 4/4 

              Amen, amen, amen.