ACARA PARTANGIANGAN NA PARPUDI DI TAON 2020

 

ACARA PARTANGIANGAN NA PARPUDI

DI TAON 2020

ADAPTASI CARA HIDUP BARU COVID-19

HKBP PONDOK GEDE RESORT PONDOK GEDE

MARHITE ZOOM VIRTUAL

Kamis, 19 Nopember 2020 Pukul 20.00 WIB

Ev. Mateus 25: 31-46; Ep. Hesekiel 34: 11-16

 

Topik:

Ari Uhum Sogot

 

(P: Parangenda; R: Ruas ni Huria; SL: Song Leader; Pj: Parjamita)

 

1.     Marende BE HKBP No. 544: 1-2 Molo Ro Panjou ni Tuhan (BL 419) G=Do 2/4

 

1.   Molo ro panjou ni Tuhan molo salpu tingki on,

Molo binsar bintang sipaias i.

Jala sahat ma tu ginjang angka na tinobus i,

Dohot au dibaen Tuhanta lao tusi.

Molo jouon ni Tuhanta angka goar di pustaha,

Dibaen asi ni roha-Na, alusanhu: O Tuhanhu, au dison.

 

2.   Molo dapot tingki hehe angka na tinobus i

Idaon nasida Tuhan Jesus i.

Di panghuling ni sarune lao manomu Tuhan i,

Dohot au dibaen Tuhanta lao tusi.

Molo jouon ni Tuhanta angka goar di pustaha,

Dibaen asi ni roha-Na, alusanhu: O Tuhanhu, au dison.

 

01.    Votum Dohot Tangiang (Pdt. Nikson Simangunsong)

 

P:    Marhitehite Goar ni Debata Ama, dohot Goar ni Anak-Na Tuhan Jesus Kristus, dohot Goar ni Tondi Parbadia, itapatupa ma Partangiangan na parpudi di taon 2020 di HKBP Pondok Gede. Amen. Martua do halak na manaon di pangunjunan, ai dung tau sian pangunjunan i, jaloonna do tumpal hangoluan, na pinarbagabaga ni Tuhan i tu angka na holong roha di Ibana. Haleluya!

(Martangiang ma hita:)

Ale Tuhan Debata, Pargogo na so hatudosan jala Parasiroha na sumurung! Dipangido rohaM, naeng mangolu jala martua hami sogot; nunga ragam dalanna dibahen Ho manungguli rohanami, asa hutanda hami hatuaon sogot. Dibahen i hupaserep hami ma nuaeng rohanami mangido sian Ho: Sai lehon ma TondiM na badia i tu hami, asa porsea hami di holong ni rohaM di hami. Sai hutangihon hami ma soaraM, na mangapoi hami di tingki parasirohaon nuaeng, asa sampang hami tu hangoluan, na pinaradeM i di hami marhitehite Tuhan Jesus Kristus, Tuhannami.

 

R:   Amen.

 

02.    Marende BE HKBP No. 562: 1-2 Hamuna Ale Jolma As=Do

 

1.   Hamuna ale jolma sai puji Debata.

Hamuna ale jolma sai puji Debata.

 

2. Gok asi ni roha-Na sahat tu huta on.

Dohot habonaron-Na sai hot do i tongtong.

 

03.    TANGIANG MANGIDO HASESAAN NI DOSA

 

P:    Tatopoti ma dosanta. Bodari on di partangiangan na parpudi di taon 2020 di na masa sorimago Covid-19. Ita ingot ma angka dosanta na ita ulahon. Godang pangalaoisionta. Ai jotjot do hita mardosa maradophon Debata, jala jotjot itasungguli rimas ni Debata marhite sian pangalaosionta, di hata-Na. Jotjot hita mardosa nang maradophon dongan jolma dohot tu sude na tinompa ni Tuhan Debata!

Ale Tuhan Jahowa, sai unang paingotingot pangalaosionnami, unang alang asi ni rohaM, sai urupi ma hami, Ho ale Tuhan Debata hatuaonnami, palua hami, jala sesa dosanami,

 

R:   Tuhan asi roham di hami, urupi hami, sesa dosanami.

 

P:    Disuru Tuhan Jesus do hita huria-Na asa gabe sira, mambahen dai na denggan, di parngoluon on, ndada sipatureon. Hape lemba do hita mangulahon i.

 

R:   Tuhan asi roham di hami, urupi hami, sesa dosanami.

 

P:    Disuru Tuhan Jesus do hita huria-Na asa gabe parasiroha sipajongjong dame dohot las ni roha di tonga ni parngoluon on. Siboan pos ni roha di tonga ni hangangguon. Siboan pangkirimon di tonga ni pandelean. Siboan dame di hagunturon. Hape jotjot hita ndang tau mangulahonsa. Gariada jotjot tartait sian ruas ni huria i, marsual di sosial media, marsual na marhombarjabu, marsual na saulaon, marsual na marhahaanggi mariboto, mardongan sahuta, samarga, sahuria. Mardosa tu Debata!

 

SL: (Mangendehon:) BE. HKBP No. 165: 3 Na Basa do Roham di Au (BL.19) D=Do 4/4

 

      O Tuhan hutopoti ma, luhutna dosangki.

      Asi rohaM sai sesa ma, di Ho ma tondingki.

 

P:    Didok Apostel Paulus, “Tuhan Jesus Kristus do pardengganan pasaehon dosanta. Alai ndada holan dosanta dohot do dosa ni portibi on”. Hasangapon ma di Debata di ginjang.

 

S:    Amen!

 

04.    Hata ni Debata (Mateus 25: 31-46)

 

P:    Tabege ma Hata ni Debata turpuk di partangiangan on sian Ev. Mateus 25: 31-46. Songon on ma hatana. Alai dung ro sogot Anak ni jolma i marhasangapon rap dohot saluhut surusuruanna, hundulanna ma disi habangsa hasangaponna i.

Dung i marluhut ma tu jolona nasa bangso, jadi sirangonna ma nasida songon binahen ni parmahan na manirang birubiru boruboru sian birubiru tunggal.

Jadi pajongjongonna ma boruboru i tu siamunna, alai anggo tunggal i tu hambirangna.

Dung i dohonon ni Raja i ma tu angka na di siamunna i: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on!

Ai na male do Ahu, dilehon hamu do Ahu mangan; na mauas do Ahu, dilehon hamu do Ahu minum; na buro do Ahu, gabe dijangkon hamu do Ahu.

Na marsangkotbulung do Ahu, jadi diparulosi hamu do ahu; na hansitan do Ahu, jala ditingkir hamu do Ahu; na tarhurung do Ahu jadi ro hamu mandulo Ahu.

Dung i dohonon ni angka partigor i ma mangalusi: Tuhan, nandigan huida hami Ho male, gabe hulehon hami Ho mangan; manang mauas, gabe hulehon hami Ho minum?

Nandigan huida hami Ho na buro, gabe hujangkon hami Ho; manang marsangkotbulung, gabe huparulosi hami Ho?

Nandigan huida hami Ho marsahit manang tarhurung, gabe hudulo hami Ho? Dung i alusan ni Raja i ma nasida: Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!

Dung i dohononna ma tu angka na di hambirangna: Laho ma hamu sian jolongkon, hamu angka na binuraan tu api sisalelenglelengna, na pinature di sibolis i dohot di angka surusuruanna!

Ai na male do Ahu, ndang dilehon hamu Ahu mangan; na mauas do Ahu, ndang dilehon hamu Ahu minum.

Na buro do Ahu, ndang dijangkon hamu Ahu; na marsangkotbulung do Ahu, ndang diparulosi hamu Ahu; na marsahit do Ahu, na tarhurung do Ahu, ndang didulo hamu Ahu.

Dung i dohononnasida ma mangalusi Ibana: Tuhan, nandigan huida hami Ho male, manang mauas, manang na buro, manang marsangkotbulung, manang marsahit, manang tarhurung, so hupatureture hami Ho?

Dung i dohononna ma mangalusi nasida: Situtu do na hudok on tu hamu: Di na so niantoanmuna sahalak sian angka na metmet on, sandok Ahu do na so niantoanmuna disi.

Dung i laho ma nasida tu na bernit salelenglelengna; alai anggo partigor i tu hangoluan sisalelenglelengna do. I ma sahatna. Martua do angka na tumangihon Hata ni Debata, jala na umpeopsa.

 

S:    Amen.

 

05.    Tangiang Pangondian (Pdt. Hotman Sitorus, S.Th.)

 

06.    Marende BE HKBP No. 167: 1 Dijangkon Jesus do Pardosa (BL 108) Bes=Do 3/4

 

1. Dijangkon Jesus do pardosa, na mangarsakhon dosa i.

Na mangundukhon hinaroa ni pambaenanna sasude.

Alai ditangkup hata on: Dijangkon Jesus nang au on.

 

2.     Pardosa na tarsolsol bagi na ponjot roha situtu.

Huhut na olo manopoti dosana i mansai burju.

I do dijangkon Jesus i, asa paluaon-Na i.

 

07.    Jamita (Hesekiel 34: 11-16  Pdt. Jeffry Sitindaon, M.Th.)

 

08.    Marende BE HKBP 461: 1-2 Songgop tu Hami (BL 407) G=Do 4/4 (Papungu Pelean)

 

1.    Songgop tu hami na di joloM on, o Tondi ni Debatangki.

Uhir patik-Mu tu rohangkinon, o Tondi ni Debatangki.

Bereng siholhu di haroroM i, molo Ho ro, nda hisar tondingki?

Didihon ma tu au on apiM i, oTondi ni Debatangki.

 

2.    Suru TondiM paluahon au on, palua ma, o Debata.

Bereng daginghu, tondingku dison, palua ma, o Debata.

Dao ma pangambat di soaraM i, hisap ni daging sandok diringki.

Na mangarsahi tongtong TondiM i, palua ma, o Debata.

 

09.    Tangiang Pelean – Pasupasu

 

Pj:   Balga do asi ni roha ni Tuhan Debata di hita huria-Na, ndang dipasombu hita, dipargogoi do hita mangadopi sude gulmit ni ngolunta, didongani do hita nang di na masa sorimago Covid-19. Tangkas do pangurupion ni Debata di hita huria-Na. Ingkon parhatopototta do i.  Jala lam ganda ma las ni rohanta manghangoluhon hata-Na.

Mauliate ma di Ho ale Tuhan Debata, patau jala pargogoi ma hami huriaM mangulahon hataM i, pinargogoan ni Tondi ParbadiaM i.

 

Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

Rap ma hita mandok Tangiang Hatopanta i,  Tangiang Ale Amanami!

Ale Amanami na di banua ginjang! Sai pinarbadia ma Goar-Mu! Sai ro ma harajaonMu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago! Ai Ho do nampuna harajaon dohot hagogoon, ro di hasangapon saleleng ni lelengna. Amen.

 

Asi ni roha ni Tuhan Jesus Kristus dohot holong ni roha ni Debata Ama dohot Parsaoran ni Tondi Parbadia ma mandongani hamu! Amen.

 

S:   (Mangendehon): BE HKBP No. 845 Amen HKBP (3x) Es=Do

      Amen, amen, amen.