PARTANGIANGAN PAMUHAI DI TAON 2017

A C A R A   P A M U H A I

PARTANGIANGAN WIJK

DI HKBP PONDOK GEDE

 RESORT PONDOK GEDE

TAON 2017

  

Rabu, 22 Februari 2017

Na hinasuhuthon ni Wijk 4

01. Tabe Joujou Mamuji Debata 

(P: Paragenda – H: Huria)

P: Tabe ma di hamu nanihaholongan di bagasan Kristus Jesus. Borngin on buhaanta ma Partangiangan Wijk di HKBP Pondok Gede di taon 2017 on. Ita rajumi Tuhanta do napatolhas hita huriaNa tu taon on bolas mamonai partangiangan on. Alani taparhatopot ma:

H:  Asi ni rohaM sambing do ale Tuhan na patolhashon hami on. Sai lohot tu Ho ma rohangku ale Tuhan, jala sai tangan siamunMi ma na tongtong manogu au.

P:  Songon parsorin ni angka partingkian, songon i do marsorin angka ari, bulan dohot taon di hita. Alai anggo Tuhanta si Tolu Sada i, hot do salelenglelengna.

H:  Asi ni rohaNa pe hot do salelenglelengna, alanii tama do pujionta Ibana.

P: Antong andorang so jojor jabu hita marsaor di bagasan hata ni Debata, tapungka ma Partangiangan Wijk on di borngin on. Tapuji ma Tuhanta sian nasa rohanta!

      H: (mangedehon) SDJ. No.565:1+4

Las Rohangku Lao Mamuji BL.565 G=D0

1.     Las rohangku lao mamuji Debata Parholong i, Songon bunga na mangerbang di na binsar ari i. Arsak, dosa, haporsuhon mago dibaen asiMi. Las ni roha na manongtong lehon di au Tuhanki.

…………..Jongjong…………

4.   Rap ma hita mangendehon, sangap di GoarNa i. Tapangiar soaranta lao mamuji Tuhan i. Sun do holong ni rohaNa na so marnamontok i, i do pasadahon hita salelenglelengna i.

02. Votum-Introitus-Tangiang

(Pdt. Nikson Simangunsong)

P:   Marhitehite Goar ni Debata Ama, dohot Goar ni AnakNa, Tuhan Jesus Kristus dohot Goar ni Tondi Parbadia na tumompa langit dohot tano on. Amen. Songon on do didok Tuhan Jesus: Ro ma hamu tu Ahu, hamu angka na loja jala na sorat, Hupasonang pe hamu.

H:  Buat hamu ma augangku tu hamu, guruhon hamu ma sian Ahu,

P:   Ai na lambok do Ahu jala na serep marroha, asa dapotan paradianan hasonangan tondimuna. Haleluya! (Martangiang ma hita): Ale Amanami Parasi roha na sumurung, Debata ni hatuaonnami! Huingot hami do di angka ari on panaonon dohot hamamate ni Tuhan Jesus Kristus, Tuhannami. Pahibul ma rohanami jala parbadiai mamingkiri sude na tinaonNa i. Patandahon ma tu hami dosanami, asa diarsakhon rohanami, asa hupompomi hami hisaphisap dohot sangkapsangkap ni rohanami, jala asa hupasaut hami lomo ni roha ni na manobus hami, asa martua hami marhite sian i ro di salelenglelengna. Na mandok mauliate do hami tu Ho sian nasa rohanami, ala ni saluhut pambahenanMi na tu hami huriaM. Di bagasan asi ni rohaM do hupaujung hami ulaon Partangiangan Wijk di huriaM Pondok Gede di taon 2016 na salpu. Laos asi ni rohaM ma na hupangasahon hami laho patupahon Partangiangan Wijk di taon 2017 on. Asi ma rohaM, sai lehon ma roha na girgir di hami laho tumangihon hataM, asa tarbahen hami mangihuthon Ho di pardalanan ni ngolunami. Patau saluhut ruas ni huriaM manghalashon program ni huriaM HKBP di taon 2017, Tahun Pendidikan dohot Pemberdayaan HKBP. Tumpahi ulaon ni ruasMi asa dihamauliatehon i marhite parsaoran dohot Ho di angka Partangiangan Wijk, asa tung marsitutu hami mangoloi Ho di bagasan haporseaon na ture. Sai patupa ma i di hami marhitehite Tuhan Jesus Kristus, Anak haholongan ni rohaM. Amen. (hundul)

03. Koor: WIJK 1 –  INA HANNA

04. Renungan Patupahon Partangingan Wijk

P:  Hataridaan ni parsaoran na mangolu dohot Debata, i ma ngolu partangiangon. Ndang mansohot dipatubegehon tu hita barita ni Kristus i, asa unang mandao rohanta sian Ibana. Songon i do dipatupa angka na porsea i di huria na parjolo. Didok di Ulaon ni Apostel 2: 46 “Ganup ari do nasida tongtong saroha di bagas joro i, jala jojor jabu do nasida marulaon na badia, marlas jala marbulus ni roha nasida marsipanganon.”

H:  Songon parsitutuon ni si David di parsaoranna dohot di parungkilonna, songon i ma diigil sian hita di parngoluonta dohot di partangiangonta, na mandok: Ai Jahowa do siparmahan au, Ibana patudu dalan sidalananku.

P:   Di na martangiang hita, disi do hita mangido gogo dohot pangurupion ni Debata, ai ndang ala ni gogonta umbahen boi hita sonang mangolu jala boi mangula ulaonta. Na mardalan tu jolo do ngolunta jala mangadopi lan hamaolon. Alani pardalananta na gok  hamaolon i, ringkot do di hita gogo, pos ni roha, dohot habengeton. Ingkon parhatopotonta do na so mura hita mangadopi angka paraloan ni ngolu i; holan mardonganhon Debata do hita boi manghamonanghon i.

05. Koor: WIJK 2 

     P:  Songon pangkalungunhon ni ursa di guluan,

H:  songon i do pangkalungunhon ni tondingku tu Ho, ale Debata. Ai ndang manahan au manghamonanghon paraloan ni ngolungku, molo ndang hataM na pasabam ahu.

P:   Partangiangan ndada holan rutinitas manang na marpungupungu sambing. Di partangiangan i do boi hilalaonta na Tuhan i do na tapangasahon. Taingot ma na masa tu bangso Israel; satongkin sambing do ndang manghatai si Musa tu nasida, nunga manimbil nasida maninggalhon Debata, dipature jala digana “debata tuangan” gabe debatana. Taboto ma, molo ndang marsaringar be hata ni Debata tu sipareonta, mago ma hita. Alanii tapeop ma hata on “Asa sian na tumangihon do ro haporseaon: ia panangihonon i, sian hata ni Kristus do” (Rom 10:17)

06. Koor: PAROMPUAN 

P:     Andorang so tauduti mandapothon bagas ni ruas ni huria ni Tuhan i patupa Partangiangan Wijk, jumolo ma hita marsada di bagasan partangiangan, songon pamuhai ni partangiangan sipatupaonta. Antong masihohot jala hot so mubauba ma hita di bagasan Tuhan i.

H:    Lam togu ma haporseaonta jala lam sumurung di ulaon ni Tuhan i. Taboto ma, ndang magopo halojaonta di bagasan Tuhan i.

P:     Lam taharingkothon ma ulaon partangiangon, ala ndang tarpangasahon hita dirinta jala tahilala ma na hurang do hita di adopan ni Debata. Ringkoti hamu ma asa didapothon  Ibana hamu so martihas, so hasurahan, di bagasan dame!

H:    Songon panghalungunhon ni Ursa di guluan, songon i ma tondingku dohot pamatangku manghalungunhon partangiangan pinatupa ni huria.

07. Koor: WIJK 4 – WIJK 3 

08. Marende BE. No. 194: 2-3 Aut so asi rohaM BL. 62 F=Do

2.   Mauliate ma di Ho o Debata ala basaM.

Sibahen dalan i marhite AnakMi tu banuaM.

3.   Anggiat ma holong rohangku sai tongtong burju tu Ho.

Sai dongananMu au manang tu dia lao sonang tutu.

09. Manjaha sian Psalmen 2: 1-12

    

P:  Tajaha ma Hata ni Debata Turpuk jamita tu ari Minggu, Epistel di partangiangan on sian Psalmen 2: 1-12. Boasa sai ogaoga angka parbegu, jala sai na so marniula dipingkiri roha ni angka bangso?

H:  Hehe martahi do angka raja ni tano on rap dohot angka na begu, mangalo Jahowa dohot Messiasna i.

P:   "Tarapui ma angka ihotnasida, jala taambolongkon ma angka talina i," ninna.

H:  Alai diengkelengkel Ibana na marhabangsa di banua ginjang i do nasida, jala dielesi Tuhanta i do nasida.

P:   Songgahanna do nasida sogot di rimasna, jadi martimpalan ma nasida mida parpiarpiar ni murukna.

H:  Hape anggo Ahu, hupabangkit do Rajangku di dolok Sion, dolok habadiaonku.

P:   Jamitahononku ma na gabe patik, didok Jahowa do mandok ahu: Anakku do Ho, sadarion do Ho hutubuhon. Pangido ma sian Ahu, asa hulehon tu Ho angka parbegu bahen jambarmu, jala gok di Ho angka ujung ni tano on.

H:  Ropuhanmu ma nasida dohot batahi bosi jala songon hudon do nasida taporanmu.

P:   On pe, hamu ale angka raja, sai olo ma hamu parrohaon, jala hamu ale angka panguhum ni tano on, sai olo ma hamu paingoton.

H:  Oloi hamu ma Jahowa dohot biar ni roha, jala marolopolop ma hamu, huhut angka hitir.

P:   Umma hamu ma Anak i, asa unang ro rimasna, jadi mago hamu maon ditongan dalan, ai tibu do marpiarpiar rimasna, alai martua ma sude angka na marhaposan tu Ibana. I ma sahatna! Martua do angka na tumangihon Hata ni Debata i jala na umpeopsa.

L+H: Amen.

10. Koor: 

11. Marende BE. No. 205: 1-2 Ale Jesus Tuhannami  BL. 90 Es=Do

1.   Ale Jesus Tuhannami, bereng hami na dison.

PinarmahanMi do hami saluhutna na dison.

Sai asi rohaM di hami, sai pangolu hami on.

2.  Ale Jesus togu hami asa unang mago be.

Manang ise sian hami sai porsea ma sude.

Sai na hot di Ho ma hami dao ma jea sasude.

12. Tangiang Pangondian (Pdt. H. Sitorus)

13.  Marende BE. No. 267: 1 O Tuhan sulingkit BL. 100 C=Do

1.  O Tuhan sulingkit ma au, sondangi rohangku tangkas.

Gogongku soada di au. Tu Ho au paringgas, tu Ho au padonok,

Di Ho nama au. Tu Ho au paringgas,

Tu Ho au padonok di Ho nama au.

14.    Jamita: 2 Petrus 1: 16-21 (Pdt. Jeffry Sitindaon)

15.   Marende BE. No. 467: 1... Asi ni rohaM hupuji BL. 315 A=Do

        (Pelean)

1.   Asi ni rohaM hupuji ala Ho manobus au.

Di paias Ho rohangku, gabe soranganMu au.

IngananMu rohanami. TondiMi manggohi i.

2.  Pangke dohot ngolunami gabe ulaulaMi.

Sai ramoti ma rohangku, asa boi gohanMu au.
Sai mabaor ma pasupasu nang marhite sian au,
IngananMu……..

........................Organ....................

3.   Naeng huhatindangkon hami hagogoonMi tongtong,
Paluahon na mardosa, nang parjahat na bolong.
IngananMu……..

4.  Sai papulik rohanami gabe pangoloi di Ho.
Asa marsahala hami lao mangkatindangkon Ho.
IngananMu…

16. Borhatborhat Manghaburjuhon Partangiangon

P:   Nunga tabege hata ni Debata, na paborhathon hita mangulahon ulaon paraloan partondion i. Asi ni roha ni Debata sambing do umbahen mangolu jala malua hita, ndang ala pambahenanta.

H:  Alani tahaburjuhon ma paraloan partondion na denggan i. Tatangkup ma hangoluan salelenglelengna, ai tu si do hita tarjou.

P:   Sai tongtong borhat ma hita tu Partangiangan Wijk di bagasan pos ni roha dohot di bagasan panogunoguon, panuturion ni Tuhan i. Manongtong ma hita martangiang jala mangasahon hata ni Debata, asa sonang rohanta, timbul dohot tuatta.

H:  (mangendehon BE. No. 272:4)

      Sai tole, tole ro sude BL. 249 G=Do

      4.    Antong sai paralohon ma haporseaonmi.

Dipargogoi Debata ma sipartangiang i.

Tajom podangta i, i ma hataNa i.

Maruli tumpal do sude na so sumurut be.

17. Tangiang Pelean - Tangiang Ale Amanami

18. Pasupasu

19. Mangendehon: Amen, amen, amen.