" H e d o n i c T r e a d m i l l "

Sungkunsungkun. Beasa, nang lam bahat pansamotan ni sasahalak, dang gabe patamba las roha? Gariada patuduhon ndang bahat ni hepeng hape, mambahen las roha!

Pande bisuk ilmu financial psychology mambahen alusna. Adong bangko di jolma i, na margoar “hedonic treadmill”. Bangko hedonic treadmill on: Tingki margaji lima juta, iasias suda do gaji tu haporluan siganup bulan. Manangkok ma margaji tolu puluh juta per bulan, tong iasias suda ganup bulan.

Beasa?

Ala ekspektasi dohot gaya ni parngoluon na manangkok jala mangerbang, saurdot dohot parnangkok ni gaji nangkin. Marhite pandohan na asing, hagiot manuhor situhoron angka barang mewah manangkok saurdot dohot parnangkok ni gaji i. On ma bangko hedonic treadmill: songon mardalan di treadmill. Alanii, las ni roha pe, ndang lam manangkok! Hagiot na so tarpagok. Di tingki tolu juta balanjo, mar-Sepeda motor “Beat”, nunga sombu pangkilalaan. Ndung marbalanjo lima juta par bulan, mar-Avanza, marbalanjo pitu juta naeng mar-Innova. Ndung lima puluh juta par bulan naneng mar-Alphard dohot mar-Harley. On ma elalela ni hedonic treadmill.

Hedonic treadmill mangarahon ekspektasi tu asa adong di ahu gabe lam tajom. I ma na mambahen las ni roha mardosdos songon simarunapunap, di hata pandohan ni inanta si Margaret Teacher di dok ma “stagnan”, nang manangkok gaji bulanan, ndang gabe manangkok las ni roha.

Bereng ma halak na dapotan hadiah isara sada mobil Innova, parateatehon ma ngoluna dung marpiga bulan mamangke mobilna i?

Aha do na masa?

Onom bulan dung dapot hadiah sada mobil Innova, dos las ni rohana dohot uju tingki so mandapot hadiah i, gariada olo lam repot, ala ingkon pajongjong bagasi ni mobil Innovana i. I ma panghorhon ni hedonic treadmill.

Aha ma ulahononta mangalo hedonic treadmill? Asa malua sian hagiot pamahemahe na so marhaujungan?

“Bahat suda, otik sukup,

bahat sibutongbutong, otik si pir ni tondi”