PARMINGGUON PASAMPULUPITUHON DUNG TRINITATIS 04 OKTOBER 2020

 

PARTORDING NI PARMINGGUON

MINGGU PASAMPULUPITUHON

DUNG TRINITATIS

TATANAN HIDUP BARU COVID-19

HKBP PONDOK GEDE

RESORT PONDOK GEDE

Minggu, 04 Oktober 2020

Ev. 1 Musa 2: 18-25

Ep. 1 Korint 11: 8-12

 

Topik: Dos Do Hita Di Adopan Ni Debata

(P: Paragenda - R: Ruas)

 

1.        Marende BE HKBP No. 135: 1-2 Marpungu Do Di JoloM on (BL 206) Es=Do 4/4

 

1.            Marpungu do di joloM on, marsada roha hami on,

O Jesus Tuhannami.

Ho Raja na tarsilang i, na pinatimbo i muse,

Sai ro ma Ho tu hami.

Olo, jalo ma tangiang, pamujian di goar-Mu,

Ala holong ni roha-Mu.

 

--- Jongjong ---

 

2.            Na metmet di mulana i sai dipararat Ho do i, 

I ma harajaon-Mu.

Lam ganda do bilangan ni na paboahon hataM i,

Baen sangap di goar-Mu.

Jesus, tulus baen sangkap-Mu sosoan-Mu hajolmaon,

Asa olo paluaon.

 

2.        Votum – Introitus – Tangiang (A.XV/A.12 – D.XIII/41)

 

       P:       Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

 

       R:       Amen.

 

       P:       Pardenggan basa do Jahowa, tau partanobatoan di ari hagogotan jala ditanda do angka na marhaposan tu Ibana. Haleluya!

 

R:       (Mangendehon BE HKBP No. 852 F=Do 4/4):

         Haleluya, Haleluya, Haleluya!

 

       P:       Martangiang ma hita:

                 Ale Tuhan Debata, Amanami na di banua ginjang! Sai lehon ma tu hami roha na togu, na badia, pingkiran na denggan dohot roha na ringgas pasauthon ulaon na denggan. Sai lehon dame tu hami asa sonang hami mangolu di bagasan pangondingiM, sai marsigantung tu HataM ma hami maradophon saluhut musunami. Sai ramoti jala pargogoi ma hami marhitehite Tuhan Jesus Kristus Tuhannami.

 

       R:       Amen. -hundul-

 

3.        Marende BE HKBP No. 128: 1-2 Ditanda Debatanta (BL 162) As=Do 4/4

 

1.            Ditanda Debatanta na di Ibana i.

Na metmet nang na balga, di nasa bangso i.

Ndang mago loason-Na nang sada sian i.

Ditogu do sudena tu hasonangan i.

Ditogu do sudena tu hasonangan i.

 

 

2.            Ditanda do nasida dibaen porsea do

Nasida di hata-Na naung tu nasida ro.

I do hangoluanna, i do guruna i.

Laos i do sinjatana, mangalo musu i.

Laos i do sinjatana, mangalo musu i.

 

 

4.        Patik (Patik Parjolo Sahat Tu Patik Pasampuluhon)

 

P:       Tangihon hamu ma Patik ni Debata i ma Patik Parjolo sahat tu Patik Pasampuluhon.

I.              Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.

 

II.            Ndang jadi ganaonmu jala ndang jadi sumanonmu manang aha na di banuaginjang dohot na di banua tonga on, ro di na di bagasan aek na di toru ni tano, ianggo tung gabe sisombaon manang sioloan.

 

III.           Ndang jadi dohonon goar ni Debata, ianggo so ture dalanna, ai hona uhum­-Na do sogot angka na marsineang di Goar-Na.

 

IV.          Ingot hamu ma pabadiahon ari Minggu i! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anak­mu pe manang borum manang naposom lahilahi manang naposom boruboru, ro di pinahanmu, ro di isi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina, dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradianan-Na i jala diparbadiai.

 

V.            Ingkon pasangaponmu do natorasmu, asa martua ho jala leleng mangolu di tano na nilehon ni Jahowa Debatam di ho.

 

VI.          Unang ho mamunu!

 

VII.         Unang ho mangalangkup!

 

VIII.       Unang ho manangko!

IX.          Unang ho olo manghatindangkon hata na so tutu maralohon dongan jolma!

X.           Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru manang lombuna manang hodana, manang dia pe ugasan ni donganmu.

 

Beha pandok ni Debata taringot tu Patik na sampulu i?

 

On do: Ahu do Jahowa Debatam, ninna Debatanta. Pargogo na so hatudosan jala Parrimas, Siluluhon dosa ni amaama tu pinomparna, ro di sundut patoluhon, ro di sundut paopathon, pinompar ni angka na sogo roha di Ahu; alai asi do rohang-Ku di angka na marriburibu, angka na marholong ni roha di Ahu, na so mangalaosi Patik-Hi.

 

P:       I ma sahatna. Antong rap mangido gogo ma hita sian Debata laho mangulahon na hombar tu patikNa i:

 

P+R:   Ale Tuhan Debata, sai pargogoi ma hami mangulahon na hombar tu Patik-Mi. Amen.

5.        Marende BE HKBP No. 174: 1-2 Torop Dope Na Siat i (BL 184) C=Do 6/8

 

1.            Torop dope na siat i di hasampuran rea.

I pe hamu pardosa i sai olo ma porsea.

Ai Debata manjou hamu tu hasonangan situtu.

Hamu, hamu, dijou Debatamu.

 

--- Jongjong ---

 

2.            Tama longang roham ale umbege pangontang-Na.

Antong sai unang jua be, tangihon pamio-Na.

Ai Debata mamio Ho, dibahen i sai ro ma ho.

Sai ro, sai ro, tu surgo ma ho ro.

 

6.        Manopoti Dosa (B.4 - C.14)

 

P:       Tatopoti ma dosanta!

Ale Tuhan Debata, Amanami, Pargogo na so hatudosan, Parasiroha mida hami na dangol on! Na ro do hami tu joloM manopoti dosanami na godang i. Di bagasan hajahaton do hami tubu jala ndang adong haporseaon di bagasan rohanami hian, saluhut do hami manimbil sian angka dalan-Mu. Mansai godang do pangalaosionnami di Patik-Mu. Alai ingot ma hami, ale Tuhan, ala ni denggan ni basaM dohot asi ni rohaM. Sai unang paingotingot angka dosa ni haposoonnami dohot pangalaosionnami: sai ingot ma hami hombar tu asi ni rohaM dohot denggan ni basaM ala ni Goar-Mu. Ale Tuhan Jesus, marpamuati ma rohaM di dosanami na godang i!

 

R:       Amen.

 

          (Tangiang na hohom BE HKBP No. 174 Torop Dope Na Siat i (BL 184) C=Do 6/8

 

P:       Tabege ma Hata bagabaga taringot tu hasesaan ni dosa. Ai ndang adong imbar ni i; ai saluhut do pardosa jala hurangan maradophon hasangapon ni Debata, alai angka na gabe pintor, binahen ni basabasa marhite sian asi ni roha-Na, hinorhon ni panobuson na marhitehite Kristus Jesus i, na pinajongjong ni Debata bahen habangsa parasian marhitehite haporseaon di mudar-Na. Hasangapon ma di Debata na di ginjang!

 

R:       Amen.

 

7.        Marende BE HKBP No. 684: 1 Lea Situtu Bes=Do 6/8

 

1.            Lea situtu do au ala ni dosangki.

Loja jala sorat au, ponjot pingkiranhi.

Debata parholong i umbege angguk i.

Ala ni holong-Na i malua au.

Holong-Na i, holong-Na i,

Ala ni holong-Na i malua au.

Holong-Na i, holong-Na i,

Ala ni holong-Na i malua au.

 

8.        Epistel (1 Korint 11: 8-12)

 

 

P:       Tabege ma Hata ni Debata turpuk ni ari Minggu on, sian buku 1 Korint 11: 8-12. Ita jaha ma marsorinsorin, songon on ma hatana! Ndada sian boruboru baoa i; sian baoa do boruboru i.

 

R:       Jala ndada ala boruboru i tartompa baoa i, boruboru i do ala ni baoa.

 

P:       Ala ni i, patut marsahala do boruboru i diatas uluna, ala ni angka surusuruan i.

 

R:       Asal ma di bagasan Tuhan i nasida, ndada boruboru i so padohot baoa i, songon i nang baoa i so padohot boruboru i.

 

P:       Ai marharoroan boruboru i sian baoa, laos songon i do baoa sian boruboru i; alai sian Debata do saluhutna i. I ma sahatna! Martua do angka na tumangihon Hata ni Debata, jala na umpeopsa.

 

R:       Amen.

 

9.        Marende BE HKBP No. 765: 1 Nang Pe Munsat Angka Dolok Es=Do 4/4

 

--- Jongjong ---

 

1.    Nang pe munsat angka dolok, nang humuntal pe robean i,

Ndang tagamon olo munsat asi roha ni Jahowa i.

Nang pe mago sogot langit, nang pe mago dohot tano i,

Ndang tagamon olo muba na nidok-Na di hataNa i.

Hot do asi ni roha-Na ro di salelenglelengna.

Nang pe padan hadameon tung na so humordit do.

I do hata ni Jahowa, Tuhan siasii ho.

Hot do asi ni roha-Na ro di salelenglelengna.

Nang pe padan hadameon tung na so humordit do.

I do hata ni Jahowa, Tuhan siasii ho. Hot do i, saut do i.

 

10.    Manghatindanghon Haporseaon

 

 

P:       Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

 

P+R:    Ahu porsea di Debata Jahowa, i do Ama, Pargogo na so hatudosan na tumompa langit dohot tano.

         

          Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

         

          Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

 

11.    Tingting Huria dohot Tangiang Pangondian

 

12.    Marende BE HKBP No. 753: 1-2 Di Pardalanan Jesus Di Jolongku Es=Do 4/4

 

1.            Di pardalanan Jesus di jolongku,

Holong ni tangan-Mi manogu au.

Nang di ngolungku Ho do sombaonhu,

Tung sonang mardalan raphon Ho.

Huboto do tangkas panoguon-Mu,

Diiringiring Ho do langkangki.

Sahat ro di ujung ni pardalanhu,

Togu ma au jonok tu lambung-Mi.

 

 

2.            Sipata lilu haporseaonhu,

Nililianan ni portibi on.

Alai dung Ho hutatap, o Tuhanhu,

Margogo do au on di ngolungkon.

Huboto do tangkas panoguon-Mu,

Diiringiring Ho do langkangki.

Sahat ro di ujung ni pardalanhu,

Togu ma au jonok tu lambung-Mi.

 

13.    Jamita (1 Musa 2: 18-25)

 

P:       Dung i ninna Debata Jahowa ma: “Ndang jadi punjung jolma i; Hubahen ma di ibana sada pangurupina bahen donganna.”

Ai dung sun dijadihon Debata Jahowa sian tano i nasa binatang di ladang ro di sude pidong angka na martongatonga langit, ditogihon ma i tu si Adam, asa diida manang beha goaranna; jala ia i dibahen si Adam goar ni nasa na marhosa laos i do goarna.

Jadi dibahen si Adam ma goar ni nasa pahanpahanan ro di pidong angka na martongatonga langit dohot nasa na manggulmit di tano on. Alai anggo di si Adam ndang adong jumpang pangurupi bahen donganna.

Dung i tarlalap modom ma si Adam dibahen Debata Jahowa, jadi dienet ma sada sian rusukna, jala dilangkophon sibuk tu pambuatanna i.

Dung i dipauli Debata Jahowa rusuk na binuatNa i sian si Adam, bahen boruboru, jala ditogu ibana tu si Adam.

Dung i ninna si Adam ma: “On do sahali holiholi sian angka holiholingku, jala sibuk sian sibukhu; goaron ma ibana: Jolma ni baoa, ala sian baoa ibana binuat.”

Dibahen i tadinghonon ni baoa do amana dohot inana mandongani jolmana, jadi sada sibuk nasida.

Marsaemara do nasida duansa, si Adam dohot jolmana i, jala ndang maila nasida. I ma sahatna!

 

14.    Marende BE HKBP No. 820: 1… Pangke Ma Tingkim Es=Do 4/4 (Pasahathon Pelean; STT - Sikola Pandita HKBP)

 

1.            Pangke ma tingkim na sian Tuhanmu,

Ai tung hatop laho salpu do i.

Dia ma arta na hot di ngolumu,

Holong na polin na manongtong i.

Reff.:      Ai ndang adong na hot di atas tano on,

            Nasa na uli lao salpu do i.

            Holong ni roha na hot na manongtong,

            Holan di Jesus do boi jumpang i.

 

2.            Pangke tingkim unang ho marnalemba,

Topoti, urupi na dangol i.

Sai marsinondang ma baen palitomu,

Baen hasangapon di Tuhanta i.

Reff.:      Ai ndang adong. . .

 

--- Musik ---

 

3.            Halojaonmu diboto Tuhanta,

Sian Ibana ro balos ni i.

Holong na ias na sinaburhonmu

Sai gotilonmu parbue ni i.

Reff.:      Ai ndang adong. . .

 

15.    Tangiang Pelean – Ale Amanami – Pasupasu

 

P:     Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:     (Mangendehon): BE HKBP No. 204:2 (BL 73)

       Nasa na nilehon-Mi, tondi ro di pamatanghu.

       Hosa dohot gogongki, ro di saluhut artangku.

       Hupasahat i tu Ho, na so unsatonhu do.

 

P:     Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:     (Mangendehon): BE HKBP No. 841

       Ai Ho do nampuna harajaon

       Dohot hagogoon, ro di hasangapon

       Saleleng ni lelengna. Amen.

P:     "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

 

P/R:  (Mangendehon): BE HKBP No. 845

       Amen… Amen… Amen.

 

 

 

Peleanta, itatongoshon ma tu:

1. Rekening Britama Cab. Pond Gede

No. (002) 038501000630566

2. Tabungan BNI

No. (009) 1919667770