PARMINGGUON PASAMPULUSIAHON DUNG TRINITATIS 18 OKTOBER 2020

 

PARTORDING NI PARMINGGUON

MINGGU PASAMPULUSIAHON

DUNG TRINITATIS

ADAPTASI CARA HIDUP BARU COVID-19

HKBP PONDOK GEDE

RESORT PONDOK GEDE

Minggu, 18 Oktober 2020

Ev. Job 42: 7-17

Ep. Johannes 2: 1-12

 

Topik: Pauliulihon Angka Hasomalan Na Denggan

 

(P: Paragenda - R: Ruas)

 

1.        Marende BE HKBP No. 565: 1-2 Las Rohangku Lao Mamuji G=Do 4/4

 

1.            Las rohangku lao mamuji Debata parholong i.

Songon bunga na mangerbang di na binsar ari i.

Arsak, dosa, haporsuhon mago dibaen asiM i.

Las ni roha na manongtong lehon di au Tuhanhi.

 

--- Jongjong ---

 

2.            Sude jadijadian-Mu, laut, tano, langit i.

Angka bintang dohot bulan nang mata ni ari i.

Hauma, ladang nang harangan, rura dohot dolok i.

Saluhutna mangendehon sangap di Tuhanta i.

 

 

2.        Votum – Introitus – Tangiang (A.XV/A.23 – D.XIII/42)

 

       P:       Marhitehite Goar ni Debata Ama dohot Goar ni Anak-Na, Tuhan Jesus Kristus dohot Goar ni Tondi Parbadia, na tumompa langit dohot tano on.

       R:       Amen.

       P:       Songon on do didok Tuhan Jesus: Ianggo poda na di Ahu, ndang Ahu nampunasa, poda ni na marsuru Ahu do i. Molo adong manang ise na mambahen lomo ni roha ni Ama i, botoon ni i do taringot tu poda i, manang na sian Debata i, manang na huhatahon i sian roharohangku sandiri. Songon na nidok ni Surat i: Angka batang aek na mangolu do mabaor sian pamatang ni na porsea di Ahu. Haleluya!

 

       R:       (Mangendehon BE. HKBP No. 852 Haleluya (3x) F=Do 4/4) Haleluya, haleluya, haleluya!

 

       P:       Martangiang ma hita:

                 Ale Tuhan Debata, Amanami na di banua ginjang! Hupangido hami tu Ho, sai lehon ma tu hami Tondi ni hasintongan dohot dame, asa tangkas huboto hami nasa lomo ni rohaM, jala urupi ma hami mangulahon i sian nasa gogonami marhitehite Anak-Mu, Tuhan Jesus Kristus Tuhannami.

 

       R:       Amen. -hundul-

 

3.        Marende BE HKBP No. 192: 1-2 O Tuhan Jesus Raja Ni Sudena (BL 60) F=Do 4/4

 

1.       O Tuhan Jesus, Raja ni sudena,

Tubu sian Ama i.

Haholonganhu, sisombaonhu,

Sasada Ho do Tuhanhi.

 

2.       Tombak denggan do, hauma pe denggan do

Na rumatarata i.

Jesus dumenggan, Jesus gumodang

Sibaen las ni rohanta i.

 

 

4.        Patik ni Debata (Konfessi HKBP Bindu 1. B2)

 

P:       Tangihon hamu ma Patik ni Debata i ma Konfessi HKBP Bindu 1. B2. DEBATA ANAK.

          Debata Anak i ma Jesus Kristus, hapataran ni Debata Ama na mangarumari diri-Na gabe jolma: na tinubuhon ni si Maria, na gabegabean sian Tondi Parbadia andorang so habubuhan. Ibana do Tuhan na humophop dohot paluahon jolma manisia. Diantoi Ibana do parsorion ni hajolmaon dohot nasa bangso di sude tingki, jala haposan situtu do Ibana sahat ro di saleleng ni lelengna. Dipalua do jolma manisia sian gomgoman ni sibolis, sian parhatobanon ni dosa, sian uhum ala dosa, dohot sian hamagoan nang hamatean na tumaon na bernit pola mate di hau pinarsilang. Ibana do hagogok ni pelean pardengganan tu Debata siala dosa ni hajolmaon. Na tuat do Ibana tu banua toru dung ditanom, na mulak mangolu di ari patolohon, na manaek tu surgo, laho hundul tu siamun ni Debata Jahowa. Amana i. Marhite i do dipatimbo Debata Ibana jala dibasabasahon goar na sumurung asa nasa goar. Asa somba tu goar ni Jesus nasa ulu ni tot na di banua ginjang i dohot na di tano nang na di toru ni tano, sian i do Ibana mangondihon nasa na porsea huhut manggomgomi saluhut, paima mulak sogot tu tano on manguhumi na mangolu dohot na mate. Asa nasa soara marhatopothon: "Jesus Kristus do Tuhan, bahen hasangapon ni Debata Ama" (Mat. 28: 18; Heb 9: 14; Pil. 2: 9 - 14; Ep. 1: 20 - 22; 1: 7; Joh. 3: 16)

         

P:       I ma hatana. Antong rap mangido gogo ma hita sian Debata laho mangulahon na hombar tu patik-Na i:

 

P+R:   Ale Tuhan Debata, sai pargogoi ma hami mangulahon na hombar tu Patik-Mi. Amen.

 

5.        Marende BE HKBP No. 171: 1-2 Tandai Ma Au (BL 1) G=Do 4/4

 

1.       Tandai ma au, sungkapi ma dohot rohangku.

Uji ma au, pamanat huhut ma dalanhu.

Olo, ditanda Ho au Debata.

 

--- Jongjong ---

 

3.            Asi ma rohaM taringot tu pangalahongku.

Olo tutu, jotjot do na lilu  dalanhu.

Sesa dosangku sude Debata.

 

 

6.        Manopoti Dosa (B.2 - C.12)

 

P:       Tatopoti ma dosanta!

Ale Amanami jala Debatanami, na di banua ginjang, Pargogo na so hatudosan! Pardengganbasa do Ho, jala ro di salelenglelengna do asi ni rohaM. Sai marpamuati ma rohaM di hajahatonnami, jala sai unang be ingot angka dosanami; ai jotjot do hami mardosa maradophon Ho, jala jotjot do husungguli hami rimas-Mu marhite sian pangalaosionnami, di hataM, Ale Tuhan Jahowa, sai unang paingotingot pangalaosionnami, unang alang asi ni rohaM, sai urupi ma hami, Ho ale Tuhan Debata hatuaonnami, palua hami, jala sesa dosanami, ala ni Anak-Mu, Tuhan Jesus Kristus, Tuhannami.

 

R:       Amen.

 

          (Tangiang na hohom BE HKBP No. 171 Tandai Ma Au (BL 1) G=Do 4/4

 

P:       Tabege ma Hata bagabaga taringot tu hasesaan ni dosa.

          Ise be mangaluhon angka na pinillit ni Debata? Debata do na mamintori. Ise do na mandabu uhum hamagoan? Kristus Jesus do naung mate; alai ndada holan i, naung mulak mangolu do, jala di siamun ni Debata do Ibana mangondihon hita. Hasangapon ma di Debata na di ginjang!

 

R:       Amen.

7.        Marende BE HKBP No. 265:1 Mauliate Ale Tuhan (BL 192) F=Do 4/4

 

1.            Mauliate ale Tuhan ala ni hahoholong-Mi.

Ro Ho sian banua ginjang pangolu au na mago i.

Hudok di Ho mauliate, naung singkop hangoluanhi.

Ala holong huhut marasi rohaM di au pardosa i.

 

8.        Epistel (Johannes 2: 1-12)

 

P:       Tabege ma Hata ni Debata turpuk ni ari Minggu on, sian Evangelium Johannes 2: 1-12. Dung i patoluarihon adong ma na marbagas di huta Kana na di luat Galilea, jala disi ma ina ni Jesus.

 

R:       Alai dohot ma Jesus raphon angka siseanna dipio tu pesta i.

 

P:       Jadi dung hurangan anggur nasida, ninna ina ni Jesus ma mandok Ibana: Ndang adong anggur di nasida!

 

R:       Alai ninna Jesus ma mandok ibana: Marhua ho tu Ahu, inang? Ndang dope ro tingkingku.

 

P:       Dung i ninna inana i ma mandok angka parhobas: Manang dia dohononna tu hamu, bahen hamu ma!

 

R:       Alai mangihuthon adat parburion ni halak Jahudi, adong ma diri disi onom gunsi (hudon batu), siatsiat dua ro di tolu poting.

 

P:       Dung i ninna Jesus ma mandok nasida: Gohi hamu ma angka gunsi on aek! Jadi gok situtu ma dibahen.

 

R:       Laos didok muse tu nasida: Tahui hamu ma sian i, dung i boan hamu ma tu indukmuna! Jadi diboan nasida ma.

 

P:       Alai didai induk ni angka parhobas i ma aek i naung gabe anggur, jala ndang diboto haroroanna, ai holan angka parhobas na manahui aek i do umbotosa, gabe dijou ma pangoli i.

 

R:       Jadi ninna ma mandok ibana: Saluhut jolma mangalehon parjolo anggur na dumenggan; dung pe butong halak,

 

P:       Asa dilehon na humurang. Ia ho, dipeop ho do anggur na dumenggan ro di nuaeng! Asa i ma tanda na parjolo, na binahen ni Jesus di huta Kana na di Galilea, papatarhon hasangaponna i,

 

R:       Gabe porsea ma angka siseanna di Ibana.

 

P:       Dung salpu i, tuat ma Ibana tu Kapernaum rap dohot inana, angka anggina dohot siseanna, laos mian manang piga ari disi. I ma sahatna! Martua do angka na tumangihon Hata ni Debata, jala na umpeopsa.

 

R:       Amen.

 

9.        Marende BE HKBP No. 690: 1+4 Hibul Rohangku C=Do 4/4

 

1.            Hibul rohangku tu Tuhan Jesus,

Sude ngolungku di Tuhan Jesus.

Ihuthononhu do Tuhan Jesus,

Ndang olo au sumurut be.

 

 

--- Jongjong ---

 

4.            Beta ihuthon ma Tuhan Jesus,

Ho na dijou do roham patulus.

Beta ihuthon ma Tuhan Jesus,

Sai unang ho sumurut be.

 

10.    Manghatindanghon Haporseaon

 

P:       Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

 

P+R:    Ahu porsea di Debata Jahowa, i do Ama, Pargogo na so hatudosan na tumompa langit dohot tano.

         

          Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

         

          Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

 

11.    Tingting Huria dohot Tangiang Pangondian

 

12.    Marende BE HKBP No.399: 1-2 Unang Tarlalap Di Hata (BL 266) Es=Do

 

1.            Unang tarlalap di hata, tulus sigop jambarmi.

Ndang dapot ho hasonangan, molo godang sabatmi.

I pe tostosi luhutna na manggugai rohami,

Arta na godang nang sangap, sabat na jorbut do i.

Unang tarlalap di hata, tulus sigop jambarmi.

 

2.            Unang lilian di dalan, tuju tongtong surgo i.

Ai naung rade do inganan dibaen Tuhanta disi.

Unang bonsa rohamuna, pos rohamu lao tusi.

Ai toguon-Hu hamuna tu lambung ni Ama i.

Unang lilian di dalan, tuju tongtong surgo i.

 

 

13.    Jamita (Job 42: 7-17)

 

P:       Jadi dung sun dihatahon Jahowa angka hata ondeng tu si Job, ninna Jahowa ma mandok si Elipas sian Teman: Nunga tung marsigorgor rimashu mida ho dohot mida alealem sidua halak i; ai ndang hata sintong dipaboa hamu taringot tu Ahu, songon na pinaboa ni naposongku si Job i?

Nuaeng pe, buat hamu ma di hamu pitu lombu tombur dohot pitu birubiru tunggal, jala laho ma hamu manopot naposongku si Job, asa dipelehon hamu sada pelean situtungon manguras hamu, jala ditangiangkon naposongku si Jobi hamu. Jadi tataponku ma ibana, gabe ndang bahenonku tu hamu hombar tu haotoon binahenmuna i, ai ndang hata sintong dipaboa hamu taringot tu Ahu, songon na pinaboa ni naposongku si Jobi.

Dung i laho ma si Elipas sian Teman dohot si Bildad sian Sua dohot si Sopar sian Naema, jala dibahen nasida ma hombar tu hata ni Jahowa tu nasida. Jadi marpamuati ma roha ni Jahowa ala si Job.

Dung i humosing ma dibahen Jahowa parsorion ni si Job, uju na martangiang ibana mangondihon alealena, jala nasa arta na di si Job na jolo silompit dua ditambai Jahowa.

Dung i ro be ma sude hahaanggina dohot angka ibotona ro di sude donganna magodang manopot ibana, laos mangan sagusagu rap dohot ibana di bagasan jabuna, jala didok hata sipir ni tondina, huhut diapulapuli ibana taringot tu saluhut hinamago na pinaro ni Jahowa tu ibana, jala dilehon be tu ibana sakesita dohot tintin sere sada be.

Dung i gumodang dipasupasu Jahowa si Job di ujungna sian na di mulana; ai sampulu opat ribu birubiruna, onom ribu untona, saribu pasang horbona, jala saribu halodena boruboru.

Tubu muse pitu anakna dohot tolu boruna.

Goar ni boruna sihahaan, i ma si Jemima, ia goar ni paidua si Kesia, ia goar ni paitolu si Keren-Hapuk.

Dung i di sandok tano i ndang adong jumpang parompuan songon hinauli ni boru ni si Job i, jala dilehon amanasida tu nasida hauma bangunan di tongatonga ni angka ibotonasida.

Dung i mangolu dope si Job i saratus opatpulu taonnari, gabe sanga dope diida pahompuna dohot ninina pola opat sundut.

Dung i mate sarimatua ma si Job i jala mahap rohana di hangoluan on. I ma sahatna!

14.    Marende BE HKBP No. 752: 1… Tuhan Patulus Ma Sangkap-Mi F=Do 9/4 (Pasahathon Pelean)

 

1.            Tuhan patulus ma sangkap-Mi

Tu ahu on na tinompaM i.

Tompa ma au on hombar tu lomoM,

Gguru di Ho ma sandok au on.

 

 

2.            Tuhan patulus ma sangkap-Mi,

Parbadiai ma pingkiranhi.

Sai pargogoi au tinobus-Mi

Mangaradoti na nidok-Mi.

 

--- Musik ---

 

3.            Tuhan patulus ma sangkap-Mi,

Parbadiai ma pingkiranhi.

Holan ala ni denggan basaM

Tarbaen au bongot tu banuaM.

 

4.            Tuhan patulus ma sangap-Mi,

Sai togutogu ma langkangki.

Gohi ma au dohot TondiM i,

Tongtong Ho mian di rohangki.

 

--- Musik ---

 

15.    Tangiang Pelean – Ale Amanami – Pasupasu

 

P:     Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:     (Mangendehon:) BE HKBP No. 204: 2 Ndang Tadinghononhu Ho (BL 73) Bes=Do 2/4

 

        Nasa na nilehon-Mi, tondi ro di pamatanghu.

        Hosa dohot gogongki, ro di saluhut artangku.

        Hupasahat i tu Ho, na so unsatonhu do.

 

P:     Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:     (Mangendehon:) BE HKBP No. 841 Ai Ho do nampuna harajaon Es=Do 4/4

 

        Ai Ho do nampuna harajaon

        Dohot hagogoon, ro di hasangapon

        Saleleng ni lelengna. Amen.

 

P:     "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

 

P/R:    (Mangendehon:) BE HKBP No. 845 Amen (3x) HKBP Es=Do 4/4 Amen, amen, amen.

 

 

 

Peleanta, itatongoshon ma tu:

1. Rekening Britama Cab. Pond Gede

No. (002) 038501000630566

2. Tabungan BNI

No. (009) 1919667770