PARMINGGUN MINGGU PADUAPULUSADAHON DUNG TRINITATIS 01 NOVEMBER 2020

 

PARTORDING NI PARMINGGUON

MINGGU PADUAPULUSADAHON

DUNG TRINITATIS

ADAPTASI CARA HIDUP BARU COVID-19

HKBP PONDOK GEDE RESORT PONDOK GEDE

Minggu, 01 Nopember 2020

Ev. 2 Rajaraja 23:1-14

Ep. 1 Korint 3:10-17

 

Topik: Haimbaruon ni Partondion

 

(P: Paragenda - R: Ruas)

 

1.        Marende BE HKBP No. 267:1-2 O Tuhan Sulingkit Ma Au (BL 100) C=Do 3/4

 

1.            O Tuhan sulingkit ma au, sondangi rohangku tangkas.

Gogongku soada di au,

Tu Ho au paringgas, tu Ho au padonok, di Ho nama au.

Tu Ho au paringgas, tu Ho au padonok, di Ho nama au.

 

--- Jongjong ---

 

2.            Tu aha marguna be i, nang godang sinamot di au?

Di ginjang di sambulonhi,

Ho Jesus artangku, tusi do siholhu, sonang rohangki.

Ho Jesus artangku, tusi do siholhu, sonang rohangki.

 

2.        Votum – Intros – Tangiang (A.XV/B.4 – D.XIII/43)

 

       P:       Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on.

 

       R:       Amen.

       P:       Halomohon Jahowa, jadi lehononNa ma tu ho na pinangido ni roham. Pasahat ma dalanmu tu Jahowa jala haposi Ibana, asa Ibana paturehon. Parohon ma roham maradophon Jahowa jala Ibana paimaima. Sai marhaposan tu Jahowa ma ho jala ulahon na denggan. Ai holong do roha ni Jahowa mida uhum jala ndang tagamon tadingkononNa angka na niasianNa. Haleluya!

 

R:       (Mangendehon BE HKBP No. 852 F=Do 4/4)

                 Haleluya, Haleluya, Haleluya!

 

       P:       Martangiang ma hita:

                 Ale Tuhan Debata jula Amanami! Sai togutogu jala ajari ma rohanami marhitehite TondiM i, asa olo hami manangihon dohot manjalo HataM. Sai pahot ma HataM di bagasan rohanami, asa lam imbaru jala lam badia rohanami. Sai urupi ma, asa lam marhaposan hami tu AnakMu, Tuhan Jesus Kristus, asa jumpang hami hangoluan saleleng ni lelengna.

 

       R:       Amen. -hundul-

 

 

3.        Marende BE HKBP No. 115:1-2 Tuhan Debata (BL 59) As=Do 4/4

1.            Tuhan Debata sai ramoti ma

Daging dohot tondinami, i do pangidoannami;

Sai pahipas be hami on sude.

 

2.            Jesus Ho tutu Raja na burju.

Sai palua tondinami sian pardosaonnami.

Pasupasu be hami on sude.

 

4.        Patik (Patik Parjolo Sahat Tu Patik Pasampuluhon)

 

P:       Tangihon hamu ma Patik ni Debata i ma Patik Parjolo sahat tu Patik Pasampuluhon.

I.              Ahu do Jahowa Debatam, ninna Debatanta. Ndang jadi marangkup Ahu bahenonmu Debatam.

 

II.            Ndang jadi ganaonmu jala ndang jadi sumanonmu manang aha na di banuaginjang dohot na di banua tonga on, ro di na di bagasan aek na di toru ni tano, ianggo tung gabe sisombaon manang sioloan.

 

III.           Ndang jadi dohonon goar ni Debata, ianggo so ture dalanna, ai hona uhumNa do sogot angka na marsineang di GoarNa.

 

IV.          Ingot hamu ma pabadiahon ari Minggu i! Di na onom ari ma ula hamu nasa siulaonmu; alai anggo ari papituhon i, ari paradianan ni Jahowa Debatam do i. Ndang jadi ho mangula anggo di na sadari i, manang anak­mu pe manang borum manang naposom lahilahi manang naposom boruboru, ro di pinahanmu, ro di isi ni huta ni halak pe na mangebati hutam. Ai di na onom ari do ditompa Debata langit dohot tano dohot laut dohot nasa isina, dung i maradian do Ibana di ari papituhon i. Dibahen i do umbahen na dipasupasu Debata Jahowa ari paradiananNa i jala diparbadiai.

 

V.            Ingkon pasangaponmu do natorasmu, asa martua ho jala leleng mangolu di tano na nilehon ni Jahowa Debatam di ho.

 

VI.          Unang ho mamunu!

 

VII.         Unang ho mangalangkup!

 

VIII.       Unang ho manangko!

IX.          Unang ho olo manghatindangkon hata na so tutu maralohon dongan jolma!

X.           Ndang jadi haliangan ni roham bagas ni donganmu, ndang jadi haliangan ni roham dongan saripe ni donganmu, manang naposona baoa manang naposona boruboru manang lombuna manang hodana, manang dia pe ugasan ni donganmu.

 

Beha pandok ni Debata taringot tu Patik na sampulu i?

 

On do: Ahu do Jahowa Debatam, ninna Debatanta. Pargogo na so hatudosan jala Parrimas, Siluluhon dosa ni amaama tu pinomparna, ro di sundut patoluhon, ro di sundut paopathon, pinompar ni angka na sogo roha di Ahu; alai asi do rohang-Ku di angka na marriburibu, angka na marholong ni roha di Ahu, na so mangalaosi PatikHi.

 

P:       I ma sahatna. Antong rap mangido gogo ma hita sian Debata laho mangulahon na hombar tu patikNa i:

 

P+R:   Ale Tuhan Debata, sai pargogoi ma hami mangulahon na hombar tu Patik-Mi. Amen.

 

5.        Marende BE HKBP No. 686:1-2 Ramun Do Au Des=Do 6/4

 

1.       Ramun do au di joloM i, gok dosangki, urasi au.

          O Jesus Birubiru i, dison do au, patau ma au.

 

--- Jongjong ---

 

 

2.       Na ro do au tu joloM i, gale do au, urupi au.

          O Jesus ala mudarMi, dison do au, patau ma au.

 

6.        Manopoti Dosa (B.5; C.15)

 

P:       Tatopoti ma dosanta!

Ale Tuhan Debata, Amanami na di banua ginjang! Ho do na patupahon hasesaan ni dosa di hami halak na dangol on marhitehite Anak haholongan ni rohaM. Sai asi ma rohaM di hami, angka na mangarsakhon dosanami. Sai sahapi ma tu bagasan rohanami hasesaan ni dosanami i. Lehon ma tu hami TondiM na badia i, asa unang ganggu rohanami di asi ni rohaM, alai asa hot rohanami marhaporseaon laho manggotaphon nasa dosa dohot roha portibi on, asa hupasahat hami dirinami tu Ho, gabe pelean na mangolu jala na badia marhitehite Tuhan Jesus Kristus Tuhannami!

 

R:       Amen.

 

          (Tangiang na hohom BE HKBP No. 686:1 Ramun Do Au Des=Do 6/4)

 

P:       Tabege ma Hata bagabaga taringot tu hasesaan ni dosa. Humophop hita, gabe dosa do Ibana na so tumanda dosa dibahen Debata, asa gabe hatigoran ni Debata hita, marhitehite Ibana. Hasangapon ma di Debata na di ginjang!

 

R:       Amen.

 

7.        Marende BE HKBP No. 417:1 Rade Situtu Haluaon (BL 278) Bes=Do 4/4

 

1.            Rade situtu haluaon na naeng tangkuponmu antong.

Rade nang di ho hatuaon, sihalashononmu tongtong.

Bernit do ditaon Tuhanmu pasaehon dosam sasude.

Tung unang paujat Ibana, sai jangkon panghophopNa i.

 

 

8.        Epistel (1 Korint 3:10-17)

 

P:       Tabege ma Hata ni Debata turpuk ni ari Minggu on, sian buku 1 Korint 3:10-17. Ita jaha ma marsorinsorin, songon on ma hatana! Hombar tu asi ni roha ni Debata na nilehonNa i tu ahu hupauli ojahan i, songon binahen ni pande bagas na bisuk; na asing do muse pajongjong bagas i. Alai ganup ma mamatahon, manang beha pangulaonna disi.

 

R:       Ai ndang tarpauli ojahan na asing dungkon ni naung ojak i, i ma Jesus Kristus i.

 

P:       Asa molo dipauli di atas ojahan i manang sere, perak, batu na arga, hau, lamlam manang durame:

 

R:       Gabe patar do na niula ni ganup. Ari sogot i do paullophonsa, ai papataron ni api ma i; asa api i do mangunjuni manang beha ulaon ni ganup.

 

P:       Molo hot ulaon na pinaulina i, jaloonna do upa.

 

R:       Molo soksohanna niulana i, luangan ma ibana; malua do nian anggo ibana, alai songon na nienet sian api nama.

 

P:       Ndang diboto hamu: Joro ni Debata hamu, jala Tondi ni Debata maringanan di bagasan hamu?

 

R:       Agohonon ni Debata do na mangagohon joro ni Debata,

 

P:       Ai na badia do joro ni Debata; i ma hamu. I ma sahatna! Martua do angka na tumangihon Hata ni Debata, jala na umpeopsa.

 

R:       Amen.

 

9.        Marende BE HKBP No. 434:1 Tuhan Jesus Bereng Au (BL 388) G=Do 4/4

 

--- Jongjong ---

 

1.            Tuhan Jesus bereng au dison

Ro ma au marsomba tu joloM.

Mansai leleng au manjua, ndang tarbahen au martua.

Dilului Ho ale Tuhan, au, diihuthon Ho au tu na dao.

Naung dapotan au di Ho Tuhan dison do au.

Sae dosangku dibaen Tuhanki,

Monang au dibaen mudarNa i.

Gogo do dilehon Tuhanki di au, di au.

 

10.    Manghatindanghon Haporseaon

 

P:      Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok:

 

P/R:   Ahu porsea di Debata Jahowa, i do Ama, Pargogo na so hatudosan na tumompa langit dohot tano.

      Ahu porsea di Jesus Kristus, Anak ni Debata Jahowa, na sasada i; i ma na tinubuhon ni si Maria na gabegabean sian Tondi Parbadia andorang so habubuhan; i do Tuhanta, na tumaon na bernit di panguhuman ni si Latus; na mate tarpajal do Ibana di hau pinarsilang, na tuat tu banua toru, dung ditanom, na mulak mangolu di ari patoluhon, na manaek tu surgo laho hundul tu siamun ni Debata Jahowa, Ama-Na i, Pargogo na so hatudosan i, disi ma Ibana, paima mulak sogot tu tano on manguhumi halak na mangolu dohot na mate.

          Ahu porsea di Tondi Parbadia, jala adong sada huria na badia, Huria hatopan ni halak Kristen angka na badia, dohot di hasesaan ni dosa, dohot di Hata i, na mandok: Mulak mangolu sogot daging ni halak naung mate, dohot di hangoluan na so ra suda. Amen.

 

 

11.    Tingting Huria dohot Tangiang Pangondian

 

12.    Marende BE HKBP No. 461:1+3 Songgop tu Hami (BL 407) G=Do 4/4

 

1.            Songgop tu hami na di joloMon, o Tondi ni Debatangki.

Uhir patikMu tu rohangkinon, o Tondi ni Debatangki.

Bereng siholhu di haroroM i,

Molo Ho ro, nda hisar tondingki?

Didihon ma tu au on apiM i, o Tondi ni Debatangki.

 

3.       Lehon hataM i ma tau podanghi, Debatangki na gogo i.

Asa sai talu sude musuM i, Debatangki na gogo i.

Manghatindanghon tongtong goarM i,

Asa malua pardosa disi.

Asa dijangkon Tuhanta ma i, Debatangki na gogo i.

 

13.    Jamita (2 Rajaraja 23:1-14)

 

P:       Dung i disuru raja i ma suruanna asa paluhuthon tu jolona saluhut sintua sian Juda dohot Jerusalem.

Dung i nangkok ma raja i tu joro ni Jahowa rap dohot sude baoa sian Juda dohot sude pangisi ni Jerusalem ro di angka malim dohot panurirang dohot sandok situan na torop i, tole angka na metmet ro di na magodang, laos didokhon ma manjaha tu pinggolnasida saluhut hata ni buku parjanjian na jumpang i di bagasan joro ni Jahowa.

Dung i jongjong ma raja i tu lambung tiang i laho mambahen parpadanan di adopan ni Jahowa, ingkon naeng magihuthon tu Jahowa dohot mangaradoti angka tonaNa dohot panindangionNa dohot aturanNa sian nasa rohana dohot sian nasa ateatena laho pahothon hata ni padan on, angka na tarsurat di bagasan buku on. Jadi sandok bangso i mangundukhon padan i.

Dung i didokhon raja i ma Sintua ni Malim Hilkia dohot angka malim paidua dohot angka sijaga pintu, asa paruaronna sian joro ni Jahowa sude ulaula angka na pinauli di Baal dohot di sombaon Asera dohot di sandok parangan di langit, laos ditutung ibana ma luhutna i di balian ni Jerusalem, di angka ladang martopihon sunge Kidron, jala sirabunna i didokhon do boanon tu Bet-El.

 

Dung i dipaijur raja i ma halak malimmalim, angka na pinabangkit ni angka raja sian Juda, asa manutung daupa nasida di atas tambak angka na di bagasan huta ni Juda dohot humaliang Jerusalem; tole huhut angka jolma na manutung daupa di Baal, di mata ni ari, di bulan dohot di sude bintang, i ma sandok parangan di langit.

 

Didokhon raja i huhut paruaron ganaganaan Asera sian joro ni Jahowa tu balian ni Jerusalem, tu rura ni sunge Kidron, laos ditutung do i di rura ni Kidron, jala digopui gabe sirabun, jala sirabunna i disaburhon do tu tanoman ni halak situan na torop i.

 

Angkup ni i dilohai do angka bagas ni baoa angka na marjolmahon baoa, angka na mardonokhon joro ni Jahowa, inganan ni parompuan angka na martonun abit undungundung di sombaon Asera.

Dung i didokhon ma ro sude malim sian angka huta ni Juda, jala diramuni angka tambak, panutungan ni angka malim di daupa, olat ni Geba sahat ro di Beer-Seba, jala dilohai do angka tambak di partungkoan, tole tambak di haroroan tu bahal ni si Josua, induk ni huta i, na di hambirang ni ganup jolma na masuk tu bahal ni huta i.

Alai anggo angka malim ni tambak, ndang jadi mamele di atas ni langgatan ni Jahowa na di Jerusalem, asal mangan sagusagu na so niasoman nasida di tongatonga ni angka hahaanggina.

 

Diramuni ibana huhut Topet na di rura ni angka anak ni si Hinnom, asa unang tarbahen manang ise be pabolushon anakna manang boruna sian api laho mamele tu Molok.

 

Dipaholang do huhut hoda, angka na niapus ni angka raja sian Juda pasahathon tu mata ni ari sian lambung pintu laho bongot tu joro ni Jahowa tungkan bilut panganan ni Netan-Melek ni halak parhalado na maringan di angka alaman, alai anggo hureta ni mata ni ari ditutung do i di bagasan api.

 

Dilohai raja i huhut langgatan angka na di atas tarup ni bilut parginjang ni si Ahas, angka na pinauli ni angka raja sian Juda; tole langgatan angka na pinauli ni si Manasse di na dua alaman ni joro ni Jahowa, ndang adong tinggal disi nanggo sada, jala sirabunna i disirsirhon do tu sunge Kidron.

 

Tole tambak angka na di adopan ni Jerusalem, tungkan siamun ni dolok hamagoan, angka na pinauli ni si Salomo raja sian Israel di sombaon Astarot, biasbias ni halak Sidon dohot di Kamos, biasbias ni halak Moab dohot di Milkom, biasbias ni halak Amon, luhutna i diramuni raja i do.

 

Diponggolhon huhut angka tiang panombanombaon jala ditaba angka sombaon Asera, jala digohi hajongjonganna i dohot holiholi ni halak na mate.

I ma sahatna!

14.    Marende BE HKBP No. 754:1-3 Gok Las ni Roha Do Au C=Do 4/4 (Papungu Pelean; Tu Dana Pensiun HKBP)

 

1.            Gok las ni roha do au di ngolungkon,

Di ngolungkon, di ngolungkon.

Gok las ni roha do au di ngolungkon,

Tongtong di ngolungkon.

Reff.:    Mauliate, gok las ni roha,

Maringan holongMi Tuhan di au.

Mauliate, gok las ni roha,

Maringan holongMi Tuhan di au.

 

--- Musik ---

 

2.            Mardame jala sonang do rohangkon,

Di ngolungkon, di ngolungkon.

Mardame jala sonang do rohangkon,

Tongtong di ngolungkon.

Reff.:    Mauliate, gok las ni roha,

Maringan holongMi Tuhan di au.

Mauliate, gok las ni roha,

Maringan holongMi Tuhan di au.

 

--- Musik ---

 

3.            Gok do holong ni Jesus di ngolungkon,

Di ngolungkon, di ngolungkon.

Gok do holong ni Jesus di ngolungkon,

Tongtong di ngolungkon.

Reff.:    Mauliate, gok las ni roha,

Maringan holongMi Tuhan di au.

Mauliate, gok las ni roha,

Maringan holongMi Tuhan di au.

 

--- Musik ---

 

15.    Tangiang Pelean – Ale Amanami – Pasupasu

 

Pdt:   Tatangianghon ma peleanta: Ale Debata, Amanami na di banua ginjang, Ho do haroroan ni saluhut silehonlehon na denggan dohot nasa ulibasa na mauliutus. Hupasahat hami ma sian na nilehon-Mi tu hami, peleannami tu Ho. Sai jalo ma i gabe uap na hushus di joloM. Pasupasu ma i jala ramoti asa huparhaseang hami pelean on, patimbulhon harajaon-Mu di tongatonga ni HuriaM dohot di portibi on. Buhai ma rohanami marhitehite TondiM, asa lam hutanda hami godang ni silehonlehon-Mi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

 

R:       (Mangendehon): BE HKBP No. 204:2 (BL 73)

          Nasa na nilehon-Mi, tondi ro di pamatanghu.

          Hosa dohot gogongki, ro di saluhut artangku.

          Hupasahat i tu Ho, na so unsatonhu do.

Pdt:   Ale Amanami na di banua ginjang! Sai pinarbadia ma Goar-Mu! Sai ro ma harajaon-Mu! Sai saut ma lomo ni rohaM di banua tonga on songon na di banua ginjang! Lehon ma tu hami sadari on hangoluan siapari! Sesa ma dosanami songon panesanami di dosa ni dongan na mardosa tu hami! Unang hami togihon tu pangunjunan! Palua ma hami sian pangago!

 

R:       (Mangendehon): BE HKBP No. 841

          Ai Ho do nampuna harajaon

          Dohot hagogoon, ro di hasangapon

          Saleleng ni lelengna. Amen.

 

Pdt:   "Dipasupasu jala diramoti Tuhan Debata ma ho (hita)! Disondangkon Tuhan Debata ma bohi-Na tu ho (hita) jala asi ma roha-Na mida ho (hita)! Didompakhon Tuhan Debata ma bohi-Na tu ho (hita) jala dipasaorhon ma dame-Na tu tondim (tondinta be).

 

P/R:    (Mangendehon): BE HKBP No. 845

          Amen… Amen… Amen.

 

 

 

 

 

 

 

 

 

 

Peleanta, itatongoshon ma tu:

 

1. Rekening Britama Cab. Pond Gede

No. (002) 038501000630566

 

2. Tabungan BNI

No. (009) 1919667770