ACARA PARPUNGUAN PESTA PARNINGOTAN DI ARI HANANAEK NI TUHAN JESUS KRISTUS

PARTORDING NI PESTA PARNINGOTAN

DI ARI HANANAEK NI 

TUHAN JESUS KRISTUS

Kamis, 25 Mei 2017

PUKUL 06.00 WIB

DOHOT

PUKUL 09.00 WIB

Topik: Gabe Sintindangi Ni Kristus

1.    Pangaradeon                   U=Uluan                     H=Huria

2.    Joujou tu Parsaoran dohot Debata

       U.  Huria na hinaholongan ni Tuhan Jesus Kristus, sadari on marpungu do hita di bagas joro on, laho manghalashon Pesta Parningotan Hananaek ni Tuhan Jesus Kristus tu banua ginjang. Didok Tuhan Jesus do di Johannes 14:1-3: ”Unang ma bonsa rohamuna! Porsea ma hamu di Debata, jala porsea ma hamu di Ahu! Torop do inganan di bagas ni Damang. Aut so i, dohononHu ma tu hamu: Na laho do Ahu mangarade inganan di hamu? Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu” Hamuna angka dongan, ido nang janji ni Tuhanta tu hita di tingki on, asa tongtong manghirim hita di ngolu sogot i. Antong di bagasan las ni roha, tapuji ma Tuhanta, marende ma hita.

3.    Marende BE No. 636:1-3 “Jesus Do Raja Bolon I” (SDJ)

       1.    Jesus do Raja bolon i, sigomgom nasa na adong.

              Hot do harajaonNa i, nang pe marujung tano on.

       2.    Tangiang nang pujian i manaek tu habangsaNa i.

              Mansai hushus goarNa i binahen ni pelean i.

             

               . . . Musik . . .                                                                               (Ruas Jongjong)

          3.     Saluhut manusia i mian do di holongNa i.

               Soara ni dakdanak i manghatindanghon sangap nii.

4.    Votum – Introitus – Tangiang

       U.   Marhitehite Goar ni Debata Ama dohot Goar ni AnakNa Tuhan Jesus Kristus, dohot Goar ni Tondi Porbadia na tumompa langit dohot tano on.

           H.    A m e n.

          U.   Nunga didok Jahowa mandok Tuhanku; Hundul ma ho tu siamun-Hon paima hubahen angka musum sidegedegean ni patmu.

     H.   Marrongoman bangsoM ro sian lomona di ari parporangan-Mu, marpahean habadiaon, songon nambur sian ampuan ni andos torang ro do tu Ho parangan-Mu angka na umposo.

           U.    Nunga pola marwari Jahowa, jala ndang tagamon solsolan-Na roha-Na.

       H.    Sai Ho do malim ro di salelenglelengna mangihuthon horong ni si Melkisedek.

           U.    Sai patimbul ma dirim, ale Debata, tu atas ni langit hamuliaon-Mu di sandok tano on. Haleluya.

                  H.    (Mangendehon: Haleluya, Haleluya, Haleluya)

       U.    Martangiang ma hita.

Ale Tuhan Jesus Kristus, Anak ni Natumimbul i, naung manaek tu banuaginjang jala hundul tu siamun ni Debata. Sai suru ma Tondi Parbadia tu rohanami, asa Ibana tongtong mangajari rohanami. Lehon tu hami parhalado na burju tu hataM, pargogoi ma nasida, asa tongtong diradoti nasida ulaonna jala asa marsahala nasida mangalo bisuk ni sibolis i, asa tung rarat harajaon-Mu di hasiangan on, paima sude musuM peak di toru ni pat-Mu. Sai pamonang ma hami saluhutna manaluhon dosa dohot hamatean marhitehite Ho, ai Ho do na mangolu dohot na manggomgomi rap dohot Ama i dohot Tondi Parbadia. Amen.                                        

(Ruas Hundul)

5.    Marende BE No. 714:4 “Tuhan Na Marmahan Hami” (SDJ)

          4.  Pabotohon ma tu hami siradotannami i.

               Tuhan gohi rohanami dohot haholongonMi.

               Tuhan Jesus Sipalua, ndang tarasam holongMi.

               Tuhan Jesus Sipalua, ndang tarasam holongMi.

6.    Manghangoluhon Patik

           U.    Tangihon hamu ma Patik ni Debata di hita sadari on i ma nanienet sian patik I dohot lapatanna: Ahu do Jahowa Debatam ninna Debatanta, ndang jadi marangkup Ahu bahenonmu Debatam. Dia do lapatan ni i:

           H.    On do; ingkon umbiar rohanta jala humolong jala umpos mida Debata asa mida nasa na adong.

           U.    Antong rap ma hita mangido gogo sian Tuhan Debata, asa margogo hita mangulahon patikNa i.

       H/U. Ale Tuhan Debata, sai pargogoi ma hami mangulahon na hombar tu patikMi, Amen.

                 

7.    Koor Pukul 06.00 WIB: Koor Ama

       Koor Pukul 09.00 WIB: Koor Lansia

8.    Marende BE No. 172:1-2 “O Jesus Panondang” (BL. 143)

       1.    O Jesus Panondang di portibi on,

              Mula ni na torang tangi hatangkon.

              Sai asi rohaMu di pardosa on.

              Ho ma mangapuli au na marsak on.

                                    . . . Ruas Jongjong . . .

       2.    Sesa ma dosangku ale Tuhanhi.

              Ala ni mudarMu na nilehonMi.

              Asal ma rohangku salelengna i

              Ingot di hansitMu dohot mudarMi.

9.    Manopoti Dosa

       U. Tatopoti ma dosanta tu adopan ni Debata, tapaunduk be rohanta martangiang ma hita.  Ale Tuhan Debata, Pargogo na so hatudosan jala Amanami na di banua ginjang. Huparhatutu jala hutopoti hami do dosa dohot pangalaosionnami na godang i di joloM. Mansai jotjot do husungguli hami rimasMu marhitehite pangalahonami na so hombar tu lomo ni rohaM. Tatap ma hami marhitehite asi ni rohaM, jala sesa ma dosanami saluhutna.

       H.    Marende BE No. 686:1 “Ramun Do Au” (SDJ)

Ramun do au di joloMi, gok dosangki. Urasi au,

O Jesus birubiru i; Dison do au, patau ma au.

       U.  Ale Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami. Hami songon bagian ni keluarga gareja dohot masyarakat, jotjot do ndang huingot hami mangulahon na ni dok ni hataM asa mangolu hami di bagasan holong. Baliksa tahe, tung na jotjot situtu do hubaen hami marsak roha ni dongannami, marhite hata nang pambahenan, ai ndang huhaholongi hami dongannami, doshon dirinami. Ale Tuhan, asi ma rohaM di hami.

       H.    Marende BE No. 686:2 “Ramun Do Au” (SDJ)

Na ro do au tu joloMi, gale do au, urupi au.

              O Jesus ala mudarMi, dison do au, patau ma au.

       U.  Ale Tondi Porbadia, pangapul di na marsak roha, pamalum ma saluhut na bernit, binahen ni dosanami. Sai marasi ni roha ma Ho di hami on, lehon di hami roha na holong, asa holong rohanami di Ho nang maradophon dongannami. Hupasahat hami ma ngolunami tu Ho, jala urupi ma hami, paubahon rohanami, asa pantun, tigor jala daulat hami marpangalaho, bahen hasangapon di goarMu na badia i.

       H.    Marende BE No. 686:3 “Ramun Do Au” (SDJ)

Ala denggan ni basaMi, ro au tu Ho, o Jesushi.

Parbadiai ma rohangki, dison do au, patau ma au.

       U.   Tabege ma Hata bagabaga ni Debata taringot tu hasesaan ni dosanta. Adong do di hita sintua ni malim na songon i, na hundul di siamun ni habangsa ni hatongamon di banua ginjang. Dibahen i tarbahen Ibana do pangoluhon ro di ujungna angka na sandok ro tu Debata marhitehite Ibana; na mangolu do Ibana tongtong, asa ditangianghon nasida. Hasangapon ma di Debata na di ginjang.

       U/H.    A m e n .                                                                                    (Ruas Hundul)

10.   Koor Pukul 06.00 WIB: Koor Immanen

Koor Pukul 09.00 WIB: Koor Parompuan/Jericho

11.  Marende BE No. 97:2-3 “Ingoton Ma Sadari On” (BL. 129)

          2.     Ai nunga mungkap dalan i di angka na porsea.

               Lao mamongoti surgo i, malua sian jea

               Naung mangonai tu sasude na mangulahon dosa i,

               Pinuji ma Tuhanta.

        3.    Ianggo las roham tutu di Jesus i Tuhanta.

              Pauba ma roham burju, ihuthon ma Ibana.

              Oloi hataNa sasude, sai tiru pambaenanNa pe,

              Saleleng ho mangolu.

12.  Epistel

       U.   Hata ni Debata Epistel di Pesta Hananaek ni Tuhan Jesus sadarion i ma natarsurat di Psalm 47:1-10, tajaha ma marganti soring. Ende sian angka anak ni si Kora. Martopaptopap tangan ma sude hamu angka bangso! Puji hamu ma Debata mardongan soara olopolop!

       H.    Ai Jahowa do na sun timbul, na songkal, Raja Bolon do Ibana gumomgom liat portibi on.

       U.    PapatuonNa do angka bangso tu hita dohot angka marga tu toru ni patta.

      H.   Ibana do mamillit di hita pargolatanta, hatimbulon ni si Jakob, na hinaholonganNa i. Sela.

      U.    Manaek do Debata mardongan parolopolopon, Jahowa mardongan soara ni sarune.

       H.    Sai endehon hamu ma Debata! Sai endehon hamu ma Rajanta i! Endehon ma tutu!

       U.    Ai Debata do Raja ni liat portibi on, endehon hamu ma ende sipodaon.

       H.    Debata do mangarajai angka parbegu, hundul do Debata di atas habangsa habadiaonNa i.

     U.  Marpungu do angka na sangap ni angka bangso tu * bangso ni Debata ni si Abraham, ai Debata do nampuna angka ** lombulombu raja ni tano on, timbul situtu Ibana. I do sahatna. Martua do na tumangihon hata ni Debata jala naumpeopsa. Amen.

13.  Koor Pukul 06.00 WIB: Koor Wijk 1

       Koor Pukul 09.00 WIB: Koor Wijk 2

14.  Marende BE No. 275:3-4 “O Jesus Tuhanhi” (BL. 245)

       3.    Molo burju au on maniop Ho tongtong, sitobus au.

              Talu do musu i, ndang be agoon nii,

              Au na hinophopMi, monang ma au.

                                                . . . Ruas Jongjong . . .

4.    Ndang hahuaon ni dosa be tondingki, malua au.

       Ho huihuthon do, surgo hutuju do.

       Tongtong jambarhu Ho, sonang ma au.

15.  Manghatindanghon Haporseaon

        U.  Tahatindanghon ma haporseaonta i, songon na hinatindanghon ni donganta sahaporseaon di sandok portibi on, rap ma hita mandok.

       U/H.    Ahu Porsea di Debata Jahowa, . . .                                            (Ruas Hundul)

16.  Sunggulsunggul:

17.  Marende BE No. 100:1… “Mardongan Olopolop …” (BL. 155)

       (Pelean Ia – Ib)

1.          Mardongan olopolop manaek Tuhanta i.

Jinangkon ni natorop surusuruan i.

Antong nang hita pe, tapuji ma Tuhanta;

Marendeende hita, marolopolop be.

2.          Namulak  do Tuhanta tu habangsaNa i.

Tu lambung ni AmaNa di siamunNa i.

Disomba sasude na di banua ginjang,

Tuhanta i na monang ro sian tano i.

                           . . . Musik . . .

3.          Tatimbang ma lapangNa umbaen na songon i.

Ai naeng ma dohot hita tumopot surgo i.

Antong taingot ma: Ianggo Tuhan Jesus,

Ibana do patulus nidok ni Debata.

4.          Ditaon do hamatean humophop hita on,

Pature pardalanan na sian tano on.

Manogu hita be tu lambung ni AmaNa.

Disi di adopanNa naeng sahat hita be.

                           . . . Musik . . 

5.          Ipe ringgas ma hita mangalo dosa i.

Manggotap roha daging nang hajahaton pe.

Tahalungunhon be Tuhanta na di ginjang.

Ibana do na monang, i ma tatiru be.

6.          O Jesus Tuhannami asi ma rohaMi.

Sai sesa dosanami palua hami be.

Pamasuk hami on tu hangoluan sogot.

Sai loas hami dohot mamuji Ho tongtong.

18.   J a m i t a: Ulaon ni Apostel 1:1-11

19.  Marende BE No. 99:1… “O Ulubalang Na Gogo” (BL. 206)

       (Pelean Tujolo Tu Ulaon Pengembangan Masyarakat)

1.    O ulubalang na gogo,

       Songon sadari on do Ho manaek tu hasangapon.

       Naung sidung do ulaonMi,

Na ringkot patupaonMi humophop hajolmaon.
Sabam, tongam do Ho muli tu na uli,

Marhabangsa di siamun ni Jahowa.

               

2.    Marloksaloksa serapim,

Marriburibu kerubim mamuji Ho na monang.

Dibaen naung pinadomuMi saluhut manisia i tu Debata di ginjang.

Puji, puji Jesus Kristus naung patulus saluhutna,

       Tinonahon ni AmaNa.

                      . . . Musik . . .

3.   O Jesus Ho do ulu ni

      Saluhut na porsea i, ruasMu anggo hami.

      Ho hangoluannami on,

      Ho hasonangannami on, Ho hagogoonnami.
Suru, togu rohanami asa hami mangalehon

      Tu Ho nasa hasangapon.

4.   Sai taiti rohanami on,

      Urupi hami on tongtong mangalo dosanami.

      Paias rohanami be,

      Parangenami baen ture nang panghataionnami.

      Tompa roha na imbaru, asa haru monang hami

      Maralohon dosanami.

. . . Musik . . .

5.   Pabulus langkanami be,

      Patigor dalannami pe lao tu banua ginjang.

      O Jesus tatap hami on, na so tarbaen di tano on

      Mardame manang sonang.

     Sonang, monang di lambungMu bahenonMu hami sogot,

     Dung tu surgo hami bongot.

20.  Parsuruon tu ngolu siapari.                                                  (Ruas Jongjong)

       U.     Hamu angka dongan marsaringar do di tongatonganta Barita na Uli na mamaritahon tu hita naung dipahundul Debata do Tuhan Jesus Kristus tu siamunNa jala saluhut do dipatunduk tu toru ni patNa. Antong, hita naung dipahehe rap dohot Kristus tajalahi ma na di ginjang unang ma na di tano on.

       H.      Marende BE No. 691:1 “Hupasahat Ma Tu Jesus” (SDJ)

              Hupasahat ma tu Jesus saluhutna ngolungki.

              Roha nang pambaenanhu, saluhutna tingkingki.

Reff.:     Hupasahat ma tu Jesus, saluhutna diringki,
Hupasahat ma tu Jesus saluhutna ngolungki.

       U.    Tuhan Jesus do Ulu ni Huria i jala hita do ruasNa. Unduk ma hita tu Ibana, marsitutu ma hita mangulahon lomo ni rohaNa di tongatonga ni portibi on. Tapelehon ma dirinta dohot nasa na adong di hita gabe ulaula ni Debata na papatarhon holong         dohot asi ni rohaNa tu nasa na humaliang hita.

       H.      Marende BE No. 691:2 “Hupasahat Ma Tu Jesus” (SDJ)

                 Pangkeonhu ma tanganhu mangula lomoNa i.

Langka nang simanjojakhu mangihuthon Tuhanhi.

Reff.:     Hupasahat ma tu Jesus, saluhutna diringki,

              Hupasahat ma tu Jesus saluhutna ngolungki.

21.  Tangiang/Ende Pelean.

22.  Tangiang Panimpuli/Ale Amanami . . ./Pasupasu.