PARTURE NI PESTA PARJOLO PARNINGOTAN HAHEHEON NI TUHAN JESUS

PARTURE NI PESTA PARJOLO

   PARNINGOTAN HAHEHEON NI TUHAN JESUS

 TEMA

“MANGOLU DI BAGASAN ASI NI ROHA”

HKBP  DISTRIK  XII BEKASI  

Minggu, 16 April 2017

1. Joujou tu Parsaoran :

U  : Hamu angka dongan na hinaholongan ni Tuhanta Jesus Kristus. Nunga hehe Jesus, nunga ditaluhon hamatean! I do asi ni roha ni Debata na balga tu hita asa malua hita sian ihotihot ni dosa dohot  hamatean. Jala gabe parjambar hita di hangoluan sogot.

H  : Pinuji ma Debata. Nunga hehe Kristus sian tanoman i.  Nunga ditaluhon hamatean. Pinuji ma Tuhan Jesus, ro di saleleng ni lelengna.

  

U  : Nunga tarbondut hamatean, jo hamatean didia soropmi? Jo banuatoru didia hamonanganMi.

H : Pinuji ma Debata. Nunga hehe Kristus i. Nunga ditaluhon banua toru. Nunga dibondut be sorop ni hamatean. Pinuji ma Tuhan Jesus, ro di saleleng ni lelengna.

U : Siala ni i, taparade ma roha dohot pingkiranta laho mamungka Pesta parjolo  Parningotan Haheheon ni Tuhan Jesus, tongon di ari Minggu sadari on. Tapahibul ma rohanta mamuji Debata, rap ma hita mangendehon “Hatuaon do”.

2. Marende BE. No. 91: 1-3  “Hatuaon do” BL. 55

                 Hatuaon do, las ni roha do. Hangongot ni Tuhanta i.

                 Mago do hita, ngot ma Tuhanta. Las be, las be ma rohanta i.

                 Mago do hita, ngot ma Tuhanta Las be, las be ma rohanta i.

        Hatuaon do, las ni roha do. Hangongot ni Tuhanta i

                    Monang  do Jesus, talu sibolis. Las be, las be ma rohanta i.

                    Monang  do Jesus, talu sibolis. Las be, las be ma rohanta i.

-jongjong-

Hatuaon do, las ni roha do. Hangongot ni Tuhanta i

                 Mungkap do dalan tu hangoluan. Las be, las be ma rohanta i.

                  Mungkap do dalan tu hangoluan. Las be, las be ma rohanta i.

3. Votum-Introitus

          U  : Marhitehite Goar ni Debata Ama, dohot Goar ni Anakna Tuhan Jesus Kristus, dohot Goar ni Tondi Porbadia na tumompa langit dohot tano on.

          H  : Amen!

          U  : Ida ma, Debata do hatuaonku. Ibana huhaposi, jadi ndang mabiar ahu, ai Tuhan Jahowa do hagogoonku jala pujionku do na manjadi hatuaon di ahu. Haleluya!

          H  : (Mangendehon) Haleluya, Haleluya, Haleluya!

          U : Martangiang ma hita. Ale Tuhan Jesus Tuhannami! Mandok mauliate do hami tu Ho, ala ditaluhon Ho dosa dohot hamatean marhite hamamate dohot haheheonMi. Disondangi Ho do tanomannami, asa marpanghirimon na mangolu hami ala ni haheheonMi. Unang loas be hami mabiar mida hamatean i, ai Ho do Ulunami, ruasMu do hami. Jala nunga dipaunsat Ho hami sian haholomon tu hatiuron, sian hamatean tu hangoluan ala haheheonMi. Sai pargogoi ma hami mamuji dohot mangoloi Ho ariari, pasangaphon Ho dibagasan haporseaon na mangolu, paima sahat hami tu lambungMu. Amen.                                    

-hundul-

4. Koor: 

5. Pangarimangion tu HaheheonNa

  U  :  Dongan na hinaholongan ni Tuhanta Jesus Kristus. Ia sintuhu ni Pesta Parningotan Haheheon ni Tuhan Jesus, i ma na dipasiding Debata do hamatean gabe hangoluan saleleng ni leleng na.  MudarNa na durus di hau pinorsilang i do gabe tobus ni utang ni dosanta. Hehe do Ibana sian hamatean, tunduk do hamatean i tu Tuhanta Jesus Kristus. Asa ndada hamatean be ujung ni ngolu  ni angka na porsea. Ai paheheonNa do di ari sogot  angka naung mate.  Asa sahat tu sambulo ni tondinta, i ma surgo hasonangan naung pinaradeNa.

  H :   Ale Tuhan Jesus Kristus! Pinuji ma GoarMu. Asi ni rohaM do na pataluphon hami gabe parnapuna dihangoluan na salelenglelengna. Ndada ala ni hatigorannami. Asi ma rohaM, pargogoi ma  hami manghangoluhon haluaon naung pinatupaM.

U   : Nunga hehe Kristus i. HaheheonNa gabe patogu panghirimon dohot haporseaonta ma i. Tuhanta Jesus Kristus mandok: Ahu do haheheon dohot hangoluan, na so tupa mate be angka na porsea di Ahu, atik pe naung mate ibana.

  H :   Ale Tuhan Jesus Kristus! Tung mansai balga do holong dohot asi ni rohaM di hami. Pinuji ma GoarMu.

    U  :  Nunga hehe Kristus Tuhanta i. Singkop ma bagabaga ni Debata paluahon hita sian hamagoan tu haluaon.  Songon panindangion ni apostel Paulus: Marisuang do haporseaonta molo so hehe Kristus i.

    H :  Ale Tuhan Debata! Ho do Debata na marhuaso manaluhon hamatean. Pinuji ma goarMu. Haheheon naung pinatupa ni AnakMu Tuhan Jesus Kristus do pangoluhon panghirimonnami. 

U  :  Nunga hehe Kristus i. Ia haheheonNa i laos ihut do tu haheheon ni pamatang ni angka na porsea dung ro tingkina. Didok Apostel Paulus anggo so adong haheheon ni angka na mate, ndang hehe nang Kristus.

U+H  :           Pinuji ma GoarMu ro di saleleng ni lelengna. Asi ni rohaM na balga i  dilehon Ho tu hami marhitehite Tuhan Jesus Kristus naung mate jala mulak mangolu, asa hangoluan saleleng ni lelengna jambarnami. Sai marsangap ma Ho Tuhan di ngolunami be.

6. Marende BE. No. 93: 1-2  “Pesta Paska, Hatuaon!” BL. 94

Pesta Paska hatuaon! Pesta Paska haluaon

sian hamatean i. Sian hamatean i!

Tuhan Jesus do pasuang hangoluan,

hasonangan tu saluhut jolma i.

Talu ho banuatoru, ndang tarbahen tiopanmu

Raja Siparngolu i.  Hamatean, hamagoan

Na so pola habiaran; Nunga talu i sude.

7. Patik

     U : Tatangihon ma patik ni Debata tongon di Pesta Parjolo Haheheon ni Tuhan Jesus di ari Minggu sadari on, i ma sian 1 Korintus 15: 13, “Alai anggo so adong haheheon ni angka na mate, ndang na hehe nang Kristus”. Antong, rap ma hita mangido gogo tu Debata.

H :  Ale Tuhan Debata! Sai pargogoi ma hami mangulahon na hombar tu patikMi. Amen

8. Koor:

9. Marende BE. No. 683: 1-2 “DiadopanMu Jesus”

    Di adopanMu Jesus lea tutu do diringkon,

      Dibaen godang ni dosangkon di adopanMu Jesus.

-jongjong-

Di adopanMu Jesus marsomba au huhut tungki,

                  Lao manopoti dosangki diadopanMu Jesus.

10. Manopoti Dosa & Bagabaga Hasesaan ni Dosa

U  :  Hita ruas ni Tuhanta. Na jongjong do hita nuaeng di jolo ni Debata na umboto saluhut. Tatopoti ma angka dosa dohot pangalaosionta  tu adopanNa. Ndang adong na buni di adopanNa. Tarimangrimang i ma sude parngoluonta nang pambahenanta.

    H  :  (Mangendehon BE. No. 151: 1 “Na Sonang Au” BL. 136)

Asi rohaM o Jesus Tuhanki, sai jangkon ma au on.

“Sai ro ma ho”, laos i do hataMi tu au pardosaon.

Dison huboan peleanMu, i ma tondingku, pamatangku,

Asi rohaM, sai jalo ma.

U      :        Ale Tuhan Debata, Parasi roha na sumurung, Ama ni Tuhan Jesus Kristus Sipangolu hami! Hami halak pardosa na dangol on ro tu jolo ni habangsa habadiaonMi manopoti jala manganggukhon dosanami. Asi ma rohaM di hami.

H :   (Mangendehon sambintas BE. No. 151: 2 “Na Sonang Au” BL. 136)

Asi rohaM! Sai jangkon ma au on, gok dosa rohangki.

Asi rohaM! Urasi rohangkon na tuk do gogoMi.

U  :   Ale Tuhan Debata. Mansai jotjot huarsahi hami Ho marhitehite pingkiran dohot hata nang pambahenannami na roa i. Ndang huhaholongi hami Ho sian nasa roha dohot gogonami. Nang dongannami, ndang doshon dirinami hubaen hami. Dibahen i tama do rimasanMu jala uhumanMu hami tu hamatean saleleng ni leleng na. Asi ma rohaM di hami.

H  :   (Mangendehon sambintas BE. No. 151: 2 “Na Sonang Au” BL. 136)

Asi rohaM! Sai jangkon ma au on, gok dosa rohangki.

Asi rohaM! Urasi rohangkon na tuk do gogoMi.

U  :     Ale Tuhan Debata. Na maporus ma hami nuaeng tu asi ni rohaM na godang i, mangido sian nasa rohanami hasesaan ni dosanami sudena. Sai urupi ma hami paubahon rohanami asa imbaru parange dohot parulannami saleleng di tano on do pe hami. Ale Tuhan marpamuati ma rohaM mida dosanami i. Asi ma rohaM sesa ma dosanami ala ni asi dohot holong ni rohaM.

H  : (Mangendehon sambintas BE. No. 151: 2 “Na Sonang Au” BL. 136)

Asi rohaM! Sai jangkon ma au on, gok dosa rohangki.

Asi rohaM! Urasi rohangkon na tuk do gogoMi.

U   :    Bagabaga ni Debata taringot tu hasesaan ni dosanta. Molo tung adong manang ise na mardosa, adong do pangondionta di Ama i, ima Tuhan Jesus Kristus na tigor roha i. Ibana do pardengganan taringot tu dosanta, alai ndada holan taringot tu dosanta dohot do taringot tu dosa ni saluhut portibi on. Hasangapon ma di Debata na di ginjang!

U+H :   Amen.

11. Marende BE. No. 435 : 1-2  “Marolopolop Tondingki” BL. 294

Marolopolop tondingki , ai  naung  ditobus Jesus i.

Hamu sude, bege ma i, sai las ro hangku  mandok i.

Sonang ni tingki i, dung jumpang Jesus Tuhanki! 

Tondi na mangajari au,  tarbaen marlas ni ro ha au!

Sonang ni tingki i, dung jumpang Jesus Tuhanki.

Dihaol holongna rohangki, tung na so boi be mago i.

MataNa do manatap au, pinggolNa tumangihon au.

            Sonang ni tingki i, dung jumpang Jesus Tuhanki! 

Tondi na mangajari au,  tarbaen marlas ni ro ha au!

Sonang ni tingki i, dung jumpang Jesus Tuhanki.

12. Epistel: Psalmen 118 : 1-2, 14 -24

U :   Tabege ma hata ni Debata turpuk Epistel di Pesta Paskah I sadari on, i ma na tarsurat di Psalmen 118 : 1-2, 14 -24. Tajaha ma marsorinsorin. Mandok mauliate ma hamu tu Jahowa, ai pardengganbasa do Ibana, ai ro di salelenglelengna do asi ni rohana!

H :   Dohonon ni Israel ma tongon: Ai ro di salelenglelengna do asi ni rohana!

U  :    Jahowa do pargogongku dohot endengku, jadi gabe hatuaonku ibana.

H :   Soara ni olopolop dohot hatuaon marsaringar di undungundung ni angka partigor: Siamun ni Jahowa do sibahen hamonangan.

U :   Timbul situtu do siamun ni Jahowa, siamun ni Jahowa do sibahen hamonangan.

H :   Ndang tagamon mate ahu, sai na mangolu do ahu, asa hupajojor angka pambahen ni Jahowa.

U :   Nunga gogo tutu dipinsang Jahowa ahu, alai nda tung tu hamatean ahu dipasahat.

H  :    Ungkap hamu ma di ahu angka bahal ni hatigoran, asa hubongoti angka i laho mamuji Jahowa.

U :   On do bahal ni Jahowa, bongotan ni angka partigor do i sogot.

H :   Mandok mauliate ma ahu di Ho, ala naung dialusi Ho ahu, jala manjadi hatuaonku.

U :   Batu naung binolongkon ni angka pande bagas, i ma jadi batu parsuhi.

H :   Sian Jahowa do i masa, halongangan do i anggo di matanta.

U :   Ari on do na jinadihon ni Jahowa, marolopolop jala marlas ni roha ma hita disi. Martua ma na tumangihon hata ni Debata jala na umpeopsa. Amen.

13. Marende BE. No.  94: 1-2 “Ale Tondingku Naung Hehe” BL. 44

Ale tondingku naung hehe Tuhanmu,

Nunga ditaban do banuatoru

Las ma roham ai martua ma ho

Rap dohot Jesus mangolu ma ho!

Rap dohot Jesus mangolu ma ho!

-jongjong-

Talu sibolis dibahen Tuhanta, nang hamatean,

nang dosa sudena. Sai dihalashon rohanta ma i.

PangoluonNa do hita sude!

PangoluonNa do  hita sude!    

                                         

14. Manghatindanghon Haporseaon

U  :    Tahatidanghon ma haporseaonta, songon na hinatindangkon ni donganta sahaporseaon di sandok portibi on. Rap ma hita mandok:

H  :    Ahu porsea....Amen

-hundul-

15. Tingting

16. Marende BE. No.  458: 1-3 “Barita na Umuli” BL. 309    (Pelean Ia & Ib)

Barita na umuli i, na sian Tuhan Jesus.

Sai i do margogoihon ahu, nang arsak pe hubolus.

On mangapuli rohangki: Sai Tuhanki na basa i do donganki.

 Ai ndang adong di rohangki na so ni hilalaNa.

Ditanda hagaleonki, nang pe so dung marsala.

Hujalo hamonanganki, ai Tuhanki na basai do donganki.

-musik-

Ibana haporusanki di godang ni dosangku.

MudarNa do mamuri au, ditobus do hosangku.

Tuhanku gabe singkathi! Dibahen i, pujionki basaNa i.

17. Jamita :  Johanes  20 : 1- 18

18. Marende BE. No. 633: 1-4 “Nunga Hehe Kristus i” (Pelean II)

Nunga hehe Kristus i haleluya,

Sian hamatean i haleluya.

Parlangitan jouhon ma haleluya, tano on alusi ma haleluya.

Singkop panghophopNa i, haleluya.

Gok hamonanganNai, haleluya

Sondang haluaon i, haleluya. Patiur dalanta i, haleluya.

Tartaban naroko i, haleluya.

Dibaen Tuhan Jesus i, haleluya

Nunga mungkap surgo i, haleluya. Di na tinobusNa i, haleluya.

Monang do Tuhanta i, haleluya.

Talu hamatean i, haleluya

Mago do sorop na i, haleluya. Ala monang Tuhan i, haleluya.

-jongjong-

19.     Tangiang  Pelean,  Tangiang  Ari  Haheheon – Pasupasu - Amen  

                       Praeses, Kabid  dan seluruh  Pelayan full timer                           

HKBP Distrik XIX Bekasi

Mengucapkan

Selamat hari Paskah