ACARA PARPUNGUAN BODARI UJUNG TAON 2016

ACARA  

PARPUNGUAN  BODARI  UJUNG  TAON  2016

HKBP PONDOK GEDE

RESORT PONDOK GEDE

DISTRIK  XIX  BEKASI

Sabtu, 31  Desember  2016 =========================

01. Pangaradeon :

U : Hamu dongan na hinaholongan ni Tuhan Jesus Kristus! Tama do marlas ni roha hita di tingki on, ala boi hita tolhas tu ujung ni taon 2016 on, Alani tama do ongkuhononta:

H :  EBENEZER, RASIRASA NUAENG DIDONGANI TUHAN I DO HITA.

U :  Manghamauliatehon asi ni rohaNa i do hita nuaeng marpungu di gareja on, ala ni i ro ma hita tu adopanNa marhitehite pujipujian, tapasangap ma goarNa, taendehon ma “Sangap di Jahowa”.

02. Marende BE. 581 : 1 + 3                   “Sangap di Jahowa”

1.  Sangap di Jahowa na sun timbul i, balga ni holongNa ndang tarasam i. Dilehon anakNa na sasada i manobus hita jolma pardosa i. Ref: Puji ma Debata ale manisia, las roham las roham somba ma Debata. Dapothon Jahowa na sun timbul i marhite AnakNa Tuhan Jesus i.

                               -----Jongjong----

3. Balga situtu pambaenMi Debata, tung so hasuhatan holong ni rohaM. Tu jolma pardosa asi do rohaM diungkap Ho dalan lao tu banuaM. Ref: Puji ma Debata....d.u..

03. Votum – Introitus – Tangiang  (L= Liturgis, R. Ruas, S = Sude)

L :  Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia na tumompa langit dohot tano on.

R :  Amen.

L :  Nunga patar hangoluan i, jala nunga huida hami jala nunga huhatindanghon hami dohot hubaritahon hami tu hamu hangoluan na saleleng ni lelengna, na di lambung ni Ama i hian jala naung patar di hami, haleluya

S :  (Mangendehon)  Haleluya…Haleluya…Haleluya

L:  Martangiang ma hita: Ale Tuhan Debata, Amanami di banua ginjang! Mandok mauliate do hami tu Ho, ala ni godang ni asi dohot holong ni rohaM di hami; ai dibasabasahon Ho do AnakMu na sasada i tu hami na di pardangolan on, asa malua hami marhitehite Ibana sian dosa dohot sian hamatean saleleng ni lelengna. Hupangido hami tu Ho, sai sondangi ma rohanami na holom i marhitehite Tondi Parbadia i, angkup ni i sai parrohai ma hami, asa huboto hami mandok mauliate tu Ho, asa tarupul situtu rohanami di hagogotan dohot dipangunjunan marhitehite AnakMu, Tuhan Jesus Kristus Tuhannami, Amen. ----hundul----

04. Marende BE. 758 : 3               “Jahowa pangurupi”   
         

3.  Jahowa pandongani di na porsea i, Ibana patuduhon nang sidalananmi
Asa marolop-olop ho di ujungna i, Ibana do donganmu nuaeng nang sogot i

05. Manjaha Patik

L : Tangihon hamu ma patik ni Debata di Partangiangan Ujung taon on, na nienet sian Markus 8 : 34, “Laos dijou ma natorop i rap dohot siseanNa, didok ma tu nasida: Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu”. Rap mangido gogo ma hita sian Tuhan Debata laho mangulahon na hombar tu patikNa i.

S :  Ale Tuhan Debata sai pargogoi ma hami mangulahon na hombar tu patik-Mi. Amen

06.  Marende BE. 695 : 2     “Jesus Tuhanku di Ho ma au on”   

         

2. Mansai godang do pardangolanki, Tagan so Jesus dope tohaphi
Disesa Jesus sude dosangki, Gok dame rohangki, Asi rohaNa di au
Tongtong asi rohaNa di au, Disesa Jesus sude dosangki
Gok dame rohangki

07.  Manopoti dosa dohot baga-baga hasesaan ni dosa :

L :  Tapaunduk ma rohanta di adopan ni Debata laho manopoti dosanta na godang i. Martangiang ma hita:   Ale Tuhan Debata, Pargogo na so hatudosan jala Amanami ! Hujou hami do GoarMu na badia i, ala na targogot hami marningot dosanami. Sai marasi ni roha ma Ho mida hami on. O Tuhan Jesus Kristus, Anak ni Debata na gabe jolma ala ni hami, na mate jala na hehe sian na mate, na manaek tu banua ginjang do Ho mangondihon hami.

R : Asi ma rohaM di hami, sai patongtong ma di hami roha hamauliateon tu Ho.

L : O Tondi Parbadia, pangapul di na marsak roha, pamalum ma saluhut na bernit binahen ni dosanami ! Ro ma Ho mangingani hami, asa marlas ni roha hami mangulahon lomo ni rohaM. Ho do parhitean ni nasa asi ni roha, sai unang tulak hami. Sai tangihon ma hami, Ho ale Debata, Ama, Anak, dohot Tondi Parbadia

          S :  (Mangendehon) BE. 733 : 2   “Dulu ma au on O Tuhan”

2.  Tu adopanMi O Tuhan marsomba au on,
Sai asi rohaM O Tuhan, jangkon ma au on.
Jesus Tuhan Jesus Tuhan bege anggukkon,
Ro do Ho tu angka dongan topot nang au on.

L : Tabege ma bagabaga ni Debata taringot tu hasesaan ni dosanta: Songon on do Hata ni Jahowa: Unang ho mabiar, ai Ahu do Siluluhon ho; nunga pola hujou goarmu, Ahu nampuna ho. Hasangapon ma di Debata na di ginjang.

          S : Amen ----hundul----

08.   Koor

09.   Marende BE. 557 : 1              “Dao dumenggan”

1. Dao dumenggan, asi ni rohaM. Dao ummarga sian ngolungkon.
Sai pujionku ma Ho Tuhanku, Dao ummarga, asi ni rohaM.

10. Epistel

L : Tajahama Epistel di Partangiangan Ujung taon on tarsurat di 1 Rajaraja 3 : 5 - 24  tajaha ma marsoringsoring. Apala di Gibeon ma patar Jahowa tu si Salomo di bagasan nipina bornginna i, didok Debata ma: Pangido ma manang aha silehononku tu ho.

R : Dung i ninna si Salomo ma: Nunga dibahen Ho asi ni roha godang tu naposom, damang si Daud, hombar tu parangena di jolomi di bagasan hasintongan, hatigoran dohot habonaron ni roha maradophon ho, jala nunga dipahot Ho di ibana asi ni roha na godang on, dilehon Ho di ibana sada anak na juguk di atas habangsana, songon na masa nuaeng.

L : On pe, ale Jahowa, Debatangku, nunga dipabangkit Ho naposom gabe raja singkat ni damang raja Daud; alai bajar dope ahu, ndang huboto ruhut tu balian manang di bagasan huta.

R :  Ia naposomon di tongatonga ni bangsom do, naung pinillitmi, bangso na bolon, na so taretong jala na so habilangan dibahen deakna.

L : Dibahen i, lehon ma tu naposomon roha na pantas laho manguhum bangsomi, asa huboto manirang na denggan sian na roa; ai tung ise ma na tuk manguhum bangsom na marmulia on?

R : Dung i lomo ma roha ni Jahowa, ala songon i pangidoan ni si Salomo.

L : Jadi ninna Debata ma tu ibana: Ala na songon i pangidoanmi, jala ndang dipangido ho ganjang ni umur, jala ndang dipangido ho hamoraon, jala ndang dipangido ho hosa ni angka musum, roha tahe pinangidom asa tumimbang uhum.

R : Ida ma, bahenonku ma hombar tu hatam. Ida ma! Lehononku ma tu ho roha na bisuk jala na pantas, asa unang adong tudoshon ho sian na robi angka naung salpu i, nang na tubu muse.

L :  Angkup ni na so pinangidom pe, lehononku do tu ho, nang hamoraon, nang hamuliaon, asa unang adong tudoshon ho nanggo sahalak di tongatonga ni angka raja saleleng ho mangolu.

R :  Dung i molo sai tong marparange ho di angka dalanku laho mangaradoti angka patikku dohot tonangku, songon parange ni amangmu si Daud, tumpahonku ho huhut sarimatua.

L :  Jadi dung ngot si Salomo, ida ma, nipina do hapengani. Jadi dung sahat ibana tu Jerusalem, jongjong ma ibana di jolo ni poti parpadanan ni Jahowa, jala dipelehon angka pelean situtungon, dibahen huhut angka pelean hamauliateon, jala dilehon mangan saluhut naposona.

R : Uju i ro ma dua parompuan sibabijalang mangalualu tu rajai, laos jongjong di jolona.

L : Ninna parompuan na sada ma: Santabi, ale tuanku, ia ahu dohot parompuan on maringan di sada jabu, jadi mangintubu ahu di lambungna di jabu i.

R :  Dung i patoluarihon dung mangintubu ahu, mangintubu huhut parompuan on; jala rap hami na dua, ndang adong halak na asing di jabu i, dungkon ni hami na dua.

L : Dung i mate ma anak ni parompuan on borngin i, ditipa ibana uju modom.

R :  Jadi hehe ma ibana tonga borngin, dihindat ma anakku sian lambungku, uju modom naposom boruburu, jala dipeakkon ibana tu ampuanna, ia anakna na mate dipeakkon tu ampuanku.

L : Jadi dung hehe ahu manogotna i laho pasusuhon anakki, gabe ida ma, nunga mate ibana. Alai hupamanatmanat ma ibana manogotna i, gabe ida ma, ndada ibana anakku na hutubuhon i.

R : Alai ninna parompuan na sadanari ma: Ndang songon i, ai anakku do na mangolu i, jala anakmu do na mate. Alai ninna parjolo i ma: Ndada! Ai anakmu do na mate, jala anakku do na mangolu i. Songon i nasida marbada masialusan di jolo ni rajai.

L :      Dung i ninna rajai ma: Sadaon mandok: On do anakku na mangolu i, jala anakmu do na mate. Alai sadaan mandok: Ndada, ai anakmu do na mate, jala anakku do na mangolu i.

S : Jadi ninna rajai ma: Antong boan hamu ma tu ahu sada podang. Jadi dung sahat podang i tu jolo ni rajai.

L :  Ima sahatna, Martua ma angka na tumangihon Hata ni Debata jala na umpeopsa.

          S :  Amen.

11.  Koor

12. Marende BE. 753 : 1           “Di pardalanan Jesus di jolongku”

1.    Di pardalanan Jesus di jolongku, Holong ni tanganMi manogu au. Nang di ngolungku, Ho do somba on hu, tung sonang mardalan raphon Ho. Huboto do tangkas panoguonMu, di iringiring Ho do langkangki. Sahat ro di  ujung ni pardalanhu, togu ma au jonok tu lambungMi.

13. Renungan ujung taon

L :  Naeng salpuhononta nama taon 2016 jala bongotanta ma taon na imbaru taon 2017. Naeng ma hita manatap tu pudi di pardalanan naung tabolus di na sataon bolon on. Di na sataon bolon on na mardalan do hita di partingkian na binasabasahon ni Debata. Torus do partingkian i mardalan nang pe ndang tarbahen hita be mardalan ala nunga loja tahilala, tung so adong do na marhuaso pasohon partingkian i so holan Debata. Na torus do partingkian i mardalan tu jolo nang pe naung gale tahilala na mandalani parngoluan on. Nuaeng nunga sahat hita tu ujung ni taon 2016 on, aha ma nanaeng hatindanghononta?

R :  Puji ma Jahowa, ale tondingku, jala nasa rohangku di bagasan mamuji goarna na badia i.

L :  Di na mandalani taon 2016 on, ra godang do pe angka batubatu na tajom na mangambati pardalananta. Marsitutu do hita mangulahon angka ulaonta alai sai taadopi do pe angka kegagalan.  Adong do ra sian tongtonganta na marsak jala na tariluilu, marragam angka na masa na so hombar tu na itahirim. Nunga tasalpuhon taon keluarga di HKBP 2016 na martemahon “Gabe rumah tangga sioloi Jahowa”. Nuaeng aha ma hajongjonghononta di adopan ni Debata?

R :  alai anggo ahu dohot donganku sajabu, ingkon Jahowa do oloannami.

L :      Hata ni Debata di Epesus 5:15-16 mandok: “Antong, manat ma hamu mamereng manangkasi parulaonmuna; songon angka na marroha, unang ma songon angka na hurang roha! Parhaseang hamu ma tingki, ai ari hasusaan do nuaeng”. Naeng tadinghononta taon 2016 on, tauji ma mambahen rujiruji tu dirinta be, tasunghun ma tu dirinta: Nunga tapangke partingkian naung tabolus tu angka ulaon na denggan? So tung do angka partingkian i marsalpuan so adong na taula agia aha pe manang tapangke partingkian i tu ulaon na so hinalomohon ni Debata?

R :  Ajari ma hami Tuhan mamangke tingkinami, asa lomo ni rohaM na huulahon hami, jala umbiaran hami mida Ho sian mida jolma.

L :  Hata ni Debata di Pilippi 3:12-14 mandok: “Apala naung sanga hutangkup i manang naung gabe sun denggan; alai sai hueaki do, anggiat tartangkup ahu i, songon naung tinangkup ni Kristus Jesus i ahu. Ale angka dongan, ndang hurajumi diringku, naung sun hutangkup i. On do tahe: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i”. Naeng bongotanta ma taon na imbaru, taon 2017. Tahalupahon kegagalan-kegagalan di tingki na salpu na mambahen hita pesimis mamongoti taon 2017 naeng ro. Songon i nang angka keberhasilan-keberhasilan di tingki na salpu tahalupahon ma i ai boi do i  mambahen hita lemba mangulahon angka na denggan tu tingki na naeng ro. Taulahon ma na denggan tu saluhut halak di ari nuaeng nang tu tingki na naeng ro, unang marnaloja hita, ai na manggotil do hita muse di tingkina i, anggo so pargale hita nuaeng.

          S : (Mangendehon) BE. 747 : 1 - 2    “Sai Hunangkohi Dolok i”

1.    Sai hunangohi dalan I dalan na marmulia I,
On do tongtong tangiangki, Tuhan patongtong langkangki.
Sai togu-togu au Tuhan baen lam solhot tu lambungMi
Tu ingananMu na tongam sai lam patongtong langkangki.

                    ------Jongjong------

2.    Ndang olo au di na holom hot diganggu ni roha I,
Sai tong ma sihol rohangkon tu inganan na timbo I,
Sai togutogu ...

L : Tahatindanghon ma Hata haporseaonta i songon na hinatindanghon ni donganta sahaporseaon di sandok portibi on. Rap ma hita mandok:

S :  Ahu Porsea di Debata  Jahowa…..  ----hundul----

14. Koor

15. Marende BE. 123 : 2                        “Ale dongan na saroha”

3.   Tanda asi ni rohaNa na bagas na timbo i, Tanda holong ni rohaNa na so hadodoan i, Didongani Debatanta, Ama na sumurung i, Dohot Jesus pe Tuhanta, hita na porsea i

16. Manjaha :

·       Bericht ni Huria              :  Uluan ni Huria

·       Statistik Huria                :  Sekretaris

·       Parhepengon ni Huria     :  Bendahara Huria

17. Marende BE. 672 : 1               “Tung godang situtu”    
         

1. Tung godang situtu ulaonmu antong, dipasahat Tuhanta tu ho
ndang adong be tingkim, marnalemba tahe, ngolumi bahen tiruan tongtong. Sai patupa ma I ala ni Tuhan I, so mangkirim balosna tu ho. Debata do marnida na niulami, Manang na adong parbue ni i

18. Mandok hata:   1. Sian sahalak ruas ni huria                                                        

                            2. Sian sahalak Parhalado

19. Marende BE. 672 : 3              “Tung godang situtu”  
   

3. Alanii boan ma, sondang na tiur i, boan ma hata ni Tuhan i,
Sai urupi na pogos na mardangol i, asa ro tu Jesus Tuhanta i.
Sai patupa ma i ala ni Tuhan i, so mangkirim balosna tu ho.
Debata do marnida na niulami, Manang na adong parbue ni i

20. Tangiang Pangondianon

21. Marende BE. : 1… “Gohi au Tuhan”  (Pel. 1a,1b) 

1.    Gohi au Tuhan marhite HataMi Gohi au Tuhan marhite HataMi, Songon hudon na rumar do au Tuhan di sumurMi, Gohi au Tuhan marhite HataMi. 

2.    Gohi au Tuhan marhite HataMi Gohi au Tuhan marhite HataMi Na mauas do tondingku O Tuhan di HataMi Gohi au Tuhan marhite HataMi.                   -------Musik------

3.    Gohi au Tuhan marhite HataMi Gohi au Tuhan marhite HataMi Asa tang jala matoras au marhite HataMi Gohi au Tuhan marhite HataMi.

22.  Jamita: Johannes  8 : 12 - 19

23.  Marende BE. 754 : 1… “Gok las ni roha do au” (Pel. II)

1.  Gok las ni roha do au dingolungkon
Dingolungkon di ngolungkon gok las ni roha
Do au dingolungkon tongtong dirohangkon
Mauliate gok las ni roha maringan holongMi
Tuhan di au mauliate gok las ni roha
Maringan holongMi Tuhan di au.

2.  Mardame jala sonang do ngolungkon, dirohangkon,
Dirohangkon. Mardame jala sonang do ngolungkon
Tongtong dirohangkon.
Mauliate ...                  -

     ----Musik----

3.  Gok do holong ni Jesus dingolungkon, dingolungkon,
Dingolungkon. Gok do holong ni Jesus dingolungkon,
Tongtong di rohangkon.
Mauliate ...

4.  Ndang hona uhum be au dingolungkon, dingolungkon,
Dingolungkon. Ndang hona uhum be au dingolungkon,
Tongtong di rohangkon.
Mauliate ...

5.  Marlas niroha do au dingolungkon, dingolungkon,
Dingolungkon. Marlas ni roha do au dingolungkon,
Tongtong di rohangkon.
Mauliate ...

24. Parsuruon : (P = Pendeta, R= Ruas, S= Sude)

P :  Hamu angka dongan satongkinnari salpuhononta nama taon 2016 on jala bongotanta taon na imbaru taon 2017. Di nanaeng tadinghononta taon 2016 on jala bongotanta ma taon 2017,  dipabotohon turpuk jamita on do hita: dapotan sondang hangoluan do na mangihuthon Jesus, dibahen i tongtong  ma hita dungo jala hobas ni ulaon na hinalomohon ni Debata; asa dapotan sondang hangoluan hita sian Debata.

R :  HataMi do sulusulu ni pathu jala hatiuron di dalanhu.

P :  Di bagasan pandongani on ni Debata las ma rohanta mambongoti taon 2017. Di taon na naeng ro naeng ma lam marsitutu hita jala hobas tu angka ulaon na denggan. Antong, borhat ma hamu tu tongatonga ni portibi on, pabotohon hamu ma habasaronmuna tu saluhut halak! Donok do Tuhan i. Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate! Jala dame ni Debata na sumurung sian saluhut roha, i ma mangaramoti angka ateate dohot pingkiranmuna di bagasan Kristus Jesus.

       S :  (Mangendehon) BE. 763 : 1       “Molo Jesus donganmi”     

Molo Jesus donganmi las roham, Jesus i pangurupim las roham. Hot haporseaonmi dohot pos ni rohami, mardonganthon Jesus I las roham. Ref: Las roham, las roham, mardonganhon Jesus i las roham. Marsinondang ma di ho bintang panghirimon i mardonganhon Jesus i las roham.

25. Tangiang Pelean – Ale Amanami – Pasupasu

Sunggulsunggul :
Denggan ma sude hita patupahon acara keluarga di parsirangan ni taon 2016.