ACARA TAON BARU 1 JANUARI 2017

            TOPIK   

             MANGHATINDANGHON 
                                     DENGGAN BASA NI DEBATA                                                               

    (JESAYA  63 : 7 – 9)

01. Pangaredeon :

·  Sude parhobas marpungu, martangiang di bilut parhobasan mangido gogo dohot pangurupion sian Tuhanta.

·      Mangkuling ma giringgiring (Sude ruas ni huria martangiang di bagasan hahohomon), laos mardalan ma barisan prosesi Parhalado sian bilut parhobasan, sahat tu jolo ni langgatan, jongjong mangadophon ruas.

Pdt : Huria na hinaholongan di bagasan goar ni Tuhanta Jesus Kristus. Sadari on, 01 Januari 2017, ima Bona ni taon na Imbaru. Tung asi ni roha ni Debata do na patariparhon ngolunta sian taon 2016, tolhas ngolunta di bona ni taon na imbaru on, dipataru Debata hita di bagasan dame dohot hasonangan. Ala ni i, andorang so tabongoti parsombaonta tu adopan ni Debata, jumolo ma hupasahat hami tabe: Selamat Taon Baru di hamu saluhutna ruas ni huria on.

R  : Selamat Taon Baru ma nang di hamu amanami dohot inanami parhalado ni huria on.

Pdt :  Hamu angka dongan sahaporseaon! Songon tanda ni las ni rohanta sadari on di habobongot ni ngolunta di bona ni taon on, taendehon ma di bagasan hibul ni roha endenta sian BE.No.70 : 1 – 3 “Naung salpu taon na buruk i”. (Parhalado masibuat hundulanna be)

·      Naung salpu taon na buruk i, Ho ma hupuji Tuhanki  Ai diramoti Ho tongtong tondingku dohot dagingkon (2x)

·      Jesus, sai asi rohaM, paian denggan ni basaM, Muse di taon na ‘mbaru on di nasa huriaM tongtong (2x) --- Jongjong ---

·      Sai tong paian hataMi na mangapuli rohai, Alai pangago sasude padao ma sian hami be (2x)

         02. Votum – Introitus – Tangiang :

L  : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on. Amen! Sai mangaranapi do matangku dompak angka dolok: Sian dia do ulaning ro pangurupion tu Ahu? Sian Jahowa Sitompa langit dohot tano on sambing ro pangurupion ianggo tu ahu. Ndang tagamon loasoNa tarsulandit patmu, ndang tagamon nok mata ni Sijaga ho, Sai jagaon ni Jahowa do ho sian nasa parmaraan, sai jagaonNa do tondim. Sai jagaon ni Jahowa do ho laho ruar dohot laho bongot olat ni on ro di saleleng ni lelengna, Haleluya.

S :  (mangendehon) Haleluya…haleluya…haleluya…

L :  Martangiang ma hita! Ale Tuhan Debata ! Sian asi ni rohaM do umbahen na sahat hami tu taon na imbaru on; Ho do na mangaramoti hami di bagasan taon na salpu. Sai asi ma rohaM, sai unang tulak hami nuaeng; sai dongani ma hami di bagasan taon na imbaru on. Pasupasu hami ro di angka ulaon na denggan na huula hami marhitehite goarMu. Alai na gumodang, pasupasuhon ma hataM na badia tu rohanami, asa gabe imbaru rohanami, asa tarpamasuk Ho hami tu banua ginjang di hasusuda ni bohalnami.

S :  Amen !   -----hundul-----

03. Marende BE. 14 : 1-2 “Puji hamu Jahowa tutu”

·    Puji hamu Jahowa tutu, Pardengganbasa, parasiroha salelengna i. Pardengganbasa i, parasiroha i.

·    Ingot tongtong, ale tondingkon, Sude na denggan na dipasonggop Debata tu ho. Denggan basaNa do na pangoluhon ho.

04. Patik Ni Debata

L :  Patik ni Debata di hita, di Taon Baru sadari on ima sian Patik I dohot lapatanna: “Ahu do Jahowa DebataM, ninna Debatanta. Ndang jadi marangkup Ahu bahenonmu Debatam. Dia do lapatan ni i? On do : Ingkon umbiar rohanta jala humolong jala umpos mida Debata asa mida nasa na adong. Antong rap mangido gogo ma hita tu Debata laho mangulahon na hombar tu patikNa i.

S :  Ale Tuhan Debata sai pargogoi ma hami mangulahon na hombar tu patikMi. Amen!

05. Marende BE. No. 68 : 4 – 5  “Masilelean angka taon”   (BL. 93)

·         Alai na niondihonMi do au, umbaen mangolu .
Ho do mandok tu Ama i sai loas ma mangolu.
Hau on, asi ma rohami, taon I pe talu uhumMi.

·         Jesus sai urupi au, di taon na ro mamboan.
Parbue angka na sai tau padaohon hamagoan.
Sai pargogoi ma au tongtong pasangap Ho di ngolungkon.

06. Renungan Situasional

L : Tama do hita mandok mauliate tu Tuhanta Debata naung patariparhon ngolunta sian taon na salpu tu taon na imbaru 2017 on. Naeng tangkas parhatopotonta godang ni angka pasupasu dohot las ni roha naung tajalo sian Tuhan i, hahipason, parsingkolaan ni angka ianakhon, hagabeon, pandaraman dohot lan angka ulaon na denggan na mambahen las rohanta. Dia ma sidohononta taringot tusi?

R :  Pinuji ma Debata, Ama ni Debatata Jesus Kristus, naung umpasupasuhon tu hita ragam ni pasupasu.

L :  Tutu, ndada holan las ni roha na masa na taadopi di pardalanan ni ngolunta di taon na salpu, boi do godang angka parungkilon, parsahiton dohot ragam ni angka hamaolon na manosak ngolunta. Dia ma dohononta nang taringot tusi ?

R:  Pinuji ma Debata, Ama ni Debatata Jesus Kristus, naung umpasupasuhon tu hita ragam ni pasupasu.

L :  Marhite angka na masa di ngolunta na salpu i, las ni roha manang arsak, naeng lam pasolhothon ngolunta ma i tu Tuhanta bona ni hatuaon i. Molo tapamanat angka na masa di taon na salpu, boi do mambahen lomos jala mabiar hita. Godang ni angka parungkilon na binolus ni bangsonta, torop ni angka na masa di bangsota,  kemerosotan moral, hamaolon mangalului ngolu siganup ari, masa do bencana alam, bom, demontrasi. Marningot saluhutna i, naeng lam gomos hita mandok :

R :  Jahowa do * Siparmahan ahu, ndang tagamon hurangan ahu..

L :  Tutu, ndang taboto dope aha na naeng masa siadopanta tu tingki na naeng ro di bagasan taon on. Boi do songon sada halak na mamongoti sada inganan na holom, so binoto tondongonna, gabe mardongan biar. Alai hita angka naung hinophop ni Tuhanta i, mardongan pos ni roha huhut mangasahon pandonganion, pangaramotion dohot panogunoguon ni Tuhanta i, tabongoti ma taon na imbaru on di bagasan pangkirimon dohot las ni roha. Gomos ma hita mandok :

R :  Jahowa do * Siparmahan ahu, ndang tagamon hurangan ahu.

L :  Taon 2016 na salpu ditotophon hurianta HKBP do gabe tahun Keluarga. Di arahon do asa gabe rumahtangga sioloi Jahowa nasa ruas ni HKBP. Asa di taon 2017 on lam huminsat ma panghobasionta tu Taon Pendidikan dohot Pemberdayaan HKBP, Antong gomos ma hita mandok:

S:   Jahowa do * Siparmahan ahu, ndang tagamon hurangan ahu.

07. Marende BE. No. 67 : 2 - 3     “Tapuji ma Tuhanta” (BL. 12)

·      Sai songon na mardalanTabolus angka taon Disi dope hosanta Diudut Debatanta.

·      Ai songon inaina Manjaga anakkonna Laos songon i Tuhanta Dijaga do hosanta

08. Tangiang Manopoti Dosa

L :  Tatopoti ma dosanta martangiang ma hita: Ale Amanami jala Debatanami na di banua ginjang, Pargogo na so hatudosan, Pardenggan basa do Ho, jala ro di saleleng ni lelengna do asi ni rohaM. Sai marpamuati ma rohaM di hajahatonnami, jala sai unang be ingot angka dosanami. Ai jotjot do hami mardosa maradophon Ho, jala jotjot do husungguli hami rimasMu marhite sian pangalaosionnami di hataM.

S  : Mangendehon BE. No. 64 : 4 “Naung Moru do muse sataon”

·         Ndang dapot bilanganhu dosa, naung huulahon na sai laon, Huhut ndang harajuman basa ni Tuhan Jesus na sai laon, Ndang dibaloshon Ho Tuhanhu, tu au hombar tu dosangki, Sai dipalambas Ho rohaMu, marnida pangalahongki

L :  Ale Tuhan Debata Jahowa, sai unang paingotingot pangalaosionnami, unang alang asi ni rohaM, sai urupi ma hami, Ho ale Tuhan Debata Jesus Kristus, Tuhannami,

--------Saat Teduh--------

L :  Tabege ma bagabaga ni Debata taringot tu hasesaan ni dosa: Parasi roha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana, Hasangapon ma di Debata na di ginjang.

S :  Amen !   -----hundul----

09. Koor

10. Marende BE. No. 581 : 1   “Sangap di Jahowa”    

                              

·      Sangap di Jahowa na sun timbul i, balga ni holongNa ndang tarasam i, Dilehon AnakNa na sasada i, manobus hita jolma pardosa i.  Puji ma Debata, ale manisia, las roham, las roham somba ma Debata, Dapothon Jahowa na sun timbul i, marhite AnakNa Tuhan Jesus i

11. Epistel :

L :  Epistel di parpunguanta di Taon baru on, i ma na tarsurat di Heber 2 : 10 - 18. Ai Ibana, hapatean jala parmulaan ni nasa na adong, dung jolo ditogihon Ibana torop anak tu hasangapon, tama Ibana, parmulaan ni haluaonnasida i, dipajongjong sun denggan marhitehite sitaonon.

R : Ai marharoroan sian na Sada do saluhutna, na pabadiahon dohot na pinabadiana i; ala ni i ndang dihailahon Ibana, manggoar nasida angka anggina.

L :  Ai ninna do: "Baritahononku do Goarmu tu angka anggingku; di tongatonga ni huria i do endehononku Ho!"

R : Dung i muse: "Ibana do bahenonku haposanku!" Jala muse: "Dison do Ahu dohot dakdanak i, angka na nilehon ni Debata tu Ahu!"

L :  Asa songon dakdanak partohap di mudar dohot di sibuk, gabe suman do dohot Ibana partohap disi, asa marhitehite hamatean i dipasohot Ibana sibolis i, na marhuaso mambahen mate,

R:   asa dipalua sasude na pinarhatoban ni biar ni roha managam

hamatean, saleleng mangolu.

L :  Ai apala angka surusuruan disarihon, pomparan ni Abraham i do!

R:   Ala ni i, ingkon gabe dos situtu Ibana tu angka anggina asa gabe parasiroha Ibana jala sintua ni malim haposan maradophon Debata, laho pasaehon angka dosa ni bangso i.

L : Ai intap naung marsitaonon Ibana di na tarunjun i, haurupan Ibana do angka na tarunjun i. I ma sahatna! Martua ma na tumangihon hata ni Debata jala naumpeopsa.

S :  Amen!

12. Koor 

13. Marende BE. No. 691: 1-2 “Hupasahat ma tu Jesus”   

·   Hupasahat ma tu Jesus saluhutna ngolungki, Roha nang pambahenanku saluhutna tingkingki, Hupasahat ma tu Jesus saluhutna diringki. Hupasahat ma tu Jesus saluhutna ngolungki.

                               --- Jongjong--- 

·      Pangkeonhu ma tanganhu mangula lomoNa i, Langka nang simanjojakhu mangihuthon Tuhanki.  Hupasahat ma…

14. Manghatindanghon Haporseaon

U  :   Tahatindangkon ma haporseaonta i, songon na hinatindanghon ni donganta di sandok portibion, Rap ma hita mandok :

U+R: Ahu porsea di Debata Jahowa,,,,,, d.u. ----hundul----

15. Mandok Hata Selamat Taon Baru

Ø  Mewakili Ruas :

Ø  Mewakili Parhalado :

16. Marende BE. No. 753: 1...(Pel. Ia,Ib  “Di pardalanan Jesus di jolongku” )

·      Dipardalanan Jesus dijolongku Holong ni tanganMi manogu au,       Nang di ngoluku Ho do sombaongku tung sonang mardalan raphon au Huboto do tangkas panoguonMu diiringiring Ho do langkangki.  Sahat ro di ujung ni pardalanku togu ma au jonok tu lambungMi.

·      Sipata lilu haporseaonhu ni lilianan ni portibi on, Alai dung Ho hutatap o Tuhanku margogo do au dingolungkon. Huboto

------Musik------

·      Patogu ma Tuhan haporseaonku, asa polin tu Ho manghirim au, Tu surgo i patulus pardalananku, tondiMi maringan ma di au. Huboto do

 

17.  Jamita: Jesaya 63 : 7 – 9

18.  Marende BE. No. 66 : 1… “Debata baen donganmi”  (Papungu Pelean II– Tu Kategorial Naposobulung HKBP)

·      Debata baen donganmi, lao mangula ulaonmu, Baen Ibana haposanmu sai paserep rohami, Debata baen donganmi, Debata baen donganmi.

·      Debata baen donganmi, molo Debata donganmu, Ndang tarbahen ho be lilu sai ture do langkami, Debata baen donganmi, Debata baen donganmi. ----Musik----

·      Debata baen donganmi, sai na saut do ulaonmu, Sai na tulus do sangkapmu jala, sonang rohami, Debata baen donganmi, Debata baen dongami.

19. Panghangoluhonon di Hata ni Debata :

Pdt : Borhat ma hita mandalani taon na imbaru on di bagasan dame dohot las ni roha. Mardalan ma hamu di bagasan pos ni roha na manongtong tu Debata. Manang tu dia pe hamu mangalangka, ganup ari, ganup taon, Debata di bagasan holongNa dohot huasoNa rade mardalan di jolomuna. Molo Debata do na mardalan di jolom, jumpangan hatiuron dohot hadameon ma hamu di pardalananmu.

S   :  (mangendehon) BE. 758 : 1   “Jahowa pangurupi”    

·   Jahowa pangurupi di siulaonmi
Dilehon pos ni roha di ganup tingki i
Nang pe sipata ganggu haporseaonmi
Jamot tongtong Tuhanmu manjaga ngolumi

Pdt : Bongot ma ho tu taon 2017, Pos ma roham, uju mardalan ho di na holom ndang tagamon loasanNa tarsulandit patmu. Ndang tagamon nok mata ni sijaga ho. Sai jagaon ni Jahowa do ho sian nasa parmaraan, sai jagaonNa do tondim. Ibana gabe panondang jala hatiuron di dalanmu. Unang be ho ganggu.

S   :  (mangendehon) BE. 758 : 3 “Jahowa pangurupi” 

·      Jahowa pandongani di na porsea i
Ibana patuduhon nang sidalananmi
Asa marolop-olop ho di ujungna i
Ibana do donganmu nuaeng nang sogot i             

Pdt : Antong, hobas ma hamu tu ulaon na denggan, borhat ma di bagasan pandonganion ni Debata, laho  mamodai, maminsang, pauliulihon, manogunogu di bagasan hatigoran, hombar tu program ni HKBP taon 2017 on.

20. Tangiang Pelean –Tangiang Taon Baru – Tangiang Ale Amanami – Tangiang Pasupasu – Amen – Amen – Amen. 

ACARA PESTA NATAL PADUAHON PARNINGOTAN HATUTUBU NI TUHAN JESUS

ACARA PESTA NATAL PADUAHON

PARNINGOTAN HATUTUBU NI TUHAN JESUS

HKBP PONDOK GEDE RESORT PONDOK GEDE

 SENIN, 26 DESEMBER  2016

Topik :

“Mamaritahon denggan basa ni Debata “

1.     Pangaradeon.

2.     Joujou tu Parsaoran dohot Debata.                  U=Uluan         H=Huria

        U.   Selamat ari Natal ma di hita saluhutna.

          Huria ni Tuhanta, tama do hita mandok mauliate jala marlasniroha di Pesta Natal Paduahon on marningot sude denggan basa ni Debata tu huria-Na. Ai naung mago hian do hita siala dosa, alai malua hita ala nunga tuat Ibana sian banuaginjang mangebati hita tu portibi on. Gok halongangan do sude pambahenan-Mi ale Debata,

      H.  Pujionku ma Jahowa sian nasa roha, jala baritahononku ma goar-Na ala angka halongangan na binahen-Na i.

      U.  Gok halongangan do angka dalan-Mu ale Jahowa. Diramoti Ho do HuriaM jala sonang, nang pe mamolus ragam ni angka hamaolon di taon 2016 on. Godang angka na masa na mambibiari rohanami di taon on, masa do angka bencana alam marluatluat, mapultak do gunung Sinabung di Tanah Karo dohot angka lan na asing dope. Alai malua do ruas ni huriaM sian angka i sude, holan marhite asi dohot holong ni rohaM.

       H.   Puji ma Jahowa, ale tondingku, jala unang tung halupahon denggan ni basana sudena.

     U.   Gok halongangan do angka dalan-Mu ale Jahowa, Jala gok las ni roha do hami nuaeng siala ni i. Hupuji hami ma holong ni roha-Mi namangaloas hami dope marpungu sadari on mamestahon Pesta Paduahon Ari Parningotan di HatutubuM i. Antong hamuna angka dongan, taparade ma rohanta, tapasangap ma Jahowa, jala tasomba ma Ibana naung ro manopot hajolmaon. Marende ma hita.

3.     Marende BE No. 605:1–3                      Las ma roham                        (SDJ)

Ø  Las ma roham Tuhanta ro, gumonggom sasude, ungkap roham, jangkon rajam. Marende ma sude, marende ma sude, marende, marende ma sude.

Ø  Tano nang laut, harangan i, nang awangawang i, hauma i nang  sunge i, olophon Raja i, olophon Raja i. Olophon olophon Raja i.

...................................... m u s i k  ..............................................

Ø  Bura binaen ni dosa i, marujung ma disi, ai nungga ro Mesias i, mamboan dame i, mamboan dame i, mamboan mamboan dame i.

       

4.     Votum-Introitus-Tangiang.

         U.  Marhitehite Goar ni Debata Ama, dohot Goar ni Anak-Na Tuhan Jesus Kristus dohot Goar ni Tondi Porbadia na tumompa langit dohot tano on. Amen. Ai nunga tubu di hita sada posoposo dilehon tu hita sada Anak, pampe tu abarana do sogot harajaon, jala bahenon-Na Goar-Na: 

         H.  Sipartahi Halongangan, siulubalang ni Debata, Ama saleleng ni lelengna, Raja ni hadameon.

         U.  Endehon hamu ma sada ende na imbaru di Jahowa, endehon ma Jahowa, ale sandok tano on!

        H.  Pajojor hamu ma di tongatonga ni angka parbegu hamuliaon-Na i, di tongatonga ni saluhut bangso halongangan, angka na binahen-Na i.

       U.  Marsomba ma hamu tu Jahowa marpahean na marhadohoan, angka hitir ma maradophon Ibana ale isi ni sandok tano on. Haleluya.

         H.  (Mangendehon)  Haleluya, Haleluya, Haleluya.

    U.  Martangiang ma hita. Ale Debata, Ama na di banuaginjang. Pujipujian, hasangapon dohot hamauliateon husombahon hami tu Ho, marningot silehonlehon-Mi na balga i tu hami jolma na di pardangolan on, i ma Anak-Mu, Jesus Kristus, na sinuru-Mi sian banua ginjang ala ni hami. Gabe na dangol do Ibana jala pogos, pola tubu Ibana di bara ni Betlehem, asa mamora hami. Sai rajai jala togutogu hami marhitehite TondiM, asa lam huida hami godang ni holong ni rohaM na pinapatar ni Anak-Mi. A m e n .                                                                                -hundul-

5.  Marende   BE  No. 614:1   Ro ma Ho tu au                     (SDJ)

     Ø  Ro ma Ho tu au O Jesus Tuhanki, sian banua ginjang tu rohangki. 

                 Ro ma Ho tu au O Tuhan Sipalua i, Dame binoanMu ndang natarasam i, O Tuhanki

       

6.  Patik ni Debata.

     U.     Tabege ma Patik ni Debata di hita di Pesta Natal Paduahon sadarion i ma natarsurat di Matius 7:21 : Ndada saluhut halak namandok Ahu Tuhanna, bongot sogot tu harajaon Banua Ginjang i,

     H.     Holan angka namangulahon lomo ni roha ni Damang na di banua ginjang i do.

U.           Ima sahatna, antong rap mangido gogo ma hita sian Debata laho mangulahon patikNa i.

        U/H. Ale Tuhan Debata sai pargogoi ma hami mangulahon nahombar tu patik-Mi. Amen.

7.   Marende BE No. 58:1+5   Martumbur tungkotungko     BL. 123

     Ø  Martumbur tungko tungko na di si Yese i, natubu posoposo na pinarbagai; 

               Ima Tuhanta i, sinuru ni AmaNa tu hita jolma i.

     Ø  O Jesus Tuhannami naung ro tu tano on, tu Pardangolannanmi di hasiangan on. 

               Asi ma rohaMi, sai togu tondinami tu hasangaponMi.

8.     Manopoti dosa.

     U.   Tatopoti ma dosanta di adopan ni Debata tapaunduk be rohanta martangiang ma hita. Ale Tuhan Debata Amanami Parasiroha Nasumurung, Pardenggan basa do Ho jala ro di saleleng ni lelengna do asi ni rohaM. Huingot hami do di angka ari on balga ni holong-Mu, ai nunga tubu Ho tu portibi on holan manghophop hami, asa malua hami sian dosa dohot hamatean. Na maporus ma hami nuaeng tu asi ni rohaM na godang i, mangido sian Ho hasesaan ni dosanami saluhutna. Sai unang paingotingot angka pambahenan nami nahurang i, alai ingot ma hami hombar tu asi ni rohaM marhitehite Tuhan Jesus Kristus Tuhannami.

      H.   (Mangendehon BE No. 56:4)           BL. 139

              O Jesus, Tuhanku sai naeng pujionku, pambaen-Mu di ahu pardosa on, 

              Ai gabe jolma Ho humophop ahu. Tasomba ma Ibana, 

              Tasomba ma Ibana, Tasomba ma Ibana, Rajanta. 

     U.   Tabege ma hata bagabaga ni Debata taringot di hasesaan ni dosanta. Parasi roha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang.

        U/H.  A m e n .                                                                             -hundul-

9.     K o o r  :  Ama

10.   Marende BE No. 51:2–3  Tole puji ma Tuhanta                       BL. 31

Ø  Dosa dohot hamatean, bolis dohot hamagoan. Talu ala naung diboan Jesus hangoluan i.

Ø  Sai tandai ma denggan basa ni Jahowa Debatanta, dibasahon do AnakNa baen hangoluanta i.

11.   Manjaha Epistel.

        U.   Epistel di Ari Pesta Paduahon Hatutubu ni Tuhanta Jesus Kristus sadari on, natarsurat di Mateus 2:13–23 : tajaha ma marsorinsorin: Asa dung laho nasida, ro ma surusuruan ni Tuhan i diida si Josep dinipina, namandok tu ibana; Hehe, ma ho, boan ma Dakdanak i rap dohot inana i, maporus ma hamu tu tano Misir, disi ma hamu jolo paima ro muse hatangKu, ai na naeng luluan ni si Herodes do Dakdanak i asa bunuonna.

        H.   Jadi hehe ma ibana, diboan ma Dakdanak i rap dohot inana borngin i, maporus tu tano Misir

    U.   Laos di si ma nasida paima mate si Herodes, asa jumpang na nidok ni Tuhan i marhite sian panurirangNa na mandok; sian Misir do Hujou Anakki.

        H.   Asa dung mamoto si Herodes, naung dipaotooto angka parhapistaran i ibana, tarrimas situtu  ma ibana, disuru ma tu Betlehem dohot tu sandok luat na humaliangi angka na mamunui nasa dakdanak baoa, namarumur dua taon, ro di angka na ummetmet sian i, hombar tu tingki naung nirisihanna sian angka parhapistaran.

      U.   Disi ma jumpang hata ni panurirang Jeremia na mandok

      H.   Tarbege do di huta Rama soara partangison dohot angguk badar. diangguhi si Rahel do ianakhonna i, ndang olo be apulon, ai nunga sun siap nasida.

    U.   Alai dung mate si Herodes, diida si Josep ma di nipina surusuruan ni Tuhan i di tano Misir, namandok tu ibana.

        H.   Hehe ma ho, boan ma Dakdanak i, rap dohot inana mulak tu tano Israel, ai nungga mate angka na sumangkapi hosa ni Dakdanak i.

        U.   Jadi hehe ma ibana, diboan ma Dakdanak i rap dohot inana mulak tu tano Israel.

        H.   Alai dung dibege ibana si Arkilaus do hape raja di luat Judea manggonti amana si Herodes, biar do rohana, anggo tung laho tusi. Jala dung ro poda sian Debata tu ibana di nipina, gabe dompak Galilea nama ditondong.

        U :  Jadi ojak ma ibana maringanan di sada huta namargoar Nazaret, gabe jumpang ma hata ni panurirang namandok, goaron do ibana si Nasarani.

12.   K o o r  Kaum Parompuan.

13.   Marende BE No. 62:3+4   Halalas ni roha godang       BL. 172

      Ø  Tuhan Jesus hadomuan na disuru Debata, napasaehon sude dosa di dolok Golgata. 

                 Reff: Hasangapon di Debata, laos dame dame dame ma di jolma, 

                         lomo ni roha ni Debata do hita jolma on.

                   (Ruas Jongjong)

      Ø  Sa sondangi ma rohangku, ale Tuhan Jesus i, asa dohot au maruli di hatutubuMi. 

                  Reff: Hasangapon di Debata . . .

         

14.    Manghatindangkon Haporseaon:

         U.  Dibagasan sada panindangion dohot donganta sahaporseaon di sandok portibi on tahatindanghon ma haporseaonta i, rap ma hita mandok:

         U/H.  Ahu porsea di Debata Jahowa …..………..

15.    K o o r:

16.    Sunggulsunggul.

17.    K o o r:   

18.   Marende BE No. 616:1 . . .        Ulinai borngin nabadia     (Pelean I – II)

      Ø  Ulina i di borngin nabadia humirdophirdop do bintang di si. 

                  Di borngin i do tubu Sipalua di panggatan di Betleem i. 

                 Portibi on dangol gok haholomon marnida sondang ni Tuhanta i. 

                 Reff.: Ulina i marende do suruan, di borngin i do tubu Kristus i, diborngin i do tubu Kristus i :: .

      Ø  Sian na dao parroha sian Purba, ro do tinogihon ni bintang i. 

                 Marsinggang be nasida lao marsomba tu Jesus Kristus Sipalua i.

                  Ibana ro sian Banua ginjang, lao paluahon hita jolma i. 

                 Reff.: Ulina i marende . . .

 ............................................ m u s i k ...................................

      Ø  Ulinai sude marlas ni roha ala naung songgop harajaonNa i, 

                 Huria i ria do ro marsomba mamuji Raja na sun sangap i.

                 Ibana do Panondang hangoluan, namangalehon panghirimon i. 

                 Reff.: Ulina i marende . . .

                                               

19.   J a m i t a: Jesaya 63: 7-9

20.   Marende BE No 52:1 . . .                       Hatuaon do                 BL. 55

        (Pelean tu Radio Suara Bona Pasogit)   

      Ø  Hatuaon do las ni roha do hatutubu ni Jesus i ;; 

                  mago do jolma ro ma Tuhanta las be las be marohanta i :;

       Ø  Hatuaon do las ni roha do hatutubu  ni Jesus i  ;; 

                   domu do hita tu Debatanta, las be las be ma rohanta i ;;

              .................... m u s i k ...............................

       Ø  Hatuaon do las ni roha do hatutubu  ni Jesus i ;; 

                   las ma rohanta mida Tuhanta, las be las be ma rohanta i ;;    

              

21. Parsuruon tu ngolu siapari.  

                              

      U:  Nunga tahalashon hatutubu ni Jesus i. Andorang so mulak hita sian parpunguan on, tama do hita marpadan tu Tuhan i, i ma padan mamaritahon barita haluaon i. Taingot ma pambahen ni angka parmahan i uju manjalo barita las ni roha i. Mulak do nasida, alai ndang dipasip nasida barita i, masipandohan do nasida:

H:  Mulak do angka parmahan i, dipasangap jala dipapujipuji do Debata ala ni sasude na binege jala niidanasida, songon naung dihatahon i tu nasida.

U:  Marhite Pesta Natal on, lam tu ringgas na ma hita mamuji jala pasangap Debata di ngolunta. Tahaholongi ma Debata dohot  dongan na humaliang hita, Keluarga, Huria, dohot masyarakat pe. Asa patar huriaNa gabe pasupasu  di tongatonga ni bangsonta.

H:  Ale Tuhan pargogoi ma hami asa gabe pasupasu huriaM, di tonga ni portibi on.

U:  Hamu angka dongan sahaporseaon tapangido jala tajalo ma huaso sian Tuhan Debata

H:  Ale Tuhan Debata, paimbaru ma roha dohot gogonami, laho manghangoluhon pambahenan ni anakMu naung gabe jolma humophop hami.

U:  Hamu angka dongan sahaporseaon, tapangido jala tajalo ma huaso sian Tuhan Debata.

H:  Ale Tuhan Debata, sai pargogoi ma hami marhite TondiM, paubahon roha namarsipaula; lehon ma tu hami roha namanghasabamhon pasupasuM, jala basabasaHon ma di hami bisuk dohot hapistaran laho mamolati na denggan dohot na roa, asa tau lomo ni rohaM ngolunami.

U:  Baritahon hamu ma barita na masa di Betlehem Efrata, paboa hamu ma tu angka bangso naung tubu Kristus i. Nasa na porsea dapotan haluaon.

H:  Ale Tuhan sai pargogoi ma hami mamaritahon habalgaon ni holongMu tu nahumaliang hami. Amen.

22. Tangiang Pelean / Ale Amanami…………….Pasupasu.

23. ACARA  PASAHATHON BINGKISAN NATAL:

      1.   Pangaradeon.

      2.   Mandok Hata sian Dewan Diakonia

      3.   Mandok Hata sian Ruas

      4.   Pasahat Bingkisan Natal…………………….             

      5.   Panutup. Martangiang sian Pendeta.

Selamat Hari Natal 25 & 26 Desember 2016

Dipasupasu Tuhanta ma hita saluhutna.