ACARA PESTA NATAL II

ACARA PESTA NATAL II

PARNINGOTAN DI ARI HATUTUBU NI TUHAN JESUS

DI HKBP PONDOK GEDE RESORT PONDOK GEDE

DISTRIK XIX BEKASI

Selasa, 26 Desember 2017

Topik: Baritahon ma Haluaon  na sian Jahowa  (Psalmen 98:2-9)

1. Pangaradeon

2. Joujou tu Parsaoran dohot Debata           (U= Paragenda ; H=Huria)

U:   Horas jala selamat ari Natal ma di hamu saluhutna! Huria ni Tuhanta, tama do hita mandok mauliate jala marlas ni roha di Pesta Natal Paduahon on marningot sude denggan basa ni Debata tu huriaNa. Ai naung mago hian do hita ala dosa, alai malua hita ala Tuhan Jesus Kristus na sian banua ginjang gabe Jolma, mangebati hita tu portibi on. Gok halongangan do sude pambahenan ni Debata!

H:   Pujionku ma Jahowa sian nasa roha, jala baritahononku ma goarNa ala angka halongangan na binahenNa i.

U:   Gok halongangan do angka dalanMu ale Jahowa. Diramoti Ho do HuriaM jala sonang, nang pe mamolus ragam ni angka hamaolon di taon 2017 on. Godang ma tongon angka na masa na mambibiari rohanami di taon on, masa do angka bencana alam marluatluat, aek magodang, gunung Sinabung  di Tanah Karo dohot gunung Agung di Bali, virus Difteri, Ancaman Penyalahgunaan Narkoba, Ancaman Penyalahgunaan Media Sosial-Internet dohot angka lan na asing dope. Alai ala asi rohaM dohot denggan basaM, malua do hami sian angka i sude.

H:   Puji ma Jahowa, ale tondingku, jala unang tung halupahon denggan ni basaNa sudena.

U:   Ale Jahowa, gok halongangan do angka dalanMu, jala gok las ni roha do hami nuaeng siala ni i. Hupuji hami ma holong ni rohaMi na mangaloas hami dope marpungu di borngin on mamestahon Pesta Paduahon Ari Parningotan di hatutubuM i. Antong hamuna angka dongan, tapasada ma rohanta, tapasangap ma Jahowa na sun timbul i,  marende ma hita SDJ. No. 581: 1-3 Sangap di Jahowa As=Do

            1.    Sangap di Jahowa na sun timbul i,

                   Balga ni holongNa ndang tarasam i.

                   Dilehon AnakNa na sasada i,

                   Manobus hita jolma pardosa i.

                   Puji ma Debata, ale manisia,

                   Las roham, las roham, somba ma Debata.

                   Dapothon Jahowa na sun timbul i,

                   Marhite AnakNa Tuhan Jesus i.

            2.    Tung so hasuhatan do basaNa i,

                   Marhite AnakNa ni lehonNa i.

                   MudarNa durus do di hau silang i,

                   Rara pe dosanta ias di baen i.

                   Puji ma Debata, ale manisia,

                   Las roham, las roham, somba ma Debata.

                   Dapothon Jahowa na sun timbul i,

                   Marhite AnakNa Tuhan Jesus i.

                                                            … jongjong …

 3.   Balga situtu pambaenMi Debata,

       Tung so hasuhatan holong ni rohaM.

       Tu jolma pardosa asi do rohaM,

       Di ungkap Ho dalan lao tu banuaM.

                   Puji ma Debata ale manisia, las roham,

                   Las roham, somba ma Debata.

                   Dapothon Jahowa na sun timbul i,

                   Marhite AnakNa Tuhan Jesus i.

3. Votum - Introitus - Tangiang

U:   Marhitehite Goar ni Debata Ama, dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. Nunga tubu di hita sada posoposo, dilehon tu hita sada Anak.

H:   Pampe tu abaraNa do sogot harajaon, jala bahenonNa GoarNa: Sipartahi Halongangan, Ulubalang ni Debata Ama, saleleng ni lelengna, Raja ni hadameon.

U:   Endehon hamu sada ende na imbaru di Jahowa, endehon ma Jahowa, ale sandok tano on.

H:   Pajojor hamu ma di tongatonga ni angka sipelebegu hamuliaonNa i, di tongatonga ni saluhut bangso halongangan, angka na binahenNa i.

U:   Marsomba ma hamu tu Jahowa marpahean na marhadohoan, angka hitir ma hamu maradophon Ibana, ale isi ni sandok tano on. Haleluya!

H:   (Mangendehon)  Haleluya, haleluya, haleluya.

U:   (Martangiang ma hita.) Ale Debata, Amanami di banua ginjang! Pujipujian, hasangapon dohot hamauliateon husombahon hami tu Ho, marningot silehonlehonMi na balga i tu hami jolma na di pardangolan on, i ma AnakMu, Jesus Kristus, na sinuruM i sian banua ginjang ala ni hami. Gabe na dangol do Ibana jala na pogos, pola tubu Ibana di bara ni Betlehem, asa mamora hami. Sai rajai jala togutogu hami marhitehite TondiM, asa lam huida hami godang ni holong ni rohaM na pinapatar ni AnakMi. Amen. (hundul)

5.  Koor:  Ama – Ina Hanna

6. Marende BE. No. 59: 1+6 O Jesuski hupuji Ho As=Do    Bl.34

1.    O Jesuski hupuji Ho, dibaen naung gabe Jolma Ho;

Ditopot Ho do hami on, na dangol di portibi on.

6.    Na pogos ma Tuhanta i manaon sude na porsuk i;

Mamora hita baenon ni saleleng ni lelengna i.

7.  Patik ni Debata

U:   Tabege ma Patik ni Debata di Pesta Natal Paduahon sadari on, i ma Patik VII dohot Lapatanna.  Patik Papituhon: Unang ho mangalangkup! Dia do lapatan ni i?

H:   On do: Ingkon dihabiari rohanta Debata jala ingkon holong rohanta di Ibana,

U:   Asa toman rohanta jala porman dohot pangalahonta ro di hatanta,

H:   Ianggo angka naung marbagas i ingkon masiparhamaolan jala masihaholongan.

U:   I do sahatna. Antong rap martangiang ma hita mangido gogo sian Tuhanta laho mangulahon PatikNa.

U/H. Ale Tuhan Debata sai pargogoi ma hami mangulahon nahombar tu patik-Mi. Amen.

8.  Koor:  Wijk II - Wijk IV

9. Marende BE. No. 53: 2+4 Di Betlehem do tubu F=Do      Bl.51

2.    Tu holong ni rohaNa hubonom rohangkon,

       Hulehon di Ibana sude na di au on.

       Olo, olo, sude na di au on.

      

… jongjong …

4.    Burju naeng lehononku, di Ho rohangkinon,

Asi rohaM Tuhanku, urupi au tongtong.

Olo, olo, urupi au tongtong.

8.  Manopoti dosa

U:   Tatopoti ma dosanta! Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami. Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami. Dibahen i tama do rimasanMu jala uhumanMu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni RohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on! Amen.

H:   (Mangendehon BE. No.56: 4) Sai ro ma hamuna A=Do Bl.139

O Jesus, Tuhanku sai naeng pujionku,

PambaenMu di ahu pardosa on; Ai gabe jolma Ho humophop ahu.

Tasomba ma Ibana, tasomba ma Ibana,

Tasomba ma Ibana, Rajanta.

U:   Tabege ma hata bagabaga ni Debata taringot di hasesaan ni dosa. Ai ndang adong imbar ni i; ai saluhut do pardosa jala hurangan maradophon hasangapon ni Debata, alai angka na gabe pintor, binahen ni basabasa marhite sian asi ni rohaNa, hinorhon ni panobusion na marhitehite Kristus Jesus i, na pinajongjong ni Debata bahen habangsa parasian marhitehite haporseaon di mudarNa. Hasangapon ma di Debata na di ginjang!

U/H: Amen.              (hundul)

9.  Koor:    Ama Immanen Wijk I – Wijk VI - Ebenezer

10.       Marende BE. No. 52:1–2 Hatuaon do Es=Do Bl.55

     1.    Hatuaon do, las ni roha do, hatutubu ni Jesus i!

            :;: Mago do jolma, ro ma Tuhanta, las be, las be ma rohanta i!

2.    Hatuaon do, las ni roha do, hatutubu ni Jesus i!

            :;: Domu do hita, tu Debatanta, las be, las be ma rohanta i!

11.       Epistel Heber 1: 1-3a

    

U:   Tabege ma Hata ni Debata turpuk di Pesta Paduahon Parningotan di ari Hatutubu ni Tuhan Jesus sadari on, sian Heber 1: 1-3a. Jotjot jala ragam najolo pambahen ni Debata mangkuling i angka ama i marhitehite angka panurirang i.

H:   Alai di angka ari na parpudi on dipanghulingi do hita marhite sian Anak i.

U:   Ibana do dipabangkit gabe sitean parluhutan i, jala marhitehite Ibana do ditompa angka hasiangan i.

H:   Sillam ni hasangaponna dohot suman ni hadirionna do Ibana.

U:   I do sahatna. Martua do na tumangihon Hata ni Debata jala naumpeopsa.

H:   Amen.

12.              Koor:       Wijk I – Wijk III        - Jeriko

13.       Marende SDJ. No. 614:1-2 Ro ma Ho tu au G=Do

           

1.    Ro ma Ho tu au o Jesus Tuhanki,

Sian banua ginjang tu rohangki

Ro ma Ho tu au o Tuhan Sipalua i,

Dame binoanMu ndang natarasam i, o Tuhanki.

… jongjong …

     2.    Asi ma rohaM di au o Tuhanki,

            Sai jalo ma tangiang nang endengki

            Songon si Maria ina na martua i,

             Baen nang au martua ala haroroMi, o Tuhanki.

14.       Manghatindangkon Haporseaon

U:   Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

U/H:Ahu porsea di Debata Jahowa…

15.              Koor:       Parompuan - Lansia

16.       Tingting

17.              Koor:       Wijk V – Ama Sion

18.       Marende BE. No.48: 1 … Bl. 16 Ria ma hita sasude F=Do  (Pel. I–II)

     1.    Ria ma hita sasude mamuji Debata;

            Girgir ma parendenta be,

            Ai i do na tama, ai i do na tama.

     2.    Diungkap Debatanta i, banua ginjang i,

            Disuru do AnakNa i,

            Hangoluanta i, hangoluanta i.

… organ …

     3.    Ampuan ni AmaNa do, tinadingkonNa i,

            Tu hasiangan on do ro,

            Tu pardangolan i, tu pardangolan i.

     4.    Sitompa nasa na adong, sigomgom sasude,

            Ro songon i tu tano on,

            Manaon naporsuk i, manaon na porsuk i.

… organ …

     5.    Dibahen i las situtu, do rohangkon nuaeng,

            Hujangkon Jesus i tutu

            Ai sonang au dibaen, ai sonang au dibaen.

     6.    Antong hamuna sasude, pardosa na tungki,

            Sai ungkap rohamuna be,

            Manjangkon Jesus i, manjangkon Jesus i.

… organ …

     7.    Ringgas ma hita sasude, mamuji Debata,

            Gogo ma taendehon be

            Amen haleluya, amen haleluya.

19. Jamita: Psalmen 98: 2 – 9

20.       Marende BE. No. 51: 1 …      Tole, puji ma Tuhanta F=Do Bl.31

     (Pelean tu Radio Suara Bona Pasogit)

     1.    Tole puji ma Tuhanta, tu Ibana ma rohanta

            Asa girgir parendenta, ale dongan Kristen i.

     2.    Dosa dohot hamatean, bolis dohot hamagoan

            Talu ala naung diboan Jesus hangoluan i.

… organ …

     3.    Sai tandai ma denggan basa ni Jahowa Debatanta,

            Dibasahon do AnakNa baen hangoluanta i.

     4.    I ma ro holong rohaNa, jolma do dibaen donganNa.

            Dohot tu harajaonNa hita di arahon do.

… organ …

     5.    Nunga binsar panondangi, haholomon di sondangi.

            Na masihol i didaoni, dipangolu do sude.

           

6.    Ale Jesus haholongan, boan ma tu hasonangan

       Hami na di parjalangan na manghalungunhon Ho.

                  

21. Parsuruon tu ngolu siapari

U:   Nunga tahalashon hatutubu ni Jesus i. Andorang so mulak hita sian parpunguan on, tama do hita marpadan tu Tuhan i, i ma padan mamaritahon barita haluaon i. Taingot ma pambahen ni angka parmahan i uju manjalo barita las ni roha i. Mulak do nasida, alai ndang dipasip nasida barita i, masipandohan do nasida:

H:   Mulak do angka parmahan i, dipasangap jala dipapujipuji do Debata ala ni sasude na binege jala niidanasida, songon naung dihatahon i tu nasida.

U:   Marhite Pesta Natal on, lam tu ringgas na ma hita mamuji jala pasangap Debata di ngolunta. Tahaholongi ma Debata dohot  dongan na humaliang hita, keluarga, huria, dohot masyarakat pe. Asa patar huriaNa gabe pasupasu di tongatonga ni bangsonta.

H:   Ale Tuhan pargogoi ma hami asa gabe pasupasu huriaM, di tonga ni portibi on.

U:   Hamu angka dongan sahaporseaon tapangido jala tajalo ma huaso sian Tuhan Debata

H:   Ale Tuhan Debata, paimbaru ma roha dohot gogonami, laho manghangoluhon pambahenan ni anakMu naung gabe jolma humophop hami.

U:   Hamu angka dongan sahaporseaon, tapangido jala tajalo ma huaso sian Tuhan Debata.

H:   Ale Tuhan Debata, sai pargogoi ma hami marhite TondiM, paubahon roha na marsipaulaula; lehon ma tu hami roha na manghasabamhon pasupasuM, jala basabasaHon ma di hami bisuk dohot hapistaran laho mamolati na denggan dohot na roa, asa tau lomo ni rohaM ngolunami.

U:   Baritahon hamu ma barita na masa di Betlehem Efrata, paboa hamu ma tu angka bangso naung tubu Kristus i. Nasa na porsea dapotan haluaon.

H:   Ale Tuhan sai pargogoi ma hami mamaritahon habalgaon ni holongMu tu nahumaliang hami. Amen.

22.  Tangiang Pelean / Ale Amanami…………….

23. Pasupasu

24.  ACARA  PASAHATHON SIPALAS ROHA NATAL:

            1. Pangaradeon sian Protokol Seksi Sosial

            2. Mandok Hata sian Dewan Diakonia

            3. Mandok Hata sian Ruas ni huria

            4. Pasahat Bingkisan Natal…………………….                       

            5. Panutup. Martangiang sian sada halak Pendeta

Selamat Ari Natal 25-26 Desember 2017