MANGARATARATAI SURAT BATAKTA I TU ANAKHON NI HURIA I

"Napuran si Rara Uruk Napuran ni Sipoholon

Halak na so olo marguru i ma halak na londongon"

ANGKA SISIASIA NA RINGKOT

Paraturan parjolo i do siingotonta, manontuhon angka sisiasia na ringkot. Sadia torop do angka saringar na marasingasing, jala piga sisiasia pandongani.

·        Sisiasia na marsaringar, i ma: a, i, u, e, dohot o

·       Sisiasia pandongani, i ma: a, ha, ma, na, ra, ta, la, pa, sa, da, ga, ja, nga, ba, wa, ya, nya, u, i.  Jadi 19 do sisiasia na ringkot pangkeonta.

PANURATHON NI HATA BATAK

Dung taboto nuaeng angka sisiasia na porlu pangkeonta, nunga adong situtu angka hata na pintor boi tingkos surathononta isara:

·        hata,

·        hatop,

·        marsahit,

·        tarida, d.l.n.a.

Alai ingkon tangkasanta dope manang na dia do ingkon hot hata bonabona i suraton jala manang di dia ingkon muba ala ni angka tambatamba panjoloani, panuruk dohot pangihut. Dung i muse saboiboina songon panurathon ni angka ompunta na jalo do ihuthononta.

PANURATHON NI ANGKA HATA BONABONA

Mangihuthon  surat Batak :

Saringar kk surathononhon ngh, songon:

·        dangha,

·        tongha tanghas.

Saringar ts (sipata ss) surathononhon ma ns, songon:

·        hinsu,

·        linsing,

·        pansur.

Saringar pp surathononhon mp, songon:

·        ompu,

·        rampas,

·        lompa.

Saringar tt surathononhon nt, songon:

·        sinta,

·        rante,

·        tintin.

Songon na maralo do angka na di ginjang on nian tu paraturanta na di jolo ni on na mandok: songon pandokna do surathonon. Boasa songon i ulaning dibahen angka ompunta na jolo? Ra, ala na songon i hian do pandok nasida na jolo, jadi sintong hian do diihuthon nasida paraturan i, alai pandokna do na lam muba.