PARTANGIANGAN BONA TAON SEKSI PAROMPUAN HKBP PONDOK GEDE

PARTANGIANGAN BONA TAON

SEKSI PAROMPUAN HKBP PONDOK GEDE

RESORT PONDOK GEDE  DISTRIK XIX BEKASI

TAON 2020 

DI AULA HKBP PONDOK GEDE

Rabu, 12 Februari 2020

01.   Marende BE. No. 122:1-2 Ida hinadenggan ni BL.13  Es=Do

1.  Ida hinadenggan ni Angka na  saroha i

     Parpambaenan na burju Nang hatana pe  tutu

2.  Sai hushus uapna i Songon bungabunga i

     Angka na tinompa i Pajengkarhon tano i.

02.   Tangiang Hamauliateon

Uluan   :    Marhitehite Goar ni  Debata Ama, dohot Goar ni Anak-Na Tuhan  Jesus Kristus dohot Goar ni Tondi Porbadia tapatupa Partangiangan Bona Taon Seksi Parompuan HKBP Pondok Gede on, Amen.  Mandok  mauliate ma hamu di Jahowa ai pardenggan basa do Ibana, ai ro di saleleng lelengna do asi ni roha-Na.

Huria    :    Marolopolop au mamuji Ho o Debata sangap do Ho! Marolopolop au mamuji Ho o Debata sangap do Ho!

Uluan   :    Mandok mauliate ma hamu di Jahowa, ai pardenggan basa do Ibana. Mandok mauliate hita ala dibasabasahon tu hita taon on. Taon na mangalehon godang sihirimon jala taon na manabunihon godang hamaolon. Marningot  pangurupion-Na di taon na salpu, tadok ma:

Huria    :    Jahowa do donganku, ndang mabiar ahu tung aha ma tagamon bahenon ni jolma tu ahu?

Uluan   :    Mangasahon pandonganion-Na i do pos rohanta mardalan di taon 2020 on. Pos rohanta ala hot do holong ni roha-Na tu hita. Songon pandonganion-Na di taon 2019 na salpu, boi lobi songon i dope pandonganion-Na di hita di taon 2020 on. Alani tadok ma: Marhaposan tu Debata do ahu, ndang tahutan ahu, tung hahuaon ni jolma ma ahu?

Huria    :    Dengganan marhaposan tu Jahowa asa marhaposan tu jolma. Dengganan marhaposan tu Jahowa asa marhaposan tu raja.

Uluan   :    (Haleluya! Martangiang ma hita). Ale Jahowa Debata, Sitompa, Siramoti hami. Marningot sude asi ni rohaM na patariparhon hami tu taon na imbaru on tama do hami pasahathon pujipujian dohot hamauliateon ni rohanami tu Ho. Ho do na paluahon  hami sian ragam ni parmaraan dohot na mangasihon tu hami pasupasu saleleng taon na salpu. Nang  pe godang jala ragam angka parungkilon hubolus hami di taon 2019 na salpu i,  andul umbalga do pangaramotion-Mu marmahani hami mamolus  ragam ni hamaolon i. Ale Tuhan na mangido ma hami tu Ho, ramoti hami di taon on. Lehon di hami gogo mangulahon na denggan dohot hamonangan mangadopi parungkilon. Mangolu manang mate hami di bagasan tangan-Mu ma hami tung unang tadingkon hami. Marhite Jesus Kristus martangiang hami tu Ho. Amen.

03. Marende Huria BE. No. 70: 2 O Jesus, Sipangolu au   BL  36 F=Do

       2.    O Jesus sai asi rohaM, paian denggan ni basaM.

              Muse di taon na imbaru on, di nasa huriaM tongtong.

              Muse di taon na imbaru on, di nasa huriaM tongtong.

          

04.      Tangiang  Hasesaan ni Dosa

Uluan   :   Di na taripar hita tu taon 2020 on, tama do ingotonta godang ni dosanta. Atik pe godang dosanta ndang sundat Tuhan i mangasii hita. Ingkon parhatopotonta do: Jotjot do hita ganggu di pangaramotion-Na. Ndang gok itaulahon lomo ni roha-Na. Langgus do hita mamarangehon hata-Na.

Huria    :    O Tuhan, hutopoti ma, luhutna dosangki. Asi roham, sai sesa ma, di Ho ma tondingki!

Uluan   :    Tabege ma hata ni Debata taringot tu hasesaan ni dosanta. Didok di Jesaya 1:18: “Tung sura rara dosamuna songon abit bunga dapdap bontar do bahenonku songon itak; nang pe rara songon abit hasumba, gabe songon hapas do muse.”

Huria    :    Songon dia do parangengku di na manjalo hasesan ni dosa?

Uluan :       Didok di Epesus 4: 23-24+32 “Alai paimbaru hamu ma dirimuna di bagasan tondi ni rohamuna. Jala solukhon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan. Gabe na basar ma hamu sama hamu, angka parsiroha, masisesan dosa ma hamu, songon panesa ni Debata di dosamuna di bagasan Kristus.”

Huria    :    Mauliate ma Tuhan, Pinuji ma Goar-Mu! Amen.     

05.  Marende BE. No.68: 2+5 Ihuthon Au sude hamu BL.93 Es=Do

1.       Diudut Ho do hosangki paidaida ahu,

      Manang adong parbue ni, na niulaM di ahu.

      Hape jotjot tarhirim Ho parbue i ndang olo ro.

06. Renungan  Partangiangan Bona Taon dohot Panindangion.

Uluan   :    Partangiangan Bona Taon. Parjolo, mangarahon hita manaili tu pudi tu taon 2019 naung tatundalhon. Molo tabolus di taon i ragam ni hamaolon, sitaonon dohot kegagalan, boi do i mambahen hita mabiar mangalangka di taon 2020 on. Sabalikna, molo tajalo di si  las ni roha dohot keberhasilan, boi do i mambahen hita bangga diri. Roha biar dohot bangga diri jumpang ma i di ngolunta molo tarajumi alani gogonta taripar hita tu taon 2020 on. Alai molo tahaporseai ala pangurupion ni Tuhan i do hita mangolu, jala i do manosoi hita marpungu saonari. Ita dok ma mauliate tu Tuhan i ala dilehon tu hita taon 2020 on. Tahamauliatehon pangurupion-Na jala taparhatopot hagaleonta. Marhite Partangiangan Bona taon on taparhatopot: Ndang tau  hita mangolu molo so didongani Tuhan i. Pangurupion-Na i do na manjujui hita marpungu saonari laho manghatindangkon:

Huria    :    Ebeneser, rasirasa nuaeng di urupi Jahowa do ahu.

Uluan   :    Partangiangan Bona Taon on, Paduahon, mangarahon hita manatap tu jolo tu taon 2020 naung tabongoti. Sian pengalaman di taon na salpu, boi do suraon lam gumodang hamaolon di taon 2020 on adopanta. Boi do parsaoran lam holang ala  lam ngali holong ni roha jala lam lumlam pangalaho. Molo lam tamba umurta, na marlapatan do i lam jonok hita tu hamamatenta. Hamamasa ni aek magodang/banjir, Virus Corona, ripas angka pinahan di marpiga luat, persekusi pinamasa ni bajarbajar, parngoluan ni angka lahilahi dohot anak boru na so suman, hapantunon ni sundut na umposo naung lam humurang, dohot ragam na i do pe tahe. Asa unang mabiar hita mangadopi i tahaposi hata-Na na mandok: “Unang ho mabiar, ai Ahu do donganmu. Unang biahaton ho, ai Ahu do Debatam”. Antong pir ma tondinta. Ibana do jaminan ni ngolunta dohot masa depanta. Dibahen i taradoti patik-Na, taulahon lomo ni roha-Na. Parpunguan on paingothon hita di jaminan ni Debata mandongani hita. Alani asa margogo hita mandalani taon on tadok ma:

        Huria   :    Ianggo ahu dohot donganku sajabu, ingkon Jahowa do oloannami. Amen.       

07.  Marende BE. No. 69: 1-2 Ungkap bahal na ummuli   BL.84 C=Do

1. Jesus sai urupi hami, dohot di taon baru on. Paimbaru rohanami, mangihuthon Ho tongtong. Pasupasu ma muse, na porsea sasude.

        2. Taon parasinirohaon, baen di au sandok taon on. Lam pahot ma hasesaan, ni dosangku di au on. Holan Ho do Jesuski, tuk pasaehon dosangki.

08.  Jamita:  

09.  Marende BE. No. 66: 1-3  Debata baen donganmi Bl. 52 As=Do (P. Pelean)

1.     Debata baen donganmi, lao mangula ulaonmu, baen Ibana haposanmu, sai paserep rohami. Debata baen donganmi. Debata baen donganmi. 

2.     Debata baen donganmi. Molo Debata donganmu, ndang tarbahen ho be lilu, sai ture do langkami. Debata baen donganmi. Debata baen donganmi.          

3.     Debata baen donganmi sai na saut do ulaonmu. Sai na tulus do sangkapmu, jala sonang rohami. Debata baen donganmi. Debata baen donganmi.

10.  Tangiang Pelean Dohot Tangiang Pos ni roha Mangalangka di Taon 2020 on.

Uluan   :    Ale Tuhan Debata Amanami na di banua ginjang, na jongjong do hami di adopan-Mu na marmulia i pasahathon tu Ho pelean on. Asi ma rohaM, jalo ma i gabe pelean na hushus di jolom.  Pasupasu  ma  i  asa  huparhaseang hami patulushon ulaon-Mu di  huriaM. Marhitehite  Tuhan Jesus Kristus Tuhannami, Amen.

Huria    :    (mangendehon:) BE. 466: 2 Nunga ro au BL.314 Es=Do

                 Ndang adong naeng tioponku, saluhut tu tangan-Mi. Maradian do tondingku, tu bagasan lomo-Mi. Hatuaon i las ni rohangki, ai hibul do hupelehon nasa diringki.

Uluan   :    Marningot hamaolon na tabolus di taon 2019, boi do lomos hita mardalan di taon 2020 on. Alai, marningot hata ni Tuhan i, ndang  ringkot hita mabiar. Ai didok do:

       Huria    :    Tu Jahowa ma giling angka pambahenanmu, asa tulus angka sangkap ni roham.

       Uluan   :    Taparsinta do taon 2020 on taon pasupasu, taon keberhasilan di hita. Asa berhasil jala gok pasupasu hita, tadapothon jala talului Tuhan i. Ai didok do:

       Huria    :    Jala  halomohon Jahowa, jadi lehononna ma tu ho  pinangido ni roham.

       Ulaun   :    Taparsinta do sonang hita di taon 2020 on.  Asa sonang hita tapasahat dirinta tu Ibana.  Ai  didok do:

       Huria    :    Pasahat ma dalanmu tu Jahowa jala haposi  Ibana, asa Ibana paturehon.

       Sude     :    (mangendehon:) BE. No. 260: 1 Holan Jesus do Hubaen Donganku Bes=Do

                                             Holan Jesus do hubahen donganku, ai Ibana  pasonangkon au, 

                                             Ingkon sai tongtong tiur langkangku, 

                                             Molo raphon Jesus i au lao, molo raphon Jesus i au lao.

       Uluan   :    Rap ma hita mandok: Tangiang “Ale Amanami…”

       Sude     :    Ale Amanami na dibanua ginjang, …Amen.

       Uluan   :    (Pasupasu:) Asi ni roha …

        Sude    :    (mangendehon:) Amen, amen, amen.