ACARA PESTA PADUAHON ARI PARNINGOTAN HASASAOR NI TONDI PARBADIA HKBP PONDOK GEDE RESORT PONDOK GEDE DISTRIK XIX BEKASI

ACARA PESTA PADUAHON ARI PARNINGOTAN

HASASAOR NI TONDI PARBADIA

HKBP PONDOK GEDE

RESORT PONDOK GEDE

DISTRIK XIX BEKASI

Topik:

Mangolu di Bagasan Panogunoguon Tondi ni Debata (Joh.14: 15-21)

Senin, 21 Mei 2018

 

1.   Joujou tu Parsombaon          (U: Uluan; R : Ruas; S: Sude)

1.  Marende BE. No. 108: 1-3 Hata ni Jahowa BL. 203 Es=Do

1.       Baen ma gabagaba dohot bungabunga, nang pelean i.

Ai nuaeng ma jumpang ari parningotan, Pentakoste i.

Haroro ni Tondi do, i ma Tondi Porbadia, masuk tu huria.

2.      Jangkon ma Ibana, ai asi rohaNa ro tu hita on.

Asa sondangonNa, tiur bahenonNa parrohaon tongtong.

Jangkon ma Ibana da, asa dao sude arsakmu,

Nang pardangolanmu.

…………………… Musik …………………………………..Jongjong…………………

3.      Tondi Pangapuli, sahap na umuli di sisean i.

Tuhan Jesus Kristus ro ma Ho pabulus tongtong langkangki.

Di na lao tu surgo au, pargogoi ma au pamonang

Sahat tu na sonang.

2.       Votum – Introitus

     

U:        Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Porbadia na tumompa langit dohot tano on. Amen. Sian Sion, situan ni hinadenggan, marsinondang Debata Sai na ro do Debata, jala ndang tagamon hohom Ibana; ai songon on do didok Jahowa: UsehononKu ma aek tu angka na mauas dohot angka sunge tu na mahiang.

R:             Haleluya! Di Tuhan Debatanta i do hatuaon dohot hasangapon dohot hamuliaon dohot hagogoon.

U:        UsehononKu ma tutu TondingKu tu pinomparmuna nuaeng jala pasupasungKu tu pinomparmu sogot. Jahowa do Debata, jala Ibana manondangi hita. Tambathon hamu ma angka pelean pesta i sahat ro di angka tanduk ni langgatan. Haleluya!

R:             (Mangendehon:) Haleluya, haleluya, haleluya.

U:        Martangiang ma hita: Ale Tuhan Jesus! Hudok hami mauliate tu Ho sian nasa rohanami, ala dipaojak Ho HuriaM di tano on, jala ala dohot hami dijou Ho tusi. Sai suru ma Tondi Parbadia tu rohanami, asa tung huparhatopot hami Ho hangoluannami, asa lohot tu Ho hami marhitehite haporseaon na sintong, jala asa tongtong huhalashon hami pasangaphon GoarMu, na tarpuji ro di saleleng ni lelengna. Amen. (Hundul)

3.  Marende No. 106: 5-6 Ale Tuhan Amanami BL.176 F=Do

5.      Patandahon  ma tu ahu dosa na buni dope,

Angka na paholang ahu sian Debata tahe.

Asa topotanhu i tu Tuhanhu Jesus i,

Jala au paluaonNa sian dosa saluhutna.

6.      Tondi sai ajari ahu jala togutogu ma.

Asa au marpangalaho na badia, na tama.

Sai paburju rohangkon mangoloi hataM tongtong,

Asa molo ro ajalhu sahat au tu ingananMu.

4.  Patik ni Debata: Epesus 4: 4-6

U:    Patik ni Debata di hita di Pesta Paduahon Ari Parningotan Haroro ni Tondi Parbadia sadari , sian Epesus 4: 4-6. Ai sada do daging i, jala sada do Tondi; ai songon i do hamu tarjou di bagasan sada pangkirimon di panjouon i.

H:        Sada do Tuhan, sada do haporseaon, sada do nang pandidion.

U :   Sada do Debata, Ama ni sasude, sigomgomi saluhut, sitorusi saluhut jala siingani saluhut. I do sahatna. Antong rap ma hita mangido gogo tu Debata laho mangulahon patikNa i.

S :        Ale Tuhan Debata, sai pargogoi ma hami mangulahon na hombar tu PatikMi. Amen.

5. Marende  BE. No. 177: 3-4 Ndada tarhatahon BL.147 Bes=do

3.      Jesus do manaoni dosa sasude.

Nunga digarari do utangta be.

Nunga pola mate Tuhan Jesus i

Paluahon hita sian dosa i.

………………….Jongjong………………………..

4.      O hamu pardosa sai tandai ma i.

Lehon di Ibana rohamuna be.

I do pangidoan ni Tuhanta i.

Asa sai tong sonang bahenonNa i

6. Manopoti Dosa

U:    Tatopoti ma dosanta! Ale Tuhan Debata, Amanami, Pargogo na so hatudosan, Parasiroha mida hami na dangol on! Na ro do hami tu joloM manopoti dosanami na godang i. Di bagasan hajahaton do hami tubu jala ndang adong haporseaon di bagasan rohanami hian, saluhut do hami manimbil sian angka dalanMu. Mansai godang do pangalaosionnami di PatikMu. Alai ingot ma hami, ale Tuhan, ala ni denggan ni basaM dohot asi ni rohaM. Sai unang paingotingot angka dosa ni haposoonnami dohot pangalaosionnami; sai ingot ma hami hombar tu asi ni rohaM dohot denggan ni basaM ala ni GoarMu. Ale Tuhan Jesus, marpamuati ma rohaM di dosanami na godang i! Amen.

(organ angonangon mangendehon BE. No.183 BL 105 G=Do)

U:    Tabege ma hata bagabaga tariongot tu hasesaan ni dosa. Songon on do Hata ni Jahowa: Unang ho mabiar, ai Ahu do Siluluhon ho; nunga pola hujou goarmu, Ahu nampuna ho. Hasangapon ma di Debata na di ginjang.

R :       Amen. (Hundul)

7.   Koor:

8.   Marende BE. No. 104: 1-2  Bongoti ma rohangku BL.155   F=Do

1.       O Pangapul na lumobi, Tondi ni Tuhan i, rohangkon bongoti.

Diparbaga Tuhannami, ingkon Ho do na ro mangajari hami.

2.      Ndang adong huboto hami na denggan, na torang, sian dirinami.

Ingkon Ho do manondangi roha ni jolma i, jala manorangi.

9.   Manjaha Turpuk Epistel Hesekiel 11: 19-20

U:   Tabege ma Hata ni Debata turpuk ni ari Pesta Paduahon Ari Haroro ni Tondi Parbadia sadari on sian Hesekiel 11: 19-20.  Jadi lehononku ma tu nasida roha sisangunjur, jala suanhononku tondi na imbaru tu bagasan ateatenasida, jala paholangonku ma roha batu sian dagingnasida, jala lehononku ma tu nasida roha sibuk.

R:      Asa diihuthon nasida angka patikku, jala diradoti angka uhumhu, jala diulahon, jadi gabe bangsongku ma nasida, jala ahu gabe Debatanasida.

U: I ma sahatna. Martua do na tumangihon Hata ni Debata jala na umpeopsa.

R:      Amen.

10. Koor:

11. Marende BE. 358: 1-2 Hamu saluhut hareajaon BL.194 As=Do

1.       Hamu saluhut harajaon, marolopolop ma hamu.

Endehon ma hamuliaon ni goar ni Debatamu.

Tu Debata ma dok hamuna, na songkal do pambaenanMi;

Ai musuMi pe saluhutna marsomba do di joloMi.

………….Jongjong…………

2.      Tu Ho, o Tuhan do marsomba muse sandok portibi on.

GoarMu do endehononna, pasangaponna Ho tongtong.

Ro ma hamu saluhut jolma marnida pambahenan ni,

Jahowa na sai marmulia di nasa manisia i.

                   

12. Manghatindanghon Haporseaon

L:   Rap ma hita manghatindanghon haporseaonta i songon panghatindanghonon ni donganta sahaporseaon di sandok portibi on, rap ma hita mandok.

H: Ahu porsea ...                                                        (Hundul)

13. Koor :

14. Boaboa

15. Marende BE. No. 102: 1...  O Tondi Parbadia, bongoti Bl. 206 Es=Do (Pelean 1a +1b)

1.       O Tondi Porbadia i bongoti rohanami be,

Ro sipatiur roha. O sondang sain surgo i

Sondangi rohanami be, tu halalas ni roha.

Asa masa patupahon pinodahon ni hataMu,

Sai tu hami ma rohaMu.

2.      Ho do silehon roha i di nasa na porsea i,

Tumpahi rohanami. Patogu rohanami be,

Pasar hataM tu sasude, sai tong dongani hami.

On pe, sude parrohaon, hatuaon lehononMu,

Sipujion do goarMu.

………….Musik…………

3.      Sai pargogoi ma hami on mangihutihut hataMon

Di pardalanannami. Haporseaonnami pe tambai

Tung masa aha pe, na bernit taononnami.

Tatap, tatap sude hami, rohanami pasonanghon;

Hajolmaon hamonanghon.

4.      Sungguli hami on sude, huhut paburju hami be

Mangalo dosanami. Papir ma tondinami on,

Papos ma rohanami on di paraloannami.

Gohi, gohi rohanami asa hami mambolongkon,

Losok dohot halembaon.

………….Musik…………

5.      Ho batu mamak na togu na tau ojahan situtu

aojak rohanami tu hata hasintongan i.

Tung unang olo lilu be nang sada sian hami.

Lehon roha na tumogu, na umburju manggoari

Jesus Kristus Tuhannami.

16. Jamita: Johannes 14: 15-21

17. Marende No. 105: 1… Ro ma Tondi Parbadia BL 86 G=Do

      (Pelean tu Diakoni Pusat) 

                 

1.         Ro ma Tondi Porbadia Debatangku situtu.

Rohanami ma paria mangoloi hataM burju.

Sai sondangi ma tongtong rohanami na holom.

2.        Lehon ma di rohanami hapistaran na sintong.

Asa tung huboto hami marparange di joloM.

Sian haliluon pe sai palua hami be.

………….Musik…………

3.        Patuduhon ma di hami dalan hangoluan i.

Paimbaru rohanami sai padao ma dosa i.

Pargogoi ma hami be tu na denggan sasude.

4.        Pabotohon ma tu hami na hinatindanghonMi.

Anak ni Debata hami na marhaojahan

Di mudar niusehon ni Anak ni Debata i.

………….Musik…………

5.        Molo marsitaonon hami jala marniae disi.

Unang ale Tuhannami padaoonMu bohiMi.

Lehon apulapulMi tu bagasan rohangki.

6.      Di na jumpang ajalnami pabotohon ma torang.

Denggan ni basaM tu hami asa hami saut monang.

Lao manjalo tumpal i na so olo malos be.

    18. TANGIANG PELEAN–PANGUJUNGI-ALE AMANAMI

   

      U:     Tatangianghon ma peleanta. Ale Debata Amanami na di banuaginjang, Ho do haroroan ni saluhut silehonlehon na denggan dohot nasa uli basa na mauliutus. Hupasahat hami sian na nilehonMi tu hami, peleannami tu Ho. Sai jalo ma i gabe uap na hushus di JoloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM  dohot  di portibi on. Buhai  ma rohanami marhitehite  tondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami Amen.

     H:      (mangendehon) SDJ. No. 848: 1 Di son adong huboan Tuhan F=Do

                        Dison adong huboan Tuhan parbue ni ngolungku na so tardok nian. Sadia ma argana Tuhan molo sai nirajuman sude denggan basaM? Jalo ma Tuhan, sai las ma roham.

     U :     Dung tajalo tondi Parbadia Pangondian i. Nuaeng marpadan ma hita di jolo ni Tuhan i laho mangundukhon na patut sibahenonta songon tanda ni pangoloion dohot haradeonta manghatindanghon dohot mamaritahon haheheonNa i. Tanda ni haporseaonta di hamonanganNa i, taulahon hataNa:

     H :            “Alealengku ma hamuna, molo diula hamu na hupatikkon i tu hamu”.

     U:        Manghatindanghon Ibana, i do parbue ni haporseaon dohot haradeon manjangkon Kristus. Panindangionta di Ibana, pataridahononta marhite parange na denggan. Antong borhat ma hita mamarangehon Hata i, tapasahat ma sondang hatiuron i tu tongatonga ni portibi on.

     H :          (mangendehon:) SDJ. No. 720: 1 Naeng marsinondang F=Do

                        Naeng marsinondang ngolungku diigil Jesus i, manang didia pe ahu tongtong huingot i. Tiur marsinondang i do niigil ni Jesus tongtong marsinondang panondang do au tutu.

     U :     Ale Amanami na di banua ginjang, Sai pinarbadia ma GoarMu, sai ro ma harajaonMu, sai saut ma lomo ni rohaM di banua tonga on songon na  di  banua  ginjang. Lehon  ma  di  hami  sadarion  hangoluan siapari. Sesa ma dosanami songon panesanami di dosa ni dongan na mardosa tu hami. Unang hami togihon  tu pangunjunan palua ma hami sian pangago.

      H:         (mangendehon): Ai Ho do nampuna harajaon dohot hagogoon ro di hasangapon. Saleleng ni lelengna. Amen.

      U :    Dipasupasu jala diramoti Tuhan Debata ma ho ………