ACARA PESTA ARI PARNINGOTAN HANANAEK NI TUHAN JESUS KRISTUS HKBP PONDOK GEDE RESORT PONDOK GEDE DISTRIK XIX BEKASI

Tema:

JESUS ANAK NI DEBATA

NA MARHABANGSA DI BANUA GINJANG

(Heber 1: 5-13)

Kamis, 10 Mei 2018

Jl. Perumahan Taman Pondok Gede Blok H No.1-3

Pondok Gede RT 04 RW 01 Kelurahan Jatirahayu

Kecamatan Pondok Melati Kota Bekasi

Provinsi Jawa Barat,

Telp. (021) 8467284

1.   Pangaradeon (U = Uluan    H = Huria)

2.   Joujou tu Parsaoran dohot Debata

U:     Hamu angka dongan sahaporseaon di bagasan Goar ni Tuhan Jesus Kristus. Na marlas ni roha do hita sadari on mamestahon; Pesta Ari Parningotan di Hananaek ni Tuhanta Jesus Kristus.

H:     I do tutu, tama do marlas ni roha hita ala diloas Tuhanta dope hita sadari on, laho manghalashon Pesta Ari Parningotan di Hananaek ni Tuhanta tu banua ginjang.

U:     Pesta na balga do parningotan sadari on di hita, ai marhite parningotan on naeng tangkas jala hantus di hita, ia Tuhanta Jesus Kristus naung mate jala hehe sian hamatean i, ndang hot di portibi on. Alai mulak do Ibana tu inganan haroroanNa hian, i ma di banua ginjang, surgo na hot ro di salelenglelengna. Nunga disi Ibana hundul di siamun ni Debata Jahowa AmaNa i.

H:     Ulina i parningotan on, di hita. Antong dia ma nuaeng pardomuan ni i dohot hita na mangolu di partingkian on?

U:     Mansai godang do pardomuan ni Hananaek ni Tuhan Jesus i, tu ngolu ni angka na porsea, alai apala na rumingkot, i ma nunga diparade Ibana inganan na hot di hita di surgo hasonangan, sambulo ni tondinta. Tusi ma hita lam masihol, jala unang tarlalap hita di ngolunta sinuaeng on, manang pogos pe hita so mardihadiha, manang panangkarnangkar di hasiangan on, manang mamora, paradongan huhut na sangap di hajolmaon, na hipas, na marsahit, manang na beha pe ngolunta, ingkon tu Ibana do pasahatonta i luhutna. Antong, hobas ma hita disi.

H:     Hobas do rohanami mandapothon Ho Tuhan, sai pargogoi ma hami, unang adong hami na lalap holan manarihon ngolu portibi on, so marningot hangoluan sogot. Ale Tuhan, parade ma di hami hangoluan sogot i, asa parjambar hami di upa ni panghophopMi.

U:     Unang be ganggu rohanta, ai nunga dibagabagahon Tuhanta Jesus Kristus i, di na nidokNa: Manang ise na tumangihon hatangKi jala na porsea di na marsuru Ahu, nunga sahat ibana tu hangoluan na saleleng ni lelengna, ndang pola be ibana tu paruhuman, nunga taripar ibana sian hamatean tu hangoluan. Antong pos ma rohanta disi, sai na saut do tu hita nahinirim ni rohanta be. Tapuji ma Tuhanta. Marende ma hita!

  

3.   Marende BE. No. 99: 1-3 O Ulubalang na gogo BL. 206 Es=Do

1.   O Ulubalang na gogo songon sadari on do Ho, manaek tu hasangapon.

Naung sidung do ulaonMi, na ringkot patupaonMi, humophop hajolmaon.

Sabam, tongam, do Ho muli tu na uli marhabangsa, di siamun ni Jahowa.

2.   Marloksaloksa Serapim, marriburibu Kerubim, mamuji Ho na monang.

Dibaen naung pinadomuMi, saluhut manisia i, tu Debata di ginjang.

Puji, puji, Jesus Kristus naung patulus, saluhutna. Tinonahon ni AmaNa.

……………. Jongjong…………….

3.   O Jesus Ho do ulu ni, luhutna na porsea i, ruasMu anggo hami.

Ho hangoluannami on, Ho hasonangannami on, Ho hagogoonnami.

Suru, togu, rohanami, asa hami mangalehon, tu Ho nasa hasangapon.

4.  Votum – Introitus – Tangiang

U:     Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia natumompa langit dohot tano on. Amen. Nunga didok Jahowa mandok Tuhanku: Hundul ma Ho di siamunHon, paima hubahen angka musuM sidegedegean ni patMu. Marrongoman bangsoM ro sian lomona di ari parporanganMu, marpahean habadiaon; songon nambur sian ampuan ni andos torang ro do tu Ho paranganMu angka na umposo. Nunga pola maruari Jahowa, jala ndang tagamon solsolanNa rohaNa: Sai Ho do malim ro di salelenglelengna mangihuthon horong ni si Melkisedek. Sai patimbul ma diriM, ale Debata, tu atas ni langit hamuliaonMu tu sandok tano on. Haleluya!

H:     (Mangendehon:) Haleluya, haleluya, haleluya.

U:     (Martangiang ma hita:) Ale Tuhan Jesus Kristus, Anak ni Natumimbul i, naung manaek tu banua ginjang jala hundul tu siamun ni Debata! Sai suru ma Tondi Parbadia tu rohanami, asa Ibana tongtong mangajari rohanami. Lehon tu hami parhalado na burju tu HataM, pargogoi ma nasida, asa tongtong diradoti nasida ulaonna jala asa marsahala nasida mangalo bisuk ni sibolis i, asa tung rarat harajaonMu di hasiangan on, paima sude musuM peak di toru ni patMu. Sai pamonang ma hami saluhutna manaluhon dosa dohot hamatean marhitehite Ho, ai Ho do na mangolu dohot na manggomgomi rap dohot Ama i dohot Tondi Parbadia. Amen. (Hundul)

5.  Marende BE. No. 11: 1+5 Aha ma endehononku BL. 185 As=Do

1.    Aha ma endehonongku, asa pujionku Ho,

Ale Tuhan Debatangku, sai urupi au gogo.

Ai ndang tarpajojor ahu, asi ni rohaM di ahu.

Ala ni hupuji Ho, tung marribu hali do.

5.    Sai patogu ma rohangku, pasangaphon goarMi,

Dohot haporseaonku, asa tu gandana i.

Sai pamasuk ale Tuhan, tondingki tu hangoluan,

Mangendehon sangapMi salelenglelengna i.

6.  P a t i k : Pangungkapon 11: 15

U:        Tangihon hamu ma Patik ni Debata! Sian buku Pangungkapon 11: 15. Dung i dipalu surusuruan na papituhon ma sarunena; jadi masa ma soara na gogo di banua ginjang, angka dipandok:

H:        Nunga sahat tu Tuhanta i dohot tu KristusNa i harajaon ni hasiangan on; bangkit Raja ma Ibana ro di salelenglelengna!

U:        Antong rap mangido gogo ma hita laho mangulahon PatikNa.

U/H:   Ale Tuhan Debata sai pargogo i ma hami, mangulahon na hombar tu PatikMi. Amen.

7.   K o o r:       Pukul 06.00 WIB:     Wijk 2

                            Pukul 09.00 WIB:     Immanen

8.   Marende BE. No. 178: 3-4 Ro ma tu Jesus BL. 196 C=Bes

         3.   Ro ma tu Jesus hatop ho ro, ai so ditulak Jesus be ho.

Na asi roha do Jesus i, sai pos ma rohami.

Mansai las rohanta i muse. molo ias sian dosa pe.

Sai ro ma hita  tu surgo i, laos sonang ma disi.

……………. Jongjong…………….

      4.      Ro ma tu Jesus na holong do, rohaNa i di halak na ro.

Ai dipalua tondinta i, unang be mago i.

Mansai las rohanta i muse, molo ias sian dosa pe.

Sai ro ma hita  tu surgo i, laos sonang ma disi.

9.   Manopoti dosa

U:     Tatopoti ma dosanta! Ale Tuhan Debata, na badia jala na bonar. Parasi jala partalup ni roha jala na basar do Ho! Sai marpangulahi ma rohaM mida hami. Dibahen i sai sesa ma sude dosanami!

H:     (Mangendehon SDJ. 683: 1 Di adopanMu Jesus) Es=Do

         Di adopanMu Jesus lea tutu do diringkon.

         Dibaen godang ni dosangkon, di adopanMu Jesus.

U:     Ndang adong na hupangasahon hami dungkon ni asi ni rohaM;

H.     (Mangendehon SDJ. No.683: 2 Di adopanMu Jesus) Es=Do

         Di adopanMu Jesus, marsomba au huhut tungki.

         Lao manopoti dosangki, di adopanMu Jesus.

U:     Hatigoran na pinatupa ni AnakMu do na hupangasahon hami tu joloM.

H:     (Mangendehon SDJ. No.683: 4 Di adopanMu Jesus) Es=Do

         Di adopanMu Jesus taruli au di asiMi.

         Tu Ho ma sahat diringki, di adopanMu Jesus.

U:     Dibahen i pasonang jala apuli ma hami angka na hinophop ni Tuhan Jesus Kristus, Tuhannami. Amen.

H:     (Mangendehon SDJ. No.683: 3 Di adopanMu Jesus) Es=Do

         Di adopanMu Jesus, tarsolsol bagi rohangkon.

         Muba ma au tu jolo on, di adopanMu Jesus.

H:     Tabege ma hata bagabaga taringot tu hasesaan ni dosa. Satongkin do hutadingkon ho, alai papungupunguonHu ma ho muse marhitehite angka asi ni roha godang! Tagan di parpiar ni murukHu hutabunihon bohingKu satongkin maradophon ho, alai marhitehite denggan basa salelenglelengna asianHu ho, ninna Jahowa Sipalua ho. Hasangapon ma di Debata na di ginjang!

U/H: Amen. (Hundul)

10.   K o o r:    Pukul 06.00 WIB:     Jeriko

                            Pukul 09.00 WIB :    Wijk 1                                            

11.  Marende BE. No. 100: 1-2  Mardongan olopolop manaek Tuhanta i

         BL. 155 F=Do

1.   Mardongan olopolop, manaek Tuhanta i,

Jinangkon ni na torop, surusuruan i.

Antong nang hita pe, tapuji ma Tuhanta,

Marendeende hita, marolopolop be.

2.   Na mulak do Tuhanta, tu habangsaNa i.

Tu lambung ni AmaNa, di siamunNa i.

Disomba sasude, na di banua ginjang.

Tuhanta i na monang, ro sian tano i.

12.  E p i s t e l: Psalmen 110: 1-7

U:     Tabege ma Hata ni Debata turpuk ni Pesta Ari Parningotan Hananaek ni Tuhan Jesus sadari on. Sian Psalmen 110: 1-7 Nunga didok Jahowa mandok Tuhanku: Hundul ma Ho tu siamunhon, paima hubahen angka musum sidegedegean ni patmu.

H:     Tongoson ni Jahowa ma sian Sion tungkot harajaon ni huasomi; antong mangarajai ma Ho di tongatonga ni musum!

U:     Marrongoman bangsom ro sian lomona di ari parporanganmu marpangkean habadiaon, sian ampuan ni andostorang ro do tu Ho nambur ni paranganmu angka na bajar.

H:     Nunga pola maruari Jahowa, jala ndang tagamon solsolanna bagina: Sai Ho do malim ro di salelenglelengna mangihuthon horong ni si Melkisedek.

U:     Tuhan i do di siamunmu, Ibana mangalengsehon angka raja di ari panombo ni rimasna.

H:     Ibana mandabu uhum di tongatonga ni angka parbegu, Ibana mambahen gok angka bangke; Ibana do mangarosak ulu di tano adaran bidang.

U:     Inumonna ma sian sunge di dalan, ala ni patimbulonna ma muse uluna. I do sahatna. Martua  do  angka  natumangihon  hata ni Debata jala naumpeopsa.

U/H:             Amen.

13.  K o o r :    Pukul 06.00 WIB:               Ama

                            Pukul 09.00 WIB:               Ina Hanna

14.  Marende BE. No. 97: 1-2 Ingoton ma sadari on HBL. 129 F=Do

1.   Ingoton ma sadari on, panaek ni Tuhan Jesus.

Tu habangsaNa na tongtong, na so tarbaen be meret.

Tasomba ma Tuhanta i, naung mulak tu Amana i,

Tapuji ma Ibana.

……………. Jongjong…………….

Ai nunga mungkap dalan i, di angka na porsea.

Lao mamongoti surgo i, malua sian jea.

Naung mangonai tu sasude, na mangulahon dosa i,

Pinuji ma Tuhanta.

15.  Manghatindanghon Haporseaon

U:     Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

H:     Ahu porsea di Debata Jahowa… (hundul)

16.  Pukul 09.00 WIB:  Parompuan

17.  Sunggulsunggul

18.  Marende BE. No. 98: 1…Naung manaek do Ho BL.59 As=Do (Pel. I-II)

1.   Naung manaek do Ho, lao tu surgo do.

Ale Jesus Rajanami, Ho do ihuthononnami,

Ho partogi i, lao tu surgo i.

………. Musik ……….

2.   Maol do dalan on, togu hami on.

Asa tung malua hami, sian angka musunami,

Na di tano on, togu hami on.

………. Musik ……….

3.   Suru ma TondiM, singkat ni bohiM.

Tu bagasan rohanami, manogihon tondinami,

Lao tu surgo i, tu adopanMi.

………. Musik ……….

19.  J a m i t a :  Heber 1: 5-13

20.  Marende BE. No. 101: 1…  Taiti gogo ihut tu Ho BL.27 Bes=Do

(Pelean tu Ulaon Pengembangan Masyarakat)

1.      Taiti gogo ihut tu Ho, palungun rohanami.

                Tu surgo i ingananMi, o Jesus Tuhannami.

2.      Togu tongtong, ma hami on. Di dalanMi tu surgo.

                Anggo so i, oloanMi. Sai saut do hami mago.

………. Musik ……….

3.      Alai tahe suraon be, so oloanMu hami.

                PinorsanMi do dosa i. Lao paluahon hami.

4.      Dibahen i, o Jesuski, sai naeng ihuthononku.

                Do hataMi, nang langkaMi, saleleng au mangolu.

………. Musik ……….

5.      Taiti gogo ihut tu Ho, au tu banua ginjang.

                Asa disi pujionki, denggan basaM o Tuhan.

21. Tangiang Panutup  (Jongjong)

U:     Tatangianghon ma Peleanta: Ale Debata Amanami na di banuaginjang, Ho do haroroan ni saluhut silehonlehon na denggan dohot nasa uli basa na mauliutus. Hupasahat hami sian na nilehonMi tu hami, pelean nami tu Ho. Sai jalo ma i gabe uap na hushus di JoloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite tondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

H :    (mangendehon) BE. No. 14: 2 Puji hamu Jahowa tutu BL.57 Bes=Do

2.       Ingot tongtong ale tondingkon,

Sude na denggan na dipasonggop Debata tu ho.

Denggan basaNa do, na pangoluhon ho.

U :    Ale Tuhan Debata, Jahowa na manompa, na mamasumasu, na paluahon jala na mangaramoti ngolunami. Marsangap ma goarMu di tongatonga ni hajolmaon, jala lam rarat ma barita ni hamuliaonMu sahat ro di ujung ni portibi on.

H:    Mauliate  ma rohanami di saluhut denggan ni basaM.

U:   Nunga dilehon Ho AnakMu Tuhan Jesus Kristus laho paluahon, jala padamehon  jolma  manisia dohot Ho Debatanami. Asi ma rohaM, sai lam marurat jala marparbue ma dameMi di bagasan ngolunami. DameMi ma na  mangarajai roha dohot pusupusunami. Asa mardame hami tu saluhut jolma.

H:   DameMi ma na mangarajai keluarga dohot  bagasnami.

U:     Lam rarat ma harajaonMu di sandok portibi on, marsangap ma tongtong goarMu, olat ni on ro di salelenglelengna. Amen.

H:     (mangendehon:) BE. No.204: 2 Ndang tadinghononhu Ho BL. 73.

2.       Nasa na nilehonMi, tondi ro di pamatanghu.

Hosa dohot gogongki, ro di saluhut artangku.

Hupasahat i tu Ho, naso unsatonku do.

U+H:      Ale Amanami na di  banua ginjang. Sai pinarbadia ma goarMu.......

H:     (mangendehon:) Ai Ho do nampuna harajaon, dohot hagogoon......

U:     Dipasupasu jala diramoti Tuhan Debata ma ho…

H:     (mangendehon:)   Amen, amen, amen.