ACARA PESTA ARI PARNINGOTAN HANANAEK NI TUHAN JESUS KRISTUS HKBP RESORT PONDOK GEDE

ACARA 

PESTA ARI PARNINGOTAN

HANANAEK NI TUHAN JESUS KRISTUS

HKBP RESORT PONDOK GEDE

          

Tema :

KRISTUS MANGGOHI SALUHUTNA

(Epesus 1: 15-23)

Kamis, 5 Mei 2016

Jl. Perumahan Taman Pondok Gede Blok H No.1-3

Pondok Gede RT 04 RW 01 Kelurahan Jatirahayu

Kecamatan Pondok Melati Kota Bekasi

Provinsi Jawa Barat,

Telp. (021) 8467284

1.   Pangaradeon (U = Uluan   H = Huria)

2.   Joujou tu Parsaoran dohot Debata

U:   Hamu angka dongan sahaporseaon di bagasan Goar ni Tuhan Jesus Kristus. Na marlas ni roha do hita sadarion mamestahon; Pesta Parningotan di Hananaek ni Tuhanta Jesus Kristus.

H:   Ido tutu, tama do marlas ni roha hita ala di loas Tuhanta dope hita sadari on laho manghalashon Pesta Parningotan di Hananaek ni Tuhanta tu banua ginjang.

U:   Pesta na balga do Parningotan sadarion di hita, ai marhite parningotan on naeng tangkas jala hantus di hita, ia Tuhanta Jesus Kristus naung mate jala hehe sian hamatean i, ndang hot di portibi on. Alai mulak do Ibana tu inganan haroroanNa hian, i ma di Banua Ginjang, Surgo na hot ro di salelenglelengna. Nunga disi Ibana hundul di siamun ni Debata Jahowa AmaNa i.

H:   Ulina i parningotan on, di hita. Antong dia ma nuaeng pardomuan ni i dohot hita na mangolu di partingki on?

U:   Mansai godang do pardomuan ni Hananaek ni Tuhan Jesus i, tu ngolu ni angka naporsea, alai apala na rumingkot i ma nunga diparade Ibana inganan na hot di hita di surgo hasonangan, sambulo ni tondinta. Tusi ma hita lam masihol, jala so tung unang tarlalap hita di ngolunta sinuaeng on, manang pogos pe hita so mardihadiha, manang panangkarnangkar di hasiangan on, manang mamora paradongan huhut na sangap di hajolmaon, na hipas, na marsahit, manang na beha pe ngolunta, ingkon tu Ibana do pasahatonta i luhutna. Antong, hobas ma hita disi.

H:   Hobas do rohanami mandapothon Ho Tuhan, sai pargogo i ma hami, unang adong na lalap holan manarihon ngolu portibion so marningot hangoluan sogot. Ale Tuhan, parade ma di hami hangoluan sogot i asa parjambar hami di upa ni panghophopMu.

U:   Unang be ganggu rohanta, ai nunga di bagabagahon Tuhanta Jesus Kristus i, di nanidokNa: Manang ise na tumangihon hatangKi jala na porsea di na marsuru Ahu, nunga sahat ibana tu hangoluan na saleleng ni lelengna, ndang pola be ibana tu paruhuman, nunga taripar ibana sian hamatean tu hangoluan. Antong pos ma rohanta disi, sai na saut do tu hita nahinirim ni rohanta be. Tapuji ma Tuhanta. Marende ma hita!

3.   Marende BE. No. 101: 1-2+4 Taiti gogo ihut tu Ho BL. 27 Bes=Do

1. Taiti gogo ihut tu Ho palungun rohanami

                  Tu surgo i ingananMi o Jesus Tuhannami.

2. Togu tongtong ma hami on di dalanMi tu surgo .

                  Anggo so i oloanMi sai saut do hami mago

……………. Jongjong…………….

4. Dibahen i, o Jesuski sai naeng ihuthononku

                  Do hataMi, nang langkaMi saleleng au mangolu

4.  Votum – Introitus – Tangiang

U:   Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia natumompa langit dohot tano on. Amen. Songon on do didok Tuhan i: “BahenonKu do sogot na monang i rap dohot Ahu hundul di habangsangKi, songon Ahu na monang i jala hundul rap dohot Damang di habangsaNa i.” (Pangk. 3: 21). Haleluya!

H:   (Mangendehon) Haleluya, haleluya, haleluya.

U:   (Martangiang ma hita): Ale Tuhan Debata, Pargogo na so hatudosan! Sai pargogoi ma hami manghaporseai AnakMu na sasada i, Sipangolu hami, na manaek tu surgo, asa huparrohahon hami roha banua ginjang marhitehite Anak haholongan ni rohaM, Tuhan Jesus Kristus, Tuhannami. Amen. ……………. Hundul …………….

5.  Marende SDJ. No. 638: 1-2 Patimbul Tuhan i  D=Do

1.       Patimbul Tuhan i, di habangsaNa i.Marhasak baen soarami mamuji Tuhan i.Endehon ma rajaM,sian sandok roham.Naung mate ala ni dosam, oloi ma Debatam.

2. Patimbul Anak i, naung gabe jolma i. Na mangantusi arsakmi na pangoluhon i.Dijangkon hita be, gabe jambarNa i.Asa sonang hita muse, di adopanNa i.

6.  P a t i k : Patik Parjolo dohot Lapatanna

U:    Tangihon hamu ma Patik ni Debata! Patik Parjolo: Ahu do Jahowa Debatam, ninna Debatanta. Ndang jadi marangkup Ahu bahenonmu Debatam. Dia do lapatani i?

H:   On do: Ingkon umbiar rohanta jala humolong jala umpos mida Debata asa mida nasa na adong.

U:    Antong rap mangido gogo ma hita laho mangulahon PatikNa.

U/H:  Ale Tuhan Debata sai pargogo i ma hami, mangulahon na hombar tu PatikMi. Amen.

7.   K o o r:    Pukul 06.00 WIB: Parompuan

                     Pukul 09.00 WIB: Ama

8.   Marende BE. No. 267: 1+3 O Tuhan sulingkit ma au BL. 100 C=Do

1. O Tuhan  sulingkit ma au, sondangi rohangku tangkas.

           Gogongku soada di au, tu Ho au paringgas

           Tu Ho au padonok, di Ho nama au

            Tu Ho au paringgas, tu Ho au padonok di Ho nama au.

……………. Jongjong…………….

3. Sude hupasahat tu Ho, ai Ho nampunasa hian.

            Tongtong au marguru tu Ho, ai Ho ale Jesus

           Sihophop sudena, nampuna au on

            Ai Ho ale Jesus, sihophop sudena nampuna au on.

9.   Manopoti dosa

U:    Tatopoti ma dosanta! Ale Tuhan Debata, Pargogo na so hatudosan, Parasi roha na sumurung, Ama ni Tuhan Jesus Kristus Sipangolu hami! Hami, halak pardosa na dangol on ro tu jolo ni habangsa habadiaonMi manopoti jala manganggukhon dosanami.

H:   (Mangendehon SDJ. 683: 1) Es=Do

       Di adopanMu Jesus lea tutu do diringkon.Dibaen godang ni dosangkon di adopanMu Jesus.

U:    Mansai jotjot huarsahi hami Ho marhitehite pingkiran dohot hata dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami; nang dongannami, ndang doshon dirinami hubahen hami.

H.    (Mangendehon SDJ. No.683: 2)

       Di adopanMu Jesus, marsomba au huhut tungki.Lao manopoti dosangki, diadopanMu Jesus.

U:    Dibahen i tama do rimasanMu jala uhumanMu hami tu hamatean saleleng ni lelengna i. Alai na maporus ma hami nuaeng tu asi ni rohaM na godang i mangido sian nasa rohanami hasesaan ni dosanami saluhutna.

H:   (Mangendehon SDJ. No.683: 4)

       Di adopanMu Jesus taruli au di asiMi.Tu Ho ma sahat diringki, di adopanMu Jesus.

U:    Sai urupi ma hami paubahon rohanami ala ni Tuhan Jesus Kristus. Anak haholongan ni RohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on! Amen.

H:   (Mangendehon SDJ. No.683: 3)

       Di adopanMu Jesus, tarsolsol bagi rohangkon.

       Muba ma au tu jolo on, di adopanMu Jesus.

H:    Amen! Tabege ma hata bagabaga taringot tu hasesaan ni dosa. Songon on do Hata ni Jahowa: Unang ho mabiar, ai Ahu do Siluluhon ho; nunga pola hujou goarmu, Ahu nampuna ho. (Jes. 43, 1). Hasangapon ma di Debata na di ginjang!

U/H:  Amen. ……………. Hundul …………….

10.   K o o r : Pukul 06.00 WIB : Wijk II

                     Pukul 09.00 WIB : Ina Hanna                          

                                                           

11.   Marende BE. No. 441: 1-2  Dia au Tuhan Jesus BL. 297 G=Do

1. Di  au  Tuhan Jesus,  na salpu do sudena, na dok dok, nang uhum tu au.

Ringkot do rohangku marhatopothon,

Jesusku,  Tuhanku, di tobus Ho au,

Disesa Tuhanku, do angka dosangku.

Nang ho, ale dongan, di tobus nang ho.

2. Di au do damena, na sonang do rohangku.

Mangolu, nang mate, di Jesus au on.

Di ribur ni tano, nang las ni roha,

Ndang dapot damena, rumur rohangku.

Disesa………….

12.  E p i s t e l : Psalmen 47: 2-10

U:    Tabege ma Hata ni Debata turpuk ni ari Pesta Parningotan Ari Hananaek ni Tuhan Jesus on. Sian Psalmen 47: 2-10: Martopaptopap tangan ma sude hamu angka bangso! Puji hamu ma Debata mardongan soara olopolop!

H:   Ai Jahowa do na tumimbul, na songkal, Raja bolon do Ibana gumomgom liat portibi on.

U:    Papatuonna do angka bangso tu hita dohot angka marga tu toru ni patta.

H:   Ibana do mamillit di hita pargolatanta, hatimbulon ni si Jakkob, na hinaholonganna i.

U:    Manaek do Debata mardongan parolopolopon, Jahowa mardongan soara ni sarune.

H:   Sai endehon hamu ma Debata! Sai endehon hamu ma Rajanta i! Endehon ma tutu!

U:    Ai Debata do Raja ni liat portibi on, endehon hamu ma ende sipodaon.

H:   Debata do mangarajai angka parbegu, hundul do Debata di atas habangsa habadiaonna i.

U:    Marpungu do angka na sangap ni angka bangso tu bangso ni Debata ni si Abraham, ai Debata do nampuna angka lombulombu raja ni tano on, timbul situtu Ibana. I do sahatna. Martua  do  angka  natumangihon  hata ni Debata jala naumpeopsa.

U/H:  Amen.

13.  K o o r :  Pukul 06.00 WIB: Jericho        

                      Pukul 09.00 WIB: Wijk I

14.  Marende BE. No. 99: 1-2 O Ulubalang na gogo HBL. 206 Es=Do

1.  O ulubalang na gogo songon sadari on do Ho manaek tu hasangapon

     Naung sidung do ulaonMi na ringkot patupaonMi

Humophop hajolmaon.  Sabam, tongam do Ho muli tu na uli Marhabangsa di siamun ni Jahowa.

……………. Jongjong…………….

2.  Marloksaloksa Serapim marriburibu Kerubim mamuji Ho na monang

     Dibaen naung pinadomuMi saluhut manisia i tu Debata di ginjang

     Puji, puji Jesus Kristus naung patulus saluhutna tinonahon ni AmaNa.

15.  Manghatindanghon Haporseaon

U:    Tahatindangkon ma haporseaonta i, songon na hinatindangkon ni donganta sahaporseaon di sandok portibi on. Rap ma hita mandok:

H:   Ahu porsea di Debata Jahowa… …………hundul ……………..

16.  Pukul 09.00 WIB:  Rogate

17.  Sunggulsunggul

18.  Marende BE. No. 97: 1…Ingoton ma Sadarion BL.129 F=Do (Pel.I-II)

1.  Ingoton ma sadari on parnaek ni Tuhan Jesus

     Tu habangsaNa na tongtong  na so tarbaen be meret

     Tasomba  ma Tuhanta i naung mulak tu Amana i tapuji ma Ibana

2.  Ai nunga mungkap dalan i di angka na porsea

      Lao mamongoti surgo i malua sian jea

      Naung mangonai tu sasude na mangulahon dosa i pinuji ma Tuhanta.

……………. organ…………….

3.   Ianggo las roham tutu di Jesus i Tuhanta

      Pauba ma roham burju ihuthon ma Ibana oloi hataNa sasude

      Sai tiru pambaenanNa pe saleleng ho mangolu

4.   Ai mulak do Tuhanta i di ari paruhuman

      Sai dabuonNa do disi sude parhajahaton

      Tu api na so mintop i alai haholonganNa i tu surgo bahenonNa.

……………. organ…………….

5.   O Jesus, Tuhannami on asi rohaM di hami.

      Sai tatap hami na di son di paraloannami

      Patogu hami sasude tumpahi hami monang be ro di ujungna sogot

19.  J a m i t a  Epesus 1: 15-23

20.  Marende SDJ. No. 636: 1 …  Jesus do Raja Bolon i D=Do

(Pelean tu Ulaon Pengembangan Masyarakat)

1.       Jesus do Raja bolon i. Sigomgom nasa na adong

Hot do harajaonna i, nang pe marujung tano on.

2.       Tangiang nang pujian i manaek tu habangsaNa i

Mansai hushus goarNa i binahen ni pelean i

……………. Organ…………….

3.       Saluhut manisia i mian do di holongNa i

Soara ni dakdanak i maghatindanghon sangap nii.

4.       Gok do asi ni roha i diharajaonNa na hot.

Malua na tarhurung i malua sian rante i.

……………. Organ…………….

5.       O na tinompa hehe ma pasangap ma Rajanta i

Suruan pe marende ma baen sangap di na monang i.

21. Tangiang Panutup (Jongjong)

U:    Tatangianghon ma Peleanta: Ale Debata Amanami na di banuaginjang, Ho do haroroan ni saluhut silehonlehon na denggan dohot nasa uli basa na mauliutus. Hupasahat hami sian na nilehonMi tu hami, pelean nami tu Ho. Sai jalo ma i gabe uap na hushus di JoloM. Pasupasu ma i jala ramoti asa huparhaseang hami pelean on, patimbulhon harajaonMu di tongatonga ni HuriaM dohot di portibi on. Buhai ma rohanami marhitehite tondiM, asa lam hutanda hami godang ni silehonlehonMi tu hami, asa lam girgir hami mandok mauliate tu Ho, marhitehite Jesus Kristus Tuhannami. Amen.

H :   (mangendehon) BE. No. 14: 2 Puji Hamu Jahowa Tutu BL.57 Bes=Do

       Ingot tongtong ale tondingkon, sude na denggan na dipasonggop Debata tu ho.Denggan basaNa do na pangoluhon ho.

U :   Ale Tuhan Debata, Jahowa na manompa, na mamasumasu, na paluahon jala na mangaramoti ngolunami. Marsangap ma goarMu di tongatonga ni hajolmaon, jala lam rarat ma barita ni hamuliaonMu sahat ro di ujung ni portibi on.

H:    Mauliate  ma rohanami di saluhut denggan ni basaM.

U:   Nunga dilehon Ho AnakMu Tuhan Jesus Kristus laho paluahon, jala padamehon  jolma  manisia dohot Ho Debatanami. Asi ma rohaM, sai lam marurat jala marparbue ma dameMi di bagasan ngolunami. DameMi ma na  mangarajai roha dohot pusupusunami. Asa mardame hami tu saluhut jolma.

H :   DameMi  ma  na mangarajai keluarga dohot  bagasnami.

U:    Lam rarat ma harajaonMu  di sandok portibion, marsangap ma tongtong goarMu, olat ni on ro di salelenglelengna. Amen.

H:    (mangendehon) BE. No.204: 2 Ndang Tadinghononhu Ho BL. 73.

       Nasa na nilehonMi, tondi ro di pamatanghu. Hosa dohot gogongki,

       Ro di saluhut artangku. Hupasahat i tu Ho, naso unsatonku do.

U+H:   Ale Amanami na di  banua ginjang. Sai  pinarbadia ma goarMu.......

H:   (mangendehon) Ai Ho do nampuna harajaon, dohot hagogoon......

U:    Dipasupasu jala diramoti Tuhan Debata ma ho…

H:   (mangendehon)   Amen, amen, amen.